Onde Nzambi ekɔ onto la mɛtɛ?
Ekadimwelo washa anto efula:
◼ “Nde ekɔ lo dihole tshɛ ndo l’ɛngɔ tshɛ. Nde ekɔ oko lɔpɛpɛ.”
◼ “Nde ekɔ yimba mɔtshi yahatakoke nembetshiya kana wolo ɔmɔtshi wahɛnama.”
Kakɔna kakate Yeso?
◼ “Lu luudu la Papa eko mvudu efula.” (Joani 14:2) Yeso akate lo yoho ya didjidji ate: Nzambi ekɔ la luudu kana la dihole dia mbidjasɛ.
◼ “Dimi lakayi uma le Papa, lambuya la kete. Dimi layumo la kete, layukalula le Papa.” (Joani 16:28) Yeso aketawɔka dia Nzambi ekɔ onto la mɛtɛ ladjasɛ lo dihole dimɔtshi dia shikaa.
NDOKO lushi lakate Yeso dia Nzambi ekɔ wolo ɔmɔtshi wahɛnama. Koko, nde akasawolaka la Nzambi ndo akɔ̂lɔmbaka. Mbala efula nde akelɛka Jehowa ɔnɛ She lele l’olongo, tshɛkɛta yakakɛnɛmɔlaka diokanelo di’oshika diaki lam’asande la Nzambi.—Joani 8:19, 38, 54.
Ekɔ mɛtɛ dia “nduku untu lakenyi [Nzambi]” ndo “[Nzambi] eko nyuma.” (Joani 1:18; 4:24) Koko kɛsɔ hɛnya ɔnɛ Nzambi bu la woho ɔmɔtshi wa demba. Bible totɛka ɔnɛ: “Naka dimba ku dimba dieko, keti ndu dimba dia [lo] nyuma dieko.” (1 Koreto 15:44) Onde lâsɔ Jehowa ekɔ la demba dia lo nyuma?
Eelo. Etena kakolwama Yeso, nde “akoto l’ulungu, ne dia menama lu ashu a [Nzambi] dia dikambu diasu.” (Heberu 9:24) Dikambo sɔ tetshaka akambo ahende w’ohomba efula wendana la Nzambi. Ntondotondo, nde ekɔ la dihole diadjasɛnde. Dikambo dia hende, nde ekɔ Onto, koko aha wolo ɔmɔtshi waheyama nembetshiya wele l’ahole tshɛ.
Ko lâsɔ, ngande wakoka Nzambi mbeya kɛnɛ keta l’ahole tshɛ? Nzambi kokaka toma nyuma kande k’ekila, kana wolo ande wakamba olimu lo dihole tshɛ dia l’andja. Oko ombutshi wakamba la lonya lande dia samba ndo sukɛ anande, Nzambi kambaka la nyuma kande k’ekila dia kotsha sangwelo diande.—Osambu 104:30; 139:7.
Lam’ele Nzambi ekɔ Onto, nde ekɔ nto la lonto lɔmɔtshi, nde ekɔ l’akambo walangande ndo wahandalange ndo nde ekɔ la nsaki. Bible totɛka ɔnɛ nde mbokaka anto ngandji, ngɛnangɛnaka elimu ande, mpetshaka ɔtɛmwɛlɔ wa dikishi ndo ndjakiyanyaka lo dikambo di’akambo wa kɔlɔ. (Etatelu 6:6; Euhwelu k’Elembe 16:22; 1 Khumi ya dikanga 10:9; Osambu 104:31) Lo 1 Timote 1:11, nde mbelamɛka ɔnɛ: ‘Nzambi k’ɔngɛnɔngɛnɔ.’ Diakɔ diakate Yeso dia sho kokaka mbeka dia mboka Nzambi ngandji l’etema aso tshɛ!—Mako 12:30.a
[Nɔte ka l’ɛse ka dikatshi]
a Dia wɛ mbeya awui efula wendana la dikambo sɔ, enda tshapita 1 ya dibuku Bible etshatɔ mɛtɛ? diakatondjama oma le Ɛmɛnyi wa Jehowa.
[Efundelo wa l’etei w’odingɔ wa lo lɛkɛ 5]
Oko ombutshi wakamba la lonya lande, Nzambi kambaka la nyuma kande k’ekila dia kotsha sangwelo diande