Ɔtɛkɛta wa Jehowa wekɔ la lɔsɛnɔ
Akambo w’ohomba w’oma lo mikanda wa Joani ndo Jude
MIKANDA esato waki ɔpɔstɔlɔ Joani wakafundama ondo oma l’Ɛfɛsɔ lo 98 T.D., wekɔ l’atei w’abuku w’ekomelo wa lo Afundelo wakasambiyama oma le Nzambi. Mikanda ehende wa ntondo keketshaka Akristo dia tetemala kɛndakɛnda l’osase ndo ndɔshana la waa apɔsta. Lo mukanda wa sato, Joani akakeketsha Akristo dia vɔ kɛndakɛnda lo akambo wa mɛtɛ ndo dia vɔ kamba kâmɛ.
Lo mukanda ande wakandafunde la Palɛstinɛ, ondo lo 65 T.D., Jude y’ɔnango Yeso akewola asekande Akristo lo dikambo dia anto wa kɔlɔ wakasɔsɔmɛ l’etshumanelo ndo nde akawasha alako lo kɛnɛ kendana la woho wa ndɔshana la tɔsɛngiya ta kɔlɔ. Mbidja yimba lo losango lele lo mikanda esato waki Joani ndo mukanda waki Jude kokaka tokimanyiya dia sho tshikala nge lo mbetawɔ kânga l’atei w’ekakatanu.—Heb. 4:12.
TOTETEMALE KƐNDAKƐNDA L’OSASE, LO NGANDJI NDO LA MBETAWƆ
Mukanda wa ntondo wakafundɛ Joani etshumanelo k’otondo wekɔ la alako w’amɛna wele l’oyango wa kimanyiya Akristo dia vɔ shika tanga la ntondo ka wetshelo waki waa apɔsta ndo tshikala nge lo akambo wa mɛtɛ ndo lo losembwe. Nde akɛnya ohomba wa tetemala kɛndakɛnda l’osase, lo ngandji ndo la mbetawɔ.
Joani akafunde ate: “Naka shu tatokendakendaka lu yanyi, uku wendi lu yanyi, keti shu tambekesanela kame.” Ndo lam’ele Nzambi mbele Kiɔkɔ ya ngandji, ɔpɔstɔlɔ Joani akate ate: “Tukani ngandji.” Lam’ele “ngandji ka [Nzambi]” totshutshuyaka dia “nama elembe andi,” sho mbidjaka andja ɔnɛ otshumba oma lo “mbetawo kasu” le Jehowa Nzambi, l’Ɔtɛkɛta ande ndo le Ɔnande.—1 Joa. 1:7; 4:7; 5:3, 4.
Ekadimwelo lo ambola w’oma l’Afundelo:
2:2; 4:10—Ngande wele Yeso ‘olambo w’edimanyielo’? Dimanyiya nembetshiyaka “nimola” kana “komba.” Yeso akakimɔ lɔsɛnɔ lande oko olambo w’edimanyielo lo yoho nyɛ yele lo sala ngasɔ nde akadimola kana akakombe kɛnɛ kakalɔmbaka losembwe la kokele. Lo ekimanyielo ka olambo ɔsɔ, Nzambi kokaka fudia kɛtshi kande ndo dimanyiya wanɛ wele la mbetawɔ le Yeso pɛkato yawɔ.—Joa. 3:16; Romo 6:23.
2:7, 8—Ɔlɛmbɛ akɔna wakelɛ Joani ɔnɛ “w’edjedja” ndo “w’uyuyu”? Joani akatɛkɛtaka dikambo di’ɔlɛmbɛ wendana la ngandji ka ndjahombia ka lam’asa onto l’ɔnango. (Joa. 13:34) Nde akawelɛ ɔnɛ “w’edjedja” dikambo Yeso mbakasha ɔlɛmbɛ ɔsɔ ɛnɔnyi ndekana 60 la ntondo ka Joani funda mukanda ande wa ntondo wakasambiyama. Omalɔkɔ, ambetawudi waki la wɔ “uma l’etatelu” ka lɔsɛnɔ l’Okristo. Ɔlɛmbɛ ɔsɔ wekɔ nto ‘oyoyo’ lo yoho nyɛ yele vɔ ndeka ‘ngandji kokaso anyaso anto oko wayalangaso’ ndo vɔ nɔmbaka onto dia nde monga la ngandji ka ndjahombia.—Lew. 19:18; Joa. 15:12, 13.
3:2—Kakɔna kaki Akristo w’akitami ‘kɔmɛna,’ ndo onto akɔna ahombawɔ mɛna “uku wendi”? Kɛnɛ kakiwɔ kɔmɛna mɛtɛ ele woho wahombawɔ monga etena kolɔwɔ l’olongo l’alemba wa lo nyuma. (Fil. 3:20, 21) Koko, kɛnɛ keyawɔ ele “naka [Nzambi] ayene, [vɔ w]ayuyala uku ndi, ne dia [vɔ w]ayuwena uku wendi,” mbuta ate “Nyuma.”—2 Kor. 3:17, 18.
5:5-8—Ngande wakɛnya ashi, dikila ndo nyuma dia “Jesu eko On’a [Nzambi]”? Ashi wakɛnya dui sɔ nɛ dia etena kakabatizama Yeso l’ashi, Jehowa ndamɛ akate dia Nde mbetawɔka Yeso oko wende Ɔnande. (Mat. 3:17) Dikila diaki Yeso, kana lɔsɛnɔ lande lakakimɔma oko ‘tshungo kɛdimi dikambo di’anto tshɛ’ diakɛnyaka nto dia Yeso ekɔ Ɔnaki Nzambi. (1 Tim. 2:5, 6) Ndo nyuma k’ekila kakɛnya dia Yeso ekɔ Ɔnaki Nzambi etena kakataholɔ le nde lo batismu kande ndo tɔ kakokimanyiya dia kindola lo ngelo la ngelo “atatshi akambu w’ololo, atakonoya wane tshe wakasuyamaka le uhimbanyi.”—Joa. 1:29-34; Etsha 10:38.
Wetshelo le so:
2:9-11; 3:15. Naka Okristo mbetawɔ dia onto kana ɛngɔ kɛmɔtshi ndanya ngandji kokande anango, kete nde ekɔ lo kɛndakɛnda lo wodjima wa lo nyuma ndo nde heye lɛnɛ atandatshu.
TOTETEMALE ‘KƐNDAKƐNDA LO MƐTƐ’
Joani akatatɛ mukanda ande wa hende lo mbuta ɔnɛ: “Ekumanyi ambufundela umuntu losonami la an’andi.” Nde akɛnya ɔngɛnɔngɛnɔ waki lande lo tana “ana[nde] amotshi wakendakenda lu mete.”—2 Joa. 1, 4.
L’ɔkɔngɔ wa nde mbakeketsha dia vɔ monga la ngandji, Joani akafunde ate: “Ngandji keli okone, dia shu nkendakenda uku eli elembe andi.” Joani akewola nto lo kɛnɛ kendana la “ukesanyi, utunyi a Kristu.”—2 Joa. 5-7.
Ekadimwelo lo ambola w’oma l’Afundelo:
1, 13—Akɔna ele “umuntu losonami”? Ondo Joani akakambe la “Kyria,” tshɛkɛta ya lo Grɛkɛ yalembetshiya “womoto” dia tɛkɛta dikambo dia womoto ɔmɔtshi laki la lokombo lɔsɔ. Kana nde akakambe la tshɛkɛta ya didjidji dia fundɛ etshumanelo kɛmɔtshi l’oyango wa mbidja asoyanyi l’okandokando. Naka aki ngasɔ, kete ana waki womoto aki ase etshumanelo kakɔ ndo ‘ana wa kadiyɛnde’ wɔtɛkɛtami lo divɛsa di’ekomelo aki ase etshumanelo kekina.
7—‘Oyelo’ akɔna waki Yeso wakatɛkɛta Joani lo divɛsa nɛ, ndo ngande “wahetawo” akesanyi asɔ dui sɔ? Ɔsɔ kema ‘oyelo’ waki Yeso wa lo nshi yayaye wa lo yoho yahɛnama. Ɔsɔ ekɔ oyelo ande wa lo demba ndo woho wakandakitama esɔ oko Kristo. (1 Joa. 4:2) Akesanyi hawetawɔ oyelo ɔsɔ wa lo demba. Ondo vɔ mangunaka dia Yeso kɔsɛna kana hawetawɔ dia nde akakitama nyuma k’ekila.
Wetshelo le so:
2, 4. Woho wamboteya ‘akambo wa mɛtɛ,’ mbuta ate wetshelo tshɛ w’Akristo wele lo Bible ndo wakitanyiyaso wetshelo akɔ ekɔ ohomba efula dikambo dia panda kaso.—3 Joa. 3, 4.
8-11. Naka hatolange shisha ‘ngandji ka mamba, kɛtshi ndo wɔladi w’oma le Nzambi Shɛso ndo Yeso Kristo,’ ndo lɔngɛnyi la lam’asaso la anyaso ambetawudi, kete sho pombaka ‘ndjalama’ lo nyuma ndo tona wanɛ ‘wahatshikala lo wetshelo wa Kristo.’—2 Joa. 3.
TONGE “EKAMBI KAME . . . LU AKAMBU WA METE”
Joani akafundɛ ɔngɛnyi ande w’oshika Ngayo mukanda ande wa sato. Nde akafunde ate: “Dimi kema la ongenongeno ukina wuleki one, dia mbuka nti: An’ami watokendakendaka lu mete.”—3 Joa. 4.
Joani akandola Ngayo l’ɔtɛ wa “ulimu wa kolamelu” wakandasale lo membolaka anango. Ɔpɔstɔlɔ Joani akate ate: “Dieli la su dia mbalungula la ongenongeno, dia shu ndjala ekambi kame la wo lu akambu wa mete.”—3 Joa. 5-8.
Ekadimwelo lo ambola w’oma l’Afundelo:
11—Lande na konga anto amɔtshi la lɔkɛwɔ la kɔlɔ? Anto amɔtshi hawɛnyi Nzambi la washo awɔ wa lo nyuma, lo woho wewɔ kema nge lo nyuma. Lam’ele vɔ hawokoke mbɛna la washo awɔ wa mɛtɛ mɛtɛ, vɔ salaka akambo oko nde hawaɛnyi.—Ezek. 9:9.
14—Waa na wele “engenyi”? Tshɛkɛta “engenyi” yele lanɛ hendana tsho la monga la diɔtɔnganelo dia ma ma la anto akina, koko Joani akakambe la tshɛkɛta shɔ dia tɛkɛta dikambo dia anyande ambetawudi lo tshɛ kawɔ.
Wetshelo le so:
4. Anto wambotshunda lo nyuma wa lo etshumanelo wekɔ l’ɔngɛnɔngɛnɔ etena kɛnawɔ akɛnda “watokendakendaka lu mete.” Ande ɔngɛnɔngɛnɔ wa mamba wele l’ambutshi etena katondoyawɔ dia kimanyiya anawɔ dia vɔ koma ekambi waki Jehowa lee!
5-8. L’atei wa wanɛ wakamba la wolo lo wahɔ w’anangɛwɔ l’ɔtɛ wa ngandji kawaokawɔ ndo kokawɔ Jehowa mbele ndo emendji weteta, waa misiɔnɛrɛ, ase Bɛtɛlɛ ndo ambatshi mboka. Sunganaka mɛtɛ dia sho mbokoya mbetawɔ kawɔ ndo sho pombaka mbasukɛ la ngandji tshɛ.
9-12. Sho pombaka mbokoya ɛnyɛlɔ kaki Demetɛriyo laki la kɔlamelo, koko aha Diɔtɛrɛfɛ laki kanga kashi.
“NYUYALAMI LU NGANDJI KA [NZAMBI]”
Jude akelɛ wanɛ wakasɔsɔmɛ l’etshumanelo dia waki ‘anto watongunangunaka, watokiyanaka ndo watosalaka akambo lo ndjela nsaki yawɔ.’ Vɔ “watoteketaka aui wa wulu l’enyo awo, watandulaka antu dia nkundja waho.”—Jude 4, 16.
Ngande wakoka Akristo ndɔshana la tɔsɛngiya ta kɔlɔ? Jude akafunde ate: “Elangimi ami, nyuho aui wakati atumami wa Khumesu Jesu Kristu.” Nde akakotsha ate: “Nyuyalamaki lu ngandji ka [Nzambi].”—Jude 17-21.
Ekadimwelo lo ambola w’oma l’Afundelo:
3, 4—Lande na kakalɔmbɛ Jude Akristo dia vɔ ‘ndwɛ mbetawɔ kawɔ ta dia wolo’? Nɛ dia ‘anto wa kɔlɔ wakɔtɔ lo etshumanelo lo woshɛshɛ.’ Anto asɔ ‘wakakadimola ngandji ka mamba kaki Nzambi oko yɛkɛ nɛndɛ dia ndjakimɔ l’awui wa mindo.’
20, 21—Ngande wakokaso ‘ndjalama lo ngandji ka Nzambi’? Sho kokaka sala dui sɔ lo toho tosato: 1) Lo ndjaodiaka lo ‘mbetawɔ koleki ekila,’ lo mbeka Ɔtɛkɛta waki Nzambi l’etete ndo lo sambishaka l’ohetoheto; 2) lo nɔmbaka ‘la nyuma k’ekila,’ kana nɔmbwama la tɔ; ndo 3) lo monga la mbetawɔ lo olambo wa tshungo waki Yeso Kristo watokimanyiya dia kondja lɔsɛnɔ la pondjo.—Joa. 3:16, 36.
Wetshelo le so:
5-7. Onde anto wa kɔlɔ kokaka ndawɔ elombwelo ka Jehowa? Lo ndjela bɛnyɛlɔ sato diewola diashila Jude, dui sɔ hadiokoke salema.
8-10. Sho pombaka ndjela ɛnyɛlɔ kaki Mikayɛlɛ arkandjelo ndo nɛmiyaka anto wele Nzambi akawasha lowandji.
12. Waa apɔsta wata dia wekɔ la ngandji wekɔ wâle efula lo mbetawɔ kaso oko watongaka ave woshɛmi lo ashi wâle efula le masuwa. Embetsha wa kashi mbeyaka mɛnama dimɛna, koko vɔ wekɔ oko wange waha la ashi lo yoho nyɛ yele lo nyuma vɔ kema l’ɛngɔ. Anto asɔ wekɔ etamba waha la elowa wambovɔ l’eleko ka diye. Vɔ wayolanyema oko wahikwama otamba l’edio. Sho pombaka ndawɔ waa apɔsta.
22, 23. Akristo wa mɛtɛ mpetshaka kɛnɛ kele kɔlɔ. Lo welo wadjawɔ dia shimbɛ “wane wadja tamu” lo elanyelo ka pondjo, anto wambotshunda wa lo etshumanelo, djekoleko emendji wakasɔnama mbashaka ekimanyielo ka lo nyuma.
[Esato wa lo lɛkɛ 28]
Ashi, nyuma ndo dikila mɛnyaka dia “Jesu eko On’a [Nzambi]”