Kɛnɛ kaketsha Yeso lo dikambo dia Nzambi

“Nduku untu leya Ona, tshikima Papa. Ndu nduku leya Papa, tshikima Ona, ku Ona ayuwenya untu tshe lalangandi.”—LUKA 10:22.

LA NTONDO ka nde ndjôtɔ oko onto, Ɔna enondo laki Nzambi aketsha ɛnɔnyi waheyama mbadia kâmɛ la She. (Kolosai 1:15) Woho ɔsɔ mbakayeya Ɔnaki Nzambi tokanyi, nsaki ndo mboka yaki She. L’ɔkɔngɔ diko, etena kakayoyaka Ɔna ɔsɔ la nkɛtɛ oko onto, nde akalomɔlomɔka dia mbetsha anto akambo wa mɛtɛ wendana la She. Sho koka mbeka akambo efula wendana la Nzambi lo mpokamɛ kɛnɛ kakate Ɔna ɔsɔ.

Lokombo laki Nzambi Lokombo laki Nzambi, Jehowa, laki l’ohomba efula le Yeso. Ɔna la ngandji ɔsɔ akalangaka dia anto akina mbeya lokombo laki She ndo litɛndɛ. Lokombo laki Yeso nembetshiyaka ɔnɛ: “Jehowa ekɔ panda.” L’otsho wa la ntondo ka nyɔi kande, Yeso akatɛ Jehowa lo dɔmbɛlɔ ate: “Dimi lakawaewuya lukumbu laye.” (Joani 17:26) Kema dui dia dambo dia mboka ɔnɛ Yeso akakambe la lokombo laki Nzambi ndo akaliewoya anto akina. Lo kanyi yakɔ yâmɛ, ampokami waki Yeso kokoka nshihodia akambo wa mɛtɛ wendana la Jehowa otondonga Yeso kombaewoya lokombo lande ndo kitshimudi yalɔ.a

Ngandji k’efula kaki Nzambi Mbala kɛmɔtshi, Yeso akalɔmbɛ Nzambi ate: “Papa, . . . we akanangi la ntundu k’etatelu k’andja.” (Joani 17:24) Lam’ele Nzambi akoke Yeso ngandji etena kakinde l’olongo, lam’akandaye la nkɛtɛ, Yeso akalangaka nkɛnɛmɔla ngandji kɛsɔ lo toho efula.

Yeso akɛnya dia Jehowa mbokaka anto tshɛ ngandji. Nde akate ate: “[Nzambi] akalangi [andja] utamanya, mbakandawasha On’andi etoi lakanduti, dia untu tshe lawetawo, tavokaki, keli ayali la lumu la pundju.” (Joani 3:16) Tshɛkɛta ya lo Grɛkɛ yokadimɔmi ɔnɛ “andja” halembetshiya “nkɛtɛ.” Lo divɛsa nɛ, yɔ nembetshiyaka anto lo tshɛ kawɔ. Ɔnkɔnɛ, Nzambi akoke anto lo tshɛ kawɔ ngandji k’efula, diakɔ diakandakimɔ Ɔnande lakandokaka ngandji efula dia anto wa kɔlamelo tshungɔ oma lo pɛkato la nyɔi ndo monga la elongamelo ka lɔsɛnɔ la pondjo. Hatokoke nshihodia ngandji k’efula kɛsɔ.—Romo 8:38, 39.

Yeso akatoshikikɛ ɔnɛ Jehowa mbokaka atɛmɔdi ande ngandji k’efula l’onto ndo l’onto. Yeso aketsha dia Jehowa ekɔ oko olami w’ɛkɔkɔ wɔsa ɛkɔkɔ ande tshɛ la nɛmɔ di’efula. (Mateu 18:12-14) Yeso akate dia ndoko ɛsɔlɛ kakoka nkɔ la nkɛtɛ ko Jehowa heyi. Nde akakotsha ate: “Ndu divu dia l’ete anyu diambalema tshe.” (Mateu 10:29-31) Naka Jehowa kokaka mbeya dia sɔlɛ dia lo kefu kapanda bu kokele, shi kete nde ayɔsɛdingola ndo ayokokɛ atɛmɔdi ande? Naka Jehowa kokaka mbadia ndo mɛna wɛɔngi wa divo dia l’ɛtɛ aso, onde ekɔ dikambo dimɔtshi dia lo lɔsɛnɔ laso (ɛnyɛlɔ ehomba aso, ekakatanu aso ndo ekiyanu aso) diahandakoke mbeya?

Shɛso lele l’olongo Oko wakatadiɛnyi lo sawo dietshi, Yeso ekɔ Ɔna ɛtɔi laki Nzambi lakandôte. Ɔnkɔnɛ, hatokoke mamba lo woho wakelɛka Ɔna la ngandji ɔsɔ Jehowa ɔnɛ: “Papa.” Lo mɛtɛ, ɛtɛkɛta wa ntondo wakate Yeso etena kakinde lo tɛmpɛlɔ ele paka la ɛnɔnyi 12 mɛnyaka dia nde akelɛ Jehowa ɔnɛ: “Papa.” (Luka 2:49) Tshɛkɛta “Papa” tanemaka mbala suke la 190 lo Evanjiliɔ. Yeso akelɛ Jehowa mbala efula ɔnɛ: “Shenyu,” “Shesu,” ndo “Papa.” (Mateu 5:16; 6:9; 7:21) Lo nkamba la nkombo shɔ mbala efula, Yeso akɛnya dia Jehowa kombolaka dia anto wele atshi wa pɛkato monga la diɔtɔnganelo dia ma ma lam’asawɔ la nde.

Nde mbokanaka kɛtshi ndo dimanyiyanaka Yeso akeyaka dia anto wele kema kokele wekɔ l’ohomba wa Jehowa mbaoka kɛtshi k’efula. Lo wɛɛla ande wa ɔna la lotshito, Yeso akɛdika Jehowa la ombutshi wa ngandji wetawɔ dimanyiya ɔnande la pami lo mbokumbatɛ etena kambondoyatshumoya. (Luka 15:11-32) Ɔnkɔnɛ, ɛtɛkɛta waki Yeso toshikikɛka dia Jehowa nyangaka dia mɛna otshikitanu tshɛ wambosala otshi wa pɛkato woho wa nde mbôka kɛtshi. Jehowa nomɔlomɔka dia dimanyiya otshi wa pɛkato wayatshumoya. Yeso akate ate: “Dimi lambunyutela nti: Wuhu ako mbayuyala ongenongeno utamanya l’ulungu lu dikambu dia untu a kolo otoi lukadimudi utema, uleki dia antu akumi divwa la divwa wahahumbi nkadimula etema.” (Luka 15:7) Onto akɔna ahakoke ndjasukanya la Nzambi kokana kɛtshi kɛsɔ?

Ɔnɛ loka alɔmbɛlɔ Etena kakinde l’olongo la ntondo ka nde ndja la nkɛtɛ, Yeso akɛnyi dia Jehowa ekɔ ɔnɛ ‘latokaka dɔmbɛlɔ’ ndo nde ngɛnangɛnaka alɔmbɛlɔ w’atɛmɔdi ande wa kɔlamelo. (Osambu 65:2) Oma lɔkɔ, l’edja tshɛ kakandakambaka olimu ande, Yeso aketsha ampokami ande woho wa nɔmba ndo kɛnɛ kakawahombe nɔmba. Nde akâlake ate: “Tanyufudiaki aui w’anyanya lu alombelo anyu.” Nde akakeketsha ampokami ande dia vɔ nɔmba dia lolango laki Nzambi “[salema] la kete uku atshamalo l’ulungu.” Sho kokaka nɔmba nto dikambo di’ehomba aso wa lushi la lushi, dia pɛkato yaso dimanyiyama ndo dia nshika ekolo la ntondo k’ehemba. (Mateu 6:5-13) Yeso aketsha dia Jehowa kadimolaka alɔmbɛlɔ w’ekambi ande watowɔ̂lɔmbaka la mbetawɔ oko watotshaka ombutshi wa pami.—Mateu 7:7-11.

Yeso aketshaka akambo wa mɛtɛ wendana la Jehowa ndo la woho wa Nzambi wende. Koko dikambo dikina diendana la Jehowa diakalomɔlomɔka Yeso dia mbetsha ele ehomɔ kayokamba la Jehowa dia nkotsha sangwelo diande diendana la nkɛtɛ ndo l’anto wodjashi lɔkɔ. Lo mɛtɛ, dikambo sɔ mbaki ɔtɛ a dui w’esambishelo kaki Yeso.

[Nɔtɛ ka l’ɛse ka dikatshi]