Tetawɔke dia dui dimɔtshi kodjɛ wekamu dia nkondja difuto

1, 2. a) Difuto diakɔna diakongɛɛ ekambi wa Nzambi? b) Kakɔna katokimanyiya dia mbika washo lo difuto? (Enda osato wele lo mbɔtwɛlɔ.)

AKRISTO w’akitami wekɔ l’elongamelo ka diambo. Vɔ wekɔ lo kongɛɛ dia tɔsɛna l’olongo. Ɔpɔstɔlɔ Pɔɔlɔ akelɛ elongamelo kɛsɔ ɔnɛ “difuto dia leeta la Nzambi.” (Flpɛ. 3:14) L’olongo, vɔ wayotolɛ kaamɛ la Yeso Kristo lo Diolelo diande ndo wayokamba la nde dia nkimanyiya anto dia monga kokele. (Ɛny. 20:6) Elongamelo kɛsɔ kekɔ ka diambo! Ɛkɔkɔ ekina wekɔ lo nongamɛ difuto diotshikitanyi. Vɔ wekɔ lo nongamɛ dia nsɛna pondjo pondjo lo Paradiso ka la nkɛtɛ ndo elongamelo kɛsɔ mbashaka mɛtɛ ɔngɛnɔngɛnɔ!​—2 Pe. 3:13.

² Pɔɔlɔ akalange nkimanyiya asekande Akristo w’akitami dia ntshikala la kɔlamelo ndo nkondja difuto. Nde akawatɛ ate: “Nyokanyiyake nshi tshɛ akambo wa la diko.” (Kɔl. 3:2) Vɔ wakahombaka mbidja yimba l’elongamelo kawɔ ka diambo ka ntshɔ l’olongo. (Kɔl. 1:4, 5) Nkana yimba lo ɛtshɔkɔ wa Jehowa kimanyiyaka okambi wa Nzambi tshɛ dia mbika washo lo difuto. Dui sɔ diekɔ mɛtɛ oyadi le wanɛ wele l’elongamelo ka tɔsɛna l’olongo kana la nkɛtɛ.​—1 Kɔr. 9:24.

3. Kakɔna kakahɛmɔla Pɔɔlɔ Akristo?

³ Pɔɔlɔ akahɛmɔla Akristo nto lo dikambo dia waale wakoka todjɛ wekamu dia nkondja difuto. Ɛnyɛlɔ, nde akafundɛ ase Kɔlɔsayi lo dikambo di’Akristo wa kashi wakasalaka la wolo dia ngɛnyangɛnya Nzambi lo ndjela Ɛlɛmbɛ wa Mɔsɛ lo dihole dia monga la mbetawɔ le Kristo. (Kɔl. 2:16-18) Pɔɔlɔ akatɛkɛta nto dia waale wele ɛlɔ kɛnɛ ndo wakoka todjɛ wekamu sho la wɔ dia nkondja difuto. Nde akalembetshiya woho wa nshika ntanga la ntondo ka nsaki y’awui wa mindo ndo kɛnɛ kakokaso nsala naka tekɔ l’ekakatanu lo nkumbo kaso kana lam’asaso l’anangɛso l’etshumanelo. Alako wa Pɔɔlɔ wa nɛmɔ asɔ koka tokimanyiya ɛlɔ kɛnɛ. Diakɔ diele, tayanga nsɛdingola ɛhɛmwɛlɔ ɛmɔtshi woludi la ngandji wele lo mukanda wakandafundɛ ase Kɔlɔsayi.

DAKA NSAKI Y’AWUI WA MINDO

4. Lande na kakoka nsaki y’awui wa mindo todjɛ wekamu dia nkondja difuto?

⁴ L’ɔkɔngɔ wa Pɔɔlɔ mbohola anango dikambo di’elongamelo kawɔ ka diambo, nde akafunde ate: “Ɔnkɔnɛ, nyodiake tenyi dianyu dia demba dia la nkɛtɛ lo kɛnɛ kendana la awui wa mindo wa dieyanelo, akambo wa mindo, nsɔngu ka dieyanelo kambotamba elelo, nsaki ka kɔlɔ.” (Kɔl. 3:5) Nsaki y’awui wa mindo koka monga wolo efula ndo yɔ koka tokonya dia nshisha diɔtɔnganelo diasaso la Jehowa ndo elongamelo kaso ka lo nshi yayaye. Ɔnangɛso ɔmɔtshi lakayasha lo nsaki yande ya mindo ndo lakayokaloyama l’etshumanelo mbutaka dia nsaki shɔ yakayonga wolo efula “polo ndo ndjokoma aya hayeyama ka nsala.”

5. Ngande wakokaso ndjakokɛ oma lo awui wa waale?

⁵ Sho pombaka monga la yambalo y’efula djekoleko naka tekɔ la ntondo ka dikambo diakoka tokonya dia nsekola atɔndɔ wa Jehowa wendana la lɔkɛwɔ. Ɛnyɛlɔ, ayonga dui dia lomba dia ɔnangɛso la kadiyɛso wembɔna ndjadjɛ elelo wendana l’awui amɔtshi oma l’etatelo, ɛnyɛlɔ kimanɛ l’alemba, mbishana bizɛ ndo monga vɔ ahende ato. (Tok. 22:3) Waale ekina koka monga etena katshɔso lo lɔkɛndɔ l’okanda kana etena kakambaso olimu l’onto lele bu pami kana womoto oko sho. (Tok. 2:10-12, 16) Akokayɛ nsala dia ndjakokɛ? Yaeyanya dia wɛ ekɔ Ɔmɛnyi wa Jehowa. Onga la lɔkɛwɔ la dimɛna ndo tohɛke pondjo dia nkɛnya l’onto okina lo demba koka kokonya l’elanyelo. Sho pombaka monga nto la shɛnɔdi y’efula naka tekɔ la lonyangu kana tekɔ lo ndjaoka opoko. Wɛ koka ndjokombola di’onto ɔmɔtshi kokonya dia ndjaoka dia wɛ ekɔ ohomba. Wɛ koka mfɔnya dia wɛ aya bu l’elongamelo ko ndjokoma dia mbetawɔ woho w’onto akɔna tshɛ layasha le yɛ. Ɔsɔ ekɔ waale. Naka ngasɔ mbayaokayɛ, tosalake ndooko dui diakoka kodjɛ wekamu dia nkondja difuto. Lɔmba Jehowa ndo ananyɔ l’akadiyɛyɛ ekimanyielo.​—Adia Osambo 34:18; Tokedi 13:20.

6. Kakɔna kahombaso mbohɔka etena kasɔnaso kɛnyɔ?

⁶ Dia ndjaka nsaki y’awui wa mindo, sho pombaka ntona tɔkɛnyɔ ta kɔlɔ. Ɛlɔ kɛnɛ, tɔkɛnyɔ efula ta l’andja ɔnɛ toholaka woho waki akambo la Sɔdɔma ndo Ngɔmɔra. (Judɛ 7) Wanɛ wasala tɔkɛnyɔ takɔ konyaka anto dia mbɔsa awui wa mindo wa dieyanelo oko wekɔ dimɛna ndo bu waale. Diakɔ diele, sho pombaka mambalɛka tena tshɛ. Aha woho wa kɛnyɔ tshɛ yatomba l’andja ɔnɛ kahombaso mbetawɔ. Koko, sho pombaka nsɔna kɛnyɔ yahatotodjɛ wekamu dia nkondja difuto dia lɔsɛnɔ.​—Tok. 4:23.

“NYƆLƆTƐ” NGANDJI NDO ƆLƆLƆ W’OTEMA

7. Ekakatanu akɔna wakoka ntomba l’etshumanelo k’Akristo?

⁷ Tekɔ l’ɔngɛnɔngɛnɔ l’ɔtɛ weso lo etshumanelo k’Akristo. Sho mbekaka Ɔtɛkɛta wa Nzambi lo nsanganya ndo sho sukanɛka onto la wonyande la ngandji tshɛ. Dui sɔ tokimanyiyaka dia ntetemala mbika washo aso lo difuto. Koko, lo tena dimɔtshi eokelo ka kɔlɔ koka tokonya dia monga l’ekakatanu l’anangɛso ndo akadiyɛso. Naka hatokandodi ekakatanu ɛsɔ, vɔ koka tokonya esadi eto dia nama tokumbɛkumbɛ.​—Adia 1 Petero 3:8, 9.

8, 9. a) Waonga akɔna wayotokimanyiya dia nkondja difuto? b) Kakɔna kakoka tokimanyiya dia ntetemala monga lo wɔladi naka osekaso Okristo ambotonyangiya?

⁸ Tatetawɔke dia tokumbɛkumbɛ todjɛ wekamu dia nkondja difuto. Pɔɔlɔ akalembetshiya kɛnɛ kakoka Akristo nsala ɔnɛ: “Oko wenyu ɛsɔnami wa Nzambi, ekilami ndo anangemi, nyɔlɔtɛ kɛtshi k’efula, ɔlɔlɔ w’otema, okitshakitsha, memakana ndo solo dia lotutsha. Nyotetemale mbikikanɛ kɔlɔ ndo nyodimanyiyanake l’otema ɔtɔi lam’asanyu, oyadi kaanga onto ekɔ la dikambo dia nyangɛ osekande, oko wakanyodimanyiya Jehowa l’otema ɔtɔi, nyu lawɔ pombaka nsala woho akɔ waamɛ. Koko, laadiko dia akambo asɔ tshɛ, nyɔlɔtɛ ngandji, nɛ dia tɔ kele dimama dia kokele.”​—Kɔl. 3:12-14.

⁹ Ngandji ndo ɔlɔlɔ w’otema koka tokimanyiya dia dimanyiya anto akina. Naka tambonyanga l’ɔtɛ wa kɛnɛ kotshi kana kosadi onto ɔmɔtshi, sho koka nkanyiya waaso wakatatɛ kana wakatasalɛ anto akina dui dimɔtshi dia kɔlɔ ko wakatodimanyiya. Shi takonge la lowando l’ɔtɛ wa ngandji ndo ɔlɔlɔ awɔ! (Adia Ondaki 7:21, 22.) Tekɔ la lowando nɛ dia la ngandji tshɛ, Kristo ambokimanyiya atɛmɔdi wa mɛtɛ dia monga kaamɛ. (Kɔl. 3:15) Sho tshɛ tekɔ lo nanga Nzambi kakɔ kaamɛ, tekɔ lo nsambisha losango lakɔ laamɛ ndo tekɔ l’ekakatanu efula wa woho waamɛ. Naka sho monga ɔlɔlɔ, la ngandji ndo dimanyiyana onto la wonyande, kete etshumanelo kayoleka monga kaamɛ ndo tayoleka mbidja yimba lo difuto.

10, 11. a) Lande na kele kandjema kekɔ waale? b) Ngande wakokaso nsala diaha kandjema todjɛ wekamu dia nkondja difuto?

¹⁰ Kandjema koka todjɛ wekamu dia nkondja difuto. Bɛnyɛlɔ dia lo Bible mɛnyaka woho wele kandjema waale. Ɛnyɛlɔ, Kɛna akoke Abɛlɛ kandjema ko akodiake. Kɔra, Datana ndo Abirama wakoke Mɔsɛ kandjema ko wakɔtɔmbɔkwɛ. Nkumekanga Saolo akoke Davidɛ kandjema ko akasale la wolo dia mbodiaka. Kɛnɛ kata Ɔtɛkɛta wa Nzambi kɛnɛ kekɔ mɛtɛ: “Lɛnɛ ele kandjema la yimba y’ewanu, lɛkɔ kayonga ndo efukutanu la akambo tshɛ wa kɔlɔ.”​—Jak. 3:16.

¹¹ Naka sho nsala la wolo dia mbokana mɛtɛ ngandji ndo monga ɔlɔlɔ, kete hatotoka anto akina kandjema. Ɔtɛkɛta wa Nzambi mbutaka ɔnɛ: “Ngandji ekɔ la solo dia lotutsha. Ngandji bu la kandjema.” (1 Kɔr. 13:4) Dia ndjashikikɛ dia sho bu la kandjema, sho pombaka nsala la wolo dia mɛna akambo oko awaɛna Jehowa. Sho pombaka mbɔsa anangɛso l’akadiyɛso oko tenyi dia lo demba ɔtɔi, diele etshumanelo. Bible mbutaka ɔnɛ: “Naka etenyi kɛmɔtshi ka demba kambodiyama, kete tenyi dikina tshɛ dia demba ngɛnangɛnaka kaamɛ la tɔ.” (1 Kɔr. 12:16-18, 26) Naka ɔnangɛso ɔmɔtshi ambokondja ɛngɔ kɛmɔtshi ka dimɛna, tɔngɛnɛngɛnɛ kaamɛ la nde, tatowokake kandjema. Tokanyiya lo dikambo dia ɛnyɛlɔ ka dimɛna ka Jɔnatana, ɔna nkumekanga Saolo. Jɔnatana komboka Davidɛ kandjema etena kakandasɔnama dia monga nkumekanga lo dihole dia nde. Nde akakome polo lo nkeketsha ndo nsukɛ Davidɛ. (1 Sa. 23:16-18) Shi sho koka monga anto w’ɛlɔlɔ ndo wokana ngandji oko Jɔnatana?

WOHO WAKOKA NKUMBO NKONDJA DIFUTO

12. Alako akɔna w’oma lo Bible wayokimanyiya nkumbo kaso dia nkondja difuto?

¹² Naka ase nkumbo kaso tshɛ nkamba l’atɔndɔ wa lo Bible, kete nkumbo kaso kayonga lo wɔladi, l’ɔngɛnɔngɛnɔ ndo kayokondja difuto. Pɔɔlɔ akasha nkumbo dako dia lomba nɛ: “Nyu wadi, nyoyakitshakitsha l’ɛse ka waomɛnyu oko wahombadiɔ monga lo Nkumadiɔndjɔ. Nyu waomi, nyotetemale nanga wadɛnyu ndo tanyowaomalɛke nkɛlɛ k’efula. Nyu ana, nyokitanyiya ambutshi anyu l’oseka dikambo tshɛ nɛ dia dui sɔ mbangɛnyangɛnya Nkumadiɔndjɔ. Nyu ambutshi w’apami, tanyotshake ananyu nkɛlɛ diaha vɔ ndjɔkɔmɔ.” (Kɔl. 3:18-21) Onde wɛ ambɛna woho wakoka dako sɔ nkimanyiya nkumbo kayɛ?

13. Ngande wakoka kadiyɛso k’Okristo nkimanyiya omɛnde lele bu ombetawudi dia nanga kambɛ Jehowa?

¹³ Ondo wɛ ekɔ kadiyɛso kele la omi lahakambɛ Jehowa. Kakɔna kayoyosala naka wɛ ambɛna dia nde hakosalɛ akambo lo yoho yahombama? Ondo wɛ ayomala ndo ayowana la nde, ko onde kɛsɔ mbayolowanya dikambo? Kaanga naka wɛ mbele la shadiya, onde wɛ ayowokonya dia nde nanga kambɛ Jehowa? Ondo bu. Koko naka wɛ mbɔlɛmiya l’ɔtɛ wende owandji wa nkumbo, kete wɛ koka nkimanyiya nkumbo kayɛ dia tɔ ndeka monga lo wɔladi ndo wɛ ayotombola Jehowa. Ɛnyɛlɔ kayɛ ka dimɛna koka nkonya omɛyɛ dia nanga kambɛ Jehowa, ko nyu tshɛ nyayokoka nkondja difuto.​—Adia 1 Petero 3:1, 2.

14. Kakɔna kahomba omi l’Okristo nsala naka wadɛnde lele bu ombetawudi hawɔlɛmiya?

¹⁴ Mbeyaka monga ko wɛ ekɔ ɔnangɛso lele la wadi lahakambɛ Jehowa. Akokayɛ nsala naka wɛ ambɛna dia nde hakɔlɛmiya? Naka wɛ mpemba mbɛnya akɔna ele owandji lo mbohangwɛhangwɛ, onde lo nsala ngasɔ mbayondokɔlɛmiya? Ndooko! Nzambi nongamɛka dia wɛ monga omi lokana ngandji lokoya Yeso. (Ɛf. 5:23) Yeso lele owandji w’etshumanelo mongaka tena tshɛ la solo dia lotutsha ndo ngandji. (Luka 9:46-48) Naka wɛ mbokoya Yeso, kete l’edjedja ka wonya wadɛyɛ koka nanga dia ntɛmɔla Jehowa nde la wɔ.

15. Ngande wɛnya omi l’Okristo dia nde nangaka wadɛnde?

¹⁵ Jehowa ndakaka waomi ɔnɛ: “Nyotetemale nanga wadɛnyu ndo tanyowaomalɛke nkɛlɛ k’efula.” (Kɔl. 3:19) Omi loka wadɛnde ngandji, mbɔsaka la nɛmɔ. Lo nsala na? Nde pokamɛka tokanyi ta wadɛnde ndo salaka dia nde mbeya ɔnɛ kɛnɛ katande kekɔ ohomba le nde. (1 Pe. 3:7) Kaanga mbele aha tena tshɛ mbayondosalaka kɛnɛ kayowɔlɔmbaka wadɛnde, mbohokamɛka ayokimanyiya omi dia mbɔsa tɛdikɔ t’amɛna. (Tok. 15:22) Pami koka wadɛnde ngandji hawodjangɛ dia mbɔlɛmiya. Koko, nde salaka la wolo dia wadɛnde mbɔlɛmiya. Naka omi nanga wadɛnde l’anande, kete ondo vɔ wayoleka monga l’ɔngɛnɔngɛnɔ etena kakambɛwɔ Jehowa ndo nkondja difuto dia lɔsɛnɔ.

ƐLƆNGƆLƆNGƆ, TANYETAWƆKE DI’ƐNGƆ KƐMƆTSHI NYOSHIMBA DIA NKONDJA DIFUTO!

16, 17. Oko weyɛ ɔlɔngɔlɔngɔ, akokayɛ nsala diaha momalɛ ambutshi ayɛ amboleka?

¹⁶ Mbeyaka monga ko wɛ ekɔ ɔna la mangase ndo ekɔ lo mfɔnya di’ambutshi ayɛ haweye woho wayaokayɛ kana ɔnɛ wamboleka awui wolo. Dui sɔ koka konyangiya efula ndo wɛ koka ndjambola dia kana wɛ kokaka ntetemala kambɛ Jehowa. Koko naka wɛ nsɛka Jehowa, kete wɛ ayɛna dia ndooko onto la l’andja ɔnɛ lakoka ngandji efula oko ambutshi ayɛ w’Akristo ndo angɛnyi ayɛ wa l’etshumanelo.

¹⁷ Ohokana yimba la dui nɛ: Naka ambutshi ayɛ hawokongola kaanga yema, ngande wayoyeya dia vɔ mɛtɛ ndjakiyanyaka dikambo diayɛ? (Hɛb. 12:8) Lo mɛtɛ vɔ bu kokele, laasɔ yoho yakongolawɔ koka konyangiya. Koko tolekake mbidja yimba lo dui sɔ. Lo dihole dia nsala ngasɔ, nsala la wolo dia mbeya ɛkɔkɔ wa kɛnɛ kasalawɔ kana katawɔ. Tshikala ki ndo tomalake esadi. Ɔtɛkɛta wa Nzambi mbutaka ɔnɛ: “Onto lele la ewo ndjakimɛka lo ɛtɛkɛta ande, ndo onto lele la shɛnɔdi nɛmbɔhalaka ki.” (Tok. 17:27) Yadjɛ oyango wa monga onto lambotshunda lo nyuma, letawɔ dako ndo nkondja wetshelo oma lɔkɔ oyadi woho akɔna wokoshawɔdiɔ. (Tok. 1:8) Tohɛke pondjo dia monga l’ambutshi woka Jehowa ngandji ekɔ woshasha wa nɛmɔ. Vɔ nangaka kokimanyiya dia wɛ nsɛna pondjo pondjo.

18. Lande na kamboyoyashikikɛ dia mbika washo lo difuto?

¹⁸ Oyadi tekɔ l’elongamelo ka nsɛna pondjo pondjo l’olongo kana lo paradiso ka la nkɛtɛ, onto tshɛ la l’atei aso kokaka nongamɛ nshi yayaye ya diambo. Elongamelo kaso kekɔ ka mɛtɛ. Tɔ pikama lo daka di’Otungi w’andja w’otondo, ɔnɛ lata ɔnɛ: “Nkɛtɛ kayolola mɛtɛ la ewo ka Jehowa.” (Isa. 11:9) Keema edja nto onto tshɛ la la nkɛtɛ ayetshama oma le Nzambi. Ɔsɔ ekɔ difuto diahombaso nsala la wolo dia nkondja. Ɔnkɔnɛ, ohɔka tena tshɛ kɛnɛ kakakolake Jehowa ndo tetawɔke di’ɛngɔ kɛmɔtshi kodjɛ wekamu dia nkondja difuto!