Jehowa mbokaka delo di’onto lele la otema wambatɛ

SƆLƆMƆNA, nkumekanga ka lomba ka l’Isariyɛlɛ w’edjedja akate ate: “Tena ndo akambo wa shashimoya komɛka anto tshɛ.” (Und. 9:11, NW) Dui dia kandji ndo dia pâ efula koka mfukutanya lɔsɛnɔ laso. Ɛnyɛlɔ, nyɔi ka shashimoya k’ose nkumbo kaso ɔmɔtshi la suke suke koka tosha pâ efula l’asolo. Lo mingu ndo lo ngɔndɔ yayela, onto kokaka monga l’ɔkɛi w’efula ndo oko onto lamboshisha elongamelo. Onto koka monga la tokanyi ta kɔlɔ polo ndo lo nde nkoma lo mfɔnya dia nde hakoke ndjasukanya la Jehowa lo dɔmbɛlɔ.

La ntondo ka dikambo dia ngasɔ, onto koka monga l’ohomba w’ekeketshelo, w’anto mbodja yimba ndo mbôka ngandji. Omembi w’esambo Davidi akembe l’eshikikelo tshɛ ate: “[Jehowa] atusukelaka wane tshe watokokaka. Ndi katusimbulaka wane tshe wukutami.” (Osam. 145:14) Bible totɛka dia “[Jehowa] atukaka ashu andi lu kete tshe, dia nsukela waku weli la etema tshe le ndi.” (2 Ek. 16:9) Nde ekɔ “kame la kanga utema wambate ndu wa ndjakitshakitsha, dia mbulula lumu la kanga ndjakitshakitsha la nkikitsha kanga utema wambate.” (Is. 57:15) Ngande wasukɛ ndo wakeketsha Jehowa onto lele la otema wambatɛ ndo wa ndjakitshakitsha?

‘Tshɛkɛta yotami lo etena kahombama’

Yoho mɔtshi yatosha Jehowa ekimanyielo lo etena kahombama ele lo tshimbo ya nkumbo kaso k’onto l’ɔnango k’Akristo. Akristo keketshamaka dia ‘monga la ɛtɛkɛta wakeketsha otsha le anima wambɔkɔmɔ.’ (1 Tes. 5:14) Ɛtɛkɛta wa kɛtshi ndo wa ngandji w’oma le asekaso ambetawudi wele la kɛtshi koka nkeketsha onto etena kende la kandji ndo la ɔkɛi. Mbutɛ onto lambɔkɔmɔ ɛtɛkɛta wakeketsha kânga lo tshena pe koka mbôkeketsha. Ɛtɛkɛta wa ngasɔ koka ndja oma le onto ɔmɔtshi lakakikɛ lɔkɔnyɔ la woho akɔ wâmɛ kana oma le ɔngɛnyi ɔmɔtshi wambohomanaka la weho w’akambo wa ngasɔ. Jehowa koka nkeketsha onto lele la otema wambatɛ lo toho ta shikaa tɔsɔ.

Tɔsɛdingole ɛnyɛlɔ kaki Alex, ekumanyi kɛmɔtshi k’Okristo kakavusha wadɛnde laki la hemɔ kɛmɔtshi kahakɔnɔ yema tshitshɛ l’ɔkɔngɔ wa vɔ tshukana. Omendji ɔmɔtshi weteta wele la kɛtshi akatɛ Alex ɛtɛkɛta ɛmɔtshi w’esambelo. Nde lawɔ akavusha wadɛnde koko akayotshukanaka nto. Omendji weteta akawotɛ woho wakawosha dikambo sɔ kandji efula l’asolo. Nde akayaokaka dimɛna etena kakinde l’anto akina l’esambishelo ndo lo nsanganya ya l’etshumanelo. Koko etena kakandɔtɔka lo luudu lande ndo kakandadihaka lokuke, nde akayaokaka opoko. Alex mbutaka ate: “Ekɔ mɛtɛ dui di’ekeketshelo dia mbeya dia onto kokaka ndjaoka ngasɔ ndo ɔnɛ anto akina wamboyaokaka woho akɔ wâmɛ.” Lo mɛtɛ, ‘tshɛkɛta yotami lo etena kahombama’ koka nkeketsha ndo nsukɛ onto etena kambondɔkɔmɔ.—Tuk. 15:23.

Ekumanyi kekina k’Okristo, keya anto efula wakavusha elonganyi awɔ, akatshutshuyama dia mbutɛ Alex ɛtɛkɛta ɛmɔtshi w’ekeketshelo. La lɔngɛnyi ndo la ngandji tshɛ, nde akawotɛ dia Jehowa mbeyaka woho wayaokaso ndo kɛnɛ keso l’ohomba etena kakɔmɔso. Ɔnangɛso ɔsɔ akawotɛ ate: “Naka lo ngɔndɔ ndo lo ɛnɔnyi wayaye, wɛ aya l’ohomba w’olonganyi, kete eya dia yɛdikɔ ya Jehowa yoludi la ngandji l’etena kɛsɔ ayonga dia wɛ ntshuka nto.” Lo mɛtɛ, aha onto tshɛ lavusha olonganyi ande ndo lakombola dia tshukana nto mbonga la akoka wa nsala dui sɔ. Koko lo nkana yimba lo ɛtɛkɛta w’ɔnangɛso ɔsɔ, Alex akate ate: “Onto kohola dia tshukana nto ekɔ yɛdikɔ y’oma le Jehowa, kokimanyiyaka dia minya tokanyi ta kɔlɔ t’ɔnɛ naka wɛ ndjotshukana nto lo nshi yayaye, kete wɛ aya bu la kɔlamelo le olonganyi ayɛ wa ntondo kana lo yɛdikɔ yaki Jehowa yendana la diwala.”—1 Kor. 7:8, 9, 39.

Omembi w’esambo Davidi lakahomana l’ehemba ndo l’ekakatanu efula akate ate: “Ashu wa [Jehowa] weko le antu w’ololo, la atui andi weko hwe lu alelu awo.” (Osam. 34:15) Lo mɛtɛ, Jehowa kokaka mboka alelo w’onto lele la otema wambatɛ lo etena kahombama oma lo tshimbo y’ɛtɛkɛta wa lomba ndo wele la shɛnɔdi w’oma le asekaso Akristo wele la kɛtshi ndo wambotshunda. Ɔsɔ ekɔ mɛtɛ yɛdikɔ ya nɛmɔ ndo y’oshika.

Ekimanyielo k’oma lo tshimbo ya nsanganya y’Akristo

Onto lambɔkɔmɔ mongaka esadi eto la tokanyi ta kɔlɔ takoka mbotshutshuya dia nde ndjanganya la anto akina. Koko, Tukedi 18:1 mbutaka ɔnɛ: “One latuyatulaka uma le antu akina, atuyangaka paka lulangu landi lutu, atutshanaka la akanga a yimba tshe.” Alex akasuya ate: “Etena kashisha onto olonganyi ande, yimba yande ndolaka tɔɔ la tokanyi ta kɔlɔ.” Nde mbohɔka dia nde akayambola ɔnɛ: “‘Onde aki dui dikina diakamakoke nsala? Onde lakakoke ndeka mbodja yimba ndo ndjadja lo dihole diande?’ Dimi kokombolaka dia monga dimɛ. Dimi kokombolaka dia monga onyemba. Ekɔ dui dia wolo efula dia onto minya tokanyi ta ngasɔ nɛ dia lushi tshɛ nde mbohɔka dia nde ekɔ opoko.”

Onto lele la otema wambatɛ ekɔ l’ohomba woleki wa lɔngɛnyi l’oshika. Lɔngɛnyi lɔsɔ, onto koka litana esadi eto l’etshumanelo k’Akristo. Lɛkɔ mbɔtshiyaso tokanyi t’ɛlɔlɔ ndo takeketsha taki Nzambi lo yimba.

Nsanganya y’Akristo tokimanyiyaka dia monga la kanyi yele la wɛdimo lo dikambo diambotokomɛ. Naka sho mpokamɛ ndo nkana yimba l’avɛsa wa lo Bible, kete tayoshikikɛ tokanyi taso lo akambo ahende woleki ohomba, mbuta ate oyindjamelo wa lowandji laki Jehowa ndo okidiamelo wa lokombo lande, koko aha tsho lo asui aso hita. Ndo nto, etena ketshamaso awui wendana la Jehowa lo nsanganya y’Akristo, sho keketshamaka lo mbeya dia oyadi anto akina haweye pâ kele la so kana hawoshihodia woho wayaokaso, Jehowa mbeyaka dikambo sɔ dimɛna. Nde mbeyaka dia “ulingulingu mbatulanyaka utema.” (Tuk. 15:13) Nzambi ka mɛtɛ nangaka tokimanyiya ndo dui sɔ tokeketshaka ndo toshaka wolo wa sho ntetemala.—Osam. 27:14.

Etena kakinde l’atei wa tɔsɛngiya toleki wolo t’oma le atunyi ande, nkumekanga Davidi akalelɛ Nzambi ate: “Lumu lami lambolembiama, ndu utema ami ambukalema.” (Osam. 143:4) Ekakatanu kokaka shishɛ onto wolo ande wa lo demba, wa lo yimba ndo mbɔkɔmɔla otema. Hemɔ kana dikɔmɔ dia lo demba diahashile koka tosoya. Sho koka monga l’eshikikelo dia Jehowa ayotokimanyiya dia sho mbikikɛ. (Osam. 41:1-3) Kânga mbele Nzambi hayɔkɔnɔya ndoko onto lo dihindo nshi nyɛ, nde mbishaka onto lasowa lomba ndo dihonga dia nde mbikikɛ okakatanu ande. Tohɔ dia etena kakinde la ekakatanu efula, Davidi akayange ekimanyielo oma le Jehowa. Nde akembe ate: “Dimi latuhoka nshi y’edjedja, latukanaka yimba lu etsha aye tshe, latuyambulaka dia elimu w’anya aye.”—Osam. 143:5.

Woho wele ɛtɛkɛta ɛsɔ fundama lo Ɔtɛkɛta wa Nzambi wakasambiyama mɛnyaka dia Jehowa mbeyaka woho wayaokaso. Ɛtɛkɛta ɛsɔ toshikikɛka dia nde mbokaka ɛsɛngɔsɛngɔ aso. Naka sho mbetawɔ ekimanyielo kaki Jehowa, kete ‘ndamɛ ayotosukɛ.’—Osam. 55:22.

“Nyutetemalaki nomba”

Jakoba 4:8 mbutaka ɔnɛ: “Nyusukani le [Nzambi], ku ndi ayusukana le nyu.” Yoho mɔtshi ya ndjasukanya la Nzambi ele lo tshimbo ya dɔmbɛlɔ. Ɔpɔstɔlɔ Paulo akatolake ate: “Nyutetemalaki nomba.” (1 Tes. 5:17) Oyadi tekɔ la okakatanu dia mbuta woho wayaokaso, “nyuma [twamɛ k]atutoteketelaka la emumu waheyama mvuta.” (Romo 8:26, 27) Jehowa shihodiaka mɛtɛ woho wayaokaso.

Monika lele la diɔtɔnganelo di’ɔlɔlɔ la Jehowa mbutaka ate: “Oma lo tshimbo ya dɔmbɛlɔ, wadielo wa Bible ndo wekelo w’onto ndamɛ, dimi lamboyoshihodia dia Jehowa aya ɔngɛnyi ami woleki tshɛ. Nde aya onto la mɛtɛ le mi ndo dimi mɛnaka woho wakimanyiyande mbala la mbala. Ekɔ dui di’ekeketshelo dia mbeya dia oyadi kânga hakoke mbolembetshiya woho wayaokami, nde mbokakami. Dimi mbeyaka dia ɔlɔlɔ ndo ɛtshɔkɔ ande kema la ekomelo.”

Ɔnkɔnɛ, nyɛsɔ tetawɔke ɛtɛkɛta wa ngandji ndo w’esambelo w’oma le asekaso Akristo, tokambake l’alako wa ngandji ndo la waohwelo wakeketsha mbetawɔ wokaso lo nsanganya y’Akristo ndo todiholɛke Jehowa otema lo dɔmbɛlɔ. Akambo asɔ tshɛ wekɔ toho tɛnya Jehowa dia nde tokanɛka. Alex mbutaka lo ndjela kɛnɛ kakokomɛ ate: “Naka sho nsala kɛnɛ tshɛ kakokaso nsala dia nkamba la tɛdikɔ tɔsa Jehowa Nzambi dia sho ntetemala monga la lonyuma la wolo, kete tayonga la ‘wolo woleki wɔnɛ wokongaka l’onto’ dia mbikikɛ woho tshɛ w’ohemba wakoka mpomana la so.”—2 Kor. 4:7.

[Kiombo/Osato wa lo lɛkɛ 18]

Esambelo le onto lele la otema wambatɛ

Dibuku di’Esambu ndola tɔɔ la ɛtɛkɛta wɛnya woho wayaoka onto ndo eshikikelo k’ɔnɛ Jehowa mbokaka alelo w’onto lele la otema wambatɛ lambɔkɔmɔ lo yimba. Tɔsɛdingole ɛtɛkɛta wayela ɛnɛ:

“Lam’akimi l’asui, dimi laketi [Jehowa], lakalelela [Nzambi k]ami. Uma lu luudu landi l’ekila, ndi akuki diui diami, ndu delu diami diakukema l’atui andi.”—Osam. 18:6.

“[Jehowa] eko lasuki la wane weli la etema wambate. Ndi atushimbelaka waku weli la etema wa ndjakitshakitsha.”—Osam. 34:18.

“Ndi [Jehowa] atokonoyaka etema wakate, atombaka ahondo lu puta yawo.”—Osam. 147:3.

[Osato wa lo lɛkɛ 17]

‘Tshɛkɛta yotami l’etena kahombama’ koka monga mɛtɛ l’ekeketshelo lo lushi la pâ!