Nyetsha Ananyu

Timɔtɛ​—Aki suke ndo aketawɔ kambɛ anto akina

“ONDE wɛ ekɔ suke?” Onde watakokaka dimbola sɔ lushi lɔmɔtshi?​— Onto lakakoke dimbola sɔ akalangaka mbeya dia kana wɛ amboyalɔngɔsɔla. Ɛnyɛlɔ, ondo nde akalange mbuta ate, ‘onde wɛ ekɔ l’abuku ayɛ wa wekelo? Onde wɛ akâdia etenyi kayoteka?’ Oko wayangaso diɛna, Timɔtɛ aki suke.

Ndo nto, Timɔtɛ aketawɔ. Onde wɛ mbeyaka kɛnɛ kalembetshiya dui sɔ?​— Etena kakawalɔmbɛ Timɔtɛ dia kambɛ Nzambi, nde akasale woho wakasale okambi okina waki Nzambi, wakate ɔnɛ: “Dim’one, untumi.” (Isaya 6:8) Lam’ele nde aki suke ndo aketawɔ dia kambɛ anto akina, Timɔtɛ aki la lɔsɛnɔ l’ɔngɛnɔngɛnɔ. Onde wɛ nangaka mbeya lande na?​—

Timɔtɛ akotɔ la Lustɛra, osomba wakangana la Jerusalɛma nkama ya kilɔmɛtɛlɛ. Tshɛnde ka womoto Lɔyi la Eyunikɛ wa nyango wakekaka Afundelo dimɛna. Kânga etena kaki Timɔtɛ êke ɔn’ashashi, vɔ wakatatɛ mbetsha Ɔtɛkɛta wa Nzambi.​—2 Timote 1:5; 3:15.

Lam’aki Timɔtɛ ondo l’ɛnɔnyi dikumi l’ɛmɔtshi, ɔpɔstɔlɔ Paulo kâmɛ la Baranaba wakembola Lustɛra lo lɔkɛndɔ lande l’otale la ntondo l’esambishelo. Ondo l’etena kɛsɔ mbakakome nyango Timɔtɛ la tshɛnde Akristo. Onde wɛ nangaka mbeya ekakatanu wakahomana la Paulo la Baranaba?​— Anto waki konangaka Akristo wakoke Paulo ave, wakɔkɔmɔla ndo wakokotola polo l’andja w’osomba. Vɔ wakafɔnya vate nde ambovɔ.

Wanɛ waketawɔ kɛnɛ kaketshaka Paulo wakaye oya le nde ndo nde aketɔ. La wedi a pindju, Paulo nde la Baranaba wakonɛ, koko kombeta edja vɔ wakayokalolaka la Lustɛra. Etena kakawakalola lɛkɔ, Paulo akasha sawo ndo akatɛ ambeki ate: “L’atei w’asui, kahumbasu mboto lu diulelu dia [Nzambi].” (Etsha 14:8-22) Onde wɛ mbeyaka kɛnɛ kakalange Paulo mbuta?​— Nde akalangaka mbuta di’anto akina wayɔhɛnyahɛnya anto wakambɛ Nzambi. Paulo akayofundɛka Timɔtɛ l’ɔkɔngɔ diko ate: “Wane tshe walanga ndjala la lumu l’ololo le Kristu Jesu, wayusuwa.”​—2 Timote 3:12; Joani 15:20.

L’ɔkɔngɔ wa Paulo la Baranaba mimɔ la Lustɛra, vɔ wakakalola lakawɔ. Ngɔndɔ ngana l’ɔkɔngɔ diko, Paulo akɔshi Silasi ko akatshu la nde dia vɔ tenda ambeki w’eyoyo lo ahole wakasambisha Paulo. Lam’akawakome la Lustɛra, Timɔtɛ aki mɛtɛ l’ɔngɛnɔngɛnɔ efula dia mɛna Paulo nto! Timɔtɛ akaleke monga l’ɔngɛnɔngɛnɔ etena kakawelɛ Paulo dia nde mbatshindɛ nde la Silasi. Timɔtɛ aketawɔ. Nde aki suke ndo aketawɔ ntshɔ.​—Etsha 15:40–16:5.

Vɔ asato wakatshu kâmɛ, l’ɔkɔngɔ wa vɔ kɛndakɛnda kilɔmɛtɛlɛ efula, vɔ wakatotetemala la lɔkɛndɔ lawɔ lo wato. L’ɔkɔngɔ wa vɔ polɔ lo wato, vɔ wakatshu la Tɛsalɔnika ka lo Ngirika. Lɛkɔ anto efula wakakome Akristo. Koko anto akina waki la kɛlɛ ndo wakatɔmbɔsha olui w’anto. Lɔsɛnɔ la Paulo, Silasi ndo Timɔtɛ laki lo wâle, ɔnkɔnɛ vɔ wakonɛ, ko wakatshu la Bɛrɔya.​—Etsha 17:1-10.

Paulo akayakiyanyaka dikambo di’ambetawudi w’eyoyo waki la Tɛsalɔnika, ɔnkɔnɛ nde akakaloya Timɔtɛ lɛkɔ. Onde wɛ mbeyaka lande na?​— L’ɔkɔngɔ Paulo akayolembetshiyaka Akristo wa la Tɛsalɔnika ate: ‘Dia nyu ndjala nge ndo nyokeketsha diaha ndoko onto ɔmɔtshi kɔmɔ.’ Ko onde wɛ mbeyaka lande na kakatome Paulo ɔlɔngɔlɔngɔ Timɔtɛ otsha lo dihole dia wâle dia ngasɔ?​— Atunyi kombeyaka Timɔtɛ dimɛna, ndo nde aketawɔ dia ntshɔ. Dui sɔ diakalɔmbaka dia monga la dihonga di’efula! Naa etombelo wakatongaka la otshwelo ande lɛkɔ? Etena kakakalola Timɔtɛ le Paulo, nde akatowotɛka di’ase Tɛsalɔnika waki la kɔlamelo. Ɔnkɔnɛ, Paulo akayafundɛka ɔnɛ: ‘Takakeketshama l’ɔtɛ anyu.’​—1 Tesalonika 3:2-7.

Timɔtɛ akakambe la Paulo ɛnɔnyi dikumi wakayele. Oma lâsɔ, Paulo akadjama lo lokanu la Rɔma ndo Timɔtɛ laki êke ka tshungɔ oma lo lokanu akatshu tenda Paulo. Etena kakinde lo lokanu, Paulo akafundɛ ase Filipi mukanda ndo ondo Timɔtɛ mbaki sekeletɛlɛ kande. Paulo akâfundɛ ate: ‘Dimi nongamɛka dia nyotomɛ Timɔtɛ, nɛ dia dimi ndoko l’onto okina lele la kɔlamelo oko nde ndo nde ayonyokimanyiya dimɛna.’​—Filipi 2:19-22; Heberu 13:23.

Ande ɔngɛnɔngɛnɔ waki la Timɔtɛ lam’akandoke ɛtɛkɛta ɛsɔ lee! Paulo akakome lo nanga Timɔtɛ efula nɛ dia nde aki suke ndo aketawɔ dia kambɛ anto akina. Sho nongamɛka dia ndo wɛ ayosala ngasɔ.

Ambola:

○ Lende akole Timɔtɛ, ndo kakɔna kakatombe lam’akatshu Paulo lɛkɔ mbala ka ntondo?

○ Kakɔna kakasale Timɔtɛ lam’akawɔlɔmbɛ dia nde tshindɛ Paulo la Silasi?

○ Ngande wakɛnya Timɔtɛ dihonga diaki lande, ndo lande na kakolange Paulo efula?

[Osato wa lo lɛkɛ 18]

Kakɔna kakatombe?