Toke washo aso lo difuto
“Dimi lambusamanya utsha lu dihuli diatamatshu, dia nungula difutu.”—FIL. 3:14.
1. Difuto diakɔna diakakongɛka ɔpɔstɔlɔ Paulo?
ƆPƆSTƆLƆ Paulo, lakelamɛka nto ɔnɛ Saulo ka la Taraso, akotɔ lo nkumbo kaki la lokumu. Ombetsha w’Ɛlɛmbɛ wa lokumu wakawelɛka Ngamaliyɛlɛ akawetsha awui wendana la ɔtɛmwɛlɔ wa watshɛnde. (Etsha 22:3) Paulo aki la olimu wakɔsamaka le anto efula oko olimu wa dimɛna, koko nde akoke ɔtɛmwɛlɔ ande ɔkɔngɔ ndo akayokoma Okristo. Oma lâsɔ, nde akatatɛ kongɛ difuto dia lɔsɛnɔ la pondjo la ɔngɛnɔngɛnɔ, mbuta ate difuto dia monga nkumekanga ndo ɔlɔmbɛdi wahavu lo Diolelo dia l’olongo diaki Nzambi. Diolelo sɔ diayolɛ lâdiko dia nkɛtɛ kayokadimɔ paradiso.—Mat. 6:10; Eny. 7:4; 20:6.
2, 3. Ngande wakɔsaka Paulo difuto dia lɔsɛnɔ la l’olongo?
2 Lo mɛnya woho wakandɔsaka difuto sɔ la nɛmɔ, Paulo akate ate: “Keli akambu waki waho le mi, akambu aso lambuwaete anyanya dikambu dia Kristu. Mete, dimi lambete diango so tshe anyanya dia ololo wa nimbitela Kristu Jesu Khumemi. Dimi lakashisha diango tshe dikambu diandi, lambudiala uku diango dia mbikadja, dia dimi kundja Kristu.” (Fil. 3:7, 8) Akambo wɔsa anto efula oko akambo w’ohomba, ɛnyɛlɔ ɔngɛnyi, olimu wa dimɛna, lokumu, Paulo akawaɔshi oko diangɔ di’anyanya l’ɔkɔngɔ wa nde mbeka akambo wa mɛtɛ wendana la sangwelo diaki Jehowa lo dikambo di’anto.
3 Oma k’etena kɛsɔ, kɛnɛ kaki mɛtɛ ohomba le Paulo aki ewo k’oshinga wolo ka Jehowa ndo ka Kristo, kakalɔmbɛ Yeso le Nzambi lo dikambo dia tɔ ɔnɛ: ‘Lɔsɛnɔ la pondjo lɔnɛ, ele weke dia nkeya wɛmɛ Nzambi ɔtɔi ka mɛtɛ la Yeso Kristo lakayatome.’ (Joa. 17:3) Nsaki k’oma k’ɛse otema kaki la Paulo ka kondja lɔsɛnɔ la pondjo mɛnamaka hwe lo ɛtɛkɛta wofundami lo Filipi 3:14 wata ɔnɛ: “Dimi lambusamanya utsha lu dihuli diatamatshu, dia nungula difutu dia leta l’uma l’ulungu, lakambeti [Nzambi] le Kristu Jesu.” Eelo, nde akake washo ande lo difuto dia lɔsɛnɔ la pondjo l’olongo oko ɔmɔtshi la lo Diolelo diaki Nzambi.
Lɔsɛnɔ la pondjo la nkɛtɛ
4, 5. Difuto diakɔna diayolongola miliyɔ y’anto wasala lolango laki Nzambi ɛlɔ kɛnɛ?
4 Le efula k’anto wasɔna dia sala lolango laki Nzambi, vɔ pombaka sala la wolo dia kondja difuto diendana la lɔsɛnɔ la pondjo lo andja w’oyoyo waki Nzambi. (Osam. 37:11, 29) Yeso akɛnya dia elongamelo kɛsɔ kekɔ ka shikaa. Nde akate ate: “Wane weli la memakana, weko la otshoko, ne dia vo wayukita kete.” (Mat. 5:5) Yeso ndamɛ mbaki onto la ntondo lakahombe kita nkɛtɛ oko wadiɛnya Osambu 2:8 ndo nde ayolɛ kâmɛ la anto 144 000 l’olongo. (Dan. 7:13, 14, 22, 27) Anto wele oko ɛkɔkɔ asɔ wasɛna la nkɛtɛ ‘wayokita’ Diolelo ‘diakawalɔngɔsɔlɛ oma k’etatelo k’andja.’ (Mat. 25:34, 46) Tekɔ la eshikikelo dia akambo asɔ tshɛ wayokotshama nɛ dia Nzambi lasha alaka asɔ “heyi mvuta kashi.” (Tito 1:2) Sho kokaka monga la eshikikelo kele oko kɛnɛ kaki la Jashua lo ekotshamelo k’alaka waki Nzambi etena kakandatɛ ase Isariyɛlɛ ɔnɛ: “Nyu mbeyaka l’etema anyu ndu lu nyumu yanyu tshe nyati: nduku dikambu diakati [Jehowa Nzambi k]anyu, lu dikambu dianyu, diahatatshama.”—Jas. 23:14.
5 Lɔsɛnɔ la lo andja w’oyoyo waki Nzambi halotonga oko lɔnɛ la kɔlɔ lele ɛlɔ kɛnɛ. Lɔ layotshikitana la lɔsɛnɔ lele ɛlɔ kɛnɛ efula: anto wayotshungɔ oma l’ata, oma l’awui wa ngala, oma lo wola, oma lo wɛngiya, oma lo hemɔ ndo oma lo nyɔi. Oma lâsɔ, anto wayonga l’alemba wa kokele ndo wayɔsɛna la nkɛtɛ kayokadimɔ paradiso. Ɔsɔ ayonga lɔsɛnɔ la dimɛna efula ndeka ndo woho walongamɛso. Eelo, lushi tshɛ layongaka lushi la ɔngɛnɔngɛnɔ. Ande difuto dia diambo lee!
6, 7. a) Ngande wakɛnya Yeso kɛnɛ kalongamɛso dia tɔ kayosalema lo andja w’oyoyo waki Nzambi? b) Ngande wayokoka kânga anto wakavu monga nto la etatelo ka dimɛna?
6 Etena kaki Yeso la nkɛtɛ, nyuma k’ekila kaki Nzambi kakawosha wolo dia nde mɛnya woho w’akambo wa diambo wayosalema lo nkɛtɛ k’otondo lo andja w’oyoyo. Ɛnyɛlɔ, Yeso akatɛ pami kɛmɔtshi kaki ekuse lo edja k’ɛnɔnyi 38 dia nde kɛndakɛnda. Bible mbutaka dia pami kɛsɔ akakɛndakɛnda. (Adia Joani 5:5-9.) Lo diaaso dikina, Yeso akahomana la “untu lakuto tshungu” ko nde akɔkɔnɔla. L’ɔkɔngɔ diko, wakayombolaka pami kaki tshungu kɛsɔ lo kɛnɛ kendana la onto lakɔkɔnɔla ko nde akakadimola ate: “Umak’etatelu k’andja, watuki dikambu dia untu lakasenya ashu wa untu lakuto tshungu. Utunduyala untu one kema uma le [Nzambi], tshiki ndi heyi ntsha nduku dikambu.” (Joa. 9:1, 6, 7, 32, 33) Yeso akakoke sala akambo asɔ tshɛ nɛ dia Nzambi mbakawosha wolo. Lo ahole tshɛ wakandatshu, Yeso “akakonoya wane wakahumbi nkono.”—Luka 9:11.
7 Yeso kɔkɔnɔla tsho anto waki la hemɔ ndo waki la dikɔmɔ, koko nde akakoke mbolola ndo wanɛ wakavu. Tɔshi ɛnyɛlɔ k’ɔna womoto ɔmɔtshi l’ɛnɔnyi 12 lakavu ndo lakatshike ambutshi ande la lonyangu l’efula. Koko Yeso akate ate: “Ona umuntu, lambukutela nti: Eto.” Ko nde aketɔ! Onde wɛ kokaka kanyiya ɔngɛnɔngɛnɔ waki la ambutshi w’ɔna womoto ɔsɔ ndo anto akina wakɛnyi dikambo sɔ? (Adia Mako 5:38-42.) Lo andja w’oyoyo waki Nzambi, ‘ɔngɛnɔngɛnɔ wayonga efula’ etena kayolɔ miliyara y’anto nɛ dia “eulwelu k’antu w’ololo la antu wa kolo uma lu nyoi kayuyala.” (Etsha 24:15; Joa. 5:28, 29) Anto asɔ wayonga la etatelo ka dimɛna ndo la elongamelo ka nsɛna pondjo pondjo oma k’etena kɛsɔ.
8, 9. a) Lo Ɛlɔmbwɛlɔ kaki Kristo k’ɛnɔnyi kinunu, kakɔna kayokomɛ pɛkato kakatahowɔ oma le Adama? b) Wanɛ wakavu wayolomboshama lo ndjela akambo akɔna?
8 Wanɛ wayolɔ wayonga la diaaso dia vɔ kondja lɔsɛnɔ. Vɔ hawotanyema l’ɔtɛ wa pɛkato yakawasale la ntondo ka vɔ mvɔ. (Romo 6:7) Lo ekimanyielo k’olambo wa tshungo, lo Ɛlɔmbwɛlɔ kaki Kristo k’ɛnɔnyi kinunu, ambolami wele l’okitanyiya wa Diolelo diaki Nzambi wayotakomaka kokele yema yema, edja ndo etena kayowotshungɔ oma lo tɔsɛngiya tshɛ t’oma lo pɛkato kaki Adama. (Romo 8:21) Jehowa ‘ayonya nyɔi pondjo ndo Nkumadiɔndjɔ Jehowa ayokitola asɔi tshɛ oma lo washo awɔ.’ (Is. 25:8) Ɔtɛkɛta waki Nzambi mbutaka nto dia ‘wɛɔmbɔ w’abuku’ wayofɔma, lo mɛnya dia wanɛ wayɔsɛna lo etena kɛsɔ wayetshama akambo w’eyoyo. (Eny. 20:12) Etena kayokadimɔma nkɛtɛ paradiso, “antu wa l’andja tshe wa[y]ekaka sambu k’ololo.”—Is. 26:9.
9 Anto wayolɔ hawotolomboshama lo ndjela pɛkato kakawahowɔ oma le Adama, koko lo ndjela kɛnɛ kayowɔsɔna vɔamɛ dia sala. Enyelo 20:12 mbutaka ɔnɛ: “Wakalumbuya antu wakavu uma l’akambu wakafundama lu abuku, uku waki etsha awo,” mbuta ate akambo wayowosala l’ɔkɔngɔ wa vɔ mbolɔ. Ande ɛnyɛlɔ ka diambo ka losembwe, kɛtshi ndo ngandji kaki Jehowa lee! Ndo nto, asui wa lo lɔsɛnɔ lawɔ la lo andja w’edjedja “wayuhamamela, hawu[t]uhwama ntu.” (Is. 65:17) Lo menda awui w’eyoyo wayowetshama ndo lɔsɛnɔ loludi l’akambo w’ɛlɔlɔ layonga la wɔ, vɔ hawotonga la lonyangu nto l’ɔtɛ w’akambo wa kɔlɔ wa lo nshi yakete. Vɔ wayohɛ akambo wa kɔlɔ asɔ tshɛ. (Eny. 21:4) Ngasɔ mbakokadiɔ mbutama ndo lo dikambo dia “ului a wuki” wayohanda lo Aramangɛdɔna.—Eny. 7:9, 10, 14.
10. a) Ngande wayonga lɔsɛnɔ lo andja w’oyoyo waki Nzambi? b) Kakɔna kakokayɛ sala dia tetemala mbika washo ayɛ lo difuto?
10 Lo andja w’oyoyo waki Nzambi, anto hawototata nto koyanga mvɔ. “Nduku untu ludjashi la Jerusalema ayuta ati: Dimi la kandji!” (Is. 33:24) L’edjedja ka wonya, anto wayɔsɛna lo nkɛtɛ k’oyoyo wayemɔka pindju tshɛ wele l’alemba w’amɛna ndo la elongamelo ka mɛna lushi la diambo lokina l’oyoyo. Vɔ wayolongamɛ dia kamba olimu w’ɔlɔlɔ ndo mbekesanɛ la anto wayakiyanya dikambo dia wahɔ awɔ. Lɔsɛnɔ la ngasɔ lekɔ difuto dia diambo efula mɛtɛ! Tambokɔlɔmba dia wɛ mbifola Bible kayɛ lo prɔfɛsiya yatanema lo Isaya 33:24 ndo 35:5-7. Onga oko onto lɛna akambo wasalema. Kɛsɔ ayokokimanyiya dia wɛ mbika washo ayɛ lo difuto.
Anto amɔtshi waki kombika washo awɔ lo difuto
11. Lembetshiya etatelo ka dimɛna kakonge la ɛlɔmbwɛlɔ kaki Sɔlɔmɔna.
11 Kam’ekaso akambo wendana la difuto, sho pombaka tetemala mbika washo lo difuto diaha sho ndjonya washo oma lɔkɔ. Ɛnyɛlɔ, etena kakakome Sɔlɔmɔna nkumekanga k’Isariyɛlɛ w’edjedja, nde akalɔmbɛ Nzambi la okitshakitsha tshɛ dia nde mbosha yimba ndo shɛnɔdi dia nde mbeya nomboshaka wodja Ande dimɛna. (Adia 1 Khumi ya Dikanga 3:6-12.) Lo ndjela Bible, etombelo wakayala ele: “[Nzambi] akasha Solomona yimba la ewu ka mamba.” Lo mɛtɛ, “[lomba la] Solomona [l]akaleki tumba t’antu tshe wa lu leke l’ehutwelu la tumba tshe t’asi Edjibitu.”—1 Khum. 4:29-32.
12. Ɔhɛmwɛlɔ akɔna wakasha Jehowa wanɛ wakahombe ndjonga nkumi ya dikanga l’Isariyɛlɛ?
12 Yema l’etatelo, Jehowa akate dia onto tshɛ lakahombe monga nkumekanga “tayafudiaki falasa” ndo ɔnɛ nde “tayalaki la wadi efula, ne dia utema andi atukuyukadimo.” (Euh. 17:14-17) Monga la falasa efula akɛnyaka dia nkumekanga akayaɛkɛka lo wolo w’alembe ande dia kokɛ wodja lo dihole dia nde ndjaɛkɛ le Jehowa, Okokedi ande. Ndo monga la wadi efula aki wâle efula nɛ dia amɔtshi l’atei awɔ wakakoke ndja oma lo wedja w’apanganu wakâdinge, wanɛ wakatɛmɔlaka tozambizambi ta kashi ndo wamato asɔ wakakoke ndjotakoya nkumekanga mboka diaha nde tɛmɔla Jehowa.
13. Ngande wakanya Sɔlɔmɔna yimba oma lo ɛlɛmbɛ wakawawosha?
13 Sɔlɔmɔna kokamba la ɛhɛmwɛlɔ ɛsɔ. Koko nde akasale paka kɛnɛ kakashimbe Jehowa dia nkumekanga kisala. Nde akayamɔtshiya nunu dia falasa ndo dia ambahemi ayɔ. (1 Khum. 4:26) Ndo nto, nde aki la wadi 700 la eseka 300 ndo efula ka l’atei awɔ, nde akâtshuke oma lo wedja w’apanganu wakâdinge. Wamato asɔ “wakenge utema andi utsha le ditemolatemola. Ku utema andi kundjala tshe le [Jehowa Nzambi k]andi.” Sɔlɔmɔna akayakimɔ lo ɔtɛmwɛlɔ wa kashi wa mindo wa wedja w’apanganu wakatɛmɔlaka wadiɛnde. L’ɔtɛ wa dikambo sɔ, Jehowa akayotɛ Sɔlɔmɔna ate: “Layunya diulelu uma l’anya aye.”—1 Khum. 11:1-6, 11.
14. Etombelo akɔna wakonge la ohedia waki Sɔlɔmɔna ndo wa wodja w’Isariyɛlɛ?
14 Sɔlɔmɔna kotetemala mbika washo lo diɛsɛ dia lânde diaki la nde dia monga onyimpala wa Nzambi ka mɛtɛ. Nde akayasha tshɛ lo ɔtɛmwɛlɔ wa kashi. L’edjedja ka wonya, wodja w’otondo wakayokomaka waa apɔsta ndo wakayolanyemaka lo 607 N.T.D. l’ɔtɛ wa dikambo sɔ. Kânga mbakayolola ase Juda ɔtɛmwɛlɔ wa mɛtɛ, Yeso akayotshutshuyama dia mbuta ntambe efula l’ɔkɔngɔ ate: “Wayunyokosola diulelu dia [Nzambi], ku wayudisha wudja watotokaka elua adio.” Kɛsɔ mbakasalema nɛ dia Yeso akayota ate: “Enda, wambunyutshikela khumbu kanyu anyanya.” (Mat. 21:43; 23:37, 38) Wodja w’Isariyɛlɛ wakashisha diɛsɛ dia woke diaki la wɔ dia monga onyimpala wa Nzambi ka mɛtɛ l’ɔtɛ wakawashisha kɔlamelo yawɔ. Lo 70 T.D., alembe w’ase Rɔma wakalanya Jerusalɛma ndo tɛmpɛlɔ kayɔ ndo efula l’atei wa wanɛ wakatshikala la lɔsɛnɔ wakakome ɛhɔmbɔ.
15. Sha bɛnyɛlɔ di’apami waki kombika washo awɔ lo kɛnɛ kaki mɛtɛ ohomba.
15 Judasɛ Isakariyɔtɛ aki ɔmɔtshi l’atei w’apɔstɔlɔ 12 waki Yeso. Judasɛ akoke wetshelo wa mamba waki Yeso ndo akɛnyi ahindo wakandasale l’ekimanyielo ka nyuma k’ekila kaki Nzambi. Koko Judasɛ konama otema ande. Wakawosha shɛtɛshɛtɛ yaki la falanga ya Yeso nde l’apɔstɔlɔ ande 12. Koko “ndi aki uvi, ndu aki la tapa diakandosaka diango diakawakitshaka loko.” (Joa. 12:6) Ɔkɔmiya ande wakayeyamaka etena kakandɔtɔ sheke kâmɛ la ɛlɔmbɛdi wa lâdiko wa dungi pende dia funga Yeso la ekenga wa fɛsa 30. (Mat. 26:14-16) Onto okina laki kombika washo lo kɛnɛ kaki mɛtɛ ohomba ko Dɛmasi lakakambaka olimu kâmɛ l’ɔpɔstɔlɔ Paulo. Dɛmasi nde lawɔ konama otema ande. Paulo akate ate: “Demasi akanseke, akalangi akambu wa la kete nye.”—2 Tim. 4:10; adia Tukedi 4:23.
Wetshelo le ɔmɔmɔ la l’atei aso
16, 17. a) Ɔlɔshamelo wahomana la so wekɔ la wolo wa ngande? b) Kakɔna kakoka tokimanyiya dia sho mbekola wekamu akɔna tshɛ watodjɛ Satana?
16 Ekambi tshɛ waki Nzambi pombaka mbɔsa bɛnyɛlɔ tshɛ dia lo Bible la nɛmɔ nɛ dia tɔ totɛka ɔnɛ: “Akambu aso wakayala le wo dia mbaewula. Vo wambufundama dia ntewula l’ekumelu ka tena diaya le su.” (1 Kor. 10:11) Ɛlɔ kɛnɛ, tekɔ lo nsɛna lo nshi y’ekomelo ya dikongɛ di’akambo dia kɔlɔ nɛ.—2 Tim. 3:1, 13.
17 Satana Diabolo ‘jambizambi ya dikongɛ dikambo nɛ’ “mbewaka dya amboocikalɛɛ cenyi ya onya coo.” (2 Kor. 4:4; Eny. 12:12, Dyookaneelo dy’Oyooyo) Nde ayosala tshɛ kakokande sala dia tshutshuya ekambi waki Jehowa dia vɔ shisha olowanyi awɔ. Satana mbalɔmbɔla andja ɔnɛ mbidja ndo tita nsango tawɔ. Koko, ekambi waki Jehowa wekɔ la ɛngɔ kɛmɔtshi kele la nkudu k’efula, mbuta ate ‘wolo woleki wɔnɛ wokongaka l’onto.’ (2 Kor. 4:7) Sho kokaka ndjaɛkɛ lo nkudu k’oma le Nzambi kɛsɔ dia tɔ tokimanyiya dia sho mbekola wekamu tshɛ wayotodjɛ Satana. Ɔnkɔnɛ, sho keketshamaka dia nɔmbaka la etete tele la eshikikelo dia Jehowa ‘ayosha nyuma k’ekila le wanɛ wɔlɔmbatɔ.’—Luka 11:13.
18. Dionga diakɔna diahomba monga la so lo kɛnɛ kendana la andja ɔnɛ?
18 Sho keketshamaka nto efula lo mbeya ɔnɛ dikongɛ di’otondo di’akambo diaki Satana diayolanyema kem’edja, koko Akristo wa mɛtɛ wayoshimbamɛ. “Akambu wa la kete la saki yawo wayushila. Keli one latutshaka lulangu la [Nzambi], atuyalaka pundju.” (1 Joa. 2:17) L’ɔtɛ w’akambo asɔ, ayonga mɛtɛ dikambo di’enginya dia okambi ɔmɔtshi waki Nzambi fɔnya dia ekɔ ɛngɔ kɛmɔtshi ka lo dikongɛ di’akambo nɛ koleki diɔtɔnganelo diasande la Jehowa nɛmɔ! Andja ɔnɛ walɔmbwama oma le Satana wekɔ oko masuwa watadite. Jehowa akatosha etshumanelo k’Akristo kakoka kimanyiya ekambi ande dia vɔ kokamɛ. Etena katawatshu otsha lo andja w’oyoyo, vɔ kokaka ndjaɛkɛ lo daka diayela nɛ: “Atshi wa kolo wayuhimbwama, keli wane watulungulamelaka [Jehowa] wayukita kete.” (Osam. 37:9) Ɔnkɔnɛ, nyɛsɔ totetemale mbika washo aso lo difuto dia diambo sɔ!
Onde wɛ âkohɔ?
• Ngande wakɔsaka Paulo difuto diakakitshama la ntondo kande?
• Anto wayɔsɛna pondjo pondjo lanɛ la nkɛtɛ wayolomboshama lo ndjela akambo akɔna?
• Naa yoho ya lɔsɛnɔ yoleki dimɛna le so ɛlɔ kɛnɛ?
[Osato wa lo lɛkɛ 12, 13]
Onde wɛ ndjaɔsaka oko onto lamboshila nongola difuto etena kadiayɛ ɛkɔndɔ wa lo Bible?