Lekɔ la ɔngɛnɔngɛnɔ kânga mbemi l’ɛkɔmɔ
Kɔndwama oma le Paulette Gaspar
Kânga mbakimi la wotsho wa kilɔ shato y’etondo etena kakamotɔ, dɔkɔtɛlɛ akeyaka dia dimi lakotɔ la dui dimɔtshi dia kɔlɔ lo demba diami. Etena kakamayotɔka, weka ami wakɔkɔ. Aki ngasɔ nɛ dia laki la hemɔ kendana la okakatanu wa okengamelo wa weka (ostéogenèse), omalɔkɔ mbakonge weka ami wɔdu wɔdu. Wakatɔlɛ lo luudu latawɔ anto, koko adɔkɔtɛlɛ wakɛnaka dia dimi hatoka. Vɔ wakalongamɛka dia layovɔ la ntondo ka kotsha wenya 24.
DIMI lakotɔ la Canberra, osomba wele kapitalɛ ka wodja wa Australie lo Ngɔndɔ ka samalo 14, 1972. Otshikitanyi la kɛnɛ kakawalongamɛka, dimi komvɔ lushi la ntondo lɔsɔ. Koko oma lâsɔ lakandama la hemɔ ka l’asasa. Lam’ele vɔ wakafɔnyaka dia lo weho akɔ tshɛ layovɔ, adɔkɔtɛlɛ kombishami ndoko okanga. Dikambo dia diambo ko dimi komvɔ.
Dimi mbohɔka dia ambutshi ami mɛtɛ waki l’okakatanu wa wolo l’etena kɛsɔ. Lam’ele akɛnamaka dia ayonga wolo dimi tshikala la lɔsɛnɔ, enganga efula waki l’etema w’ɛlɔlɔ wakalake ambutshi ami diaha vɔ ndeka ndjasha le mi. Lo mɛtɛ, lo ngɔndɔ shato y’etatelo yakimi lo lopitadi, ambutshi ami komonga la lotshungɔ la munandami ɔnɛ watokoyɔmbɔkɔla weka. Etena kakawayɛna dia dimi kokaka mbika, adɔkɔtɛlɛ wakatɛ ambutshi ami dia vɔ tɔlami lo luudu lakawalamaka ana wele la dikɔmɔ.
Koko ambutshi ami wakɔshi yɛdikɔ ya ntshɔ la mi la ngelo. Lâsɔ ko mama ambotatɛ mbeka Bible la Ɛmɛnyi wa Jehowa. Kɛnɛ kakandeke kakaleke mbohola ɔkɛndɛ wele la nde wa kokɛmi. Koko aki tshondo y’okakatanu le nde dia sukana lalemi nɛ dia wonya wakoshilɛka etena kakandasalaka tshɛ dia kotsha ehomba ami. Wakatɔlaka mbala la mbala lo lopitadi. Weka ami wakɔkɔka kânga lo kiambokambo ya tshitshɛ yele oko mbɔka. Kânga etena kakamasalaka lokashi, weka ami wakakokaka mbatɛ ɛlɔngɛ.
Lakayonga la ɔkɔmwɛlɔ
Etena kakamayolaka, dimi kokakitɔnaka la kɔsa kami k’etshimbi. Dimi kokoka mbeka dia kɛndakɛnda. Kânga mbakimi l’ekakatanu ɛsɔ, ambutshi ami wakakotshɛka ehomba ami wa lo demba dimɛna.
Lâdiko dia lâsɔ, mama akasale la wolo dia mbetshami losango lakeketsha la lo Bible. Ɛnyɛlɔ, nde akambetsha dia lo nshi yayaye, Nzambi ayokadimola nkɛtɛ paradiso ndo anto tshɛ wayonga kokele lo nyuma, lo yimba ndo demba. (Osambu 37:10, 11; Isaya 33:24) Koko, mama akasuya dia nde mɛnaka dia ekɔ wolo dia dimi monga la lɔsɛnɔ l’ɔngɛnɔngɛnɔ naka Diolelo diaki Nzambi diataye.
L’etatelo, lakɔtɔka lo kalasa y’ana wele la dikɔmɔ. Embetsha ami kombidjaka ndoko oyango lo dikambo diami ndo dimi dimɛ kondjadjɛka ndoko oyango. Lo mɛtɛ, aki tshondo y’okakatanu dia dimi tetemala la mbɔtɔ kalasa. Ana efula wa lɛkɔ wakamɛnyaka pâ. L’ɔkɔngɔ diko, lakayɔtɔka lo kalasa yɔtɔ ana wele kema la dikɔmɔ. Lakayɛnaka dia mbeka dia monga kâmɛ l’anto akina akashishɛka wolo ami wa lo demba, wa lo yimba ndo wa lo tokanyi. Koko, lakɔshi yɛdikɔ dia dimi shidiya kalasa ka sekɔndɛrɛ.
Djekoleko etena kakamakome lo kalasa ka sekɔndɛrɛ, lakakane yimba lo kɛnɛ kendana la nsɛnɔ y’asekami ambeki yakɛnamaka dia yɔ komonga la oyango. Dimi lakakanaka yimba nto lo akambo wakambetsha mama oma lo Bible. Dimi lakeyaka lo yimba yami dia kɛnɛ kakandataka kaki mɛtɛ. Koko wetshelo wa lo Bible komunanda otema ami l’etena kɛsɔ. L’etena kɛmɔtshi, lakayɛnaka dimɛna sala la wolo dia ndodja lɔsɛnɔ lami l’awui w’ɔngɛnɔngɛnɔ ndo wɔdia aha la kana yimba dikambo dia loyi.
Etena kakamakotsha ɛnɔnyi 18, lakamɔ oma lakaso ndo lakatodjasɛ lo luudu lɔmɔtshi lakadjasɛka akanga wa dikɔmɔ. Lakɛnyi dia wonwelo ɔsɔ waki dikambo di’ɔngɛnɔngɛnɔ ndo diakambishaka okiyanu. Monga la lotshungɔ, dipanda, angɛnyi w’eyoyo ndo mbokana l’anto akina akambishaka ɔngɛnɔngɛnɔ efula. Efula k’angɛnyi ami wakatshukama. Dimi laki la nsaki k’efula ka tshukama ndo mbokama ngandji. Koko, lam’ele laki la ɛkɔmɔ, aki wolo le mi dia dimi tana olonganyi. Dui sɔ diakambishaka okiyanu efula.
Koko, dimi kombisha Nzambi onongo wa pâ yami. Lakeke akambo efula wendana la Nzambi dia mbeya dia nde hakoke sala akambo aha la losembwe pondjo. (Jobo 34:10) Lakasale la wolo dia mbetawɔ lɔsɛnɔ lami woho wakilɔ. Kânga mbakidiɔ ngasɔ, lakayonga l’ɔkɔmwɛlɔ w’efula.
Lakatakɔnɔka yema yema
Diɛsɛ ko, mama akeyaka akambo wakakomɛka ndo nde akatɛ ekumanyi kɛmɔtshi ka l’etshumanelo kaki suke la mi. Ekumanyi kakɔ akambelɛ lo telefɔnɛ ko akambutɛ dia dimi tɔtɔ lo nsanganya y’Akristo lo Mbalasa ka Diolelo k’Ɛmɛnyi wa Jehowa kaki lo ngelo kakɔ. Lâdiko dia lâsɔ, kadiyɛso kɛmɔtshi ka l’etshumanelo akatatɛ mbeka la mi Bible lomingu tshɛ.
Lakohɔ akambo wa mɛtɛ wa lo Bible wakambetsha mama ambeta ɛnɔnyi efula ndo lɔsɛnɔ lami lakatatɛ ndowana. Lakangɛnangɛna lɔngɛnyi la lam’asami la wanyami Akristo. Koko, dimi lakeke diaha mbutɛka anto woho wokami nɛ dia lakokaka wɔma diaha vɔ nyangiyami. Dimi fɔnyaka dia dui sɔ diakambidjɛ wekamu diaha dimi mboka Nzambi ngandji k’efula. Kânga mbakidiɔ ɔsɔku, lakeye dia aki dimɛna ndjakimɔ le Nzambi. Ɔnkɔnɛ, lo Ngɔndɔ ka dikumi l’ahende 1991, lakabatizama dia mɛnya ndjakimɔ kami lo sɛkɛ.
Lakonɔ oma lo luudu lakamadjasɛka la akanga wa dikɔmɔ ko lakatodjasɛ lo luudu lami dimɛ. Otshikitanu ɔsɔ wakambela wahɔ ndo ekakatanu. Ɛnyɛlɔ, lakayaokaka opoko. Ndo lakafɔnyaka di’ana w’apami wayoyɔmbɔtwɛ. Kombeta edja, lakayongaka l’ɔkɔmwɛlɔ nto. Kânga mbakimi l’elungi k’ɔmɔnɔmɔnɔ, dimi kondjaokaka dimɛna. Laki l’ohomba w’angɛnyi w’ɛlɔlɔ ndo w’eshika.
Lakayɛnaka dia Jehowa Nzambi akambisha ɔngɛnyi wakamahombaka. Dikumanyi dia l’etshumanelo ka lo ngelo kaso wakɔshi tɛdikɔ dia Suzie, kadiyɛso kɛmɔtshi kambotshukama tetemalaka mbeka la mi Bible. Suzie komonga tsho ombetsha le mi, koko nde akakome ndo ɔngɛnyi ami w’oshika wakamalangaka efula.
Suzie akandowanya woho wa mbetsha anto akina akambo wakamekaka, oyadi l’esambishelo ka lo soko la soko kana ka lo tshakitudi. L’etena kɛsɔ mbakamayotatɛ ngɛnangɛna waonga waki Nzambi. Koko, kânga mbakamabatizama, lâsɔ ko talonge la ngandji k’efula le Nzambi. Lo diaaso dimɔtshi, dimi laki suke la tshika mbokambɛ. Lakayotɛka Suzie dui diakɔ ndo nde akakimanyiya l’etena kakimi l’ɔkɔmwɛlɔ kɛsɔ.
Suzie akakimanyiya nto dia dimi mbeya dia kɛnɛ kakalekaka shishɛmi ɔngɛnɔngɛnɔ ele, woho wakimi la lɔngɛnyi la anto amɔtshi waki konangaka Jehowa efula. Ɔnkɔnɛ, lakatatɛ mbɔtɔ lɔngɛnyi l’Akristo wambotshunda lo nyuma, djekoleko wanɛ waya epalanga. Ndo nto, diɔtɔnganelo diaki lam’asami la mama komonga dimɛna; ɔnkɔnɛ dimi lakatatɛ monga la diɔtɔnganelo dia dimɛna la nde ndo la enondo ami la pami. Dimi lakambe efula nɛ dia laki la ɔngɛnɔngɛnɔ waki komongaka la mi ntondo. Analengo l’akadiyɔ wa lo nyuma, nkumbo kami ndo lâdiko di’anto asɔ tshɛ Jehowa, akayala kiɔkɔ y’ɔngɛnɔngɛnɔ ndo y’ekeketshelo le mi.—Osambu 28:7.
Olimu w’oyoyo
L’ɔkɔngɔ wa dimi mbɔtɔ lo losanganya la woke lɛnɛ akamatoka sawo diakɛnyaka ɛngɛnɔngɛnɔ wakondja ekambi w’Akristo wa lo tena tshɛ, lakakane yimba nte: ‘Dimi lawɔ kokaka kamba olimu ɔsɔ.’ Lakeyaka dia dikambo sɔ ayonga wolo le mi. Koko l’ɔkɔngɔ wa dimi sɛdingola dikambo sɔ lo dɔmbɛlɔ, lakɔshi yɛdikɔ ya ndodja dɛmandɛ dia ndjokoma ombetsha wa Bible wa lo tena tshɛ ndo lo Ngɔndɔ ka nɛi 1998, lakatatɛ kamba olimu w’oyoyo ɔsɔ.
Ngande wakamakoke sambisha dimɛna la demba diami di’ose hemɔ? Lôkomongaka, dimi nangaka ndjasalɛ awui dimɛ ndo halange mbahɛ anto akina wotsho lo mendɛka le wɔ dia vɔ mɛmbakami kana kimanyiyakami lo woho okina. Ɔnkɔnɛ, Suzie nde la Michael w’omɛnde wakambutɛ dia dimi somba mututu! Ko ngande wakamakoke kɛndjakɛndja mututu? Oko wadiɛnya foto kami kele lo sawo nɛ, mututu ami wakasalema lo yoho ya lânde dikambo diami. Laki paka la kilɔ 19 tsho ndo komongaka ohomba dimi monɛ oma lo kɔsa kami k’etshimbi!
Lam’ele lekɔ la mututu ami wa lânde, dui sɔ mbishakami diaaso dia membola anto ndo mbekaka la wɔ Bible lo tena diakakokaka le wɔ ndo le mi. Lo mɛtɛ, dimi nangaka kɛndjakɛndja mututu ami efula dia tɔsaka yema ya lɔpɛpɛ ndo ɔsɔ ekɔ dikambo diambisha ɔngɛnɔngɛnɔ!
Dimi ngɛnangɛnaka sawola la anto lo toshinga nɛ dia efula kawɔ wekɔ la loshilambo ndo la dilɛmiɛlɔ le mi. Dimi ngɛnangɛnaka kimanyiya anto akina dia vɔ mbeka akambo wa lo Bible. Dimi mbohɔka diaaso dimɔtshi diakamatombe lo esambishelo ka lo luudu la luudu kâmɛ la ɔnangɛso ɔmɔtshi l’otale tshwa. Nde akasha kanga luudu ɔmɔtshi la womoto mɔyɔ ndo kam’akandamende, nde akâmbe ndo akambola ɔnɛ lakatshu la mi ɔnɛ: “Onde nde kokaka tɛkɛta?” Sho akɔ ahende takatondɔ la tɔɔla. Lam’akamashidiya mbosambisha, mama kakɔ akashola dia dimi kokaka tɛkɛta!
Kakianɛ, lekɔ lo ngɛnangɛna la lɔsɛnɔ ndo lambeka dia mboka Jehowa Nzambi ngandji. Lekɔ la lowando l’efula le mama woho wakandambetsha akambo wa mɛtɛ wa lo Bible ndo lekɔ lo kongɛ nshi yayaye l’eshikikelo tshɛ etena kayanga Nzambi ‘mbetɛ diangɔ tshɛ eyoyo,’ mbidja ndo tolemba tami.—Enyelo 21:4, 5.
[Efundelo wa l’etei w’odingɔ wa lo lɛkɛ 26]
“Lakasale la wolo dia mbetawɔ lɔsɛnɔ lami woho wakilɔ. Kânga mbakidiɔ ngasɔ, lakayonga l’ɔkɔmwɛlɔ w’efula”