Teye dia Yeso ekɔ Mɔsɛ ka woke
“[Jehowa Nzambi k]anyu ayunyia umvutshi uma l’atei w’anyanyu uku dimi. Kanyuwukeli lu akambu tshe wayundunyutela.”—ETSHA 3:22.
1. Ngande wakonge Yeso Kristo la shɛngiya lo ɔkɔndɔ w’ana w’anto?
AMBETA ɛnɔnyi nunu pende, eotwelo ka ɔna pami ɔmɔtshi akatshutshuya andjelo efula l’olongo dia vɔ tombola Nzambi ndo anami w’ɛkɔkɔ wakoke lotombo lakɔ. (Luka 2:8-14) Ɛnɔnyi akumi asato l’ɔkɔngɔ diko, ɔna ɔsɔ akakome opalanga, akatatɛ olimu w’esambishelo wakandakambe lo edja ka ɛnɔnyi esato l’etenyi ndo vɔ wakatshikitanya akambo tshɛ wa lo ɔkɔndɔ w’ana w’anto. Yɔnɛ Philip Schaff laki ombewi w’ɛkɔndɔ wakanyanyemaka lo ntambe 19 akatshutshuyama dia mbuta lo dikambo dia ɔna pami ɔsɔ ate: “Kânga mbakinde kofunda ndoko dui ndamɛ, kɛnɛ kakandasale ndo kakandate kakatshutshuya afundji efula w’abuku, w’esambo, w’asawo ndo asangi w’asango dia vɔ funda kana sanga awui wendana la nde. Kɛsɔ mɛnyaka dia nde aki la shɛngiya ya wolo lo ɔkɔndɔ w’ana w’anto.” Ɔna pami la diambo efula ɔsɔ ko Yeso Kristo.
2. Kakɔna kakate ɔpɔstɔlɔ Joani lo dikambo dia Yeso ndo di’olimu Ande?
2 Ɔpɔstɔlɔ Joani akafunde ɔkɔndɔ wendana l’olimu waki Yeso ndo l’ekomelo nde akate ate: “Jesu akatshi ndu akambu akina efula. Utunduyala dikambu la dikambu diafundami, dimi lambukana nti: Kete yame tshu tutuyeya nkuka abuku tshe wutufundama.” (Joa. 21:25) Joani akeyaka dia nde akakoke funda paka akambo angana ato l’atei w’akambo tshɛ wakate Yeso ndo wakandasale lo edja ka ɛnɔnyi esato l’etenyi wa diambo ɛsɔ. Koko, ɔkɔndɔ wakakɔndɔla Joani lo Evanjiliɔ ande wekɔ la nɛmɔ di’efula.
3. Ngande wakokaso fudia eokelo kaso lo kɛnɛ kendana la ɔkɛndɛ wele la Yeso lo sangwelo diaki Nzambi na?
3 Lâdiko dia ɛkɔndɔ wa lo Evanjiliɔ ɛnɛi, avɛsa akina wa lo Bible wekɔ l’akambo akina wendana la lɔsɛnɔ laki Yeso wakeketsha mbetawɔ. Ɛnyɛlɔ, ɛkɔndɔ wa lo Bible wendana la apami amɔtshi wa kɔlamelo wakasɛnaka la ntondo ka Yeso wekɔ l’akambo wafudia eokelo kaso lo kɛnɛ kendana la ɔkɛndɛ wele la nde lo sangwelo diaki Nzambi. Nyɛsɔ tɔsɛdingole ɛkɔndɔ ɛmɔtshi l’atei awɔ.
Ekambi waki Nzambi waki didjidji dia Kristo
4, 5. Waa na waki didjidji diaki Yeso, ndo lo toho takɔna?
4 Joani nde la afundji akina asato wa lo Evanjiliɔ mɛnyaka dia Mɔsɛ, Davidi ndo Sɔlɔmɔna waki didjidji dia Yeso l’ɔkɛndɛ ande wa okitami w’esɔ waki Nzambi ndo Nkumekanga ka lo nshi yayaye. Lo woho akɔna waki ekambi waki Nzambi wa lo nshi y’edjedja ɛsɔ didjidji dia Yeso, ndo wetshelo akɔna wakokaso kondja oma l’ɛkɔndɔ ɛsɔ?
5 Lo tshena pe, Bible totɛka dia Mɔsɛ aki ɔprɔfɛta, ompakemi ndo otshungodi. Ngasɔ mbakokadiɔ mbutama ndo lo dikambo dia Yeso. Davidi aki onami w’ɛkɔkɔ ndo nkumekanga kakalɛndja atunyi w’ase Isariyɛlɛ. Yeso nde lawɔ ekɔ onami ndo nkumekanga katalɛndja. (Ezek. 37:24, 25) Lo edja tshɛ kakinde la kɔlamelo, Sɔlɔmɔna aki omboledi wa lomba ndo lo ɛlɔmbwɛlɔ kande ase Isariyɛlɛ waki la wɔladi. (1 Khum. 4:25, 29) Yeso nde lawɔ ekɔ la lomba l’efula ndo nde mbelamɛka ɔnɛ: “Uwandji wa ki.” (Is. 9:6) Mbokɛmaka hwe dia ɔkɛndɛ waki Kristo Yeso fɔnaka la wɔnɛ waki la apami wa lo nshi y’edjedja asɔ, koko dihole diele la Yeso lo sangwelo diaki Nzambi mbaleka la fwa. Ntondotondo, nyɛsɔ tɛdike Yeso nde la Mɔsɛ kele tende woho wayotokimanyiya wɛdikelo ɔsɔ dia sho ndeka mbeya ɔkɛndɛ wele la Yeso lo sangwelo diaki Nzambi.
Mɔsɛ aki didjidji dia Yeso
6. Ngande wakɛnya ɔpɔstɔlɔ Petero ohomba wa mpokamɛ Yeso?
6 Yema tshitshɛ l’ɔkɔngɔ wa Pɛntɛkɔsta ka lo 33 T.D., ɔpɔstɔlɔ Petero akavusola prɔfɛsiya kɛmɔtshi kakate Mɔsɛ kakayokotshama le Yeso Kristo. Petero akemala la ntondo k’olui w’atɛmɔdi waki la ntondo ka tɛmpɛlɔ. Anto “wakambi efula” etena kakakɔnɔla Petero la Joani ose kɛtshi ɔmɔtshi lakotɔ ekuse, ndo vɔ tshɛ wakalangaka mbeya kɛnɛ kakatombe. Petero akawatɛ dia dikambo dia diambo sɔ diakasalema l’ekimanyielo ka wolo wa nyuma k’ekila kaki Jehowa kakakambaka lo tshimbo ya Yeso Kristo. Oma lâsɔ, nde akavusola awui w’oma lo Afundelo wa lo Hɛbɛru lo mbuta ate: “Mete kakati Mose ati: [Jehowa Nzambi k]anyu ayunyia umvutshi uma l’atei w’anyanyu uku dimi. Kanyuwukeli lu akambu tshe wayundunyutela.”—Etsha 3:11, 22, 23; adia Euhwelu k’Elembe 18:15, 18, 19.
7. Lande na kakakoke ampokami waki Petero shihodia ɛtɛkɛta ande wendana la ɔprɔfɛta woleki Mɔsɛ woke?
7 Ondo ampokami waki Petero wakeyaka ɛtɛkɛta waki Mɔsɛ ɛsɔ. Oko wakiwɔ ase Juda, vɔ wakɔsaka Mɔsɛ la nɛmɔ di’efula. (Euh. 34:10) Vɔ wakalongamɛka l’asolo walomɔlomɔ oyelo wa ɔprɔfɛta ɔmɔtshi woleki Mɔsɛ woke. Ɔprɔfɛta ɔsɔ takandahombe monga tsho okitami waki Nzambi ɔmɔtshi oko Mɔsɛ, koko nde aki Mɛsiya, mbuta ate: “Kristu ka [Nzambi], osonami” wa Jehowa.—Luka 23:35; Heb. 11:26.
Awui wafɔna Yeso nde la Mɔsɛ
8. Naa awui amɔtshi wafɔna lɔsɛnɔ laki Mɔsɛ la laki Yeso?
8 Lɔsɛnɔ laki Yeso la la nkɛtɛ lakafɔnɛ la lɔsɛnɔ laki Mɔsɛ l’awui amɔtshi. Ɛnyɛlɔ, etena kakiwɔ ana w’ashashi Mɔsɛ nde la Yeso vɔ tshɛ wakahande nyɔi oma l’anya w’ewandji wa kɔlɔ. (Etum. 1:22–2:10; Mat. 2:7-14) Ndo nto, vɔ akɔ ahende ‘wakelamɛ oma l’Edjibito.’ Ɔprɔfɛta Hɔsɛa akate ate: “Lam’aki Isariyele olongo a pami, dimi lakawukaka ngandji. Dimi laketi on’ami a pami uma lu Edjibitu.” (Hos. 11:1) Ɛtɛkɛta waki Hɔsɛa mendanaka la etena kakatondjama ase Isariyɛlɛ oma l’Edjibito lo ɛlɔmbwɛlɔ ka Mɔsɛ laki ɔnɔmbɔdi awɔ wakasɔnwama oma le Nzambi. (Etum. 4:22, 23; 12:29-37) Koko, ɛtɛkɛta waki Hɔsɛa ɛsɔ hawendana tsho la dikambo diambetaka, koko vɔ mendanaka ndo la dikambo diakahombe ndjosalema lo nshi yayaye. Ɛtɛkɛta ande ɛsɔ waki prɔfɛsiya kakayokotshama etena kakakalola Yɔsɛfu nde la Mariya oma l’Edjibito kâmɛ la Yeso l’ɔkɔngɔ wa nyɔi ka nkumekanga Hɛrɔdɛ.—Mat. 2:15, 19-23.
9. a) Naa ahindo wakasale Mɔsɛ nde la Yeso? b) Ta awui akina wafɔna Yeso nde la Mɔsɛ. (Enda kiombo yele l’ɔtɛ a dui ɔnɛ: “Toho tokina takafɔnaka Yeso nde la Mɔsɛ,” lo lɛkɛ 26.)
9 Mɔsɛ nde la Yeso vɔ akɔ ahende wakasale ahindo, ndo wakɛnya dia Jehowa akâsukɛka. Lo mɛtɛ, Mɔsɛ mbaki onto la ntondo lakasale ahindo. (Etum. 4:1-9) Ɛnyɛlɔ, Mɔsɛ akasale ahindo wendana l’ashi etena kakandakadimola ashi wa Nilɛ ndo wa eduwa waki suke la wɔ dikila, etena kakandatola ndjale ka Beela ndo kakandatondja ashi oma lo dive l’oswe wa shɛnga. (Etum. 7:19-21; 14:21; 17:5-7) Yeso nde lawɔ akasale ahindo wendana l’ashi. Dihindo dia ntondo diakandasale aki dia kadimola ashi wanu lo dambo dia tshuki dimɔtshi. (Joa. 2:1-11) L’ɔkɔngɔ diko, nde akɔladia asuku wa wolo waki lo ndjale ka Ngalileya. Ndo lo diaaso dimɔtshi, nde akakɛndakɛnda lâdiko dia ashi! (Mat. 8:23-27; 14:23-25) Awui akina wafɔna Mɔsɛ nde la Yeso lele Mɔsɛ ka woke, wekɔ lo kiombo yele lo lɛkɛ 26.
Teye dia Kristo aki ɔprɔfɛta
10. Naa akambo amɔtshi wasala ɔprɔfɛta wa mɛtɛ, ndo lande na kataso dia Mɔsɛ aki ɔprɔfɛta wa mɛtɛ?
10 Anto efula fɔnyaka dia ɔprɔfɛta ekɔ onto lata akambo wahataye, koko dui sɔ diekɔ ɔkɛndɛ ɔmɔtshi l’atei w’ɛkɛndɛ wele l’ɔprɔfɛta. Ɔprɔfɛta wa mɛtɛ ekɔ yɛmba awui yaki Jehowa yakasambiyama, mbuta ate ɔnɛ lewoya “etsha a wulu wa [Nzambi].” (Etsha 2:11, 16, 17) L’atei w’akambo akina wakokande mbewoya mbele ndo mbuta akambo wayosalema lo nshi yayaye, mbewoya akambo wendana la sangwelo diaki Jehowa kana dombwelo diande. Mɔsɛ aki ɔprɔfɛta wa woho ɔsɔ. Nde akewoyaka la ntondo sui tshɛ dia lo Asui Dikumi wakahombe komɛ ase Edjibito. Nde akasambiya ase Isariyɛlɛ sheke y’Ɛlɛmbɛ l’okongo wa Sinai. Ndo nde aketsha wodja lolango laki Nzambi. Koko, ɔprɔfɛta woleki Mɔsɛ woke akahombe ndjoya l’ɔkɔngɔ.
11. Ngande wakakotsha Yeso ɔkɛndɛ wa ɔprɔfɛta woleki Mɔsɛ woke?
11 L’ɔkɔngɔ diko, lo ntambe ka ntondo, Zɛkariya akate akambo wahataye etena kakandewoya sangwelo diaki Nzambi diendana la Joani y’ɔnande. (Luka 1:76) Ɔna ɔsɔ akayokomaka Joani Obatizanyi ɔnɛ lakayewoya oyelo wa Yeso Kristo, ɔprɔfɛta woleki Mɔsɛ woke wakakongɛka anto edja efula. (Joa. 1:23-36) Oko wakinde ɔprɔfɛta, Yeso akatewoyisha akambo efula. Ɛnyɛlɔ, nde akatɛkɛta dikambo dia nyɔi kande, akatatshi woho wakandahombe mvɔ, lɛnɛ akandahombe mvɔ ndo wanɛ wakahombe mbodiaka. (Mat. 20:17-19) Ampokami waki Yeso wakambe etena kakandawatɛ dia Jerusalɛma la tɛmpɛlɔ kayɔ yayolanyema vwa. (Mako 13:1, 2) Prɔfɛsiya yande yekɔ lo kotshama polo ndo nshi yaso nyɛ.—Mat. 24:3-41.
12. a) Ngande wakahɔhɔla Yeso olimu w’esambishelo wa l’andja w’otondo? b) Lande na kayelaso ɛnyɛlɔ kaki Yeso ɛlɔ kɛnɛ?
12 Lâdiko dia monga ɔprɔfɛta, Yeso aki osambisha ndo ombetsha. Nde akasambisha lokumu l’ɔlɔlɔ la Diolelo diaki Nzambi, ndo ndoko onto lakatɛkɛta la dihonga oko nde. (Luka 4:16-21, 43) Nde aki ombetsha woleki woke. Anto amɔtshi wakoke kɛnɛ kakandataka wakate vɔate: “Nduku untu edja ndu kakiane akateketa wuhu oso.” (Joa. 7:46) Yeso akasambishaka lokumu l’ɔlɔlɔ l’ohetoheto ndo nde akashaka ambeki ande ɛnyɛlɔ k’ɔlɔlɔ lo dikambo sɔ. Lo sala ngasɔ, nde akahɔhɔla olimu w’esambishelo ndo wa wetshelo wa l’andja w’otondo watatetemala polo ndo nshi nyɛ. (Mat. 28:18-20; Etsha 5:42) Ɔnɔnyi wetshi, ambeki waki Kristo suke la miliyɔ esambele waketsha wenya oko 1 500 000 000 l’olimu wa sambisha lokumu l’ɔlɔlɔ la Diolelo ndo wa mbetsha wanɛ wɛnya nsaki akambo wa mɛtɛ wa lo Bible. Onde wɛ lawɔ mbishaka lonya lo yɛdikɔ y’efula l’olimu ɔsɔ?
13. Kakɔna kayotokimanyiya dia sho ‘sungukalaka’?
13 Hatokoke mbidja tâmu dia Jehowa akakotsha prɔfɛsiya ka toma ɔprɔfɛta wele oko Mɔsɛ. Shɛngiya yakɔna yele la ewo ka dikambo sɔ le so? Shi tɔ toshaka eshikikelo k’ɔnɛ prɔfɛsiya yakasambiyama yendana la nshi yaso yayaye yayokotshama? Eelo, kana yimba lo ɛnyɛlɔ kaki Mɔsɛ ka woke totshutshuyaka dia sho ‘sungukalaka ndo mambalɛka’ kɛnɛ kayanga sala Nzambi.—1 Tes. 5:2, 6.
Teye dia Kristo ekɔ Ompakemi
14. Ngande waki Mɔsɛ ompakemi lam’asa ase Isariyɛlɛ la Nzambi?
14 L’ɛnyɛlɔ ka Mɔsɛ, Yeso ekɔ ompakemi. Ompakemi ekɔ oko kilalo kakakatanya wedi ehende wokakitɔnyi. Mɔsɛ aki ompakemi wa sheke y’Ɛlɛmbɛ lam’asa Jehowa l’ase Isariyɛlɛ. Otondonga ana wa Jakɔba wakakitanyiya ɛlɛmbɛ waki Nzambi, tshike vɔ wototetemala monga wodja wa lânde waki Nzambi, mbuta ate etshumanelo kande. (Etum. 19:3-8) Sheke shɔ yakatetemala monga la nɛmɔ oma lo 1513 N.T.D. polo lo ntambe ka ntondo T.D.
15. Lo woho akɔna wele Yeso ompakemi woleki woke?
15 Lo 33 T.D., Jehowa akadje sheke yoleki dimɛna nde la Isariyɛlɛ w’oyoyo, mbuta ate, “Isariyele wa [Nzambi],” wakayokoma etshumanelo ka l’andja w’otondo kokengami l’Akristo w’akitami. (Ngal. 6:16) Etena kele sheke yaki Mɔsɛ ompakemi yaki la ɛlɛmbɛ wakafunde Nzambi lo pase di’ave, sheke yele Yeso ompakemi ndjileka la fwa nɛ dia lo sheke shɔ Nzambi akafunde ɛlɛmbɛ l’etema w’anto. (Adia 1 Timote 2:5; Heberu 8:10.) Ɔnkɔnɛ, “Isariyele wa [Nzambi]” waya kakianɛ wodja wa lânde waki Nzambi, mbuta ate ‘wodja watɔ elowa’ wa Diolelo diaki Mɛsiya. (Mat. 21:43) Anto wakenga wodja wa lo nyuma ɔsɔ wekɔ ase sheke y’oyoyo. Koko aha paka vɔamɛ ato mbakondja wahɔ oma lo sheke shɔ. Olui w’anto waheyama mbadia, ndo lokema la wanɛ woladi djɔ lo nyɔi wayolongola ɛtshɔkɔ wa pondjo oma lo sheke y’oyoyo shɔ.
Teye dia Kristo ekɔ Otshungodi
16. a) Lo toho takɔna takakambe Jehowa la Mɔsɛ dia tshungola wodja w’Isariyɛlɛ? b) Lo ndjela Etumbelu 14:13, ele Kiɔkɔ y’etshungwelo?
16 L’otsho w’ekomelo wakiwɔ la ntondo ka vɔ tomba oma lo Edjibito, ana amɔtshi w’ase Isariyɛlɛ waki lo wâle nɛ dia ondjelo waki Nzambi aki suke la kindjakindja wodja w’otondo w’Edjibito dia ndjaka ana wa nondo tshɛ. Jehowa akatɛ Mɔsɛ dia ana wa nondo w’ase Isariyɛlɛ wayohanda naka ase Isariyɛlɛ mbɔsa dikila dia ɔn’ɔkɔkɔ wa Elekanelo ko kita lo eshingito wa asoko wa mvudu yawɔ. (Etum. 12:1-13, 21-23) Ngasɔ mbakadiasalema. Yema tshitshɛ l’ɔkɔngɔ diko, wodja w’otondo waki lo wâle wa mamba. Vɔ wakatanema lam’asa lɔkɔnga la mpakahaka, mbuta ate lɛnɛ ndjale ka Beela ndo lo wedi okina ase Edjibito wakayawayelaka la pusupusu ya ta. Mbala kɛsɔ nto, Jehowa akâtshungola lo tshimbo ya Mɔsɛ, lakâtola ashi wa ndjale l’ahende lo dihindo.—Etum. 14:13, 21.
17, 18. Lo toho takɔna tele Yeso otshungodi woleki Mɔsɛ woke?
17 Kânga mbaki etshungwelo kɛsɔ woke, etshungwelo katshungola Jehowa anto lo tshimbo ya Yeso ndeka woke la fwa. Akanga w’okitanyiya wekɔ lo tshungɔ oma lo lɔhɔmbɔ la pɛkato oma lo tshimbo ya Yeso. (Romo 5:12, 18) Ndo etshungwelo kɛsɔ kekɔ “etshungwelu ka pundju.” (Heb. 9:11, 12) Lokombo Yeso nembetshiyaka “Jehowa ekɔ panda.” Oko wende Otshungodi, kana Oshimbedi aso, Yeso hatotshungola tsho oma lo pɛkato yakete, koko nde todiholɛka ndo mboka dia sho ndjonga la nshi yayaye y’amɛna. Lo tshungola ambeki ande oma lo lɔhɔmbɔ la pɛkato, Yeso mbashimbɛka oma lo kɛlɛ ka Nzambi ndo mbakonyaka dia vɔ monga la diɔtɔnganelo dia ma ma la Jehowa.—Mat. 1:21.
18 Lo etena kakashikikɛma, etshungwelo katotshungola Yeso oma lo pɛkato kayototshungola ndo oma l’etombelo atɔ wa kɔlɔ, mbuta ate pɛkato ndo nyɔi. Dia shihodia kɛnɛ kalembetshiya dikambo sɔ, tɔsɛdingole kɛnɛ kakatombe etena kakatshu Yeso otsha lo luudu laki pami kɛmɔtshi kelɛwɔ Jayiro kakavusha ɔnande la womoto laki la ɛnɔnyi 12. Yeso akashikikɛ Jayiro ate: “Tukaki woma, etawo paka mbetawo, ku ndi ayokono.” (Luka 8:41, 42, 49, 50) Nde akate mɛtɛ nɛ dia ɔna womoto ɔsɔ akolɔ oma lo nyɔi! Ohokanyiya woho w’ɔngɛnɔngɛnɔ waki l’ambutshi ande! Lâsɔ wɛ kokaka kanyiya ɔngɛnɔngɛnɔ w’efula wayonga la so etena “kayuka wane weli lu waumbu tshe diui [dia Yeso], ku vo wayutumba,” mbuta ate wayolɔ. (Joa. 5:28, 29) Lo mɛtɛ, Yeso ekɔ Oshimbedi ndo Otshungodi!—Adia Etsha 5:31; Tito 1:4; Eny. 7:10.
19, 20. a) Kana yimba lo ɔkɛndɛ wele la Yeso oko wende Mɔsɛ ka woke ekɔ la shɛngiya yakɔna le so? b) Kakɔna kayotɔsɛdingola lo sawo diayela?
19 Mbeya dia sho kokaka kimanyiya anto dia vɔ kondja wahɔ oma lo woho watoshimbɛ Yeso totshutshuyaka dia sho mbisha lonya l’olimu w’esambishelo ndo wa mbetɛ anto ambeki. (Is. 61:1-3) Lâdiko dia lâsɔ, kana yimba lo ɔkɛndɛ wele la Yeso oko wende Mɔsɛ ka woke tokimanyiyaka dia sho ndeka monga l’eshikikelo dia nde ayotshungola ambeki ande etena kayondoya dia ndjolanya anto wa kɔlɔ.—Mat. 25:31-34, 41, 46; Eny. 7:9, 14.
20 Eelo, Yeso ekɔ Mɔsɛ ka woke. Nde akasale akambo wa mamba efula waki Mɔsɛ kokoka mbasala pondjo. Kɛnɛ kakate Yeso oko wende ɔprɔfɛta ndo kɛnɛ kakandasale oko wende ompakemi kekɔ la shɛngiya le nkumbo k’anto k’otondo. Oko wende Otshungodi, Yeso mbishaka anto wakoka tshungɔ panda ka pondjo koko aha ka lo tshanda mɔtshi. Ndo nto, ekɔ akambo akina wendana la Yeso wakokaso mbeka oma le ekambi waki Nzambi wa kɔlamelo wa lo nshi y’edjedja. Lo sawo diayela, tayɔsɛdingola woho waki Yeso Davidi dia woke ndo Sɔlɔmɔna ka woke.
Onde wɛ kokaka nembetshiya?
Ngande wele Yeso ndeka Mɔsɛ woke oko wende
• ɔprɔfɛta?
• ompakemi?
• otshungodi?
[Kiombo/Osato wa lo lɛkɛ 26]
Toho tokina takafɔnaka Yeso nde la Mɔsɛ
◻ Vɔ akɔ ahende wakatshike ahole wa lâdiko dia kambɛ Jehowa ndo ekambi ande.—2 Kor. 8:9; Fil. 2:5-8; Heb. 11:24-26.
◻ Vɔ akɔ ahende waki akitami w’esɔ, kana ‘waa kristo.’—Mako 14:61, 62; Joa. 4:25, 26; Heb. 11:26.
◻ Vɔ akɔ ahende wakaye lo lokombo la Jehowa.—Etum. 3:13-16; Joa. 5:43; 17:4, 6, 26.
◻ Vɔ akɔ ahende waki la memakana.—Wal. 12:3; Mat. 11:28-30.
◻ Vɔ akɔ ahende wakalesha elui w’anto.—Etum. 16:12; Joa. 6:48-51.
◻ Vɔ akɔ ahende waki toshushi ndo ambidji w’ɛlɛmbɛ.—Etum. 18:13; Mal. 4:4; Joa. 5:22, 23; 15:10.
◻ Vɔ akɔ ahende wakalongola ɔkɛndɛ oma le Nzambi dia nɔmbɔla luudu lande.—Wal. 12:7; Heb. 3:2-6.
◻ Vɔ akɔ ahende mbeyamaka oko ɛmɛnyi wa Jehowa wa kɔlamelo.—Heb. 11:24-29; 12:1; Eny. 1:5.
◻ L’ɔkɔngɔ wa nyɔi ka Mɔsɛ ndo ka Yeso, Nzambi akalame edo awɔ.—Euh. 34:5, 6; Luka 24:1-3; Etsha 2:31; 1 Kor. 15:50; Jude 9.