Woho wa nsala wekelo wa Bible wa dimɛna

Ngande wakokaso nsala wekelo wa Bible wa dimɛna? Ngande wakokaso ndeka nkondja wahɔ oma lo wenya wekaso Bible? Nyɛsɔ tɔsɛdingole lo tshena pe akambo asato wakoka tokimanyiya dia ndeka nkondja wahɔ oma lo wekelo w’onto ndamɛ.

1 DƆMBƐLƆ: Dɔmbɛlɔ mbele dui dia ntondo diahombaso nsala. (Osam. 42:8) Lande na? Sho pombaka mbɔsa wekelo w’Ɔtɛkɛta waki Nzambi oko etenyi kɛmɔtshi k’ɔtɛmwɛlɔ aso. Ɔnkɔnɛ, sho pombaka nɔmba Jehowa dia nde tosha yimba y’ɔlɔlɔ ndo nyuma kande k’ekila. (Luka 11:13) Barbara lambokamba oko misiɔnɛrɛ l’edja k’ɛnɔnyi efula mbutaka ate: “Dimi nɔmbaka mbala tshɛ la ntondo ka mbeka Bible. L’ɔkɔngɔ wa nɔmba, dimi mbokaka dia Jehowa aya suke la mi ndo nde ngɛnangɛnaka kɛnɛ kayangami nsala.” Nɔmbaka la ntondo ka mbeka Bible nɔngɔsɔlaka etema ndo timba taso dia sho nshihodia awui wa lo nyuma wayangaso mbeka.

2 OKANELO WA YIMBA: Anto amɔtshi salaka wekelo w’Ɔtɛkɛta wa Nzambi wa lahahɛ dikambo wekɔ la wesanu efula. Lo nsala ngasɔ, vɔ pandjaka wahɔ wakokawɔ nkondja oma lo wekelo wa lotshimola wa Bible. Carlos lambokambɛ Jehowa ndekana ɛnɔnyi 50 akayoshihodiaka di’ekɔ ohomba mbɔsaka etena ka nkana yimba. Nde mbutaka ate: “Nshi nyɛ, ladiaka totshapita tɔmɔtshi ta lo Bible, mbuta ate otsha lo tohende lushi tshɛ. Oma lâsɔ ko dimi ndjɔsa wenya efula dia nkana yimba la kɛnɛ kakamadisha dia menda wetshelo wakokami nkondja.” (Osam. 77:12) Etena kɔsaso wenya ɛmɔtshi dia nkana yimba la awui wekaso, ewo ndo eokelo kaso k’Ɔtɛkɛta wa Nzambi pamaka.—Kol. 1:9-11.

3 KAMBA L’AWUI WEKAYƐ: Naka sho mbeya lande na kasalaso dikambo dimɔtshi, kete tayoleka ndjasha lɔkɔ. Ngasɔ mbediɔ ndo lo kɛnɛ kendana la wekelo wa Bible. Ɔlɔngɔlɔngɔ w’Okristo welɛwɔ Gabriel wele la mbekelo ka mbekaka Bible mbutaka ate: “Wekelo wa Bible kimanyiyakami dia ntondoya ekakatanu wa lushi la lushi ndo dia nkimanyiya anto akina. Dimi salaka la wolo dia nkamba la kɛnɛ tshɛ kekami.” (Euh. 11:18; Jas. 1:8) Bible ndola tɔɔ l’awui wakokaso mbeka ndo nkamba la wɔ.—Tuk. 2:1-5.

VUSOLA: Ande diɛsɛ diele la so dia mbadia Ɔtɛkɛta wa Jehowa lele Kiɔkɔ ya lomba tshɛ lee! (Romo 11:33) Ɔnkɔnɛ mbala kekina kayoyeka Bible, kɔlɔmbɛ Jehowa dia nde kosha yimba y’ɔlɔlɔ ndo nyuma kande k’ekila. Ndo l’ɔkɔngɔ wa wɛ mbeka, kɔshi etena ka wɛ nkana yimba l’awui akɔ. Kokambe la kɛnɛ kayoyadia lo lɔsɛnɔ layɛ la lushi la lushi. Naka wɛ nsala awui asɔ, kete wɛ ayokondja wahɔ efula ndo ayoleka ngɛnangɛna wekelo wa Bible.