Onde Ɛmɛnyi wa Jehowa ndjakaka awala w’anto?

ANTO efula mbutaka ɔnɛ: “Naka olonganyi ɔmɔtshi ambɔtɔ l’ɔtɛmwɛlɔ okina, kete diwala diayovɔ.” Kɛsɔ mbatɛwɔ olonganyi wa onto lalanga koma Ɔmɛnyi wa Jehowa. Ko onde ngasɔ mbongadiɔ mbala tshɛ?

Mbokɛmaka dia etena katatɛ onto lotshukami ndjasha l’ɔtɛmwɛlɔ okina kana kamɔnde l’ɔtɛmwɛlɔ wambondɔtɔka edja ko mbɔtɔ l’okina, olonganyi ande kokaka monga la kandji l’asolo. Dui sɔ kokaka mbisha olonganyi ande pâ l’asolo, ɔkɔmwɛlɔ ndo kandji.

Tena efula wamato mbaleka nanga mimɔ oma l’ɔtɛmwɛlɔ ɔmɔtshi ko mbɔtɔ l’okina. Naka wadɛ ekɔ lo mbeka Bible la Ɛmɛnyi wa Jehowa, shɛngiya yakɔna yakoka monga la dui sɔ lo diwala diayɛ? Naka wɛ ekɔ wadi lêka Bible la Ɛmɛnyi wa Jehowa, kakɔna kakokayɛ sala dia kitshakitsha wɔma wakoka olonganyi ayɛ monga latɔ?

Kanyi yakoka monga la omi

Mark, lele lo wodja wa Australie, aki ambotshukana la wadɛnde ɛnɔnyi 12 etena kakatatɛ wadɛnde mbeka Bible la Ɛmɛnyi wa Jehowa. Nde akate ate: “Dimi laki l’ɔngɛnɔngɛnɔ lo diwala diami ndo laki la olimu wa dimɛna. Lɔsɛnɔ laki dimɛna. Oma lâsɔ, wadɛmi akayotatɛka mbeka Bible la Ɛmɛnyi wa Jehowa. Mbala kakɔ ɔtɔi, dimi lakayaoke dia yɛdikɔ yambɔsa wadɛmi yayofukutanya lɔsɛnɔ lami. L’etatelo, dimi kɔngɛnangɛna woho wakayashaka wadɛmi l’awui wa lo Bible, koko etena kakandambutɛ dia nde ambɔsa yɛdikɔ ya batizama oko Ɔmɛnyi wa Jehowa, dimi lakayakiyanya efula.”

Mark akatatɛ ndjambola dia kana diwala diande diayovɔ l’ɔtɛ wambɔtɔ wadɛnde l’ɔtɛmwɛlɔ okina. Nde akalange mboshimba wekelo wa Bible ndo diaha nde sawola la Ɛmɛnyi wa Jehowa. Koko lo dihole dia nde sala akambo l’esasesase, Mark akatoketsha etena kɛmɔtshi. Kakɔna kakakomɛ atshukanyi asɔ?

Mark mbutaka ate: “Lekɔ l’ɔngɛnɔngɛnɔ nɛ dia diwala diaso diamboleka monga dimɛna nshi nyɛ. Diɔ diamboleka keketala tatɛ lam’akabatizama wadɛmi oko Ɔmɛnyi wa Jehowa aya ɛnɔnyi 15.” Kakɔna kakimanyiya dia diwala diawɔ nomba? Mark mbutaka ate: “Kɛnɛ kakaleke ele woho wakakambaka wadɛmi la alako w’amɛna wele lo Bible. Mbala tshɛ nde akasalaka la wolo dia nɛmiyami.”

Alako w’oma le waa wadi wakatondoya

Naka wɛ ekɔ womoto lêka Bible la Ɛmɛnyi wa Jehowa, kakɔna kakokayɛ sala kana mbuta dia kitshakitsha pâ kakoka monga la olonganyi ayɛ? Dja yimba lo kɛnɛ kakate wamato amɔtshi w’oma lo wedja wotshikitanyi.

Sakiko, lele lo wodja wa Japon akate ate: “Aya ɛnɔnyi 31 wambomotshukama ndo lekɔ la ana asato. Ndo aya ɛnɔnyi 22 wemi Ɔmɛnyi wa Jehowa. Nsɛna l’omi lele bu layɛ ɔtɛmwɛlɔ ɔtɔi mongaka tena dimɔtshi tshondo y’okakatanu. Koko dimi salaka la wolo dia kamba la alako w’oma lo Bible dia monga ‘suke dia mpokamɛ, ɔkɔkɛ dia tɛkɛta ndo ɔkɔkɛ dia mboka kɛlɛ.’ (Jakoba 1:19) Dimi salaka la wolo dia monga la lɔsɛngɔ otsha le omɛmi ndo dia kitanyiya nango yande naka hayɔlɔshana la atɔndɔ wa lo Bible. Kɛsɔ akakimanyiya dia diwala diaso nomba.”

Nadezhda, lele lo wodja wa Russie akate ate: “Aya ɛnɔnyi 28 wambomotshukama ndo aya ɛnɔnyi 16 wemi Ɔmɛnyi wa Jehowa wambobatizama. La ntondo ka dimi mbeka Bible, dimi kɔfɔnyaka dia omɛmi koka monga ɔtɛ wa nkumbo. Lakɔsaka tɛdikɔ efula dimɛ. Koko yema yema, lakayoshihodiaka dia kamba la atɔndɔ w’oma lo Bible kimanyiyaka dia wɔladi ndo ɔngɛnɔngɛnɔ monga lo nkumbo kaso. (1 Koreto 11:3) Yema yema, lakayoyakitshakitsha l’ɛse k’omɛmi ndo nde akɛnyi etshikitanu wakamasale.”

Marli, lele lo wodja wa Brésil akate ate: “Dimi lekɔ la ana ahende ndo aya ɛnɔnyi 21 wambomotshukama. Aya ɛnɔnyi 16 wemi Ɔmɛnyi wa Jehowa wambobatizama. Lakeke dia Jehowa Nzambi nangaka dia atshukanyi mbidjasɛ kâmɛ aha kakitɔna. Ɔnkɔnɛ, dimi salaka la wolo dia monga wadi l’ɔlɔlɔ, dia tɛkɛta ndo sala akambo lo yoho yayɔngɛnyangɛnya Jehowa ndo omɛmi.”

Larisa, lele lo wodja wa Russie akate ate: “Lam’akamakome Ɔmɛnyi wa Jehowa ambeta ɛnɔnyi oko 19, lakeye dia dui dioleki ohomba le mi ele dia sala etshikitanu lo lɔsɛnɔ lami. Omɛmi kokaka mɛna shɛngiya y’ɔlɔlɔ yele la Bible le mi, tɔ kambokimanyiya dia dimi monga wadi la lokombo ndo la lowando le omɛmi lo woho wende omi l’ɔlɔlɔ. L’etatelo, takawanaka lo kɛnɛ kendana la woho wa mbodia anaso, koko takakandolaka ekakatanu akɔ. Omɛmi mbetawɔka dia anaso ntshɔ la mi lo nsanganya nɛ dia nde mɛnaka dia vɔ wekɔ lo nongola wetshelo wele la wahɔ efula le wɔ.”

Valquíria, lele lo wodja wa Brésil akate ate: “Aya ɛnɔnyi 19 wambomotshukama ndo lekɔ la ɔna ɔtɔi. Aya ɛnɔnyi 13 wemi Ɔmɛnyi wa Jehowa. L’etatelo, omɛmi konangaka dia dimi sambisha. Koko lakeke woho wa kadimola ekiyanu ande lo yoho ya dimɛna ndo mbokimanyiya dia nde mɛna dia Bible ekɔ la shɛngiya y’ɔlɔlɔ lo lonto lami. Yema yema, omɛmi akayɛnaka di’aki ohomba efula le mi dia dimi ndjashaka l’olimu w’esambishelo. Ɛlɔ kɛnɛ, nde sukɛkami efula l’elimu ami wa lo nyuma. Etena katshɔmi tɔlɔmbɔla wekelo wa Bible l’ahole wa tale, nde mɛmbakami lo mutuka ande ndo kongɛkami l’andja polo etena kashidiyami.”

Dikambo di’ohomba

Naka olonganyi ayɛ ekɔ lo mbeka Bible la Ɔmɛnyi wa Jehowa, tokake wɔma ɔnɛ dui sɔ diayodiaka diwala diayɛ. Oko wakɛnyi waomi ndo wadi efula wa lo andja w’otondo, Bible kimanyiyaka efula dia awala nomba.

Omi ɔmɔtshi lele kema Ɔmɛnyi wa Jehowa akate ate: “L’etatelo, lakokaka wɔma etena kaketawɔ wadɛmi mbetawɔ k’Ɛmɛnyi wa Jehowa, koko kânga mbakinde wolo dia mbetawɔ dui sɔ, dui sɔ diaki l’etombelo w’ɛlɔlɔ.” Omi okina akate awui wayela anɛ lo dikambo dia wadɛnde: “Kɔlamelo, eshikikelo ndo olowanyi wa wadɛmi akatshutshuya dia dimi mandola efula Ɛmɛnyi wa Jehowa. Takakondja wahɔ efula lo diwala diaso l’ɔtɛ wa dietawɔ diande. Sho tamboyaekesanyiya ndo tambokana dia diwala diaso diayotshikala pondjo.”

[Kiombo/​Osato wa lo lɛkɛ 32]

Ngande wɔsa Ɛmɛnyi wa Jehowa diwala?

Ɛmɛnyi wa Jehowa mbɔsaka Bible oko Ɔtɛkɛta wakasambiyama waki Nzambi. Ɔnkɔnɛ, vɔ mbɔsaka kɛnɛ katatɔ lo dikambo dia diwala la nɛmɔ. Tende ekadimwelo washa Bible lo ambola wayela anɛ:

▪ Onde Ɛmɛnyi wa Jehowa mbetshaka dia ekɔ dimɛna kakitɔna la olonganyi wele kema Ɔmɛnyi wa Jehowa? Ndooko. Ɔpɔstɔlɔ Paulo akafunde ate: “Naka unyasu omotshi eko la wadi laha umbetawudi, la umuntu uku ambetawo mbidjase landi, ndi tukimoki. Naka umuntu eko la umi laha umbetawudi, naka umendi ambetawo mbidjase landi, ndi tanganaki uma le umendi.” (1 Koreto 7:12, 13) Ɛmɛnyi wa Jehowa kitanyiyaka didjango sɔ.

▪ Onde womoto lotshukami lele Ɔmɛnyi wa Jehowa keketshamaka diaha nde kotsha nsaki y’omɛnde lele bu Ɔmɛnyi wa Jehowa? Ndooko. Ɔpɔstɔlɔ Petero akafunde ate: “Nyu amantu, nyetawo aui a waumenyu, ne dia naka amotshi hawukitanyia diui dia [Nzambi], ndu waha la diui dia [Nzambi], wayudietawo ne dia ditshelu dia wadiewo lam’ayuwena ditshelu dianyu di’ololo diosohanyi la woma.”​—1 Petero 3:1, 2.

▪ Onde Ɛmɛnyi wa Jehowa mbetshaka dia lowandji l’omi kema la elelo? Ndooko. Ɔpɔstɔlɔ Paulo akate ate: “Keli dimi nangaka nyu mbeya nyati: Ote a pami tshe eli Kristu, la ote a wumuntu eli pami; la ote a Kristu eli [Nzambi].” (1 Koreto 11:3) Womoto l’Okristo lotshukami pombaka nɛmiya omɛnde oko ɔtɛ wa nkumbo. Koko lowandji l’omi lekɔ la elelo. Nde ayokoya la Nzambi ndo la Kristo. Ɔnkɔnɛ, naka omi ambotɛ wadɛnde dia nde sala akambo walɔshanya la ɛlɛmbɛ waki Nzambi, womoto lotshukami l’Okristo pombaka ‘kitanyiya Nzambi oko wende owandji lo dihole dia anto.’​—Etsha 5:29.

▪ Onde Ɛmɛnyi wa Jehowa mbetshaka ɔnɛ diwala hadiokoke ndjakema? Ndooko. Yeso Kristo akate ate: “Dimi lambunyutela nti: Untu tshe layukimo wadendi, naka aha lu dikambu dia luseka, [awui wa mindo wa dieyanelo] ku ndi ntshuka ukina, ndi ambunana.” (Mateu 19:9, sho mbɛnganyisha alɛta ango.) Ɔnkɔnɛ, Ɛmɛnyi wa Jehowa mbetawɔka kanyi yaki Yeso y’ɔnɛ diwala kokaka mvɔ l’ɔtɛ wa loseka. Koko, vɔ mbetawɔka nto dia diwala hadiokoke ndjakema l’ɔtɛ w’ɛkɔkɔ w’anyanya. Vɔ keketshaka wanyawɔ dia kitanyiya ɛtɛkɛta waki Yeso wayela ɛnɛ: “Aha dia dikambu ne mbayutshika untu shi la nyangu, mbayundumamana la wadendi, ku vo ahendi wayuyala untu otoi? Okone . . . untu tamamitulaki kene kakamamanya [Nzambi].”​—Mateu 19:5, 6.