Toshike tanga la ntondo k’awui wa kashi waki Satana

‘TANYOYAKESAKE, Nzambi kanyu hatonyokimanyiya. Nyayosoyama tshanana!’ Ɔsɔ mbele losango lakaye la Rabishakɛ, otomami waki Sɛnakɛribɛ, nkumekanga k’ase Asuriya dia ndjewoya ase Jerusalɛma. Alembe wa nkumekanga wakɔtɔ lo nkɛtɛ ya Juda. Ɛtɛkɛta waki otomami ɔsɔ waki l’oyango wa ntshindja ase Jerusalɛma wɔɔngɔ kana mbaotsha wɔma.—2 Khum. 18:28-35.

Ase Asuriya wakeyamaka oko anto wa ngala ndo w’esehe. Vɔ wakotshaka atunyi awɔ wɔma lo mbaewoya dimɛna dimɛna woho wakawahɛnyɔlaka fumbe yawɔ. Lo ndjela ombewi ɔmɔtshi w’ɛkɔndɔ wakawelɛka Philip Taylor, vɔ wakakambaka la shambo ya “mbotsha anto wɔma ndo dianganya awui wa kashi l’oyango wa nkɔmɔla etema ndo mfukutanya wɛɔngɔ wa wanɛ wakakoke ndjokoma atunyi awɔ.” Awui wa kashi wekɔ ehomɔ ka ta ka wolo efula. Taylor mbutaka ate: Awui wa kashi “wekɔ l’oyango wa mfukutanya timba t’anto.”

Sho Akristo wa mɛtɛ “hatolo ta la emunyi la dikila, keli [tekɔ lɔ ndɔ] la . . . elui w’edienge,” mbuta ate ditongami dia lo nyuma diakatɔmbɔkwɛ Nzambi. (Ef. 6:12) L’atei adiɔ mbele ndo Satana Diabolo, otunyi aso woleki woke. Nde lawɔ kambaka la shambo ya mbotsha anto wɔma ndo dianganya awui wa kashi.

Satana sɛmaka dia nde kokaka toshishɛ olowanyi aso sho tshɛ. Lo nshi ya owandji wa nkumbo Jɔbɔ, nde akatɛ Jehowa Nzambi ate: “Kene tshe keli la untu, ndi nkikimoka ne dia lumu landi.” Lo ɛtɛkɛta ekina, Satana akalange mbuta ate naka onto mpomana la asui efula, kete kotambɔ kolembɔ, nde ayoshisha olowanyi ande le Nzambi. (Jobo 2:4) Onde Satana ekɔ la shadiya? Onde ekikelo kaso k’ehemba kekɔ l’elelo, mbuta ate naka ehemba wambotamba elelo ɛsɔ, kete tayosekola atɔndɔ wayelaso dia sho ntshikala la lɔsɛnɔ? Satana nangaka tokonya dia sho mfɔnya ngasɔ. Oma lɔkɔ, nde kambaka la awui wa kashi dia monɛ kanyi shɔ lo timba taso. Nyɛsɔ tɔsɛdingole toho tɔmɔtshi takamba la nde ndo woho wakokaso nshika tanga la ntondo kande.

Vɔ “wakatongo uma lu ditshu”

Satana akakambe la Elifazɛ, ɔmɔtshi a l’atei wa angɛnyi asato waki Jɔbɔ wakaye ndjowenda lo mbuta ɔnɛ anto bu la wolo wa nshika tanga la ntondo ka Satana. Lo mbuta dia anto wekɔ “la alimba wa kete,” Satana akatɛ Jɔbɔ ate: “[Vɔ] wakatongo uma lu ditshu, wukuki minwama uku lumbudi? Vo watulanyemaka l’asa pindju la dikolo, watuvokaka, ku nduku untu ladja tukanyi loko.”—Jobo 4:19, 20.

Lo avɛsa akina wa l’Afundelo, sho anto mbɛdikamaka la ‘mpoke y’awomba’ yolɛ esadi. (2 Kor. 4:7) Sho tekɔ wɔdu nɛ dia takahowɔ pɛkato ndo eongelo ka kema kokele. (Romo 5:12) Hatokoke ndɔshana la Satana la wolo aso hita. Koko, oko weso Akristo, sho kokaka ndjaɛkɛ lo ekimanyielo kaki Jehowa. Kânga mbeso wɛɔdu, tekɔ la nɛmɔ lo washo wa Nzambi. (Is. 43:4) Ndo nto, Jehowa mbishaka nyuma kande le wanɛ tshɛ wɔlɔmbatɔ. (Luka 11:13) Nyuma kande kokaka tosha ‘wolo woleki wɔnɛ wokongaka l’onto’ dia tokimanyiya dia ndɔshana la ekakatanu watela Satana. (2 Kor 4:7; Fil. 4:13) Naka sho nshika tanga la ntondo ka Diabolo, ‘tele nge lo mbetawɔ,’ kete Nzambi ayotokeketsha ndo ayotosha wolo. (1 Pet. 5:8-10) Oma lɔkɔ, hatohombe mboka Satana Diabolo wɔma.

Onto “atonokaka kolo uku ashi”

Elifazɛ akambola ate: “Untu eli na, dia ndi ndjala pudipudi, kana one lakuto uma le umuntu, dia ndi ndjala uluwanyi?” Oma lâsɔ, nde akatatɛ nkadimola lo mbuta ate: “Naka [Nzambi] hekama ekilami andi, naka ulungu kema pudipudi lu ashu andi, keti [hoke] one leli wononyi la kolo, untu latonokaka kolo uku ashi!” (Jobo 15:14-16) Elifazɛ aki lo mbutɛ Jɔbɔ ate ndoko onto lele ɔlɔlɔ lo washo wa Jehowa. Diabolo nde lawɔ kambaka la tokanyi ta kɔlɔ ta ngasɔ. Nde nangaka sho ndjakiyanya lo kɛnɛ kendana la kɔlɔ yakatasale lo nshi yakete, kana ndeka ndjaɔnyɔla ndo ndjaɔsa oko anto wahakokaki tshungɔ pondjo. Nde nangaka nto dia sho mfɔnya ɔnɛ Jehowa tɔlɔmbaka akambo efula ndo ɔnɛ nde haleke toka kɛtshi, haleke todimanyiya ndo haleke tosukɛ.

Lo mɛtɛ, sho tshɛ ‘takatshe pɛkato ndo hatokoke nkoma lo lotombo laki Nzambi.’ Onto tshɛ lele bu kokele hakoke nkitanyiya wadjango wa kokele waki Jehowa. (Romo 3:23; 7:21-23) Koko, kɛsɔ halembetshiya dia sho kema la nɛmɔ lo washo ande. Jehowa mbeyaka dia “ului ako a wuki w’edjedja, wetawo vati: Uhimbanyi, Satana” mbakamba la eongelo kaso k’anto wele kema kokele. (Eny. 12:9, 10) Oko weyande dia “ditshu mbesu,” Nzambi mbidjaka yimba lo dikambo sɔ ndo hayange dia ‘totana la munga.’—Osam. 103:8, 9, 14.

Naka sho ntshika lɔkɛwɔ laso la kɔlɔ ndo ndjasukanya la Jehowa la etema wambatɛ ndo la yimba ya ndjatshumoya, kete ‘nde ayetawɔ todimanyiya tshɛ.’ (Is. 55:7; Osam. 51:17) Bible mbutaka ɔnɛ: “Kuyanga kolo yanyu yeli tilili, yo yayuyala wema uku pembe.” (Is. 1:18) Ɔnkɔnɛ, nyɛsɔ toyashikikɛ diaha ntshika pondjo nsala lolango laki Nzambi.

L’ɔtɛ wa eongelo kaso ka kema kokele, tototokoka mbɔsama oko anto w’ɛlɔlɔ lo washo waki Nzambi. Adama la Eva wakayashishɛ ndo wakatoshishɛ sho tshɛ eongelo ka kokele ndo elongamelo ka lɔsɛnɔ la pondjo. (Romo 6:23) Koko, l’ɔtɛ wa ngandji k’efula kokande anto, Jehowa akɔshi yɛdikɔ ya todimanyiya pɛkato yaso naka sho monga la mbetawɔ l’olambo wa tshungo waki Ɔnande, Yeso Kristo. (Mat. 20:28; Joa. 3:16) Nzambi mɛtɛ akɛnya anto “ngandji ka mamba”! (Tito 2:11) Sho mɛtɛ kokaka tshungɔ oma lo pɛkato yaso! Lâsɔ, lande na kahombaso tshikɛ Satana dihole lo nde tokonya lo mfɔnya ɔnɛ hatokoke nkondja edimanyielo ka pɛkato yaso na?

“Unandi weka andi la emunyi andi”

Satana akasɛmɛ dia Jɔbɔ ayoshisha mbetawɔ kande naka nde mundama la hemɔ. Diabolo akadje Jehowa tɔfwɛfwɛ lo mbuta ate: “Unandi weka andi la emunyi andi; ndi ayukoseka kaku.” (Jobo 2:5) Otunyi waki Nzambi ɔsɔ ayonga mɛtɛ l’ɔngɛnɔngɛnɔ naka nde tokonya lo sho mfɔnya ɔnɛ tekɔ anto w’anyanya l’ɔtɛ wa dikɔmɔ diele la so lo demba.

Koko, Jehowa hatokasha l’ɔtɛ w’ɔnɛ hatoyokoka nsala kɛnɛ tshɛ kakatasalaka ntondo l’olimu ande. Ko kayotota naka ɔngɛnyi aso ɔmɔtshi ambɔlɔshama ndo ambohomuyama? Onde tayowɔsa oko ɛngɔ k’anyanya nɛ dia nde hayokoka tosalɛ kɛnɛ kakandatosalɛka ntondo? Kema! Tayotetemala mbôka ngandji ndo ndjakiyanya dikambo diande, djekoleko naka nde akahomuyama etena kakandayangaka dia tosalɛ dikambo dimɔtshi di’ɔlɔlɔ. Shi kɛsɔ mbakokaso mbuta ndo lo dikambo dia Jehowa? Bible mbutaka ɔnɛ: “[Nzambi] kema kolo, dia ndi mbuhela ulimu anyu la ngandji kakanyenya antu lu lukumbu landi.”—Heb. 6:10.

Afundelo tɛkɛtaka dia ‘wadi aki odo ɔmɔtshi laki kanga wola,’ lele ondo akasukɛka ɔtɛmwɛlɔ waki Nzambi l’edja k’ɛnɔnyi efula. Etena kakawɛnyi Yeso adja ‘ekenga ehende wa totshitshɛ wa falanga waki komonga la nɛmɔ efula’ lo shɛtɛshɛtɛ ya lo tɛmpɛlɔ, onde Yeso akawɔshi nde la olambo ande oko diangɔ di’anyanya? Kema, nde akawândola l’ɔtɛ wakandasale kɛnɛ tshɛ kakinde l’akoka wa nsala dia sukɛ ɔtɛmwɛlɔ wa mɛtɛ.—Luka 21:1-4.

Naka sho nama olowanyi aso, kete sho kokaka ndjashikikɛ dia diɔtɔnganelo diasaso la Jehowa diayotshikalaka woho akɔ wâmɛ, oyadi pâ kakɔna kayotela lotshundu kana hemɔ koye oma lo eongelo kaso k’anto wele kema kokele. Nzambi hakalɛki pondjo ekambi ande wa kɔlamelo nɛ dia waya bu l’akoka wa mbokambɛ woho wakawokambɛka ntondo l’ɔtɛ w’asui wele la wɔ.—Osam. 71:9, 17, 18.

Tɔsɛ “lufule la panda”

Ngande wakokaso ndjakokɛ oma lo awui wa kashi waki Satana? Ɔpɔstɔlɔ Paulo akafunde ate: “Nyukikitali le Khumadiondjo, ndu lu wulu wa wulu andi tshe. Nyolote eloto tshe wa ta wa [Nzambi], dia nyu mbeya nshikikala la ntundu ka kesu tshe ya uhimbanyi.” “Lufule la panda” lekɔ ehomɔ kɛmɔtshi ka lo ɛlɔtɔ wa ta wa lo nyuma. (Ef. 6:10, 11, 17) Lo kɛnɛ kendana la awui wa kashi waki Satana, Sho pombaka ndjashikikɛ dia tambɔsa lofulɛ laso ndo tekɔ lo ntetemala lilɔta. Lofulɛ laki ɔsɔlayi kokɛka ɔtɛ ande. “Elungamelu [kaso] ka panda,” mbuta ate eshikikelo kele la so lo alaka waki Nzambi wendana la andja ande w’oyoyo wa lotombo, ayokokɛ timba taso oma lo awui wa kashi waki Satana. (1 Tes. 5:8) Sho pombaka namaka elongamelo kaso nge oma lo ekimanyielo ka wekelo w’onto ndamɛ w’Afundelo.

Jɔbɔ akakikɛ ɛlɔshamelo wa wolo ndo wa la lohetsho tshɛ w’oma le Satana. Kânga wâle wa nyɔi kokoka mbɔkɔmɔla nɛ dia nde aki la elongamelo ka wolo lo eolwelo. Koko nde akatɛ Jehowa ate: “We ayumbeta, ku dimi layuketawo; we ayukaka ulimu w’anya aye ketshi.” (Jobo 14:15) Kânga mbotovɔ Jɔbɔ l’ɔtɛ wakandalame olowanyi ande, nde aki la eshikikelo ɔnɛ ngandji koka Nzambi ekambi Ande wa kɔlamelo kayowotshutshuya dia nde mbaolola oma lo nyɔi.

Nyɛsɔ toyale la wɛkamu wa ngasɔ le Nzambi ka mɛtɛ. Jehowa kokaka nɔngɔsɔla akambo tshɛ wa kɔlɔ wakoka tosalɛ Satana la anto ande. Tohɔ nto dia Paulo toshikikɛka ɔnɛ: “[Nzambi] eko la kolamelu; ndi hetawo dia nyu mpimbama uleki wulu anyu. Keli lam’ayuya ehimba, ndi ayunyutshela mbuka ka nyu mpanda dia nyu ndjala la wulu wa nshikikala.”—1 Kor. 10:13.

[Osato wa lo lɛkɛ 20]

Jehowa mbɔsaka olimu wokambɛyɛ la nɛmɔ

[Osato wa lo lɛkɛ 21]

Tɔsɛ lofulɛ la panda ndo totetemale lilɔta