Tosambisha la shamanya!
1. Dako dakɔna diaki Paulo dialɔmba dia sho didja yimba lo nshi yaso nyɛ?
1 ‘Sambisha ɔtɛkɛta, sambishawɔ l’etete.’ (2 Tim. 4:2) Lande na kele dako diaki Paulo sɔ ohomba lo nshi yaso nyɛ? Shɛngiya yakɔna yakoka monga la ɛtɛkɛta ɛsɔ lo nsɛnɔ yaso ndo y’anto akina?
2. Lande na kahombaso nyanga wanɛ wahatoke lokumu l’ɔlɔlɔ l’etete?
2 Nsɛnɔ y’anto yekɔ lo wâle: Miliyɔ y’anto l’andja w’otondo watoke lokumu l’ɔlɔlɔ latɔla otsha lo panda. (Romo 10:13-15; 1 Tim. 4:16) Anto efula wele l’etema w’ɛlɔlɔ wekɔ lo mbidjasɛ lo bɛtshi dia nkɛtɛ diakindjakindjama efula. Naka sho membola anto lo nshi nkina kana lo wenya ekina, kete sho mbeyaka mpomana l’anto wotshikitanyi. Woho wayotâyanga l’etete ayotokimanyiya dia sho monga la nkum’etema ya pudipudi ndo mbewɔ onongo wa dikila.—Etsha 20:26.
3. Ngande wakokaso nkamba la wenya aso dimɛna etena keso l’esambishelo?
3 Kânga mbakawadiɛnɛ l’ɔlɔshamelo wa wolo, Akristo wa lo ntambe ka ntondo ‘wakalodia Jerusalɛma la wetshelo awɔ.’ (Etsha 5:28) Onde ndo sho lawɔ mbamboyashikikɛ dia ‘nsambisha dimɛna dimɛna?’ (Etsha 10:42) Etena keso l’olimu w’esambishelo, onde sho kambaka la wenya aso dimɛna? Naka tekɔ lo nkonga dia apandjudi akina mana wendelo awɔ w’oyoyo, onde sho sambishaka wanɛ weta lo mboka?
4. Ngande wele nsambisha la shamanya tokimanyiyaka dia sho ntetemala nsungukala?
4 Dia sho ndeka mambalɛ: Oko wamboleka nsukana ekomelo ka dikongɛ diakambo nɛ, sho pombaka mambalɛka ndo ntetemala nsungukala. (1 Tes. 5:1-6) Etena kayotosambishaka akambo wendana la Diolelo mbala la mbala, tayewɔ diaha awui wa lo dikongɛ diakambo nɛ tɔkɔmɔla. (Luka 21:34-36) Diakɔ diele, oko walamaso lushi la Jehowa ‘lo yimba,’ sho pombaka ndeka nkamba olimu w’esambishelo washimbɛ nsɛnɔ.—2 Pet. 3:11, 12.
5. Ngande wele woho wɔsaso lɔsɛnɔ la nɛmɔ totshutshuyaka dia nsambisha?
5 Etena kasambishaso la shamanya, sho mbɔsaka lɔsɛnɔ woho waliɔsa Jehowa nɛ dia “ndi halangi nduku omotshi nshisho, keli ndi nangaka tshe wakadimuli etema.” (2 Pet. 3:9; Ezek. 33:11) Nyɛsɔ toyashikikɛ dia nsambisha anto efula wele lo ɛtshi kaso ka nkɛtɛ dia lotombo la Jehowa!—Osam. 109:30.