Onde tayotetemala nama olowanyi aso?
‘Edja ndo lam’ayomovɔ, dimi hashishaki olowanyi ami!’—JOBO 27:5.
1, 2. Woho akɔna w’ohikelo wahombaso mbisha lonya lɔkɔ, ndo ambola akɔna wayangaso sɛdingola?
OHƆSA dia wɛ ambosanga sango dia luudu lalangɛ mbika. Wɛ ambɔngɛnangɛna efula lo menda woho wayonga luudu lakɔ. Wɛ ambɔngɛnangɛna etena kakanyiyayɛ woho wayonyokimanyiya luudu lɔsɔ wɛ la nkumbo kayɛ. Shi wɛ ayetawɔ dia sango sɔ diayonga l’ohomba, paka wɛ amboka luudu, ambonɔ lɔkɔ, ndo oma lâsɔ wɛ ambotetemala likokɛ?
2 Woho akɔ wâmɛ mbakokaso mbɔsa olowanyi oko dionga di’ohomba diakoka tosalɛ sho la wakiso wa ngandji ɔlɔlɔ. Hatotokondja ndoko wahɔ lo mbuta tsho dia olowanyi ekɔ dionga di’ɔlɔlɔ, koko sho pombaka nama olowanyi aso w’Okristo. Ɛlɔ kɛnɛ wokelo wa mvudu nɔmbaka falanga efula. (Luka 14:28, 29) Woho akɔ wâmɛ mbele, monga l’olowanyi nɔmbaka dia sho mbɔsa wenya efula ndo mbidja welo efula, koko ɔsɔ bu welo wa wodjadja. Ɔnkɔnɛ, nyɛsɔ tɔsɛdingole ambola asato anɛ: Ngande wakokaso monga la olowanyi? Ngande wakokaso nama olowanyi aso w’Okristo? Kakɔna kakoka salema naka onto amboshisha olowanyi?
Ngande wakokaso monga la olowanyi?
3, 4. a) Lo toho takɔna tatokimanyiya Jehowa dia sho monga la olowanyi? b) Ngande wakokaso monga la olowanyi l’ɛnyɛlɔ ka Yeso?
3 Takɛnyi lo sawo dietshi dia Jehowa toshaka nɛmɔ lo woho watotshikande dia shoamɛ nsɔna dia kana tayonga la olowanyi. Koko nde tokimanyiyaka lo dikambo sɔ. Nde tetshaka woho wakokaso monga la dionga di’ohomba efula sɔ, ndo nde toshaka nyuma kande k’ekila katokimanyiya dia sho kamba olimu la wetshelo ande. (Luka 11:13) Nde kokɛka lonyuma la wanɛ tshɛ wasala la wolo dia monga la olowanyi.—Tuk. 2:7.
4 Ngande watetsha Jehowa dia sho nama olowanyi aso? Lo yoho yoleki tshɛ, nde akatome Ɔnande Yeso lanɛ la nkɛtɛ. Yeso akonge l’okitanyiya wa kokele otsha le She. Nde “akayala la ukitanyia edja ndu lu nyoi.” (Fil. 2:8) Lo akambo tshɛ wakandasale, Yeso akakitanyiya She lele l’olongo kânga l’etena kaki dui sɔ wolo efula. Nde akatɛ Jehowa ate: “Aha uku alangami, keli uku alangaye.” (Luka 22:42) Ɔmɔmɔ la l’atei aso la dia ndjambola ɔnɛ: ‘Onde ndo dimi mbele la yimba y’okitanyiya ya ngasɔ?’ Naka okitanyiya aso tshutshuyama oma l’ɛkɔkɔ w’ɛlɔlɔ, kete tayonga anto walama olowanyi. Tɔsɛdingole akambo amɔtshi wa lo lɔsɛnɔ wele okitanyiya ekɔ ohomba efula.
5, 6. a) Ngande wakɛnya Davidi ohomba wa nama olowanyi oyadi etena kele ndoko onto latɛna? b) Ekakatanu akɔna wendana la olowanyi wahomana l’Akristo ɛlɔ kɛnɛ etena kewɔ vɔamɛ?
5 Sho pombaka kitanyiya Jehowa kânga l’etena kafɔnyaso dia ndoko onto latɛna. Omembi w’esambo Davidi akɛnyi ohomba wa monga la olowanyi kana l’otema wosembwe kânga lo waaso wakandafɔnyaka dia nde aki ndamɛ. (Adia Osambu 101:2.) Oko wakinde nkumekanga, Davidi aki mbala efula kâmɛ l’anto. Aha la tâmu, tena efula nde akikɔ l’atei wa nkama kana nunu di’anto wakawendaka. (Ɛdika la Osambu 26:12.) Nama olowanyi lo tena dia ngasɔ aki ohomba efula, nɛ dia nkumekanga akahombaka mbisha anto tshɛ ɛnyɛlɔ k’ɔlɔlɔ. (Euh. 17:18, 19) Koko Davidi akakondja wetshelo dia etena kakinde ndamɛ, mbuta ate ‘letei ka luudu lande,’ nde akahombaka kɛndakɛnda la olowanyi. Ko kayotota dikambo diaso?
6 Lo Osambu 101:3, Davidi akate ate: “Dimi halukitsha dikambu dia kolo la ntundu kami.” Ɛlɔ kɛnɛ, tekɔ la waaso efula wa kitsha diangɔ dia kɔlɔ la ntondo kaso, djekoleko l’etena keso shoamɛ. Woho waya anto efula la diaaso dia kamba l’Ɛtɛrnɛtɛ ambetɛ dui sɔ tshondo y’okakatanu. Aya bu dikambo dia wolo di’onto menda esato wa mindo. Ko, onde sala ngasɔ mɛnyaka dia onto ekɔ l’okitanyiya otsha le Nzambi kakasambiya Davidi dia funda ɛtɛkɛta wele la diko engo? Wendelo w’esato wɛnyawɔ anto etakataka wekɔ kɔlɔ, nɛ dia vɔ nomialomiaka nsaki ya kɔlɔ ndo ya lokaki, nanyaka nkum’otema kaso, ndjakishaka awala ndo shishiyɛka wanɛ tshɛ wawaenda nɛmɔ diawɔ.—Tuk. 4:23; 2 Kor. 7:1; 1 Tes. 4:3-5.
7. Tɔndɔ diakɔna diakoka tokimanyiya dia sho nama olowanyi aso etena keso shoamɛ?
7 Lo mɛtɛ, ndoko okambi waki Jehowa wele mɛtɛ ndamɛ. Shɛso ka ngandji tɛnaka sho tshɛ. (Adia Osambu 11:4.) Ande ɔngɛnɔngɛnɔ wayonga la Jehowa etena katɛnande tashika tanga la ntondo k’ehemba lee! Naka sho sala ngasɔ, kete tayokitanyiya ɛtɛkɛta waki Yeso wele lo Mateu 5:28. Lâdiko di’akambo asɔ tshɛ, nyɛsɔ toyashikikɛ diaha menda esato wakoka totshutshuya dia sho sala akambo wa kɔlɔ. Tatengɔnyake olowanyi aso la wendelo w’esato wɛnyawɔ anto etakataka!
8, 9. a) Ekakatanu akɔna wendana la olowanyi wakahomana la Danyɛlɛ nde l’asekande? b) Ngande wangɛnyangɛnya akɛnda w’Akristo Jehowa ndo asekawɔ Akristo ɛlɔ kɛnɛ?
8 Sho kokaka nto nama olowanyi aso lo kitanyiya Jehowa etena keso l’atei w’anto wele bu ambetawudi. Tɔshi ɛnyɛlɔ ka Danyɛlɛ nde la angɛnyi ande asato. Etena kakiwɔ weke akɛnda, vɔ wakatɔlama lo fumbe la Babilɔna. Lɛkɔ, oko wakiwɔ kâmɛ l’anto waki komonga ambetawudi ndo waki kombeyaka Jehowa kânga yema, akɛnda anɛi w’ase Hɛbɛru asɔ wakasɛngiyama dia ndɛ diangɔ diakasekɛma lo Ɛlɛmbɛ waki Nzambi. Komonga dui dia wolo dia ɛlɔngɔlɔngɔ ɛsɔ mbisha tɛkɛ nɛndɛ dia vɔ ndɛ diangɔ sɔ. Ambutshi awɔ, dikumanyi dikina di’ase Juda, ɛlɔmbɛdi kokoka mɛna kɛnɛ kakasalaka ɛlɔngɔlɔngɔ ɛnɛi ɛsɔ. Ko lâsɔ akakoke mbaɛna na? Paka Jehowa ndamɛ. Ɔnkɔnɛ, vɔ wakɔshi yɛdikɔ ya mbôkitanyiya oyadi tɔsɛngiya takɔna tshɛ ndo wâle wakakoke monga la ntondo kawɔ.—Dan. 1:3-9.
9 L’andja w’otondo ɛlɔ kɛnɛ, Ɛmɛnyi wa Jehowa weke ɛlɔngɔlɔngɔ la esekaseka wekɔ lo mbɔsa yɛdikɔ yakɔ yamɛ lo sukɛ ɛlɛmbɛ waki Nzambi ndo lo tona dia mbetawɔ tɔsɛngiya ta kɔlɔ t’oma le asekawɔ. Etena katonanyu nyu akɛnda dia nɔ didjoyadjoya, ndjâkimɔ l’awui wa ngala, tondja ɛtɛkɛta wa mindo, sala awui wa mindo wa dieyanelo ndo awui akina wa kɔlɔ, nyekɔ lo kitanyiya Jehowa. Ndo etena kasalanyu ngasɔ, nyekɔ lo nama olowanyi anyu. Dui sɔ diekɔ la wahɔ le nyu ndo nyu ngɛnyangɛnyaka Jehowa ndo asekanyu Akristo!—Osam. 110:3.
10. a) Naa tokanyi ta kɔlɔ tendana la monanyi takayokonya akɛnda amɔtshi dia vɔ shisha olowanyi awɔ? b) Lɔkɛwɔ lakɔna latotshutshuya olowanyi dia sho monga lalɔ lo kɛnɛ kendana la wâle waya oma lo monanyi?
10 Sho pombaka nto kitanyiya Jehowa lo kɛnɛ kendana la diɔtɔnganelo dia lam’asaso l’onto lele bu pami kana womoto oko sho. Sho mbeyaka dia Ɔtɛkɛta wa Nzambi shimbaka monanyi. Koko kema dui dia wolo dia sho shisha okitanyiya aso ko ndjokoma lo sala kɔlɔ. Ɛnyɛlɔ, akɛnda amɔtshi wakasale dieyanelo dia l’onyɔ ndo dia l’odingi ndo wakasalanaka esuse lam’asawɔ wafɔnya ɔnɛ ditshelo sɔ kema pɛkato nɛ dia diɔ bu tshondotondo ya dieyanelo. Akɛnda asɔ mbohɛka kana mbeyaka minya yimba ɔnɛ tshɛkɛta ya lo Bible yokadimɔmi ɔnɛ monanyi mendanaka la ditshelo sɔ kana lɔkɛwɔ la kɔlɔ lakoka onto mbitshanyema oma l’etshumanelo.a Koko kɛnɛ koleki tshɛ kɔlɔ ele vɔ mbohɛka ohomba wa nama olowanyi. Lam’ele tekɔ lo mbidja welo dia nama olowanyi aso, sho hatoyange tɛkɛ nɛndɛ dia shisha olowanyi akɔ. Sho hatokoke monga suke la pɛkato kana kisala aha la nongola dilanya. Sho hatoke washo tsho lo alanya wakoka etshumanelo tosha l’ɔtɛ wa munga kambotosala. Koko sho mbidjaka welo aso tshɛ dia sala kɛnɛ kayɔngɛnyangɛnya Jehowa ndo mbewɔka sala kɛnɛ kakoka mbônyangiya. L’ɔtɛ wa pemba dia kɛnya la pɛkato, sho kiewɔka ndo ‘ndawɔka monanyi.’ (1 Kor. 6:18) Lo sala ngasɔ, sho mɛnyaka dia tekɔ anto wele la olowanyi w’oshika.
Ngande wakokaso nama olowanyi aso?
11. Lande na kele oseka tshelo tshɛ y’okitanyiya yekɔ ohomba? Sha ɛnyɛlɔ.
11 Sho mongaka la olowanyi lo monga l’okitanyiya, lâsɔ mbokɛmaka hwe dia sho namaka olowanyi lo mbikikɛ l’okitanyiya tshɛ. Tshelo yâmɛ y’okitanyiya mbeyaka mbɔsama oko kiambokambo y’anyanya. Koko l’edjedja ka wonya, okitanyiya ndjotokimanyiyaka dia sho nama olowanyi aso. Tɔshi ɛnyɛlɔ kɛnɛ: Tafadi ɔtɔi mbeyaka mbɔsama oko ɛngɔ k’anyanya, koko naka sho mbahatanya atafadi efula kete sho mbeyaka mbika luudu la dimɛna. Ɔnkɔnɛ, lo tetemala monga l’okitanyiya, tayolama olowanyi aso.—Luka 16:10.
12. Ngande wakatotshikɛ Davidi ɛnyɛlɔ lo kɛnɛ kendana la nama olowanyi la ntondo k’ɛhɛnyɔhɛnyɔ ndo ka wɛngiya?
12 Olowanyi aso mɛnamaka djekoleko etena kakikɛso asui, ɛhɛnyɔhɛnyɔ kana wɛngiya. Tɔshi ɛnyɛlɔ kaki Davidi kɔtɛkɛtami lo Bible. Etena kakinde eke ɔlɔngɔlɔngɔ, nde akahɛnyahɛnyama oma le nkumekanga kakɔsamaka oko didjidji dia lowandji laki Jehowa. Koko, nkumekanga Saulo kombetawɔmaka nto oma le Jehowa ndo akokaka Davidi kandjema efula l’ɔtɛ wakawetawɔka Nzambi. Koko Saulo akatshikala edja lo lowandji ndo akakambe l’alembe w’Isariyɛlɛ dia nyanga dia ndjaka Davidi. Jehowa akatshike dia akambo wa wɛngiya asɔ salema l’edja k’ɛnɔnyi efula. Onde Davidi akomalɛ Nzambi? Onde nde akate ɔnɛ ndoko ohomba wa tetemala mbikikɛ? Ndooko. Nde aki la dilɛmiɛlɔ di’efula otsha le Saulo oko wakinde okitami w’esɔ waki Nzambi ndo akatone dia mbodiaka etena kakandakondja diaaso.—1 Sam. 24:2-7.
13. Ngande wakokaso nama olowanyi aso etena katosalɛ anto kɔlɔ kana katonyangiyawɔ?
13 Ɛnyɛlɔ kaki Davidi kɛkɔ la shɛngiya ya wolo le so ɛlɔ kɛnɛ! Tekɔ l’etshumanelo ka l’andja w’otondo k’anto wele bu kokele, kele onto ɔmɔtshi mbeyaka tosalɛ kɔlɔ kana shisha kɔlamelo yande. Koko tekɔ la diɛsɛ dia nsɛna l’etena kele ekambi waki Jehowa lo tshɛ kawɔ hawokoke pondjo shisha olowanyi awɔ. (Is. 54:17) Ko kakɔna kahombaso sala naka onto ɔmɔtshi ambotosalɛ kɔlɔ? Naka sho mombɛ wonyaso ɔtɛmɔdi kumbɛkumbɛ, kete sho mbeyaka shisha olowanyi aso. Lɔkɛwɔ l’anto akina halohombe pondjo totshutshuya dia momalɛ Nzambi kana shisha kɔlamelo yaso. (Osam. 119:165) Mbikikɛ ehemba ayotokimanyiya dia sho nama olowanyi aso.
14. Kakɔna kasala anto wele la olowanyi etena kasalema etshikitanu wendana la okongamelo ndo la wetshelo aso?
14 Sho kokaka nto nama olowanyi aso lo mbewɔ dia mundana la dikɔmɔ kana monga la yimba ya mɔnyɔla anto akina. Dui sɔ nembetshiyaka monga la kɔlamelo le Jehowa. Nshi nyɛ mbamondoleka tshɔkɔla ekambi ande. Nshi nyɛ mbamboleka ɔtɛmwɛlɔ wa pudipudi monga lâdiko di’ekina lo nkɛtɛ k’otondo. (Is. 2:2-4) Etena kasalema etshikitanu lo kɛnɛ kendana la elembetshiyelo w’avɛsa amɔtshi wa lo Bible kana woho wahomba akambo salema, sho mbaetawɔka. Sho ngɛnangɛnaka dia mɛna woho wataleke fula osase wa lo nyuma. (Tuk. 4:18) Naka tekɔ l’okakakatanu dia shihodia etshikitanu ɛsɔ, kete sho pombaka nɔmba Jehowa dia nde tokimanyiya lo dikambo sɔ. L’etena kakɔ kâmɛ, sho mongaka l’okitanyiya ndo namaka olowanyi aso.
Kakɔna kakoka salema naka onto ɔmɔtshi amboshisha olowanyi ande?
15. Paka onto akɔna lakoka kɔkɔsɔla olowanyi ayɛ?
15 Shi ɔsɔ mɛtɛ ekɔ dimbola dia dimɛna? Oko wakatɛnyi lo sawo dietshi, ekɔ ohomba efula dia sho nama olowanyi aso. Otondonga sho bu la olowanyi, tshike sho bu la diɔtɔnganelo di’ɔlɔlɔ lam’asaso la Jehowa ndo tshike sho bu l’elongamelo ka mɛtɛ. Tohɛke dikambo nɛ: L’andja w’otondo paka onto ɔtɔi oto mbakoka kɔkɔsɔla olowanyi ayɛ, mbuta ate paka wɛmɛ. Jɔbɔ akeyaka dikambo sɔ dimɛna. Nde akate ate: ‘Edja ndo lam’ayomovɔ, dimi hashishaki olowanyi ami!’ (Jobo 27:5) Naka ndo sho lawɔ mbɔsa yɛdikɔ ya ngasɔ ndo tshikala suke la Jehowa, kete hatoshishaki olowanyi aso pondjo.—Jak. 4:8.
16, 17. a) Naka onto ambosala pɛkato ka woke, dionga diakɔna dia kɔlɔ diakokande monga ladiɔ? b) Ko naa dionga di’ɔlɔlɔ diakokande monga ladiɔ?
16 Koko anto amɔtshi ndjoshishaka olowanyi awɔ. Oko wakadiasalema etena kaki apɔstɔlɔ weke la lɔsɛnɔ, anto amɔtshi ndjosalaka pɛkato ya weke. Naka dui dia ngasɔ diambotokomɛ, onde kete lâsɔ elongamelo kaya bu nto? Ndooko. Kakɔna kakoka salema? Ntondotondo tende kɛnɛ kahatahombe sala. Anto wekɔ la mbekelo ka mbishɛ pɛkato la ntondo k’ambutshi awɔ, k’asekawɔ Akristo kana la ntondo ka dikumanyi. Koko, Bible toholaka ɔnɛ: “One latusheka kolo yandi, hatongonaka. Keli one latushulaka ndu latosekaka kolo yandi, ayukama ketshi.” (Tuk. 28:13) Wanɛ washɛ pɛkato yawɔ salaka munga ka woke nɛ dia ndoko dui diakokaso mbishɛ Nzambi. (Adia Heberu 4:13.) Anto amɔtshi nyangaka dia nsɛna lɔsɛnɔ la dungi pende, lo sɛma dia wekɔ lo kambɛ Jehowa, ko tete le wekɔ lo tetemala sala pɛkato. Onto la ngasɔ, amboshisha olowanyi ande. Jehowa hangɛnangɛna wanɛ wɔ̂tɛmɔla ko l’etena kakɔ kâmɛ wekɔ lo mbishɛ pɛkato ya weke yasalawɔ. Koko dionga dia dungi pende mbishaka Jehowa nkɛlɛ.—Tuk. 21:27; Is. 1:11-16.
17 Bible tɛnyaka hwe kɛnɛ kahombaso sala etena kasalaso pɛkato. Onto lasala pɛkato pombaka nyanga ekimanyielo oma le dikumanyi di’Akristo. Jehowa ambɔlɔngɔsɔlaka yɛdikɔ yakoka tokimanyiya etena kasalaso pɛkato. (Adia Jakobo 5:14.) Tatetawɔke dia wɔma wɔnɛ wayotongola kana wayotosha lohango toshimba dia sho kokɛ lonyuma laso. Onde onto lele la yimba koka mɛtɛ mbishɛ enganga hemɔ kele lande l’ɔtɛ w’ɔnɛ wayowoka tɛdi kana mbosala epaso?—Heb. 12:11.
18, 19. a) Ngande wɛnya ɛnyɛlɔ ka Davidi dia onto kokaka nyomonga nto la olowanyi? b) Kakɔna kambotoyashikikɛ dia sala lo kɛnɛ kendana la olowanyi aso?
18 Onde onto koka kɔlɔngana tshɛ lo tshɛ oma hemɔ kande? Onde onto lamboshisha olowanyi kokaka nongamɛ dia nyomonga lawɔ nto? Tɔsɛdingole nto ɛnyɛlɔ kaki Davidi. Nde akasale pɛkato ka woke. Nde akakombola wadi akana, akasale loseka ndo akadiakisha omɛnde laki komonga l’onongo. Shi hatokoke mbuta dia Davidi aki la olowanyi l’etena kɛsɔ? Ko onde nde kokoka nyomonga la olowanyi nto? Davidi aki l’ohomba w’ohokwelo wa wolo ndo nde akalongola ohokwelo akɔ. Oma lâsɔ, ndjatshumoya ka l’otema ɔtɔi kaki lande akakonya dia Jehowa mbôka kɛtshi. Davidi akakondja wetshelo oma l’ohokwelo wakandalongola ndo nde akanyomonga la olowanyi nto lo tetemala kitanyiya Nzambi. Lɔsɛnɔ laki Davidi mɛnyaka mɛtɛ ka kɛnɛ kofundami lo Tukedi 24:16 lɛnɛ adiaso ɔnɛ: “Untu ololo atokokaka tena esambeli, ku ndi atunelaka ntu.” Etombelo akɔna wakayala? Tende kɛnɛ kakayotɛ Jehowa Sɔlɔmɔna lo dikambo dia Davidi l’ɔkɔngɔ wa nyɔi kande. (Adia 1 Khumi ya Dikanga 9:4.) Nzambi akohɔka Davidi oko onto laki la olowanyi. Lo mɛtɛ, Jehowa kokaka mbɛdia atshi wa pɛkato ya weke wayatshumoya oma lo pɛkato ya weke yakawasale.—Is. 1:18.
19 Eelo, lo kitanyiyaka Nzambi la ngandji tshɛ, sho kokaka monga anto walama olowanyi awɔ. Nyɛsɔ totetemale mbikikɛ la kɔlamelo tshɛ ndo naka tambosala pɛkato, toyatshumoya l’otema ɔtɔi. Olowanyi ekɔ mɛtɛ ɛngɔ ka nɛmɔ efula! Nyɛsɔ sho tshɛ toyashikikɛ oko wakayashikikɛ Davidi lakate ɔnɛ: ‘Dimi layɔkɛndakɛndaka lo olowanyi ami.’—Osam. 26:11.
[Nɔte ka l’ɛse ka dikatshi]
a Enda lo Tshoto y’Etangelo ya Ngɔndɔ ka sato 1, 2004, lɛkɛ 13, odingɔ 15.
Ngande wayoyokadimola?
• Ngande wakokaso monga la olowanyi?
• Lo toho takɔna takokaso nama olowanyi aso?
• Ngande wakokaso nyomonga nto la olowanyi?
[Kiombo ya lo lɛkɛ 8]
‘NDE MƐTƐ AKASALE DIKAMBO DIA DIMƐNA’
Womoto ɔmɔtshi laki la diemi dia ngɔndɔ tshanu akate ɛtɛkɛta wele la diko engo lo kɛnɛ kendana la lɔsɛngɔ ndo la olowanyi wakɔkɛnɛmɔlɛ womoto ɔmɔtshi lakinde kombeyaka. Nde aki lo dihole diakawasondjaka eloko, ndo akohɛ tshapatapa yande ya falanga lo dihole sɔ. Tshapatapa shɔ yaki la dɔlara 2 000, ndo ɔsɔ aki lofulo la falanga lakinde atɛngɔlaka lalɔ. Nde akayotɛka afundji wa jurnalɛ mɔtshi ate: “Dimi lakakɔmɔ demba kɔmɔ.” Koko, osekaseka ɔmɔtshi akatɔngɔna tshapatapa shɔ ndo akatatɛ nyanga kangayɔ aha la tshimbatshimba. Lam’ele nde komboshola, nde akatɔlɛ apulushi tshapatapa yakɔ, ko apulushi wakayosholaka womoto lakikɔ la diemi ɔsɔ. Womoto lakanga tshapatapa shɔ akate ate: “Ɔsɔ aki mɛtɛ dui dia dimɛna efula.” Lande na kakadje womoto ɔsɔ welo w’efula ɛsɔ dia kaloya falanga shɔ? Afundji wa jurnalɛ yakatatɛkɛtshi wakate dia oko wakinde Ɔmɛnyi wa Jehowa, nde “akɛnya olowanyi wa ngasɔ l’ɔtɛ w’ɔtɛmwɛlɔ wakandodiama lɔkɔ.”
[Osato wa lo lɛkɛ 9]
Kânga l’atei w’ehemba akɛnda kokaka nama olowanyi awɔ
[Osato wa lo lɛkɛ 10]
Davidi akashisha olowanyi ande l’etena kɛmɔtshi, koko akayonga la wɔ nto