Laki l’akambo efula wa nsala l’okongamelo wa Jehowa

Kɔndwama oma le Vernon Zubko

LAKODIAMA lo dihole diakawalongaka nyama ndo diakawakambaka dikambɔ diaki suke la ngelo ka Stenen kaki suke la prɔvɛnsɛ ka Saskatchewan, lo wodja wa Canada. Ambutshi ami, Fred nde la Adella wakasalaka la wolo dia nkotsha ehomba aso wa lo nyuma ndo wa lo demba dimi la Aurellia enondo ami la womoto kâmɛ l’akosɛmi Alvin, Allegra, la Daryl. Polo ndo nshi nyɛ, tekɔ la lowando le ambutshi aso lo woho wakawatetsha akambo wa mɛtɛ.

Papa kaso laki Okristo w’okitami aki osambisha waki la dihonga. Nde akasalaka la wolo dia nkotsha ehomba aso wa lo demba, ndo akasalaka nto la wolo dia anto tshɛ mbeya ɔnɛ nde ekɔ Ɔmɛnyi wa Jehowa. Nde akatɛkɛtaka nshi tshɛ di’akambo wa mɛtɛ. Nde akatshikɛ ɛnyɛlɔ ka dimɛna kendana la ohetoheto ndo la dihonga. Nde akambutɛka mbala la mbala ɔnɛ: “Onga l’akambo efula wa nsala l’okongamelo wa Jehowa ko wɛ ayewɔ ekakatanu efula.”

Takasambishaka mbala la mbala lo toshinga ta la Stenen ndo lo ngelo yaki suke la lɛkɔ. Dikambo sɔ komongaka nshi tshɛ wɔdu le mi. Osomba tshɛ akikɔ la dengalenga diakayaka oya le so sho akɛnda dia ndjotosola. Mbala kɛmɔtshi lam’akimi l’ɛnɔnyi enanɛi, lakemala lo tshuku dia shinga mɔtshi lokime Tshoto y’Etangelo la Réveillez-vous !, ko djui mɔtshi y’akɛnda wa lo lɔlɔnga lami wakadinge. Wakapɔtɔla lufulɛ lami l’oyoyo lakamalɔtɛ ko wakaliokɛ lo viuduvudu mɔtshi yaki suke la mi. Diɛsɛ ko ɔnangɛso ɔmɔtshi l’opalanga lakamendaka akɛnyi kɛnɛ kakasalema. Nde akaye ko akambola ate: “Vern, kakɔna kambotomba?” Aha la ntshimbatshimba, akɛnda asɔ tshɛ wakahandjɔnɛ. Kânga mbele dikambo sɔ diakanyangiya, diɔ diakambisha wetshelo w’ɔnɛ etena kasambishaso lo toshinga sho pombaka sɛkɔsɛkɔka lo dihole dia sho memala oko lohingu. Olowanyelo wa ngasɔ wakamalongola oma ko dikɛnda diami wakambisha dihonga diakimi l’ohomba dia nsambisha lo soko la soko.

Dimi la Alvin takabatizama Ngɔndɔ ka tanu 1951. L’etena kɛsɔ, laki l’ɛnɔnyi 13. Lâkatetemala mbohɔ dia ɔnangɛso Jack Nathan lakasha sawo dia batismu akatokeketsha diaha sho mbetsha kânga ngɔndɔ ɔtɔi aha la nsambisha akambo wendana la Jehowa.a Lo nkumbo kaso, takɔsaka dia olimu w’ombatshi mboka mbele olimu woleki tshɛ dimɛna wahombaso mbesa. Ɔnkɔnɛ, lo 1958, l’ɔkɔngɔ wa dimi nshidiya kalasa lakonɔ l’osomba wa Winnipeg, Manitoba, dia tokamba oko ombatshi mboka. Kânga mbele papa akalangaka dia dimi la nde nkamba oko otshudi w’abaya, nde la mama wakakeketsha dia dimi nkamba olimu wa lo tena tshɛ ndo wakafutɛ lɔkɛndɔ lami.

Ngelo k’oyoyo ndo olonganyi w’oyoyo

Lo 1959, Bɛtɛlɛ akalɔmbɛ onto tshɛ lakakokaka dia ntshɔ otsha la Québec lɛnɛ akiwɔ l’ohomba efula w’apandjudi dia nde monɔ otsha lɛkɔ. Lakatshu dia tokamba olimu w’ombatshi mboka la Montréal. Ande otshikitanu wakonge la dikambo sɔ lee! Ɔsɔ aki dikambo di’oyoyo lo lɔsɛnɔ lami nɛ dia lakahombe mbeka Falase ndo ndjaekesanyiya la mbekelo yotshikitanyi ya lɛkɔ. Omendji aso w’otshimbedi akatambute ate: “Totake pondjo wate woho ɔnɛ mbakatasalaka lakaso.” Ɔsɔ aki mɛtɛ dako di’ohomba efula.—1 Kor. 9:22, 23.

Etena kakamonɔ la Québec, dimi komonga l’olonganyi. Koko, kadiyɛso kɛmɔtshi k’osekaseka kakawelɛka Shirley Turcotte kakɛnana la mi l’osomba wa Winnipeg akayokomaka olonganyi ami etena kakatayotshukanaka lo Ngɔndɔ ka hende 1961. Nde lawɔ akotɔ lo nkumbo kakokaka Jehowa ngandji. Kânga mbakimi kombeyaka dui sɔ l’etena kɛsɔ, nde akahombe ndjonga kiɔkɔ y’ekeketshelo le mi l’edja k’ɛnɔnyi efula.

Takakindjakindja osomba wa Gaspésie l’esambishelo

Ɛnɔnyi ehende l’ɔkɔngɔ wa sho ntshukana, wakatotome oko ambatshi mboka wa lânde l’osomba wa Rimouski la Québec. L’eleko kamɔnga akatshi kakayele, Bɛtɛlɛ akatɔlɔmbɛ dia sho ntshɔ tokindjakindja disɛnga dia Gaspésie diaki lo lɛkɛ la ɛstɛ l’omamu w’ashi lo wodja wa Canada l’olimu w’esambishelo. Ɔkɛndɛ aso aki wa monɛ ntɔngɔ y’akambo wa mɛtɛ efula. (Und. 11:6) Takalodia mutuka aso la periodikɛ ndekana 1000 ndo abuku suke la 400, kâmɛ la mbo ya ndɛ ndo l’ahɔndɔ, ko takatatɛ nkindjakindja osomba wa Gaspésie l’olimu w’esambishelo l’edja ka ngɔndɔ k’otondo. Takasambisha tongelongelo tshɛ ta l’osomba wa Gaspésie. Shɛnɛ mɔtshi y’aradiyo yaki l’osomba akɔ yakewola anto ɔnɛ Ɛmɛnyi wa Jehowa wambokoma l’atei aso. Tanyolongolake abuku awɔ. Koko, anto efula wa lo ngelo kɛsɔ koshihodia diewoyelo sɔ nɛ dia vɔ wakafɔnya di’oko wakâkeketsha dia mbetawɔ abuku aso. Ɔnkɔnɛ, vɔ waketawɔ mbâlongola.

L’ɛnɔnyi ɛsɔ, lotshungɔ la nsambisha laki leke ka mbishama l’ahole amɔtshi wa la Québec ndo lo tena dimɔtshi, apulushi wakandaka anto wakasambishaka. Dikambo sɔ diakatokomɛ l’osomba ɔmɔtshi etena kakatatashaka anto abuku aso lo soko la soko. Pulushi kɛmɔtshi akatɔlɔmbɛ dia sho ntshɔ la nde lo biro awɔ ndo kɛsɔ mbakatasale. Lakateyaka lɛkɔ dia avɔka wa lo ngelo akadjanga dia vɔ toshimba sho nsambisha. Lam’ele owandji w’apulushi komonga lushi lakɔ, lakɛnya avɔka ɔsɔ mukanda wakambisha Bɛtɛlɛ ka la Toronto wakɛnyaka dia tekɔ la lotshungɔ la nsambisha. L’ɔkɔngɔ wa nde mbadia mukanda akɔ, aha la ntshimbatshimba nde akate ate: “Dimi akana bu la dikambo. Osasɛrdɔsɛ mbakambute dia dimi konda.” Lam’ele takalangaka di’anto wa lo ɛtshi kaso ka nkɛtɛ mbeya ɔnɛ olimu aso koshimbama, aha la ntshimbatshimba takakalola lo ɛtshi ka nkɛtɛ kakatonde apulushi, ko takatosambishaka nto lɛkɔ.

La wedi a pindju, etena kakatakalolaka dia tɛnana la owandji w’apulushi, nde akanyange efula dia mboka dia wakatoshimbe dia sho nsambisha. Nde akahangwɛ pulushi kɛsɔ lo telefɔnɛ etena kakandasawolaka la nde. Owandji w’apulushi akatotɛ dia naka tambonga l’okakatanu, ko sho mbelɛ nde ndamɛ dia nde ndjôkandola. Kânga mbakiso angɛndangɛnda ndo mbakiso kombeyaka Falase dimɛna, anto wa lɛkɔ waki la lɔsɛngɔ ndo wakatolongola dimɛna. Koko, takayambolaka ɔnɛ: ‘Onde vɔ wayeya akambo wa mɛtɛ lushi lɔmɔtshi?’ Takayokondjaka okadimwelo l’ɔkɔngɔ w’ɛnɔnyi efula etena kakatayokalolaka dia toka Mbalasa ya Diolelo l’osomba wa Gaspésie w’otondo. Takayosholaka dia anto efula wakatasambisha waya anangɛso l’akadiyɛso. Lo mɛtɛ, Jehowa mbatodiaka.—1 Kor. 3:6, 7.

Takakondja sango

Ɔnaso la womoto le Lisa akotɔ lo 1970. Sango di’oma le Jehowa sɔ diakanyomotosha ɔngɛnɔngɛnɔ w’efula lo lɔsɛnɔ. Shirley nde la Lisa wakakambe kâmɛ la mi olimu wa wokelo wa Mbalasa efula ya Diolelo. L’ɔkɔngɔ wa Lisa nshidiya kalasa, nde akate ate: “Papa la mama le, lam’ele l’ɔtɛ ami mbakanyayomɔka l’olimu wa lo tena tshɛ, layosala la wolo dia monga ombatshi mboka.” Ambolekana ɛnɔnyi 20 wakamba Lisa olimu w’ombatshi mboka, koko kakianɛ nde okamba kâmɛ l’omɛnde Sylvain. Vɔ ahende wambonga la diɛsɛ dia mbisha lonya lo dikongelo dia wokelo dia lo wedja efula. Oyango wakatayadjɛ lo nkumbo kaso ele wa mbetɛ lɔsɛnɔ laso ɔsɛlɛngɛ ndo ndjasha tshɛ l’olimu waki Jehowa. Hambohɛki pondjo ɛtɛkɛta wakatotɛ Lisa etena kakandatatɛ nkamba olimu w’ombatshi mboka. Lo mɛtɛ, nde akatshutshuya dia dimi nkalola l’olimu wa lo tena tshɛ lo 2001 ndo lekɔ ombatshi mboka oma k’ɔnɔnyi ɔsɔ. Olimu w’ombatshi mboka wekɔ lo ntetemala kimanyiyami dia dimi ndjaɛkɛ le Jehowa l’oseka dikambo tshɛ diasalami ndo dia dimi nsɛna lɔsɛnɔ l’ɔsɛlɛngɛ lele l’oyango ndo l’ɔngɛnɔngɛnɔ.

Olimu wa wokelo nɔmbaka dia monga la ngandji, kɔlamelo ndo la mbetawɔ

Jehowa akambetsha dia naka sho ndjakimɔ tshɛ ndo mbetawɔ ɔkɛndɛ tshɛ watoshande, kete tayokondja ɛtshɔkɔ efula. Nkamba lo Kɔmite rejiɔnalɛ ka wokelo ndo nkamba olimu wa wokelo kâmɛ l’anangɛso l’akadiyɛso wa lo Québec k’otondo ndo l’ahole akina ekɔ tshondo ya diɛsɛ.

Kânga mbele anangɛso amɔtshi wayakimɔ la lolango l’olimu wa wokelo hawokoke mbisha asawo w’amɛna oma lo lɔyɛnga, vɔ mpɛtaka oko tɔɔtɔ lo wokelo wa Mbalasa ya Diolelo. Anangɛso wa ngandji asɔ wekɔ lo ndjasha l’olimu l’etema awɔ tshɛ ndo diewo diawɔ ndjotombaka sɛkɛ. Etombelo w’olimu awɔ mɛnamaka oma lo Mbalasa y’amɛna yakawɔ dia ntɛmɔla Jehowa.

Wakamumbola ɔnɛ: “Naa waonga woleki ohomba wahomba monga la wanɛ wakayakimɔ la lolango lawɔ lo wokelo wa Mbalasa ya Diolelo?” Lo ndjela kɛnɛ kakamɛnyi, ntondotondo onto pombaka mboka Jehowa nde la Ɔnande ngandji, kâmɛ la nkumbo kaso k’onto l’ɔnango ka l’andja w’otondo. (1 Kor. 16:14) Dionga dia hende ele, nde pombaka monga la kɔlamelo. Etena kahasalema akambo lo ndjela yoho yalangaso, onto lele la kɔlamelo ayotetemala nsukɛ tɛdikɔ ta teokrasi oyadi dikambo dia ngasɔ diambosalema. Kɔlamelo ayotshutshuya onto layakimɔ la lolango dia nde nyomoyasha l’olimu wa wokelo wayosalema otsha la ntondo.

Lekɔ la lowando le Jehowa

Kânga mbakavu papa lo 1985, dako diakandambisha dia monga l’akambo efula wa nsala l’okongamelo waki Jehowa diakakakatɛ lo yimba yami. Oko walongola anto wele l’etenyi k’okongamelo waki Jehowa kele l’olongo ɛkɛndɛ, mbele aha la tâmu papa nde lawɔ ekɔ l’akambo efula wa nsala. (Eny. 14:13) Mama aya l’ɛnɔnyi 97. L’ɔtɛ wa hemɔ ka muyɛkɛ kele la nde, nde hayokoka ntɛkɛta woho wakandatɛkɛtaka ntondo koko ewo kande ka Bible katakitakita. Nde tofundɛka awui w’oma l’avɛsa lo mikanda watofudɛnde ndo tokeketshaka dia sho ntetemala kambɛ Jehowa la kɔlamelo. Sho ana tshɛ tekɔ la lowando lo woho wakatakondja ambutshi wa ngasɔ watoka ngandji.

Lekɔ la lowando nto le Jehowa l’ɔtɛ wakandambisha Shirley, wadɛmi ndo olonganyi ami wele la kɔlamelo. Nde lawɔ namaka lo yimba dako diakawosha nyango di’ɔnɛ: “Vern ayonga l’akambo efula wa nsala l’akambo wa mɛtɛ ndo wɛ pombaka mbetawɔ dia nde nkamba la wenya ande ɛmɔtshi lo wahɔ w’anto akina.” Etena kakatatshukana ambeta ɛnɔnyi 49, takɔshi yɛdikɔ ya sho ntshunda kâmɛ, kambɛ Jehowa kâmɛ ndo naka dimi la nde tamboka l’ekomelo ka dikongɛ nɛ di’akambo, kete tayokalola ɛlɔngɔlɔngɔ l’esekaseka kâmɛ ndo ntetemala mbokambɛ pondjo pondjo kâmɛ. Eelo, taki ‘l’akambo efula wa nsala l’olimu wa Nkumadiɔndjɔ.’ (1 Kor. 15:58) Lo wedi ande, Jehowa akatokotshɛ ehomba aso tshɛ ndo akasale kɛnɛ tshɛ kaki ohomba diaha sho mpomba ndoko ɛngɔ kele ɔlɔlɔ.

[Nɔtɛ ka l’ɛse ka dikatshi]

[Osato wa lo lɛkɛ 31]

“Oyango wakatayadjɛ lo nkumbo kaso ele wa mbetɛ lɔsɛnɔ laso ɔsɛlɛngɛ ndo ndjasha tshɛ l’olimu waki Jehowa”