Yasukanya la Nzambi
She ana wa tshike
‘NZAMBI lodjashi lo edjaselo k’ekila mbele she ana wa tshike.’ (Osambu 68:5) Ɛtɛkɛta wakasambiyama ɛsɔ tetshaka wetshelo w’ohomba efula wendana la Jehowa Nzambi watosukanya la nde, mbuta ate nde mɛnaka ehomba w’amɛnyi fɔnu. Woho wayakiyanyande dikambo di’ana wa tshike akɛnama hwe lo Ɛlɛmbɛ wakandasha Isariyɛlɛ. Nyɛsɔ tɔsɛdingole Etumbelu 22:22-24, avɛsa wa ntondo watɛkɛta dikambo dia “ona etshiki.”
Nzambi ndakaka ɔnɛ: “Tusuyaki . . . ona etshiki.” (Divɛsa 22) Ɔsɔ komonga tsho dui diakawalɔmbaka anto dia kimanyiya ana wa tshike wakasowaka, koko aki didjango diaki Nzambi. Ɔna lavusha she ndo lashisha okokedi ande aki lo wâle w’anto akina mbosalɛ kɔlɔ. Ndoko onto lakahombe ‘soya’ ɔna ɔsɔ. Dikadimwelo dikina dia Bible kambaka la tshɛkɛta ‘salɛ kɔlɔ,’ ‘pɛnyahɛnya,’ ndo ‘pɛnyɔla’ lo dihole dia ‘soya.’ Salɛ ɔna etshike dikambo dia kɔlɔ aki tshondo y’onongo lo washo waki Nzambi. Onongo akɔna?
Ɛlɛmbɛ tetemalaka mbuta ɔnɛ: “Naka we ambâsuya, ku vo wambundelela, mete, dimi layuka alelu awo.” (Divɛsa 23) Lo ɛtɛkɛta wa ntondo wakafundama Bible, wakakambe la “nyu” lo divɛsa 22 ndo “we” lo divɛsa 23. Onto tshɛ ndo wodja w’otondo wakahombe kitanyiya ɔlɛmbɛ w’oma le Nzambi ɔsɔ. Jehowa akendaka, akahokɛka lotui lo alelo w’ana wa tshike ndo aki suke dia mbakimanyiya.—Osambu 10:14; Tukedi 23:10, 11.
Ko lâsɔ, kakɔna kakakoke salema naka onto ambosalɛ ɔna etshike kɔlɔ lo mbokonya lo nde ndelɛ Nzambi? Jehowa mbutaka ɔnɛ: “Kele kami kayoheta, dimi layudiaka la yombo.” (Divɛsa 24) Dibuku dimɔtshi dialembetshiya awui wa lo Bible mbutaka dia divɛsa sɔ “kadimɔmaka tshɛkɛta lo tshɛkɛta ɔnɛ ‘ɔhɛmbɛ ami wayɔhɛta,’ ndo dui sɔ nembetshiya kɛlɛ ka wolo.” Tolembete dia Jehowa kotshika dia toshushi t’ase Isariyɛlɛ sala di’anto kitanyiya ɔlɛmbɛ ɔsɔ, koko Nzambi ndamɛ mbakahombe mendana l’onto tshɛ lahɛnyɔla ɔna etshike.—Euhwelu k’Elembe 10:17, 18.
Jehowa atatshikitana. (Malaki 3:6) Nde mbokaka ana wa tshike kɛtshi. (Jakoba 1:27) Tatoyakesake, She ana wa tshike mbokaka wanɛ wahɛnyahɛnya ana wa tshike kɛlɛ ka losembwe. Wanɛ wayanga dia salɛ ana wa tshike kɔlɔ hawotohandɔ “ududu wa [Jehowa].” (Zefaniya 2:2) Anto wa kɔlɔ asɔ wayeya dia “dikambu dia woma mbedio, dia nko l’anya wa [Nzambi k]a lumu.”—Heberu 10:31.