Onde wɛ âkohɔ?

Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka kadimola ambola wayela anɛ:

• Naka ɔna ambovɔ la ntondo ka nde mbotɔ, onde nde kokaka ndjolɔ?

Lɔsɛnɔ tatɛka etena katshɔ womoto diemi. Jehowa koka mbolola onto tshɛ, mbidja ndo ɔna leke l’otema a nyango nɛ dia “akambu tshe mbeyaka ntshama le [Nzambi].” (Mako 10:27) Koko, Bible hate hwe dia kana nde ayolola ana wakavu weke l’etema w’anyangɛwɔ.​—4/15, lɛkɛ 12, 13.

• Wetshelo akɔna wakokaso kondja oma le tɔnɔna, otomba, ɛndjɔ, ndo lokudi?

Ditongami nɛi sɔ mɛnyaka lomba la lôtɔ lele la diɔ. Ɔnkɔnɛ, diɔ mɛnyaka lomba lele la Nzambi. (Tuk. 30:24-28)​—4/15, lɛkɛ 16-19.

• Lande na katɛkɛta Bible dimɛna dikambo dia nɛmbɔhala?

Bible mɛnyaka dia nɛmbɔhala ekɔ djembetelo ya dilɛmiɛlɔ, dui diakimanyiya dia kana yimba ndo ekɔ djembetelo ya yewo ndo ya shɛnɔdi. (Osam. 37:7; 63:6; Tuk. 11:12)​—5/15, lɛkɛ 3-5.

• Nkumi ya dikanga ngana ya la Juda yaki l’ohetoheto wa mamba dikambo dia luudu la Nzambi?

Nkumi ya dikanga dikumi la divwa mbakolɛ lo diolelo dia Juda dia lo sidɛ, koko nyɛi l’atei awɔ mbakeyamaka l’ɔtɛ w’ohetoheto wa mamba waki la wɔ. Nkumi ya dikanga yakɔ ko: Asa, Jehɔshafata, Hɛzɛkiya ndo Jɔsiya.​—6/15, lɛkɛ 7-11.

• Onde Akristo tshɛ w’akitami weke la nkɛtɛ mbele l’ɔkɛndɛ wa mbisha wanyawɔ Akristo mbo ya ndɛ ya lo nyuma?

Kema. Wanɛ tshɛ wakakitama nyuma kaki Nzambi mbakenga olui w’ɔhɔmbɔ wa kɔlamelo ndo wa kɛsɔ, koko wanɛ wakenga Olui-walɔmbɔla mbênda olimu wa woshelo wa mbo ya ndɛ ya lo nyuma.​—6/15, lɛkɛ 22-24.

• Ngande wakokayɛ nɔngɔsɔla ɔnayɛ lele l’ɛnɔnyi dikumi l’ɛmɔ dia nde ndjokoma opalanga w’oshika?

Dia nɔngɔsɔla ɔnayɛ lele l’ɛnɔnyi dikumi l’ɛmɔtshi dia nde ndjokoma opalanga, wɛ pombaka mbokimanyiya dia nde tshundja ‘yimba’ yande dia nde ndjonga l’akoka wa ndjaɔsɛ tɛdikɔ t’amɛna. (Romo 12:1, 2) Lo kamba la atɔndɔ wa lo Bible lo toho ta shikaa, wɛ ayowokimanyiya dia nde monga opalanga, mbɔsa tɛdikɔ t’amɛna etena kayondokoma opalanga ndo mbewɔ etombelo wa kɔlɔ waya oma lo monga la lɔkɛwɔ la kɔlɔ. (Fil. 4:5; Ngal. 6:7; Kol. 3:21) Atɔndɔ wa lo Bible kokaka kimanyiya nkumbo kayɛ dia tɔ monga l’ɔngɛnɔngɛnɔ.​—7/1, lɛkɛ 29.

• Lande na kakokaso mbuta dia ngandji mbakalekaka tshikitanya Yeso la ewandji w’ɛtɛmwɛlɔ lo woho wakawɔsaka anto?

Lo dihole dia mboka anto k’anto ngandji, ewandji w’ɛtɛmwɛlɔ ɛsɔ wakawaɔnyɔlaka. Ndo nto, vɔ kombokaka Nzambi ngandji. Yeso akokaka She ngandji ndo nde akokaka anto kɛtshi. (Mat. 9:36) Nde akawaokaka ngandji, kɛtshi ndo aki la lɔsɛngɔ otsha le wɔ.​—7/15, lɛkɛ 15.