Totetemale nsambisha la shamanya
‘Osambishake ɔtɛkɛta, osalake dui sɔ la shamanya.’—2 TIM. 4:2.
ONDE WƐ KOKAKA NEMBETSHIYA?
Lande na kakasambisha Akristo wa lo ntambe ka ntondo la shamanya?
Kakɔna kahombaso nsala dia ntetemala nsambisha la shamanya?
Bonde kahombaso ndeka nsambisha la shamanya nshi nyɛ?
1, 2. Ambola akɔna wayangaso nsɛdingola?
TƆSHI dia wɛ ekɔ lo nkatɛ. Ɛnyiyɛ ko ɔnayɛ lakɛnya la nkɛtɛ ambofumbola fudu. Onde wɛ ayotetemala nkatɛ l’ɔtɛ weyɛ la ndjala? Shi wɛ ayotshika mbala kakɔ ɔtɔi kɛnɛ kasalayɛ dia ntshɔ la nde lo lopitadi nɛ dia ɔsɔ ekɔ dui dia wanyandja?
2 Oko weso Ɛmɛnyi wa Jehowa, sho nangaka nkimanyiya anto akina dia vɔ ndjoshimbamɛ. Diakɔ diɔsaso ɔkɛndɛ wa nsambisha lokumu l’ɔlɔlɔ la Diolelo la nɛmɔ di’efula. Koko kânga mbakokaso nsambisha la shamanya, paka sho nsala dui sɔ lo yoho yokongɛmi dimɛna. Ko kakɔna kakalange ɔpɔstɔlɔ Paulo mbuta etena kakandafunde ate: ‘Osambishake ɔtɛkɛta, osalake dui sɔ la shamanya’? (2 Tim. 4:2) Ngande wakokaso nsambisha la shamanya? Lande na kahombaso nsambisha la shamanya?
LANDE NA KAHOMBASO NSAMBISHA LA SHAMANYA?
3. Oyadi anto mbetawɔ kana ntona losango la Diolelo, kakɔna kele mɛtɛ?
3 Naka sho mbohɔka di’olimu w’esambishelo wekɔ olimu washimbɛ nsɛnɔ, kete ondo tayowokamba la shamanya. (Romo 10:13, 14) Bible mbutaka ɔnɛ: “Ndu naka dimi lambutela untu a kolo nti: Mete, we ayuvo! Keli naka ndi ambukalula uma lu kolo kandi, ambutsha akambu w’usimbwi la w’ololo, . . . ndi ayuyala la lumu, ndi huvo. Kolo tshe yakandatshi, yayuhamamela.” (Ezek. 33:14-16) Ndo tɔ mbutɛka wanɛ wasambisha losango la Diolelo ɔnɛ: “We ayuyashimbela, ndu we ndu wane wuka aui aye.”—1 Tim. 4:16; Ezek. 3:17-21.
4. Lande na kakahombe Timɔtɛ nsambisha la shamanya?
4 Dia nshihodia lande na kakatɛ Paulo Timɔtɛ dia nsambisha la shamanya, nyɛsɔ tɔsɛdingole divɛsa 3 ndo 4 dia tshapita 4 ya mukanda wa 2 Timote. Avɛsa akɔ mbutaka ɔnɛ: ‘Osambishake ɔtɛkɛta, osalake dui sɔ la shamanya lo tena di’ɔlɔlɔ ndo lo tena dia pâ. Ɔhɛmɔlake, ohangɔke ndo olakake la solo dia lotutsha tshɛ ndo la diewo dia mbetsha. Nɛ dia etena kɛmɔtshi kayoyala kele anto hawotosukɛ wetshelo w’oshika, koko lo ndjela nsaki yawɔ hita, vɔ wayoyanga embetsha dia vɔ mbatɛka kɛnɛ kangɛnyangɛnya atui awɔ. Vɔ wayokadimola atui awɔ diaha mpokamɛ akambo wa mɛtɛ ndo wayodja yimba l’ɛkɔndɔ wa kashi.’ (2 Tim. 4:2-4) Yeso akatatshi ɔnɛ wetshelo wa kashi wayofulanɛ. (Mat. 13:24, 25, 38) Lam’ele wetshelo wa kashi waki waya suke la fulanɛ, Timɔtɛ akahombe ‘nsambisha ɔtɛkɛta’ l’atei w’etshumanelo diaha Akristo minganyiyama ndo nsɛnɔ y’anto mbɔtɔ lo wâle. Ko onde ndo nshi nyɛ mbele nsɛnɔ y’anto lo wâle?
5, 6. Naa tokanyi tele l’anto efula wahomana la so l’esambishelo?
5 Nshi nyɛ, wetshelo wa kashi wambofulanɛ ndo wambokokanɛ l’andja w’otondo. (2 Tes. 2:3, 8) Naa wetshelo waleka ngɛnyangɛnya anto ɛlɔ kɛnɛ? L’ahole efula, wetshelo w’ohilwelo wambokita dikuma. Kânga mbele mbala efula ambewi wa siansɛ mbayasha lo wetshelo w’ohilwelo, ase ɛtɛmwɛlɔ efula woyasha lɔkɔ ndo dui sɔ diekɔ la shɛngiya lo woho wɔsawɔ Nzambi l’anto akina. Akina mbutaka ɔnɛ lam’ele Nzambi hayakiyanya dikambo diaso, kema ohomba mbokambɛ. Ko lande na kakesama miliyɔ y’anto la wetshelo wa ngasɔ? Vɔ tshɛ mbetawɔka kanyi nyɛ: ‘Wɛ mbeyaka nsala kɛnɛ tshɛ kalangɛ nɛ dia ndoko lɛnɛ ayoyokoya Nzambi la yɛ.’ Lonyangu ko, kanyi shɔ ngɛnyangɛnyaka anto efula.—Adia Osambu 10:4.
6 Koko ekɔ toho tokina takamba l’ewandji w’ɛtɛmwɛlɔ dia ngɛnyangɛnya ampokami awɔ. Mbala efula, vɔ mbutɛka ambetawudi awɔ ɔnɛ: ‘Oyadi wɛ nsala ɔlɔlɔ kana kɔlɔ, Nzambi kôkaka ngandji.’ Waa pastɛrɛ efula mbutɛka ambetawudi awɔ ɔnɛ dia Nzambi mbatshɔkɔla, vɔ pombaka ndjasha lo waa sɛlɛmɔnyi, lo misa, lo fɛtɛ y’ɛtɛmwɛlɔ ndo l’ɔtɛmwɛlɔ wa dikishi. Ambetawudi yema tshitshɛ tsho mbashihodia wâle waya lo ndjasha lo mbekelo ya kɔlɔ shɔ. (Osam. 115:4-8) Ɔnkɔnɛ, naka sho mbakimanyiya dia vɔ nshihodia losango la lo Bible, kete vɔ kokaka ndjokondja ɛtshɔkɔ wayotela Diolelo diaki Nzambi.
NSAMBISHA LA SHAMANYA KƐDIKƐDI NA?
7. Ahombaso nsala dia nsambisha la shamanya?
7 Ɔfɛlɛmɛ wasala onto epaso pombaka mbidja yimba yande tshɛ lɔkɔ nɛ dia lɔsɛnɔ l’onto akɔ lekɔ lo wâle. Woho akɔ wâmɛ mbele, sho kokaka mɛnya dia tekɔ lo nsambisha la shamanya lo ndjasha tshɛ l’olimu akɔ, ɛnyɛlɔ lo nyanga dia mbeya akambo waleka wanɛ wahomana la so ndjasha lɔkɔ. Sho pombaka nto tendaka anto etena kakokawɔ tanema lawakawɔ.—Romo 1:15, 16; 1 Tim. 4:16.
8. Kakɔna kalɔmbama dia nsala akambo la shamanya?
8 Nsala akambo la shamanya nembetshiyaka nto mbetsha akambo woleki ohomba lo dihole dia ntondo. (Adia Etatelu 19:15.) Tɔshi dia wɛ ambotshɔ tosala egzamɛ lo lopitadi nɛ dia wɛ ekɔ la hemɔ. L’ɔkɔngɔ wa dɔkɔtɛlɛ mbishola hemɔ, nde ambokotɛ ate: “Hemɔ kayɛ kambokoheka efula. Wɛ pombaka nsala kɛnɛ kahombama la ntondo ka ngɔndɔ kɛnɛ nshila diaha wɛ mvɔ.” Kânga mbele ɔsɔ ekɔ dui dia wanyandja, ondo wɛ hatotomba oma lo biro waki dɔkɔtɛlɛ la vangowango. Koko, wɛ ayokalola la ngelo ndo ayotosala kɛnɛ kele ohomba dia wɛ sakemɛ.
9. Kakɔna kɛnya dia Paulo akasambishaka la shamanya lam’akinde l’Asiya?
9 Dia sho nshikikɛ ɔnɛ Paulo akasambisha lokumu la l’ɔlɔlɔ shamanya l’Asiya, nyɛsɔ tɔsɛdingole ɛtɛkɛta wakandatɛ dikumanyi dia l’Ɛfɛsɔ. (Adia Etsha 20:18-21.) Mɛnamaka dia nde akasambishaka lo luudu la luudu ntatɛ lushi la ntondo lakandakome lɛkɔ. Ndo nto, nde ‘akashaka asawo lushi la lushi lo luudu la kalasa ya Turano’ l’edja k’ɛnɔnyi ehende w’etondo. (Etsha 19:1, 8-10) Mbokɛmaka hwe dia Paulo akasambishaka la shamanya. Kânga mbahombaso sho lawɔ ‘nsambisha la shamanya,’ sho pombaka monga la wɛdimo. Koko esambishelo mbahomba mbeta lo dihole dia ntondo lo nsɛnɔ yaso.
10. Lande na kahombaso monga la lowando lo woho wakasambishaka Ambeki wa Bible lokumu l’ɔlɔlɔ la shamanya la ntondo ka 1914?
10 Woho wakasambisha djui ya tshitshɛ y’Ambeki wa Bible la ntondo ka 1914 tɛnyaka kɛnɛ kalembetshiya nsambisha la shamanya. Kânga mbakiwɔ yema tshitshɛ, vɔ wakashihodia ɔnɛ nshi y’ekomelo yambotatɛ ndo wakasambisha la shamanya. Vɔ wakakambe l’asawo wakatondjamaka lo tojurnalɛ efula ndo la “ Photo-Drame de la Création ” dia nsambisha miliyɔ y’anto lokumu l’ɔlɔlɔ. Otondonga vɔ kosambisha la shamanya, tshike tototokoma Ɛmɛnyi wa Jehowa.—Adia Osambu 119:60.
TOTETEMALE NSAMBISHA LA SHAMANYA
11. Kakɔna kakakonya Akristo amɔtshi dia ntshika nsambisha la shamanya?
11 Awui wekola yimba koka nkonya opandjudi diaha nde nsambisha la shamanya. Dikongɛ diaki Satana diekɔ l’oyango wa mbekola yimba yaso l’akambo w’anyanya. (1 Pet. 5:8; 1 Joa. 2:15-17) Akristo amɔtshi wakasambishaka la shamanya wakayoshishaka ohetoheto awɔ l’edjedja ka wonya. Ɛnyɛlɔ, Okristo wa lo ntambe ka ntondo wakawelɛka Dɛmasi akatatshindɛka Paulo l’olimu wa misiɔnɛrɛ, koko lo dihole dia nde ntetemala nsambisha la shamanya kâmɛ la Paulo, nde akôlawɔ.—File. 23, 24; 2 Tim. 4:10.
12. Diaaso diakɔna diele la so ɛlɔ kɛnɛ ndo diayonga la so lo nshi yayaye?
12 Dia sho ntetemala nsambisha la shamanya, sho pombaka mbewɔ nsaki ka nsomba kɛnɛ nsomba kɛnɛ. Koko, sho pombaka mbidja welo dia “nkimela lumu la mete.” (1 Tim. 6:18, 19) Ekɔ mɛtɛ dia lɔsɛnɔ la pondjo lanɛ la nkɛtɛ lo Diolelo diaki Nzambi layotosha diaaso dia sho ndjoyasha efula l’elimu aso ekina. Ɔnkɔnɛ, ɔnɛ mbele etena ka sho ndeka nkimanyiya wanyaso anto dia vɔ ndjoshimbamɛ lo ta di’Aramangɛdɔna.
13. Lam’ele sho hatoyolala djɔ ya lo nyuma, ngande wakokaso ntetemala nsambisha la shamanya?
13 Lam’ele anto efula wa l’andja ɔnɛ wekɔ lo ndala djɔ ya lo nyuma, kakɔna kakoka tokimanyiya dia ntetemala mbasambisha la shamanya? Kɛnɛ kakoka tokimanyiya ele mbohɔ ɔnɛ ndo sho mbakalalaka djɔ ya lo nyuma la ntondo ka sho sambishama. Koko, takayemɔka oma lo djɔ shɔ ndo osase wa Kristo wakatɔhɛtɛ. Ɔnkɔnɛ, taya la diɛsɛ dia pɛtshɛ anto akina osase ɔsɔ. (Adia Efeso 5:14.) L’ɔkɔngɔ wa nde mbuta awui asɔ, Paulo akafunde ate: “Nyewo ololo uku [akɛndakɛndanyu], aha uku dinginya, keli uku akanga a yimba. Nyuyatshungweli etena, ne dia nshi nye yeko kolo.” (Ef. 5:15, 16) Kânga mbasɛnaso lo nshi nyɛ ya kɔlɔ, nyɛsɔ ‘toyatshungolɛke etena’ ka ndjashaka l’akambo watokimanyiya dia sɛnaka lo nyuma.
TEKƆ LO NSƐNA LO NSHI Y’EKOMELO
14-16. Lande na kele ɔnɛ mbele etena kahombaso ndeka nsambisha la shamanya?
14 Nshi nyɛ mbamboleka monga ohomba wa sho nsambisha la shamanya nɛ dia oma ko 1914, djembetelo yatɛkɛtama l’Ɔtɛkɛta waki Nzambi yambɛnama hwe. (Mat. 24:3-51) Nsɛnɔ y’anto yamboleka mbɔtɔ lo wâle. Kânga mbambɔtɔ wedja efula toseke dia ntshika nsala ekoma, wedja woleki wolo weke la bɔmbɛ ya wolo oko 2 000. Ewandji wa lɛɛta wekɔ lo nkiyana l’ɔtɛ wakawashisha bɔmbɛ ya wolo efula. Awui wa terɔrismɛ wekɔ woho w’anyanya. Anyangiyangi mbutaka dia naka waa terɔristɛ mpɔhɔla ta dia la waa bɔmbɛ ya wolo, kete ana w’anto tshɛ wayoshila oshiki. Koko, aha ata ato mbadja nsɛnɔ y’anto lo wâle.
15 Alapɔlɔ ɔmɔtshi wakatondjama lo 2009 oma le afundji wa jurnalɛ mɔtshi (The Lancet) ndo oma le wanɛ wakamba lo kalasa y’adidi ya la Londres wakate ɔnɛ: “Wodelo wa djungudungu y’okama a nkɛtɛ mbele dui diamboleka mbidja nsɛnɔ y’anto lo wâle lo ntambe 21 kɛnɛ. Wodelo ɔsɔ wayodja nsɛnɔ ya miliyara y’anto lo wâle w’efula ɛnɔnyi akumi oma lanɛ.” Etombelo wakoka monga la dui sɔ ele lɔnyɔi l’anto l’ɔtɛ wa dola, ɔwɔ, mpɛpɛ ya wolo ndo ata lam’asa wedja. Lo mɛtɛ, ata ndo mpokoso y’oma lo diangɔ diakatongama yekɔ lo mbidja nsɛnɔ y’anto lo wâle.
16 Anto amɔtshi mbeyaka mfɔnya di’ata wakandawɔ bɔmbɛ ya wolo wekɔ l’atei w’awui wakotsha “djimbitelu” ya lo nshi y’ekomelo. Koko efula ka l’atei awɔ hawoshihodia kitshimudi ya djembetelo shɔ. Aya ɛnɔnyi efula wambɛnama djembetelo shɔ ndo yɔ mɛnyaka dia wôngelo wa Kristo wakashile ntatɛ ndo ɔnɛ ekomelo ka dikongɛ nɛ di’akambo kekɔ lo ndjasukana esadi esadi. (Mat. 24:3) Awui efula wa lo djembetelo shɔ kɔmɛnamaka hwe woho wowɛnama nshi nyɛ. Ɔnɛ mɛtɛ mbele etena kahombaso memula anto oma lo djɔ ya lo nyuma shɔ lo tshimbo y’olimu w’esambishelo.
17, 18. a) Kakɔna kahombaso nsala lo menda “etena” kasɛnaso? b) Akambo akɔna wakoka nkonya anto efula dia vɔ ndjeya ehomba awɔ wa lo nyuma?
17 Taya bu la nshi efula ya mɛnya Jehowa ngandji kawokaso lo nsambisha lokumu l’ɔlɔlɔ la ntondo k’ekomelo ndja. Kɛnɛ kakatɛ Paulo Akristo waki la Rɔma koka monga la shɛngiya y’efula le so ɛlɔ kɛnɛ. Nde akawatɛ ate: “Nyu mbeyaka ushidi akona weko. Etena ka nyu memo uma lu djo, kambukuka kakiane. Ne dia kakiane, panda kambuleka ndjala suki la su, uleki etena kakatetawo.”—Romo 13:11.
18 Awui weta lo nshi y’ekomelo nyɛ kokaka nkonya anto efula dia vɔ mbeya ehomba awɔ wa lo nyuma. Anto akina komaka ewo etena kɛnawɔ dia mandji y’ana w’anto bu l’akoka wa nkandola ekakatanu wendana l’ekondjelo, wa nkomiya ata wa la bɔmbɛ ya wolo, awui wa ngala kana lomanu l’esongo ndo nyama. Ndo akina wambokoma dia mbeya ehomba awɔ wa lo nyuma l’ɔtɛ w’awui weta lo nkumbo yawɔ wele oko hemɔ, odiakelo wa diwala kana nyɔi ka lakiwɔ la ngandji. Naka sho ndjasha l’esambishelo, kete tayokimanyiya anto wa ngasɔ.
WAKASALE AKAMBO LA SHAMANYA
19, 20. Kakɔna kakasale Akristo efula dia vɔ nsambisha la shamanya?
19 Lam’ele vɔ wakakombola dia nsala akambo la shamanya, Akristo efula wakɔshi yɛdikɔ ya pamia olimu awɔ w’esambishelo. Ɛnyɛlɔ, wadi l’omi amɔtshi waki weke katshukana wadjasɛ lo wodja w’Équateur wakɔshi yɛdikɔ ya mbetɛ nsɛnɔ yawɔ ɔsɛlɛngɛ l’ɔkɔngɔ wa vɔ mbɔtɔ lo Losanganya la lânde la lo 2006 laki l’ɔtɛ a dui ɔnɛ: “Lamaka sso diayɛ ɔsɛlɛngɛ.” Vɔ wakasale listɛ la diangɔ diakiwɔ komonga l’ohomba ndo l’ɔkɔngɔ wa ngɔndɔ shato, vɔ wakonɔ lo luudu laki la shambrɛ ɔtɔi, wakasondja diangɔ diawɔ dimɔtshi ndo wakafute abasa waki la wɔ. Kombeta edja, vɔ wakatatɛ nkamba olimu w’ombatshi mboka wa tshanda ndo waketawɔ kanyi yakawasha omendji w’otshimbedi ya ntshɔ tokamba l’etshumanelo kaki l’ohomba efula w’apandjudi.
20 Ɔnangɛso ɔmɔtshi ladjasɛ l’Amɛrikɛ wa lo nɔrdɛ akafunde ate: “Etena kakamɔtɔ dimi la wadiɛmi lo Losanganya la lânde lo 2006, lâsɔ ko tambobatizama aya ɛnɔnyi 30 w’etondo. Etena kakatatakalolaka otsha la ngelo, takatakɛtshanyaka woho wakokaso nkamba l’alako wakashama dia mbetɛ lɔsɛnɔ laso ɔsɛlɛngɛ. (Mat. 6:19-22) Taki la mvudu shato, lokombo, mituka w’oshinga wolo, mashuwa ndo mututu. Diaha ndala djɔ lo nyuma, takɔshi yɛdikɔ ya nkamba olimu w’ombatshi mboka wa pondjo. Lo 2008, takakimanyiya ɔnaso la womoto dia nde lawɔ nkamba olimu w’ombatshi mboka wa pondjo. Ande diɛsɛ diaya la so lo woho wambotoleka ndjasukanya l’anangɛso ndo l’akadiyɛso lee! Kakianɛ, tôkamba lɛnɛ ewɔ l’ohomba w’apandjudi efula. Ndo nto, tambɛna dia kambɛ Jehowa tokimanyiyaka dia ndeka ndjasukanya la nde. Etena kangɛnangɛna wanɛ wasambishaso l’ɔtɛ wambowoshihodia Ɔtɛkɛta waki Nzambi, sho lawɔ ngɛnangɛnaka.”
21. Lande na kahombaso nsambisha la shamanya?
21 Sho mbeyaka dia kem’edja, dikongɛ nɛ di’akambo diayanga ndanyema lo “lushi l’elumbwelu ndu l’elanyelu ka antu wa kolo.” (2 Pet. 3:7) Dui sɔ totshutshuyaka dia sho nsambisha l’ohetoheto tshɛ ɔnɛ fɔnu ka woke ndo andja w’oyoyo waya suke. Ɔnkɔnɛ, nyɛsɔ totetemale nsambisha la shamanya dia sho mbisha anto elongamelo ka shikaa. Naka sho nsala ngasɔ, kete tayɛnya dia sho mbokaka Nzambi ndo wanyaso anto ngandji ka mɛtɛ.