Yaayo kanyu lo yoho ya lɔsɛnɔ yoleki dimɛna!
“Kana teko la lumu, kana tambuvo shu teko wa Khumadiondjo.”—ROMO 14:8.
1. Kakɔna kaketsha Yeso lo kɛnɛ kendana la yoho ya lɔsɛnɔ yoleki dimɛna?
JEHOWA nangaka dia sho monga la yoho ya lɔsɛnɔ yoleki dimɛna. Anto kokaka nsɛna toho ta nsɛnɔ totshikitanyi, koko yoho tshɔi tsho mboleki dimɛna. Yoho ya lɔsɛnɔ yoleki dimɛna yakokaso nsɛna ele mbɔtɔnganyiya lɔsɛnɔ laso l’Ɔtɛkɛta wa Nzambi ndo mbeka awui oma le Ɔnande, Yeso Kristo. Yeso aketsha ambeki ande dia vɔ tɛmɔlaka Nzambi lo nyuma la lo mɛtɛ ndo nde akawadjangɛ dia vɔ mbetɛ anto ambeki. (Mat. 28:19, 20; Joa. 4:24) Lo nsɛna lo yoho yɔtɔnɛ la wetshelo waki Yeso, sho ngɛnyangɛnyaka Jehowa ndo kondjaka ɛtshɔkɔ oma le Nde.
2. Kakɔna kakasale anto efula wakoke losango la Diolelo lo ntambe ka ntondo, ndo kakɔna kakalembetshiyaka monga lo “Mbuka”?
2 Etena kakoma ‘anto wakoka nkondja lɔsɛnɔ la pondjo’ ambetawudi ndo kabatizamawɔ, sho mongaka la ɛkɔkɔ w’eshika wa mbatɛ ɔnɛ: “Yaayo kanyu lo yoho ya lɔsɛnɔ yoleki dimɛna!” (Etsha 13:48) Lo ntambe ka ntondo lo tena diaso nɛ, nunu di’anto di’oma lo wedja wotshikitanyi waketawɔ akambo wa mɛtɛ ndo wakɛnya ndjakimɔ kawɔ le Nzambi lo sɛkɛ lo batizama. (Etsha 2:41) Ambeki wa ntondo asɔ waki lo “Mbuka.” (Etsha 9:2; 19:23) Tshɛkɛta shɔ kokaka nɛ dia wanɛ wakakome ambeki wa Kristo waketawɔ nsɛna yoho ya lɔsɛnɔ yohikami lo mbetawɔ kele la wɔ le Yeso Kristo ndo lo mbokoya ɛnyɛlɔ kande.—1 Pet. 2:21.
3. Lande na kabatizama ekambi waki Jehowa, ndo anto angana wakabatizama lo ɛnɔnyi dikumi wetshi ɛnɛ?
3 Olimu wa mbetɛ anto ambeki wambohama efula lo nshi y’ekomelo nyɛ ndo wekɔ lo kambema lo wedja ndekana 230. Lo ɛnɔnyi dikumi wetshi ɛnɛ, ndekana anto 2 700 000 wakɔshi yɛdikɔ ya nkambɛ Jehowa lo batizama dia mɛnya ndjakimɔ kawɔ le nde lo sɛkɛ. Ekɔ oko yɛdikɔ ya l’atei atei ya ndekana anto 5 000 mbabatizama lomingu tshɛ! Ngandji kokawɔ Nzambi, ewo k’Afundelo ndo mbetawɔ kele la wɔ lo kɛnɛ kekawɔ mbâtshutshuya dia batizama. Batismu ekɔ dui di’ohomba efula lo lɔsɛnɔ laso ndo tɔ mɛnyaka etatelo ka diɔtɔnganelo di’oshika dia lam’asaso la Jehowa. Tɔ mɛnyaka nto dia tekɔ la eshikikelo dia nde ayotokimanyiya dia sho mbôkambɛ la kɔlamelo tshɛ oko wakandakimanyiya ekambi ande wa lo nshi y’edjedja dia vɔ nkɛndakɛnda lo mboka yande.—Is. 30:21.
Lande na kahombayɛ batizama?
4, 5. Shila ɛtshɔkɔ ndo ɛlɔlɔ ɛmɔtshi waya lo batizama.
4 Ondo wɛ amboshila la nkondja ewo ka Nzambi, amboshila la nsala etshikitanu lo lɔsɛnɔ layɛ ndo aya opandjudi wahatabatizama. Wɛ kokaka mandɔma lo ohamelo wamboyosala ɔsɔ. Ko onde wɛ amboyakimɔ le Nzambi lo dɔmbɛlɔ ndo ekɔ lo nongamɛ dia batizama? Oma l’ekimanyielo ka wekelo ayɛ wa Bible, ondo wɛ ambeya dia lo lɔsɛnɔ layɛ l’otondo wɛ pombaka tombolaka Jehowa, koko aha ndjasha tsho l’eyango w’ɛngɛnɔngɛnɔ ndo wa lomombo la l’emunyi. (Adia Osambu 148:11-13; Luka 12:15) Ko naa ɛlɔlɔ ndo ɛtshɔkɔ ɛmɔtshi waya lo batizama?
5 Oko weyɛ Okristo wamboyakimɔ, lɔsɛnɔ layɛ layonga la oyango woleki tshɛ dimɛna. Wɛ ayonga la ɔngɛnɔngɛnɔ nɛ dia wɛ ekɔ lo nsala lolango laki Nzambi. (Romo 12:1, 2) Nyuma k’ekila kaki Jehowa kayokokimanyiya dia wɛ monga la waonga w’ɛlɔlɔ wele oko wɔladi ndo mbetawɔ. (Ngal. 5:22, 23) Nzambi ayoka alɔmbɛlɔ ayɛ ndo ayɔtshɔkɔla welo wadjayɛ dia mbɔtɔnganyiya lɔsɛnɔ layɛ l’Ɔtɛkɛta ande. Wɛ ayonga la ɔngɛnɔngɛnɔ l’olimu ayɛ w’esambishelo ndo nsɛna yoho ya lɔsɛnɔ yangɛnyangɛnya Nzambi ayokeketsha elongamelo kayɛ ka lɔsɛnɔ la pondjo. Ndo nto, ndjakimɔ ndo batizama ayɛnya dia wɛ mɛtɛ nangaka monga Ɔmɛnyi wa Jehowa.—Is. 43:10-12.
6. Kakɔna kɛnya batismu kaso?
6 Lo ndjakimɔ le Nzambi ndo lo batizama, sho mɛnyaka lo sɛkɛ dia taya anto waki Jehowa. Ɔpɔstɔlɔ Paulo akafunde ate: “Nduku untu l’atei asu atuyayalelaka la lumu lu wulu andi ndame, ndu nduku untu atuvokaka lu wulu andi ndame. Naka shu teko la lumu, keti shu teko la lumu le Khumadiondjo. Naka shu tambuvo, keti shu tambuvo le Khumadiondjo. Okone kana teko la lumu, kana tambuvo, shu teko wa Khumadiondjo.” (Romo 14:7, 8) Nzambi akatosha nɛmɔ lo tosha lotshungɔ la nsɔna kɛnɛ kalangaso. Etena kɔsaso yɛdikɔ ya wolo ya ndjela yoho ya lɔsɛnɔ yoleki dimɛna nɛ dia sho mbokaka Nzambi ngandji, sho ngɛnyangɛnyaka otema ande. (Tuk. 27:11) Batismu kaso ekɔ djembetelo ya ndjakimɔ kaso le Nzambi ndo ya wotelo wa lo sɛkɛ w’ɔnɛ Jehowa mbele Omboledi aso. Tɔ mɛnyaka nto dia sho tambeta lo wedi ande lo dikambo diendana la lowandji la l’andja w’otondo. (Etsha 5:29, 32) Jehowa nde lawɔ ekɔ lo wedi aso. (Adia Osambu 118:6.) Batismu toshaka nto diaaso dia nkondja ɛtshɔkɔ ekina wa lo nyuma oma ko kakianɛ ndo lo nshi yayaye.
Vɔ mbɔtɔka lo nkumbo k’anto l’ɔnango kele la ngandji
7-9. a) Eshikikelo kakɔna kakasha Yeso wanɛ wakatshike diangɔ tshɛ ndo wakôyele? b) Ngande wakotshama daka diaki Yeso dia lo Mako 10:29, 30?
7 Ɔpɔstɔlɔ Petero akatɛ Yeso ate: “Enda, shu tambutshika diango tshe, tambukuyela. Kayutukundja na?” (Mat. 19:27) Petero akalange mbeya kɛnɛ kayondokondja nde la ambeki akina waki Yeso lo nshi yayaye. Dia ndjasha tshɛ l’olimu w’esambishelo ka Diolelo, vɔ wakayahombia akambo efula. (Mat. 4:18-22) Eshikikelo kakɔna kakawasha Yeso?
8 Lo ndjela ɔkɔndɔ wa woho akɔ wâmɛ wa lo Mako, Yeso akɛnya dia ambeki ande wayonga lo nkumbo k’anto l’ɔnango ka lo nyuma. Nde akate ate: “Nduku untu layutshika luudu, anangu, akadiyendi, nyangu, shi, ana kana kambo dikambu diami ndu ne dia lukumu l’ololo, lahulungula kakiane l’etena kene: mvudu, anangu, akadiyo wanyangu, ana, ndu dikambo, tena lukama, kame l’asui; ku l’etena kayayi, lumu la pundju.” (Mako 10:29, 30) Akristo wa lo ntambe ka ntondo, ɛnyɛlɔ Ludiya, Akula, Piriskila ndo Ngayo waki l’atei wa wanɛ wakakimɔ “mvudu” yawɔ ndo wakakome “anangu, akadiyo, wanyangu” aki asekawɔ ambetawudi oko wakalake Yeso.—Etsha 16:14, 15; 18:2-4; 3 Joa. 1, 5-8.
9 Ɛtɛkɛta waki Yeso wekɔ lo kotshama lo yɛdikɔ y’efula ɛlɔ kɛnɛ. “Dikambo” diatshika ambeki ande l’ɔkɔngɔ mendanaka la diangɔ diatshika anto efula, mbidja ndo waa misiɔnɛrɛ, ase nkumbo ka Bɛtɛlɛ, ekambi watshɔ tokamba lo wedja ekina, ndo anto akina la lolango lawɔ dia ntɔla wahɔ wa Diolelo otsha la ntondo lo wedja efula. Anangɛso l’akadiyɛso efula wakatshike mvudu yawɔ dia mbetɛ nsɛnɔ yawɔ ɔsɛlɛngɛ ndo dui sɔ toshaka ɔngɛnɔngɛnɔ dia mboka ɛkɔndɔ awɔ wɛnya woho wâkotshɛ Jehowa ehomba awɔ ndo woho wawasha olimu wokambɛwɔ ɔsɔ ɔngɛnɔngɛnɔ. (Etsha 20:35) Ndo nto, ekambi waki Jehowa tshɛ wambobatizama kokaka monga la ɔngɛnɔngɛnɔ waya lo ‘nyanga ntondo diolelo la ɔlɔlɔ wa Nzambi’ oko wewɔ l’atei wa nkumbo k’onto l’ɔnango k’Akristo ka l’andja w’otondo.—Mat. 6:33.
Vɔ kokamɛka lo “dihole dia woshamu”
10, 11. “Dihole dia woshamu dia Nkum’Olongo” kɛdikɛdi na, ndo ngande wakokaso mbɔtɔ lɔkɔ?
10 Ndjakimɔ ndo batizama mbelaka ɛlɔlɔ ekina, mbuta ate diɛsɛ dia monga lo “dihole dia woshamu dia Nkum’Olongo.” (Osam. 91:1, NW) Ɔsɔ ekɔ dihole di’ekokelo ndo dia lotui tshitshi dia didjidji, mbuta ate dihole diakokamɛso oma lo wâle wa lo nyuma. Diɔ diekɔ “dihole dia woshamu” nɛ dia anto wele bu la ɛnɛlɔ ka lo nyuma ndo wahayaɛkɛ le Nzambi hawodieye. Lo nsɛna lo yoho yɔtɔnɛ la ndjakimɔ kaso ndo lo ndjaɛkɛ tshɛ le Jehowa, sho mbotɛka ɔnɛ: “Ndi keli eshamelu kami la lungeli lami, [Nzambi k]ami katumekamaka.” (Osam. 91:2) Jehowa Nzambi komaka dihole diaso di’ekokelo. (Osam. 91:9) Shi Jehowa mbele eshamelo kaso koleki tshɛ?
11 Monga lo “dihole dia woshamu” diaki Jehowa nembetshiyaka nto dia tekɔ la diɛsɛ dia woke dia monga la diɔtɔnganelo sho la nde. Dui sɔ tatɛka etena kayakimɔso le nde ndo kabatizamaso. Oma lâsɔ, sho mongaka la diɔtɔnganelo di’ɔlɔlɔ lam’asaso la Nzambi lo ndjasukanyaka la nde lo tshimbo ya wekelo wa Bible, y’alɔmbɛlɔ w’oma k’ɛse otema ndo lo mongaka la okitanyiya wa tshɛ le nde. (Jak. 4:8) Ndoko onto lakaleke ndjasukanya la Jehowa ko ndeka Yeso lele mbetawɔ kande le Otungi kɔndjɛkayɛka kânga lushi ɔtɔi. (Joa. 8:29) Ɔnkɔnɛ, tatongake pondjo la tâmu lo dikambo dia Jehowa kana lo nsaki ndo lo dikoka diele la nde dia tokimanyiya dia sho nsɛna lo yoho yɔtɔnɛ la dɔkɔlɔkɔ dia ndjakimɔ kaso. (Und. 5:4) Tɛdikɔ ta lo nyuma takɔshi Nzambi dikambo di’ekambi ande mɛnyaka hwe dia nde mɛtɛ tolangaka ndo nangaka dia sho ntondoya l’olimu ande.
Tɔsake paradiso kaso ka lo nyuma la nɛmɔ
12, 13. a) Paradiso ka lo nyuma kɛdikɛdi na? b) Ngande wakokaso monga l’akoka wa nkimanyiya eyoyo?
12 Ndjakimɔ ndo batizama toshaka nto diaaso dia mbɔtɔ lo paradiso ka lo nyuma. Ɔsɔ mbele tshɔi ya dihole dia lo nyuma diongaso kâmɛ l’asekaso ambetawudi wele la wɔladi lam’asawɔ la Nzambi ndo lam’asawɔ vɔamɛ. (Osam. 29:11; Is. 54:13) Andja ɔnɛ ndoko kânga la ɛngɔ ɔtɔi kakoka mbɛdikama la paradiso kaso ka lo nyuma. Dikambo sɔ mɛnamaka djekoleko lo nsanganya ya weke ya wedja efula, lɛnɛ ele anangɛso la akadiyɛso w’oma lo wedja efula, watɛkɛta ɛtɛkɛta wotshikitanyi ndo w’oma lo waoho wotshikitanyi sanganaka lo wɔladi, lo kâmɛ ndo lo ngandji k’onto l’ɔnango.
13 Paradiso kaso ka lo nyuma tshikitana etale l’andja wa kɔlɔ wasɛnaso ɔnɛ. (Adia Isaya 65:13, 14.) Lo nsambisha Diolelo, tekɔ la diɛsɛ dia mbisha anto akina leeta la vɔ mbɔtɔ lo paradiso ka lo nyuma. Tekɔ nto la diɛsɛ dia nkimanyiya eyoyo wa lo etshumanelo ndo wahomba nkondja wahɔ oma lo olowanyelo walongolawɔ l’olimu w’esambishelo. Oma lo ɛlɔmbwɛlɔ ka dikumanyi, sho kokaka nkondja diɛsɛ dia nkimanyiya eyoyo ɛmɔtshi, oko wakasale Akula la Piriskila wanɛ waketsha Apolo ‘mboka ka Nzambi dimɛna dimɛna.’—Etsha 18:24-26.
Totetemale mbeka awui oma le Yeso
14, 15. Naa ɛkɔkɔ w’eshika wele la so wa ntetemala mbeka awui oma le Yeso?
14 Tekɔ la ɛkɔkɔ w’eshika wa ntetemala mbeka awui oma le Yeso. La ntondo ka nde ndja la nkɛtɛ oko onto, Yeso aketsha ɛnɔnyi waheyama mbadia lo nkamba kâmɛ la She. (Tuk. 8:22, 30) Nde akeyaka dia ndjasha tshɛ l’olimu waki Nzambi ndo nsambisha akambo wa mɛtɛ mbele yoho ya lɔsɛnɔ yoleki dimɛna. (Joa. 18:37) Yeso akeyaka dia toho tokina tshɛ ta lɔsɛnɔ kɛnɛmɔlaka dionga dia lokaki ndo tekɔ anyanya. Nde akeyaka dia nde ayohembama wolo ndo ayodiakema. (Mat. 20:18, 19; Heb. 4:15) Oko wende Ɛnyɛlɔ kaso, nde akatetsha woho wa nama olowanyi aso.
15 Yema tshitshɛ l’ɔkɔngɔ wa Yeso batizama, Satana akôhembe dia nde ntshika yoho ya lɔsɛnɔ yoleki dimɛna, koko Satana akakite tatala. (Mat. 4:1-11) Kɛsɔ tetshaka dia oyadi kakɔna kakoka Satana nsala, sho kokaka nama olowanyi aso. Mɛnamaka dia nde ndekaka nsɔma wanɛ wayanga batizama ndo wanɛ wêke kabatizama. (1 Pet. 5:8) Ase nkumbo yaso mbeyaka tɔlɔsha nɛ dia wakawatɛ awui wa kashi lo dikambo di’Ɛmɛnyi wa Jehowa ndo vɔ fɔnyaka dia wekɔ lo nyanga dia tokokɛ. Koko, ehemba ɛsɔ toshaka waaso wa sho nkɛnɛmɔla waonga w’ɛlɔlɔ w’Okristo wele oko, dilɛmiɛlɔ ndo yewo etena kakadimolaso lo ambola ndo kasambishaso. (1 Pet. 3:15) Awui asɔ kokaka monga la shɛngiya y’ɔlɔlɔ le anto watohokamɛ.—1 Tim. 4:16.
Tokukute yoho ya lɔsɛnɔ yoleki dimɛna!
16, 17. a) Naa atɔndɔ asato walɔmbama dia ntshikala la lɔsɛnɔ watanaso lo Euhwelu k’Elembe 30:19, 20? b) Ngande wakasukɛ Yeso, Joani, ndo Paulo kɛnɛ kakafunde Mɔsɛ?
16 Ɛnɔnyi oko 1 500 la ntondo ka Yeso ndja la nkɛtɛ, Mɔsɛ akatɛ ase Isariyɛlɛ dia vɔ nsɔna yoho ya lɔsɛnɔ yoleki dimɛna yaki l’etena kɛsɔ. Nde akawatɛ ate: “Dimi lambeta ulungu la kete emenyi lu dikambu dianyu elo nti: Dimi lambukitsha lumu la nyoi, otshoko la mananu la ntundu kanyu. Okone nyosonole lumu, dia nyu la an’anyu ndjala la lulumbi, lu mbuka [Jehowa, Nzambi k]anyu, ngandji, lu nkitanyia diui diandi ndu lu mbumamema.” (Euh. 30:19, 20) Kânga mbaki ase Isariyɛlɛ kotshikala la kɔlamelo le Nzambi, atɔndɔ asato w’ohomba wakalɔmbamaka dia ntshikala la lɔsɛnɔ wakate Mɔsɛ watatshikitana. Yeso la anto akina wakayâshilaka nto.
17 Ntondotondo, ‘sho pombaka mboka Jehowa Nzambi kaso ngandji.’ Sho mɛnyaka dia sho mbokaka Nzambi ngandji lo nsala akambo lo yoho yɔtɔnɛ la mboka yande yosembwe. (Mat. 22:37) Dui dia hende, ‘sho pombaka mpokamɛ dui dia Jehowa’ lo mbekaka Ɔtɛkɛta wa Nzambi ndo lo kitanyiyaka wadjango ande. (1 Joa. 5:3) Kɛsɔ tɔlɔmbaka dia sho mbɔtɔka lo nsanganya y’Akristo mbala la mbala, lɛnɛ akɛtshanyaso awui wa lo Bible. (Heb. 10:23-25) Dui dia sato, ‘sho pombaka mamema Jehowa.’ Oyadi okakatanu akɔna wayohomana la so, nyɛsɔ toyalake la mbetawɔ le Nzambi ndo toyelake Ɔnande nshi tshɛ.—2 Kor. 4:16-18.
18. a) Kakɔna kakate Tshoto y’Etangelo lo kɛnɛ kendana l’akambo wa mɛtɛ lo 1914? b) Dionga diakɔna diahombaso monga la diɔ ɛlɔ kɛnɛ lo kɛnɛ kendana l’osase w’akambo wa mɛtɛ?
18 Ande ɛtshɔkɔ wayotokondja lo nsɛna lo yoho yɔtɔnɛ l’akambo wa mɛtɛ wa lo Bible lee! Lo 1914, etelo k’ohomba kɛnɛ kakatondjama lo Tshoto y’Etangelo: “Shi sho tekɔ wodja wambɔtshɔkwama ndo wele la ɔngɛnɔngɛnɔ? Shi Nzambi kaso ekɔ la kɔlamelo? Naka onto ɔmɔtshi mbeyaka dikambo dimɔtshi dioleki sɔ dimɛna, nde adite. Naka onto ɔmɔtshi l’atei anyu ambototana dikambo dimɔtshi dioleki dimɛna, sho nongamɛka dia nyayoyototɛ. Sho mbeyaka dia ndoko kɛnɛ kele dimɛna ko ndeka kɛnɛ kele l’Ɔtɛkɛta wa Nzambi. . . . Ekɔ wolo sho nembetshiya wɔladi, ɔngɛnɔngɛnɔ ndo ɛtshɔkɔ wambotokondja lo lɔsɛnɔ la so lo mbeya Nzambi ka mɛtɛ dimɛna. Ɔkɔndɔ wa lomba, losembwe, wolo ndo wa ngandji kaki Nzambi kotshaka ehomba aso wa lo yimba ndo wa l’otema. Ndoko kayangaso nto. Ndoko ɛngɔ kakombolaso lâdiko dia mpama lo ewo ka Nzambi kaso.” (Tshoto y’Etangelo ya Ngɔndɔ ka dikumi l’ahende 15, 1914, lɛkɛ 377-378, lo Angɛlɛ) Lowando lele la so dikambo dia osase ndo akambo wa mɛtɛ wa lo nyuma hatshikitana. Lo mɛtɛ, tekɔ kakianɛ l’ɔkɔkɔ woleki woke wa ngɛnangɛna nɛ dia tekɔ lo ‘nkɛndakɛnda l’osase wa Jehowa.’—Is. 2:5; Osam. 43:3; Tuk. 4:18.
19. Lande na kahomba wanɛ wambokotsha kɛnɛ kalɔmbama dia batizama takola nna sɔ aha la tshimbatshimba?
19 Naka wɛ nangaka ‘nkɛndakɛnda l’osase wa Jehowa,’ koko wɛ atayakimɔ ndo atakome Okristo wambobatizama, kete totshimbatshimbake dia nsala dikambo sɔ. Sala kɛnɛ tshɛ kahombama dia nkotsha kɛnɛ kalɔmba Bible dia batizama. Ɔsɔ mbele yoho yâmɛ ya mɛnya lowando lo kɛnɛ kakakosalɛ Nzambi nde la Kristo. Lo diangɔ tshɛ dia l’emunyi diele layɛ, sha Jehowa kɛnɛ koleki nɛmɔ, mbuta ate lɔsɛnɔ layɛ. Ɛnya dia wɛ amboyadjɛ oyango wa nsala lolango la Nzambi lo ndjela Ɔnande. (2 Kor. 5:14, 15) Aha la tâmu, ɔsɔ mbele yoho ya lɔsɛnɔ yoleki dimɛna!
Ngande wayoyokadimola?
• Alembetshiya batismu kaso?
• Ndjakimɔ le Nzambi ndo batizama mbelaka ɛtshɔkɔ akɔna?
• Lande na kele ekɔ ohomba mbeka awui oma le Yeso?
• Kakɔna kayotokimanyiya dia sho nkukutɛ yoho ya lɔsɛnɔ yoleki dimɛna?
[Osato wa lo lɛkɛ 25]
Batismu kayɛ mɛnyaka dia wɛ ambɔsɔna yoho ya lɔsɛnɔ yoleki dimɛna
[Esato wa lo lɛkɛ 26]
Onde wɛ ambokokamɛ lo “dihole dia woshamu”?