Onde sho mbɔsaka anto akina woho wawaɔsa Jehowa?
“Ne dia diatanelu diatukuyala lu dimba; . . . beke dia dimba dialamani pupu.”—1 KOR. 12:25.
1. Ngande wakatayaoke etena kakatɔtɔ mbala ka ntondo lo paradiso ka lo nyuma?
ETENA kakatatombe mbala ka ntondo oma lo andja wa kɔlɔ ɔnɛ ndo kakatatatɛ kakatana la ekambi waki Jehowa, ondo sho takangɛnangɛna dia mɛna ngandji ka la wangasanu tshɛ kele l’atei awɔ ndo woho wakananɛwɔ. Dionga sɔ tshikitana efula mɛtɛ la dionga di’awui wolo, dia lohetsho ndo di’ewanu diele la anto walɔmbwama oma le Satana! Takɔtɔ lo paradiso ka lo nyuma lɛnɛ ele ki ndo kâmɛ.—Is. 48:17, 18; 60:18; 65:25.
2. a) Kakɔna kakoka sɛngiya woho wɔsaso anto akina? b) Kakɔna kahombaso ntsha?
2 Koko lam’atete nshi, sho mbeyaka ndjotatɛ monga la kanyi ya kɔlɔ lo dikambo dia anangɛso l’ɔtɛ weso kema kokele. Eongelo kaso kele kema kokele mbeyaka tokonya dia nunya wandja w’anangɛso l’ɔtɛ wa sho mbika washo lo waonga awɔ wa lo nyuma tshɛ. Lo tshena pe, sho mbohɛka dia mbaɔsa woho wawaɔsa Jehowa. Naka taya la kanyi shɔ, kete ayoleka dimɛna sho mbidja yimba lo tokanyi taso ndo tiɔtɔnganyiya la kanyi ya Jehowa yokɛma hwe.—Etum. 33:13.
Woho wɔsa Jehowa anangɛso
3. Bible mbɛdikaka etshumanelo k’Akristo la ɛngɔ kakɔna?
3 Oko wofundamidiɔ lo 1 Koreto 12:2-26, ɔpɔstɔlɔ Paulo akɛdika etshumanelo k’Akristo w’akitami la demba diele la “beke efula.” Oko wotshikitanyi bɛkɛ dia demba lam’asadiɔ, ase etshumanelo tshikitana efula lo kɛnɛ kendana la waonga ndo la akoka awɔ. Koko Jehowa mbetawɔka woho ɔsɔ wotshikitanyi ekambi ande. Nde mbaokaka ngandji ndo mbaɔsaka la nɛmɔ lo ɔmɔmɔ. Ɔnkɔnɛ, Paulo ambotolaka nto ɔnɛ, ase etshumanelo “[w]alamani pupu.” Dui sɔ mbeyaka monga ponda mbɔtɔ lo yisho ya tɛdikɔ nɛ dia lonto laki anto akina kokaka tshikitana la laso.
4. Bonde kahombaso tshikitanya kanyi yele laso lo dikambo dia anangɛso?
4 Sho mbeyaka ndjonga ndo la nsaki ka mbika washo lo wɛɔdu w’anangɛso. Naka sho sala ngasɔ, kete tayonga oko onto loka sso paka lo hiole mɔtshi ya foto. Koko Jehowa lo wedi ande mendaka foto k’otondo. Sho mbeyaka ndjonga la kanyi ya mbika washo lo kɛnɛ kahatalange, koko Jehowa mɛnaka tshondo y’onto, mbidja ndo waonga ande w’ɛlɔlɔ tshɛ. Naka sho ndeka sala la wolo dia mbokoya Jehowa, kete tayokokaka kimanyiya efula dia ngandji ndo kâmɛ monga lo etshumanelo.—Ef. 4:1-3; 5:1, 2.
5. Lande na kele kema dimɛna nombosha anto akina?
5 Yeso akeyaka dimɛna dia anto wele kema kokele wekɔ mbala efula la mbekelo ka mɔnyɔlaka anyawɔ. Nde akasha dako nɛ ate: “Tanyolomboyake, kele watonyolomboyake.” (Mat. 7:1, Dyookaneelo dy’Oyooyo) Tolembete dia Yeso akate hwe ɔnɛ: “Tanyolomboyake.” Nde akeyaka dia ampokami ande efula wakashile monga la mbekelo ka nomboshaka anto akina. Onde kokaka monga ko ndo sho lawɔ taya la mbekelo kɛsɔ? Naka ɔsɔku, kete sho la dia sala la wolo dia mbokitshika, diaha sho nomboshama lo yoho ya kɔlɔ efula. Akɔna eso mɛtɛ dia sho nombosha onto lakalongola ɔkɛndɛ ɔmɔtshi oma le Jehowa kana mbuta ɔnɛ nde hahombe monga lo etshumanelo na? Ɔnangɛso ɔmɔtshi mbeyaka monga la wandja amɔtshi, ko naka Jehowa akawetawɔ, onde ayonga dimɛna sho mbotona? (Joa. 6:44) Onde mɛtɛ sho mbetawɔka dia Jehowa mbalɔmbɔla okongamelo ande ndo naka etshikitanu pombaka salema, kete nde ayowasala lo etena kakoka?—Adia Romo 14:1-4.
6. Ngande wɔsa Jehowa ekambi ande?
6 Dikoka dia diambo diele la Jehowa ele, nde kokaka mɛna le Okristo tshɛ woho w’onto wayondokoka koma etena kayondokoma kokele lo andja w’oyoyo. Nde mbeyaka nto ehamelo wa lo nyuma wambowoshila sala. Ɔnkɔnɛ, nde bu la shadiya kânga ɔtɔi ya mbika washo lo wɛɔdu wa lo demba wa ɔmɔmɔ wa l’atei awɔ. Lo Osambu 103:12, sho mbadiaka ɔnɛ: “Uku wanganyi ehutwelu la edjelu, mbatundutanganyiyaka ehedia asu etali.” Ande lowando lahombaso monga lalɔ l’ɔtɛ wa dikambo sɔ lee!—Osam. 130:3.
7. Wetshelo akɔna wakondjaso oma lo woho wakɔsaka Jehowa Davidi?
7 Lo Afundelo, sho mɛnaka dia Jehowa ekɔ la dikoka dia diambo dia mbika washo lo waonga w’ɛlɔlɔ wele la onto. Nzambi akelɛ Davidi ɔnɛ “ukambi ami Davidi, lakalamaka elembe ami ndu lakandjelaka l’utema tshe, lakatshaka paka akambu w’usimbwi lu ashu ami.” (1 Khum. 14:8) Lo mɛtɛ, sho mbeyaka dia Davidi akasale akambo amɔtshi wa kɔlɔ. Koko, Jehowa akɛnyi ɔlɔlɔ mbika washo ande lo waonga w’ɛlɔlɔ nɛ dia nde akeyaka ɔnɛ otema waki Davidi waki osembɔki.—1 Ek. 29:17.
Tɔshi anangɛso woho wawaɔsa Jehowa
8, 9. a) Lo yoho yakɔna yakokaso mbokoya Jehowa? b) Ngande wakokaso nembetshiya dikambo sɔ ndo wetshelo akɔna wakokaso kondja?
8 Jehowa ekɔ la dikoka dia mbeya kɛnɛ kele l’otema w’onto, koko sho bu ladiɔ. Ɔsɔ ekɔ shadiya y’ɔlɔlɔ yatotshutshuya diaha nombosha anyaso. Hateye tokanyi tshɛ tele l’otema w’onto okina. Ɔnkɔnɛ, sho pombaka sala la wolo dia mbokoya Jehowa lo tona dia mbidja yimba lo munga ya wanyaso, nɛ dia vɔ wayoyitshika. Shi ayonga dimɛna sho ndjadjɛ oyango wa monga oko nde lo dikambo sɔ? Naka sho sala ɔsɔku, kete dui sɔ diayotokimanyiya efula dia sho monga la diɔtɔnganelo dia dimɛna la anangɛso ndo la akadiyɛso.—Ef. 4:23, 24.
9 Tɔshi ɛnyɛlɔ ka luudu lɔmɔtshi lambolana, sɔdu yambofufɔfufɔ, adidishi wambolana, ndo otala w’oselasela. Lo menda luudu lɔsɔ, anto efula kokaka mbuta ɔnɛ lɔ la dia mbutɔma nɛ dia laya bu ɔlɔ menda. Koko onto ɔmɔtshi mbeyaka mɛna luudu lakɔ lo yoho yotshikitanyi. Nde kokaka mɛna dia kânga mambolana diangɔ sɔ, dikundji dieke amɛna ndo luudu lakɔ kokaka nɔngɔswama. Nde ambosomba luudu lakɔ ndo ambɔlɔngɔsɔla ahole wakalana ndo lɔ laya dimɛna. Oma lâsɔ, ambetshitshi woshimboya luudu lakɔ olangala. Onde sho kokaka monga oko onto lakasale la wolo dia nɔngɔsɔla luudu lɔsɔ? Shi sho kokaka sɛdingola waonga w’ɛlɔlɔ w’anangɛso la akadiyɛso ndo akoka awɔ wa nyomoleka pama lo nyuma lo nshi yayaye, l’ɔtɛ wa sho mbika washo paka lo wandja awɔ? Naka sho sala ngasɔ, kete tayoyolanga anangɛso la akadiyɛsɔ l’ɔtɛ wa waonga awɔ w’ɛlɔlɔ wa lo nyuma, oko wâlanga Jehowa.—Adia Heberu 6:10.
10. Ngande wakoka tokimanyiya dako dia lo Filipi 2:3, 4?
10 Ɔpɔstɔlɔ Paulo akasha alako amɔtshi wakoka tokimanyiya dia sho monga la diɔtɔnganelo di’ɔlɔlɔ la anto tshɛ wa lo etshumanelo. Nde akakeketsha Akristo ate: “Tanyutshaki dikambu la utshanu kana la ndjatumbula, keli la ndjakitshakitsha ka yimba. Untu l’untu akani ati: Ukina kundeki ololo. Nyu tshe, untu l’untu, tendaki akambu andi atu, keli untu l’untu endi ndu akambu w’antu akina.” (Fil. 2:3, 4) Okitshakitsha wayotokimanyiya dia sho monga la kanyi y’ɔlɔlɔ lo dikambo dia anto akina. Ndjasha le anto akina ndo nyanga waonga w’ɛlɔlɔ wele lawɔ ayotokimanyiya dia mbaɔsa woho wawaɔsa Jehowa.
11. Etshikitanu akɔna wamonga la shɛngiya lo tshumanelo dimɔtshi?
11 Lo nshi yaso nyɛ, etshikitanu wasalema lo andja w’otondo wambokonya anto efula dia monɔ otsha lo ahole akina. Anto w’oma lo wedja wotshikitanyi wekɔ lo mbidjasɛ lo esomba ɛmɔtshi ɛlɔ kɛnɛ. Eyoyo ɛmɔtshi wa lo ahole wodjashiso woyasha lo akambo wa mɛtɛ wa lo Bible ndo womɛ tɛmɔla Jehowa kâmɛ la so. Vɔ ndja “uma lu wedja tshe, ndu uma lu wauhu tshe ndu uma lu weuhu w’antu tshe, ndu w’eteketa tshe.” (Eny. 7:9) Oma lɔkɔ mbele, tshumanelo diaso diekɔ l’anto woye oma lo wedja efula.
12. Woho akɔna wahombaso tetemala mbɔsana ndo bonde kakokaso monga la okakatanu dia sala dikambo sɔ tena dimɔtshi?
12 Lo etshumanelo kaso, mbeyaka monga ohomba sho mbidja yimba efula dia tetemala monga la kanyi y’ɔlɔlɔ lo dikambo dia anto akina. Dui sɔ toholaka dako diaki ɔpɔstɔlɔ Petero diatɔlɔmba dia ‘mboka anyaso ngandji ka mɛtɛ,’ ndo dia ‘mbokana ngandji k’efula lam’asaso la otema ɔtɔi.’ (1 Pet. 1:22) Kɛnɛmɔla ngandji ndo lolango la mɛtɛ mbeyaka monga ponda mbɔtɔ lo yisho ya tɛdi lo dihole diodjashi anto w’oma lo wedja efula. Mbekelo ya wanyaso atɛmɔdi mbeyaka tshikitana efula la yaso hita, ɛnyɛlɔ oko lo kɛnɛ kendana la kalasa, ekondjelo ndo la waoho woyeso. Onde sho mongaka la okakatanu dia shihodia tokanyi ndo awui wasala anto amɔtshi wele bu la so dioho ɔtɔi? Tokanyi tɔsɔ mbakokawɔ vɔ lawɔ monga la tɔ lo dikambo diaso. Lo wedi okina, sho tshɛ keketshamaka ɔnɛ: ‘Nyolange nkumbo k’otondo k’anangɛso.’—1 Pet. 2:17.
13. Etshikitanu akɔna wahombaso sala lo tokanyi taso?
13 Mbeyaka monga ohomba sho sala etshikitanu ɛmɔtshi lo tokanyi taso la oyango wa nyomofudia ngandji kaso le anangɛso tshɛ. (Adia 2 Koreto 6:12, 13.) Onde ambotokomɛka lushi lɔmɔtshi dia mbuta ɛtɛkɛta wele oko “halokanɛ anto kapanda kɔlɔ, koko . . . “ k’oma lâsɔ sho tatɛ mbuta awui amɔtshi wa kɔlɔ wɔsaso dia anto efula wa lo dioho sɔ mbasalaka? Tokanyi tɔsɔ mbeyaka mɛnya ohomba wa sho minya dikanyiyakanyiya dieke laso l’ɛse kaso k’otema. Sho kokaka ndjambola ɔnɛ: ‘Onde dimi salaka la wolo nshi tshɛ dia mbeya anto wele la mbekelo yotshikitanyi la yami?’ Ndjasɛdingola ngasɔ kokaka tokimanyiya dia sho sala etshikitanu wahombama dia mbetawɔ ndo nanga anangɛso w’oma lo wedja tshɛ.
14, 15. a) Sha bɛnyɛlɔ diɛnya woho wakatshikitanya anto amɔtshi woho wakawɔsaka anto akina. b) Ngande wakokaso mbaokoya?
14 Bible kekɔ la bɛnyɛlɔ di’ɛlɔlɔ dia wanɛ wakasale etshikitanu. Ɔmɔtshi l’atei awɔ aki ɔpɔstɔlɔ Petero. Oko wakinde ose Juda, Petero akakoke mbewɔ dia mbɔtɔ lo luudu l’ose Wodja. Tokanyiya yema woho wakandayaoke etena kakawɔlɔmbɛ dia nde ntshɔ laka Kɔnɛliyɔ laki ose Wodja laki kombahema ohekele. Petero akasale etshikitanu, nɛ dia nde akashihodia dia aki lolango la Nzambi dia anto wa lo wedja tshɛ koma ase etshumanelo k’Akristo. (Etsha 10:9-35) Ndo Saulo, lakayokomaka ɔpɔstɔlɔ Paulo, akahombe sala etshikitanu ndo minya dikanyiyakanyiya diaki lande. Nde akasuya dia woho wakandahetsha Akristo efula akokonya dia ‘nde tetemala pɛnyahɛnya etshumanelo kaki Nzambi ndo kihandjola vwa.’—Ngal. 1:13-20.
15 Hatokoke mbidja tâmu ɔnɛ sho kokaka sala etshikitanu lo lɔkɛwɔ laso lo ekimanyielo ka nyuma kaki Jehowa. Naka tambɛna dia tekɔ la yema ya dikanyiyakanyiya dioshami, kete sho la dia sala la wolo dia mbodinya ndo “nama utundu wa nyuma lu dimama dia ki.” (Ef. 4:3-6) Bible tokeketshaka ɔnɛ: “Nyolote ngandji; to keli dimama dia uluwanyi.”—Kol. 3:14.
Tokoya Jehowa lo olimu aso w’esambishelo
16. Naa sangwelo diaki Nzambi lo kɛnɛ kendana la anto?
16 Ɔpɔstɔlɔ Paulo akafunde ate: “Ne dia la ntundu ka [Nzambi] kema shonondi.” (Romo 2:11) Sangwelo dia Jehowa ele dia anto w’oma lo wedja tshɛ mbɔtɔ lo okongamelo ande dia mbɔtɛmɔla. (Adia 1 Timote 2:3, 4.) Oma lɔkɔ mbele, nde akasale dia “lukumu l’ololo la pundju” sambishama lo “wedja tshe ndu wauhu tshe ndu eteketa tshe, ndu antu tshe.” (Eny. 14:6) Yeso akate ate: “Ekambo eli andja.” (Mat. 13:38) Ɛtɛkɛta ɛsɔ alembetshiyawɔ le yɛ ndo le nkumbo kayɛ?
17. Woho akɔna wakokaso kimanyiya weho w’anto tshɛ?
17 Aha anto tshɛ mbele la akoka wa ntshɔ lo tokoma ta nkɛtɛ dia tosambisha anto akina losango la Diolelo. Koko, sho mbeyaka monga la akoka wa sambisha anto w’oma lo bɛkɛ tshɛ dia nkɛtɛ wele lo mbilo kaso. Onde sho kambaka la waaso tshɛ wele laso dia sambisha weho w’anto tshɛ, aha paka wanɛ wakatasambisha lo ɛnɔnyi wakete? Lande na kahatayadjɛ oyango wa sambisha anto akina wahatasambishama dimɛna dimɛna?—Romo 15:20, 21.
18. Ngande wakayakiyanya Yeso lo dikambo dia anto?
18 Yeso akɛnyi mɛtɛ ohomba wa kimanyiya anto tshɛ. Nde kosambisha paka lo dihole ɔtɔi to. Ɔkɔndɔ ɔmɔtshi wa lo Bible mɛnyaka dia nde “akakindula lu esumba tshe ndu lu ngelu.” Oma lâsɔ, “lam’akandenyi elui w’antu, ndi akawauki ketshi,” ndo akɛnyi ohomba wa mbâkimanyiya.—Mat. 9:35-37.
19, 20. Naa toho tɔmɔtshi takokaso mɛnya dia sho mbɔsaka anto tshɛ woho wawaɔsa Jehowa la Yeso?
19 Naa toho tɔmɔtshi takokaso kɛnɛmɔla dionga dia ngasɔ sho lawɔ? Amɔtshi wakayadjɛ oyango wa sambisha lo tenyi dia lo mbilo kawɔ diahataleke sambishama efula. Ɛnyɛlɔ, lo ahole w’amundji w’okanda, lo parkɛ, lo ahole wemala mituka, kana lo mvudu y’ɛlɔhɛ yele kema wɔdu onto mbɔtɔ lɔkɔ. Akina wakasale la wolo dia mbeka ɔtɛkɛta w’angɛndangɛnda woho wa sambisha anto w’oma lo waoho amɔtshi wodjashi lo ɛtshi kawɔ ka nkɛtɛ kana waki kosambishama mbala efula lo nshi yakete. Naka sho mbeka woho washanawɔ mɔyɔ lo ɔtɛkɛta w’anto asɔ, kete tayɛnya dia sho ndjashaka dia mbeya woho wele yônge yawɔ. Naka sho bu la akoka wa mbeka ɔtɛkɛta okina, shi sho kokaka keketsha wanɛ wasala dikambo sɔ? Lo mɛtɛ, hatohombe kɔmɔla etema w’anto wasala la wolo dia sambisha anto w’oma lo wodja okina kana ndjambola bonde kasalawɔ dikambo sɔ. Nsɛnɔ tshɛ yekɔ la nɛmɔ lo washo wa Nzambi ndo sho nangaka mɛna akambo woho wawaɛna Jehowa.—Kol. 3:10, 11.
20 Mɛna akambo woho wawaɛna Nzambi nembetshiyaka nto sambisha anto tshɛ oyadi awui akɔna wele lawɔ. Mbeyaka monga ko amɔtshi bu la mvudu, wekɔ dipakapaka, kana wekɔ la yoho ya lɔsɛnɔ la mindo. Kânga anto amɔtshi wekɔ kɔlɔ oya le so, kɛsɔ hahombe totshutshuya dia sho monga la tokanyi ta kɔlɔ lo kɛnɛ kendana la wodja kana la dioho diawɔ tshɛ. Anto amɔtshi wakasalɛ Paulo awui wa kɔlɔ, koko nde kombetawɔ dia dikambo sɔ mbokonya lo nde tshika dia sambisha anto w’oma lo dioho diakɔ. (Etsha 14:5-7, 19-22) Nde aki la eshikikelo ɔnɛ anto amɔtshi wayetawɔ losango lande.
21. Naka sho mbɔsa anto woho wawaɔsa Jehowa, ngande wayotokimanyiya dui sɔ?
21 Tamboleka mɛna hwe kakianɛ dia monga la kanyi ya dimɛna, mbuta ate kanyi ya Jehowa, mbayotokimanyiya dia monga la diɔtɔnganelo di’ɔlɔlɔ la anangɛso wa lo etshumanelo, wa lo nkumbo kaso ka lo andja w’otondo k’anto l’ɔnango, ndo anto wahomana la so lo esambishelo. Naka kanyi yaso ndeka fɔna la Jehowa, kete tayoleka kimanyiya dia ki ndo kâmɛ monga efula. Ndo tayonga la akoka wa kimanyiya anto akina dia vɔ nanga Jehowa, Nzambi “[k]ahatuyalaka la shonodi” koko kayasha la ngandji le anto tshɛ, “ne dia vo tshe weli ulimu w’anya [ande].”—Jobo 34:19.
Onde wɛ kokaka kadimola?
• Naa yoho ya mbɔsa anangɛso yahombaso sala la wolo dia mbewɔ?
• Ngande wakokaso mbokoya Jehowa lo woho wɔsaso anangɛso?
• Wetshelo akɔna wambotokondja lo dikambo dia woho wɔsaso nkumbo kaso ka lo andja w’otondo k’anto l’ɔnango?
• Ngande wakokaso mbɔsa anto woho wawaɔsa Jehowa lo etena keso lo esambishelo?
[Osato wa lo lɛkɛ 26]
Ngande wakokaso mbeya anto wele la mbekelo nkina?
[Osato wa lo lɛkɛ 28]
Lo toho takɔna takokaso sambisha anto efula lokumu l’ɔlɔlɔ?