Yeso aki l’okitanyiya lo tena tshɛ

Onde tena tshɛ mbediɔ wɔdu dia nkitanyiya ambutshi ayɛ?— Tena dimɔtshi, dui sɔ tongaka wolo. Ko onde wɛ mbeyaka dia Yeso aki l’okitanyiya otsha le Jehowa ndo le ambutshi ande?— Ɛnyɛlɔ kande koka kokimanyiya dia wɛ nkitanyiya ambutshi ayɛ kaanga mbele dui sɔ keema wɔdu. Ɛsɔ tɔsɛdingole akambo amɔtshi wendana la dui sɔ.

La ntondo ka Yeso ndja lanɛ la nkɛtɛ, nde aki kaamɛ la Jehowa ya She l’olongo. Koko Yeso akayongaka nto la ambutshi lanɛ la nkɛtɛ. Nkombo yawɔ ko Yɔsɛfu nde la Mariya. Onde wɛ mbeyaka woho wakawayokoma ambutshi ande?—

Jehowa akasangola lɔsɛnɔ la Yeso oma l’olongo ko lidja l’otema waki Mariya dia Yeso mbotɔ ndo ndjɔsɛna la nkɛtɛ. Ɔsɔ aki dihindo. Yeso akayaafuwɔka l’otema waki Mariya oko watofuwɔka ana akina tshɛ l’etema w’anyangɛwɔ. L’ɔkɔngɔ wa ngɔndɔ divwa, Yeso akootɔ. Ngasɔ mbakayokomaka Mariya nde la Yɔsɛfu y’omɛnde ambutshi wa Yeso lanɛ la nkɛtɛ.

Etena kakakotsha Yeso ɛnɔnyi 12, nde akasale dikambo dimɔtshi diakɛnya dia nde akalangaka Jehowa ya She efula. Dui sɔ diakasalema etena kakande Yeso nde la nkumbo kande lɔkɛndɔ l’otale efula otsha la Jerusalɛma lo dambo di’Elekanelo. Etena kakawayakalolaka, Yɔsɛfu nde la Mariya kɔmɛna Yeso nto. Onde wɛ mbeyaka lɛnɛ aki Yeso?—

Yɔsɛfu nde la Mariya wakakalola esadi esadi otsha la Jerusalɛma ndo wakayange Yeso ahole tshɛ. Vɔ waki la lonyangu l’efula lo woho wakiwɔ kombɛna. Koko l’ɔkɔngɔ wa nshi shato, vɔ wakatotana Yeso lo tɛmpɛlɔ. Onde wɛ mbeyaka kɛnɛ kakatshaka Yeso lo tɛmpɛlɔ?— Nde akekaka akambo wendana la Jehowa ya She. Nde akokaka Jehowa ngandji ndo akalangaka mbeka woho wa mbɔngɛnyangɛnya. Kaanga etena kakandakome opalanga, Yeso akakitanyiyaka Jehowa tena tshɛ. Yeso aki l’okitanyiya kaanga lo tena diaki dui sɔ wolo kana lo tena di’asui. Onde Yeso akakitanyiyaka ndo Yɔsɛfu nde la Mariya?— Eelo, Bible mbutaka dia nde akaakitanyiyaka.

Wetshelo akɔna wakokayɛ nkondja oma l’ɛnyɛlɔ ka Yeso?— Wɛ pombaka nkitanyiya ambutshi ayɛ, kaanga lo tena diele dui sɔ wolo. Onde wɛ ayosala dui sɔ?—