Yasukanya la Nzambi
Nde “atendaka utema”
ƐNAMELO ka l’andja kokaka nkesa onto. Ɛnamelo k’onto ka l’andja haleke mɛnya kɛnɛ kende l’etei, mbuta ate l’etei k’otema ande. Anto nomboshanaka lo ndjela ɛnamelo k’onto ka l’andja. Diɛsɛ ko, Jehowa Nzambi hende tsho ɛnamelo ka l’andja. Dui sɔ mɛnyama dimɛna lo ɛtɛkɛta watanema lo 1 Samuele 16:1-12.
Ɔsa dia wɛ ekɔ lo mɛna kɛnɛ kakete. Jehowa aki suke la nkita nkumekanga k’oyoyo ka l’Isariyɛlɛ esɔ. Nzambi akatɛ ɔprɔfɛta Samuɛlɛ ate: “Uneli, layukutuma le Jese, usi Betelehema. Dimi lambuyasonwela khum’ekanga uma l’atei wa an’andi w’apami.” (Divɛsa 1) Jehowa kombotɛ lokombo, koko nde akawotɛ tsho dia onto lambondɔsɔna ayonga l’atei w’ana w’apami waki Jɛse. Etena kakatatshɔka Samuɛlɛ otsha la Bɛtɛlɛhɛma, nde akakoke ndjambola ɔnɛ: ‘Ngande wayomeya ɔnaki Jɛse lambɔsɔnama oma le Jehowa?’
Lam’akandakome la Bɛtɛlɛhɛma, Samuɛlɛ akalɔngɔsɔla dia Jɛse la anande ndɛ kâmɛ mma di’olambo. Etena kakɔtɔ Eliyabɛ, ɔna l’enondo, Samuɛlɛ akakotwama mbala kakɔ ɔtɔi la ɛnamelo kande. Lo menda diema diaki la Eliyabɛ, Samuɛlɛ akafɔnya dia weho akɔ tshɛ nde kokaka monga nkumekanga ndo nde akate l’otema ate: “Mete, one lakasonola [Jehowa] one, emadi la ntundu kandi.”—Divɛsa 6.
Koko Jehowa akɛnaka akambo lo yoho yotshikitanyi. Nde akatɛ Samuɛlɛ ate: “Tendaki elundji k[ande] kuyanga diema diandi, ne dia dimi lakûtuni.” (Divɛsa 7) Diema ndo olangala waki la Eliyabɛ komambiya Jehowa. Washo waki Jehowa watendaka onto lo tshɛ kande, koko aha ɛnamelo ka l’andja ndo dui sɔ mbokimanyiyaka dia nde mɛna olangala wa mɛtɛ w’onto.
Jehowa akatɛ Samuɛlɛ ate: “[Dimi] hatendaka kene katendaka untu. Ne dia untu atendaka kene kenandi lu ashu, keli [Jehowa] atendaka utema.” (Divɛsa 7) Eelo, Jehowa atodjaka yimba lo otema, mbuta ate lonto la l’etei k’otema, kiɔkɔ ya tokanyi, y’eyango, ndo ya nsaki y’onto. ‘Ɔnɛ latɔsɛdingolaka otema’ akatone Eliyabɛ ndo ana akina asamalo waki Jɛse wakaye la ntondo ka Samuɛlɛ.—Tukedi 17:3.
Jɛse aki la ɔna okina la kose, Davidi ‘lakalamaka ɛkɔkɔ.’ (Divɛsa 11) Ɔnkɔnɛ, wakatelɛ Davidi oma l’oswe ko nde akaye la ntondo ka Samuɛlɛ. Ko Jehowa akatɛ Samuɛlɛ ate: “Uneli, ukiti iso, nduk’uku!” (Divɛsa 12) Lo mɛtɛ, Davidi aki “la ashu w’amena. Ndi aki dimena efula.” Eelo, otema ande mbakokonya dia nde mbetawɔma lo washo waki Nzambi.—1 Samuele 13:14.
Lo andja ɔnɛ walekawɔ mbɔsa dimɛna dia lo washo la nɛmɔ, sho kokaka keketshama lo mbeya dia Jehowa hasɛngiyama oma lo ɛnamelo k’onto ka l’andja. Aha otale ayɛ kana woho wakɔsa anto akina dia wɛ ekɔ olangala mbele ohomba lo washo ande. Koko, lonto layɛ la l’etei k’otema, mbuta ate otema ayɛ. Shi mbeya dikambo sɔ totshutshuyaka dia sho nkɛnɛmɔla waonga w’ɛlɔlɔ wayotetɛ anto w’ɛlɔlɔ lo washo waki Nzambi?