‘Ɔna nangaka mbeyanya she’
“Nduku untu leya Ona, tshikima Papa. Ndu nduku leya Papa, tshikima Ona, ku Ona ayuwenya untu tshe lalangandi.”—LUKA 10:22.
NGANDE WAYOYOKADIMOLA?
Lande na kakeyanya Yeso She lo yoho yoleki anto tshɛ?
Ngande wakeyanya Yeso She?
Naa toho takokayɛ mbeyanya Jehowa l’ɛnyɛlɔ ka Yeso?
1, 2. Naa dimbola diatshindja anto efula wɔɔngɔ, ndo lande na?
‘ELE Nzambi?’ Dimbola sɔ tshindjaka anto efula wɔɔngɔ. Ɛnyɛlɔ, efula ka wanɛ wayata di’Akristo mbewɔ mbetawɔka wetshelo wa Losato l’osanto, koko vɔ mbutaka ɔnɛ wetshelo ɔsɔ wekɔ wolo nshihodia. Owandji ɔmɔtshi w’ɔtɛmwɛlɔ akate ate: “Wetshelo ɔsɔ ekɔ wetshelo wahakoke anto mana fundo.” Ndo nto, anto efula wetawɔ wetshelo w’ohilwelo mbutaka ɔnɛ Nzambi bu. Vɔ mbutaka dia diangɔ tshɛ diakahilɔ lohilɔ. Kânga mbakandetawɔka dia Nzambi ekɔ, Charles Darwin akate ate: “Lambɛna dia ndoko onto lakoka mbeya oseka vuiwui tshɛ yendana la nde.”
2 Oyadi dietawɔ diakɔna diele la wɔ, anto efula ndjambolaka dia kana Nzambi ekɔ. Koko lam’ele vɔ hawokondja ekadimwelo w’eshika, vɔ ndjotshikaka dia ntetemala nyanga ekadimwelo. Diakɔ diele, Satana “ambete waku wahetawo uku tutshungu lu tukanyi tawo.” (2 Kor. 4:4) Ɔnkɔnɛ, hatohombe mamba lo woho wele anto efula haweye mɛtɛ lo dikambo dia Nzambi Otungi w’andja w’otondo.—Is. 45:18.
3. a) Onto akɔna lakatokimanyiya dia sho mbeya Otungi? b) Ambola akɔna wayangaso nsɛdingola?
3 Lande na kele ekɔ ohomba efula di’anto mbeya mɛtɛ lo dikambo dia Nzambi? Nɛ dia paka wanɛ “[w]atetaka lukumbu la [Jehowa]” mbayoshimbamela. (Romo 10:13) Dia mbeta lokombo la Jehowa, sho pombaka mbêya dimɛna. Yeso Kristo akeyanya She nɛ dia nde akawaetsha akambo wendana la She. (Adia Luka 10:22.) Ko lande na kakeyanya Yeso She lo yɛdikɔ yoleki anto tshɛ? Ngande wakandasale dui sɔ? Ngande wakokaso mbôkoya lo mbeyanya lokombo la She? Nyɛsɔ tɔsɛdingole ambola asɔ.
YESO KRISTO MBELE L’AKOKA WOLEKI WA MBEYANYA SHE
4, 5. Lande na kaki Yeso l’akoka wa mbeyanya She lo yoho yoleki anto akina tshɛ?
4 Yeso akeyanya She lo yoho yoleki anto tshɛ. Lande na? Nɛ dia edja efula la ntondo ka diangɔ tshɛ tongama, nde akasɛnaka oko etongami ka lo nyuma l’olongo ndo oko “Ona etoi a [Nzambi].” (Joa. 1:14; 3:18) Ɔsɔ mɛtɛ aki dihole dia lânde. La ntondo k’oseka ɛngɔ tshɛ tongama, Ɔna akangɛngangɛnaka lale She ndo akeke awui efula wendana la nde ndo la waonga ande. Mbokɛmaka dia vɔ wakasawolaka dimɛna ndo wakokanaka ngandji k’efula l’edja k’ɛnɔnyi. (Joa. 5:20; 14:31) Ande ewo k’oshika kakakondja Yeso lo dikambo dia She lee!—Adia Kolosai 1:15-17.
5 Yeso akasɔnama dia monga yɛmba awui yaki She, mbuta ate “Diui dia [Nzambi].” (Eny. 19:13) Diakɔ diele paka nde mbakakoke mbeyanya She lo yoho yoleki anto akina tshɛ. Ofundji w’Evanjiliɔ wa Joani akakoke mɛtɛ mbuta ɔnɛ Yeso ekɔ “Diui” ndo ɔnɛ nde ekɔ “lu tulu ka Shi.” (Joa. 1:1, 18) Lo mbuta ɔnɛ Ɔna aki lo tolo ka She, ondo Joani akatɛkɛtaka dia mbekelo kɛmɔtshi kaki l’anto wa lo nshi yande lo wonya w’olelo. Etena kakayaka angɛndangɛnda la ngelo, vɔ wakahombaka mbidjasɛ suke suke nɛ dia dui sɔ diakâkimanyiyaka dia vɔ nsawola dimɛna. Ɔnkɔnɛ, woho waki Ɔna “lu tulu ka Shi” mɛnyaka dia nde akasawolaka la She lo yoho ya dimɛna efula.
6, 7. Ngande wakatahamaka diɔtɔnganelo diaki lam’asa Yeso la She?
6 Diɔtɔnganelo diaki lam’asa Yeso la She diakatahamaka yema yema. Ɔna “akangenangenaka la ntundu [ka Nzambi] tena tshe.” (Adia Tukedi 8:22, 23, 30, 31.) Ɔnkɔnɛ, sho kokaka mbuta l’eshikeko tshɛ ɔnɛ vɔ waki la diɔtɔnganelo dia ma ma etena kakawakambaka kâmɛ ndo Ɔna akokoya waonga waki She. Nde akɛnyi kɛnɛ kakasalaka Jehowa dia ntonga ditongami dikina ndo nde akaleke nshihodia lonto lande.
7 Woho wakadje Satana lowandji laki Jehowa tɔfwɛfwɛ akasha Yeso diaaso dia mɛna woho wɛnya Jehowa ngandji, losembwe, lomba ndo wolo ande etena kakandakandolaka tɔfwɛfwɛ tɔsɔ. Dui sɔ diakakimanyiya Yeso dia nde ndjotondoya ehemba tshɛ wakandakoke ndjohomana la wɔ l’olimu w’esambishelo.—Joa. 5:19.
8. Kakɔna kalekaso nshihodia l’ekimanyielo k’ɛkɔndɔ wa l’Evanjiliɔ?
8 Lam’ele Yeso akatôngi la diɔtɔnganelo dia ma ma nde la Jehowa, nde akayoweyanya le anto wa la nkɛtɛ lo yoho yahakokaki onto okina nsala. Shi yoho yoleki dimɛna yakokaso mbeya Jehowa ele mbidja yimba lo yoho yaketsha ndo yakasale Ɔnande ɛtɔi akambo? Tɔshi ɛnyɛlɔ kɛnɛ: Onde wɛ kokaka nshihodia kitshimudi ya tshɛkɛta “ngandji” dimɛna dimɛna lo ndjadia tsho lo diksiɔnɛrɛ? Ndooko. Koko naka wɛ nkana yimba lo ɛkɔndɔ watɛkɛta di’olimu wakakambe Yeso wa l’Evanjiliɔ ndo lo woho wakandakimanyiyaka anto akina la ngandji tshɛ, kete wɛ ayoshihodia dimɛna dimɛna etelo k’ɔnɛ “[Nzambi] eli ngandji.” (1 Joa. 4:8, 16) Woho akɔ wâmɛ mbakokaso mbuta ndo dia waonga akina waki Nzambi wakakɛnɛmɔlɛ Yeso ambeki ande etena kakinde la nkɛtɛ.
WOHO WAKEYANYA YESO SHE
9. a) Lo toho tohende takɔna takeyanya Yeso She? b) Sha ɛnyɛlɔ kɛnya woho wakeyanya Yeso She oma lo wetshelo ande.
9 Ngande wakeyanya Yeso She le ambeki ande? Lo toho tohende tɔnɛ: Lo wetshelo ndo lo lɔkɛwɔ lande. Nyɛsɔ tɔsɛdingole ntondotondo wetshelo wa Yeso. Wetshelo ɔsɔ wakɛnya dia nde akeyaka tokanyi, nsaki ndo mboka yaki She lo yoho ya kokele. Ɛnyɛlɔ, Yeso akɛdika She l’olami w’ɛkɔkɔ wambotshɔ dia toyanga ɔkɔkɔ ɔtɔi wakashishɔ. Nde akate ate: “Ongenongeno andi le one wushishwi, ayuleka ongenongeno andi le akumi divwa la divwa wahashishwi.” Wetshelo akɔna wakawasha Yeso oma lo wɛɛla ɔsɔ? Nde akate ate: “[Woho akɔ wâmɛ mbele] Shenyu leli l’ulungu halangi nduku kiendakenda mvo.” (Mat. 18:12-14) Wetshelo akɔna wakokaso nkondja oma lo wɛɛla ɔsɔ lo dikambo dia Jehowa? Kânga mbakokayɛ ndjaoka lo tena dimɔtshi oko onto l’anyanya ndo lahadjama yimba, eya dia Shɛso lele l’olongo ndjakiyanyaka lo dikambo diayɛ ndo ayokokimanyiya. Nde kɔ̂saka oko “kiendakenda” yahandakombola dia yɔ mvɔ.
10. Ngande wakeyanya Yeso She oma lo lɔkɛwɔ lande?
10 Yoho ya hende yakeyanya Yeso She le ambeki ande ele oma lo lɔkɛwɔ lande. Etena kakambola ɔpɔstɔlɔ Filipɛ ɔnɛ “utenya Shesu,” Yeso akate l’eshikikelo tshɛ ɔnɛ: “One lakamenyi, akenyi Papa.” (Joa. 14:8, 9) Nyɛsɔ tɔsɛdingole waaso amɔtshi wakakɛnɛmɔla Yeso waonga waki She. Etena kakɔlɔmbɛ pami “[k]aki la sudi dimba tshe” dia nde mbɔkɔnɔla, Yeso akawonanda ndo akawotɛ ate: “Dimi nangaka, okono.” Aha la tâmu, pami kaki la sudi kɛsɔ akashihodia ɔnɛ Yeso akɔkɔnɔya l’ekimanyielo ka Jehowa. (Luka 5:12, 13) Ndo nto, l’ɔkɔngɔ wa nyɔi ka Lazaro, ambeki waki Yeso wakɛnyi kɛtshi ka Jehowa ‘etena kakakumaka Yeso akumu ndo kakandalelaka.’ Kânga mbakandeyaka ɔnɛ nde ayanga mbolola Lazaro, nde lawɔ akoke kandji kaki l’ase nkumbo ka Lazaro ndo angɛnyi ande. (Joa. 11:32-35, 40-43) Ondo wɛ ekɔ l’ɔkɔndɔ ɔmɔtshi wa lo Bible walekayɛ nanga wakokimanyiya dia mɛna woho wakakɛnɛmɔla Yeso kɛtshi ka Jehowa oma l’etsha ande.
11. a) Dionga diakɔna diaki Jehowa diakakɛnɛmɔla Yeso etena kakandatshanya anto oma lo tɛmpɛlɔ? b) Ekeketshelo kakɔna kakondjaso oma l’ɔkɔndɔ ɔsɔ?
11 Ko oko le yɛ, dionga diakɔna diakakɛnɛmɔla Yeso etena kakandatshanya anto oma lo tɛmpɛlɔ? Ohɔsa dia wɛ ekɔ la Jerusalɛma. Ɛnyiyɛ nganɛ ko Yeso ambɔsa lofimbɔ ndo ambotatɛ mbitshanya wanɛ wasondja ngɔmbɛ l’ɛkɔkɔ lo tɛmpɛlɔ. Nde ambohandjola falanga y’ekenga y’amengodi ndo ambɔkɔsha mɛsa awɔ. (Joa. 2:13-17) Dihonga diaki la Yeso sɔ diakohola ambeki ande prɔfɛsiya ka Davidi kata ɔnɛ: “Ngandji k’utamanya kukami etemwelo kaye kambundjaka.” (Osam. 69:9) Lo mbitshanya anto wa kɔlɔ asɔ oma lo tɛmpɛlɔ, Yeso akɛnya dia nde akalomɔlomɔka dia mamɛ ɔtɛmwɛlɔ wa mɛtɛ. Onde wɛ ambɛna dionga diaki Jehowa diakakɛnɛmɔla Yeso? Ɔkɔndɔ ɔsɔ toholaka dia Nzambi ekɔ la wolo wahadjama anya wa minya akambo wa kɔlɔ tshɛ ndo nde nomɔlomɔka dia nsala dui sɔ. Ɔkɔndɔ ɔsɔ wɛnya dihonga diaki la Yeso la ntondo k’akambo wa kɔlɔ tɛnyaka woho wayaoka Jehowa etena kɛndande akambo wa kɔlɔ wambokita dikuma lo nkɛtɛ k’otondo ɛlɔ kɛnɛ. Dui sɔ tokeketshaka dia sho ntetemala ndɔshana la wɛngiya.
12, 13. Wetshelo akɔna wakondjaso oma le Jehowa lo woho wakasalɛka Yeso ambeki ande akambo?
12 Kakianɛ, aya sho sɛdingolaka woho wakasalɛka Yeso ambeki ande akambo. Vɔ wakatetemala nkakatana dia mbeya ɔnɛ lakaleke woke l’atei awɔ. (Mako 9:33-35; 10:43; Luka 9:46) Lam’ele Yeso akasɛnɛ edja efula l’olongo kâmɛ la She, nde akeyaka dia Jehowa tonaka akanga wa lotamanya. (2 Sam. 22:28; Osam. 138:6) Ndo nto, nde akɛnyi otako waki la Satana Diabolo. Satana akalangaka di’anto mbɔtɛmɔla lo dihole dia Nzambi. Ɔnkɔnɛ, Yeso akanyange efula etena kakandɛnyi ambeki ande la dionga sɔ. Kânga apɔstɔlɔ ande waki l’otako polo ndo l’ekomelo ka lɔsɛnɔ lande la la nkɛtɛ. (Luka 22:24-27) Koko Yeso akatetemala mbangola la lotutsha tshɛ ndo nde koshisha elongamelo k’ɔnɛ vɔ wayoyoyalowanya ndo ndjonga l’okitshakitsha.—Fil. 2:5-8.
13 Onde wɛ ambɛna dionga diaki Jehowa diakakɛnɛmɔla Yeso etena kakandakimanyiyaka ambeki ande dia vɔ ntshika dionga dia kɔlɔ diaki la wɔ? Onde wɛ ambɛna woho wakokoya Yeso Jehowa lahasɛkɛ ekambi ande kânga mbasalawɔ wandja mbala la mbala? Shi woho wele Nzambi la waonga w’amɛna wa ngasɔ totshutshuyaka dia ndjatshumoya etena kasalaso munga?
ƆNA AKEYANYA SHE LA LOLANGO TSHƐ
14. Ngande wakɛnya Yeso ɔnɛ nde akalangaka mbeyanya She?
14 Otshikitanyi l’ewandji wa hiadi washɛ ambolami awɔ awui efula wahombawɔ mbeya l’oyango wa mbasɔkisha, Yeso akewoyaka anto akina akambo wendana la She. (Adia Mateu 11:27.) Ndo nto, nde akasha ambeki ande “yimba ya nimbitela one lele mete,” mbuta ate Jehowa Nzambi. (1 Joa. 5:20) Kakɔna kalembetshiya dui sɔ? Diɔ nembetshiyaka dia Yeso akakimanyiya ambeki ande dia vɔ nshihodia wetshelo wendana la She. Nde kombashɛ akambo wendana la She ndo nde kosukɛ wetshelo wa kashi w’ɔnɛ Nzambi ekɔ Losato l’osanto.
15. Lande na kakatone Yeso dia mbutɛ ambeki ande oseka vuiwui tshɛ yendana la She?
15 Onde Yeso akasholɛ ambeki ande oseka vuiwui tshɛ yendana la She? Kema. (Adia Joani 16:12.) Ko lande na? Nɛ dia l’etena kɛsɔ, ambeki ande ‘komonga l’akoka wa nshihodia’ awui asɔ tshɛ. Oko wakadiɛnya Yeso, ambeki ande wakayoshihodiaka awui efula l’ɔkɔngɔ diko etena kakandâtomɛ “ukimanyidi,” mbuta ate nyuma k’ekila kakayalɔmbɔla “lu akambu wa mete tshe.” (Joa. 16:7, 13) Oko wakoka ombutshi wa lomba ntona dia mbutɛ ɔnande akambo amɔtshi etena kekende dikɛnda l’ɔtɛ wende bu l’akoka wa mbashihodia, Yeso akalange di’ambeki ande tokotshunda ndo tokonga l’akoka dia nde ndjowatɛ awui amɔtshi wendana la She. Nde akadje yimba l’elelo waki la wɔ.
TOKOYA YESO LO NKIMANYIYA ANTO AKINA DIA VƆ MBEYA JEHOWA
16, 17. Lande na kahombaso nsambisha akambo wendana la Nzambi?
16 Naka wɛ mbeyaka onto ɔmɔtshi dimɛna ndo ngɛnangɛnaka waonga ande, shi wɛ ayotɛ anto akina awui wendana la nde? Etena kakinde la nkɛtɛ, Yeso akasambisha awui efula wendana la She. (Joa. 17:25, 26) Shi ndo sho lawɔ pombaka mbôkoya lo nsambisha anto akina awui wendana la Jehowa?
17 Oko wakatashidi diɛna, Yeso akeyaka She lo yoho yoleki oseka onto tshɛ. Diakɔ mbakandeyanya Nzambi ndo mbakandetsha ambeki ande lonto lande. Shi ndo sho lawɔ Yeso kokaka tokimanyiya dia nshihodia awui efula wendana la She lo yoho yahakoke anto efula wa l’andja ɔnɛ mbeya? Ande lowando lele la so le Yeso lo woho wakandeyanya She le so oma lo wetshelo ndo lo lɔkɛwɔ lande lee! Lo mɛtɛ, sho ngɛnangɛnaka mbeya awui efula wendana la Nzambi. (Jer. 9:24; 1 Kor. 1:31) Naka sho nsala la wolo dia ndjasukanya la Jehowa, kete nde ayoyasukanya la so. (Jak. 4:8) Ɔnkɔnɛ, tekɔ la diɛsɛ dia nsambisha akambo weyaso lo dikambo dia Nzambi. Ngande wakokaso nsala dui sɔ?
18, 19. Naa toho takokayɛ mbeyanya Jehowa? Lembetshiya.
18 Sho pombaka mbokoya Yeso ndo nsambisha akambo wendana la She oma l’ɛtɛkɛta ndo oma lo lɔkɛwɔ laso. Teye di’anto efula wahomana la so l’esambishelo haweye Nzambi. Wetshelo wa kashi wetshamawɔ hawasha diaaso dia mbêya. Sho kokaka mbaɛnya lokombo la Nzambi, sangwelo diande lo dikambo dia nkɛtɛ ndo waonga ande lo nkamba la Bible. Ndo nto, sho kokaka nkɛtshanya kâmɛ l’asekaso ambetawudi ɛkɔndɔ ɛmɔtshi wa lo Bible wɛnya dionga dimɔtshi diaki Nzambi diakiso koshihodiaka ntondo. Naka sho nsala ngasɔ, kete ndo vɔ lawɔ wayokondja wahɔ.
19 Ko ngande wakokaso nsambisha anto akina akambo wendana la Nzambi oma lo lɔkɛwɔ laso etena kasalaso la wolo dia mbokoya Yeso? Naka sho mɛnya ngandji ka Kristo oma lo lɔkɛwɔ laso, kete wanyaso anto wayoyasukanya la nde ndo la She. (Ef. 5:1, 2) Ɔpɔstɔlɔ Paulo akatokeketsha ate: “Nyumbukuyaki, uku wukuyami Kristu.” (1 Kor. 11:1) Ande diɛsɛ diele la so dia nsambisha awui wendana la Jehowa oma lo lɔkɛwɔ laso lee! Ɔnkɔnɛ, nyɛsɔ totetemale mbokoya Yeso lo mbeyanya She.