Toyasha la Ngandji Tshɛ le “Ana wa [Tshike]”
1 Jehowa ekɔ “shi ana wa [tshike].” (Osam. 68:5) Woho wayakiyanyande dikambo di’ɔlɔlɔ awɔ mɛnamaka lo didjango nɛ diakandasha wodja w’Isariyɛlɛ wa nshi ya ntondo: “Tusuyaki wadi aki udu, kuyanga ona etshiki. Naka we ambâsuya, ku vo wambundelela, mete, dimi layuka alelu awo.” (Etum. 22:22, 23) Ɛlɛmbɛ waki Nzambi waki nto l’ɛlɔngɔswɛlɔ wakalɔmbaka dia kimanyiyaka anto asɔ l’ehomba awɔ wa l’emunyi. (Euh. 24:19-21) L’ɔlɔngɔswɛlɔ w’Akristo, atɛmɔdi wa mɛtɛ wakalɔmbamaka dia “ntenda ana wa tshiki la wadi waki edu lu asui awo.” (Jak. 1:27) Ngande wakokaso mbokoya Jehowa lo ndjasha la ngandji tshɛ otsha le ana wodiama oma le ombutshi ɔtɔi kana wanɛ wele nkumbo k’otondo hawɔtɛmɔla dihole ɔtɔi?
2 Wetshelo wa lo Nyuma: Naka wɛ ekɔ ombutshi wodia ana wɛmɛ ko kana mbala mɔtshi olonganyi ayɛ kema ombetawudi, kete wɛ mbeyaka mɛna dia nɔmbɔla wekelo wa Bible mbala la mbala lo nkumbo wɛ l’anayɛ kema dikambo dia tshitshɛ. Koko wekelo wa Bible walɔmbwama mbala la mbala ndo wakotsha ehomba wa lo nkumbo ekɔ ohomba efula dia vɔ koma anto wambotshunda ndo wele la wɛdimo. (Tuk. 22:6) Ekɔ nto ohomba sawolaka la wɔ akambo wa lo nyuma. (Euh. 6:6-9) Mbala mɔtshi, wɛ mbeyaka kɔmɔ otema, koko tohekɔke. Yanga ekeketshelo ndo ɛlɔmbwɛlɔ oma le Jehowa lam’ayangayɛ dia “[mb]audia lu elembe la lu wetshelu wa [Jehowa].”—Ef. 6:4.
3 Naka wɛ ekɔ l’ohomba w’ekimanyielo dia kotsha ɛkɛndɛ wakosha Afundelo, kete ewoya dikumanyi ehomba ayɛ. Vɔ mbeyaka kosha alako wa shikaa kana kokimanyiya dia wɛ monga l’ekongelo k’ɔlɔlɔ k’akambo wa lo nyuma lo nkumbo kayɛ.
4 Woho Wokoki Anto Akina Mbisha Ekimanyielo: Lo ntambe ka ntondo, Timɔtɛ akakome okambi wa Jehowa waki l’etete kânga mbakandole lo nkumbo kakatɔna l’awui w’ɔtɛmwɛlɔ. Welo wakadjaka nyango nde la tshɛnde dia mbetsha efundelo w’ekila oma ko kiɛndakɛnda yande wakokimanyiya efula. (Etsha 16:1, 2; 2 Tim. 1:5; 3:15) Koko, Timɔtɛ akakondja wahɔ nto oma le Akristo akina wakekesanɛka la nde, mbidja ndo ɔpɔstɔlɔ Paulo, ɔnɛ lakɔsaka Timɔtɛ oko “[ɔnande] la ngandji la kolamelu le Khumadiondjo.”—1 Kor. 4:17.
5 Ndo ɛlɔ kɛnɛ, ekɔ dui di’ɔlɔlɔ efula etena kayasha anangɛso l’akadiyɛso wambotshunda lo nyuma la ngandji tshɛ le ana wa tshike wele l’atei w’etshumanelo! Onde wɛ mbaeyaka vɔ tshɛ nkombo yawɔ? Onde wɛ sawolaka la wɔ lo nsanganya y’Akristo ndo lo waaso akina? Lɔmbakawɔ dia tombaka la yɛ l’olimu w’esambishelo. Ondo wɛ kokaka mbaelɛka mbala la mbala, kamɛ nd’ombutshi wawawodia ndamɛ kana ombutshi awɔ wele ombetawudi koko olonganyi ande bu ombetawudi oya lo wekelo anyu wa lo nkumbo kana mbetsha tena dimɔtshi di’ɔngɛnɔngɛnɔ wɛ la wɔ. Naka akɛnda asɔ wokɔsaka oko ɔngɛnyi awɔ, kete vɔ wayonga suke dia mbokoya ɛnyɛlɔ kayɛ ndo mbetawɔ ekeketshelo kawashayɛ.—Fil. 2:4.
6 Jehowa ndjashaka efula le ana wa tshike, ndo nde tshɔkɔlaka welo wadjaso dia mbakimanyiya dia vɔ nanga akambo wa mɛtɛ ndo mbɔtɔnganyiya nsɛnɔ yawɔ l’akambo akɔ. Efula ka wanɛ wakodiama oma le ombutshi ɔtɔi kana lo nkumbo kambatɔna l’awui w’ɔtɛmwɛlɔ wakalongola ekeketshelo ka ngasɔ ndo ɛlɔ kɛnɛ vɔ wekɔ lo kamba la kɔlamelo tshɛ oko ombatshi mboka, ekambi w’olimu, dikumanyi, emendji weteta, misiɔnɛrɛ, kana oko ase nkumbo ka Bɛtɛlɛ. Nyɛsɔ sho tshɛ toyange toho ta ‘nyomoleka mɛnya’ ngandji kaso otsha le ana wa tshike lo mbokoya ɛnyɛlɔ kaki Shɛso lele l’olongo.—2 Kor. 6:11-13.