Onde sho mbɔsaka Jehowa oko Shɛso?

“KHUMADIONDJO utetsha lama nomba.” Etena kakɔlɔmbɛ ombeki ande ɔmɔtshi dikambo sɔ, Yeso akawotɛ ate: “Lam’ayunyolombaka, kanyutaki nyati: Shesu, lukumbu laye layali ekila.” (Luka 11:1, 2) Yeso akakoke ntɛkɛta dikambo dia Jehowa lo nkamba la nkombo ya lɔtɛtɛmɔla nyɛ: “Kanga-Wulu-Tshe,” ‘Ombetsha a Woke,’ “Utungi,” “Tangu Andja,” ndo “Khum’ekanga ka pundju.” (Etat. 49:25; Is. 30:20; 40:28; Dan. 7:9; 1 Tim. 1:17) Koko, Yeso akakambe la tshɛkɛta “Shesu.” Lande na? Ondo nɛ dia nde nangaka dia sho sawolaka la Omboledi w’andja w’otondo lo yoho yatosawolaka ɔna lele la okitshakitsha nde la she ka ngandji.

Koko, anto amɔtshi mɛnaka wolo mbɔsa Nzambi oko Shɛwɔ. Okristo ɔmɔtshi welɛwɔ Atsukoa mbutaka ɔnɛ: “Ɛnɔnyi efula l’ɔkɔngɔ wa batismu kami, laki la okakatanu dia ndjasukanya la Jehowa ndo mbɔlɔmba oko Shɔmi.” Lo mbisha ɔkɔkɔ wakinde la okakatanu ɔsɔ, nde mbutaka ate: “Halohɔ lushi lɔmɔtshi lakamɛnyi dia shɔmi ka pɛtɛpɛtɛ mbokakami ngandji.”

Lo nshi y’ekomelo ya pâ nyɛ, “ngandji ka mete” kakoka ɔna nongamɛ oma le she kaya bu. (2 Tim. 3:1, 3) Ɔnkɔnɛ, kema dikambo dia diambo dia anto efula ndjaoka oko wakayaoke Atsuko. Koko, ekɔ dui di’ekeketshelo le so dia mbeya dia tekɔ la ɛkɔkɔ w’eshika wa mbɔsa Jehowa oko Shɛso ka ngandji.

Jehowa kotshaka ehomba aso la ngandji tshɛ

Dia sho mbɔsa Jehowa oko Shɛso, sho pombaka mbêya dimɛna. Yeso akate ate: “Nduku untu leya Ona, tshikima Shi; ndu nduku untu leya Shi, tshikima Ona. Ku Ona ayuwenya untu tshe lalangandi.” (Mat. 11:27) Yoho yoleki dimɛna ya mbeya woho w’onto wele Jehowa oko wende Shɛso ele nkana yimba lo kɛnɛ kakatosholɛ Yeso lo dikambo dia Nzambi ka mɛtɛ. Ko kakɔna kakatosholɛ Yeso lo dikambo dia Shɛso?

Lo mbetawɔ Jehowa oko Kiɔkɔ ya lɔsɛnɔ lande, Yeso akate ate: ‘Lekɔ la lɔsɛnɔ oma le Papa.’ (Joa. 6:57) Sho lawɔ, oma le Shɛso mbeso la lɔsɛnɔ. (Osam. 36:9; Etsha 17:28) Kakɔna kakatshutshuya Jehowa dia mbisha anto akina lɔsɛnɔ? Shi ngandji mbakotshutshuya dia nde nsala dikambo sɔ? L’ɔtɛ wa woshasha ɔsɔ, sho lawɔ pombaka mboka Shɛso ngandji.

Yoho yoleki woke yakɛnya Nzambi ngandji kokande anto ele yɛdikɔ yakandɔshi ya Yeso ndjakimɔ oko olambo wa tshungo. Diɛsɛ la tshungo mbakoka anto wa kɔlɔ monga la diɔtɔnganelo di’ɔlɔlɔ la Jehowa oma lo tshimbo y’Ɔnande la ngandji. (Romo 5:12; 1 Joa. 4:9, 10) Lam’ele Shɛso lele l’olongo atokotshaka alaka ande, sho kokaka monga la eshikikelo dia wanɛ tshɛ wawoka ngandji ndo wôkitanyiya wayonga la ‘lotshungɔ la lotombo l’ana wa Nzambi.’—Romo 8:21.

Ndo nto, Shɛso lele l’olongo ‘tohotoyɛka wonya’ lushi la lushi. (Mat. 5:45) Diakɔ diele, sho bu l’ohomba wa nɔmba dia wonya mpotɔ. Koko tekɔ l’ohomba w’efula w’esase wa wonya ndo sho ngɛnangɛnaka esase akɔ! Ndo nto, Shɛso ekɔ Ombishi woleki tshɛ weya ehomba aso wa l’emunyi la ntondo ka sho mbotɛwɔ. Onde lâsɔ hatokoke mbɔsaka etena ka sho nkana yimba la lowando tshɛ lo woho wakotsha Shɛso lele l’olongo ehomba wa ditongami diande?—Mat. 6:8, 26.

Shɛso ekɔ ‘Okokedi wele la kɛtshi’

Prɔfɛsiya k’Isaya kakashikikɛ ekambi waki Nzambi wa lo nshi y’edjedja ɔnɛ: “Kânga ekongo wayomɔ ndo akona wayosukasuka, lɔngɛnyi lami halomɔki pondjo oma le yɛ ndo sheke yami ya wɔladi hayotɔki pondjo mbata Jehowa, Okokedi anyu wa kɛtshi.” (Is. 54:10, The Bible in Living English) Dia nkeketsha kanyi shɔ, dɔmbɛlɔ diakasale Yeso l’otsho w’ekomelo wa lɔsɛnɔ lande lanɛ la nkɛtɛ mɛnyaka dia Jehowa ekɔ mɛtɛ ‘Okokedi wa kɛtshi.’ Yeso akalɔmbɛ dikambo dia ambeki ande ate: “Vo weko wa la kete, ku dimi luyayi le ye. Papa k’Ekila, ulami wane wakayambisha [l’ɔtɛ wa] lukumbu laye.” (Joa. 17:11, 14) Jehowa akalame ndo akakokɛ ambeki waki Yeso.

Yoho mɔtshi yatokokɛ Nzambi oma lo tolonga taki Satana nshi nyɛ ele lo tosha mbo ya ndɛ ya lo nyuma la wonya lo tshimbo ya ‘ɔhɔmbɔ wa kɔlamelo ndo wa kɛsɔ.’ (Mat. 24:45) Ekɔ ohomba ndɛ mbo ya ndɛ yakeketsha shɔ dia sho ‘ndɔta ɛlɔtɔ tshɛ wa ta wa Nzambi.’ Tɔshi ɛnyɛlɔ ka “engawo ka mbetawo” katokimanyiya dia sho “nyima akuwa tshe wa dja wa kanga kolo.” (Ef. 6:11, 16) Mbetawɔ kaso tokokɛka oma lo wâle wa lo nyuma ndo mɛnyaka dia Shɛso ekɔ la wolo wa tokokɛ.

Sho kokaka mbeka akambo efula lo kɛnɛ kendana la kɛtshi kele la Shɛso lele l’olongo lo nsɛdingola dimɛna dimɛna woho wa lɔkɛwɔ laki la Ɔna Nzambi lanɛ la nkɛtɛ. Tɔsɛdingole ɔkɔndɔ wele lo Mako 10:13-16. L’ɔkɔndɔ ɔsɔ, Yeso ekɔ lo mbutɛ ambeki ande ate: “Nyete tokendakenda wayi le mi.” Etena kakaye tɔkɛndakɛnda tɔsɔ le nde, Yeso akâkumbatɛ la kɛtshi tshɛ ndo akâtshɔkɔla. Vɔ wakahombe mɛtɛ monga la dungi di’ɛmɔnɔmɔnɔ! Ndo lam’ele Yeso akate ɔnɛ: “One lakamenyi, akenyi Papa,” sho mbokaka lâsɔ dia Nzambi ka mɛtɛ nangaka dia sho ndja oya le nde.—Joa. 14:9.

Jehowa Nzambi ekɔ Kiɔkɔ ya woke ya ngandji. Nde ekɔ Ombishi ndo Okokedi woleki tshɛ wakombola dia sho ndjasukanya la nde. (Jak. 4:8) Ɔnkɔnɛ, aha la tâmu, Jehowa ekɔ mɛtɛ Shɛso koleki tshɛ ɔlɔlɔ!

Ɛlɔlɔ w’efula wakondjaso

Sho kondjaka ɛlɔlɔ efula lo ndjaɛkɛ le Jehowa Shɛso ka ngandji ndo ka kɛtshi kele l’olongo. (Tuk. 3:5, 6) Yeso akakondja ɛlɔlɔ lo ndjaɛkɛ tshɛ lo tshɛ le She. Kristo akatɛ ambeki ande ate: “Dimi kema dime, keli dimi la Papa lakantumi.” (Joa. 8:16) Yeso aki nshi tshɛ la wɛkamu lo osukɔ wa Jehowa. Ɛnyɛlɔ lo batismu kande, She akoshikikɛ nto la ngandji tshɛ ate: “On’ami la ngandji one, ndi atongenyangenyaka ololo.” (Mat. 3:15-17) Ndo yema tshitshɛ la ntondo ka nyɔi kande, Yeso akate la dui dia wolo ate: “Papa, lambukitsha lumu lami lu anya aye!” (Luka 23:46) Polo ndo l’etena kɛsɔ, Yeso koshisha wɛkamu waki la nde otsha le She.

Kɛsɔ mbakokaso nsala ndo sho. Lam’ele Jehowa ekɔ lo wedi aso, onde ekɔ dui dimɔtshi diahombaso mboka wɔma? (Osam. 118:6) Atsuko lakatatɛkɛtshi dikambo diande l’etatelo ka sawo nɛ aki la mbekelo ka ndjaɛkɛka lo wolo ande hita etena kakinde l’atei w’ekakatanu. Koko, nde akayotatɛ mbeka awui wendana la lɔsɛnɔ ndo la olimu wa Yeso, lo ndeka mbidja yimba lo diɔtɔnganelo diaki lam’asa Yeso la She lele l’olongo. Etombelo akɔna wakonge la dikambo sɔ? Atsuko mbutaka ate: “Lakeye kɛnɛ kalembetshiya ndjala la Papa ndo ndjaɛkɛ le nde.” Nde kotshaka ate: “Dimi lambokondja ki ndo ɔngɛnɔngɛnɔ wa mɛtɛ. Lo mɛtɛ, sho ndoko l’ɔkɔkɔ wa ndjakiyanya kânga lo dikambo ɔtɔi.”

Naa ɛlɔlɔ ekina wakondjaso lo mbɔsa Jehowa oko Shɛso? Ana mongaka la mbekelo ka mboka ambutshi awɔ ngandji ndo ka mbangɛnyangɛnya. Ngandji mbakatshutshuya Ɔna Nzambi dia ‘salaka nshi tshɛ awui wangɛnyangɛnya She.’ (Joa. 8:29) Woho akɔ wâmɛ mbele, ngandji kokaso Shɛso lele l’olongo kokaka totshutshuya dia nsala akambo la lomba ndo ‘mbotombola lo sɛkɛ.’—Mat. 11:25; Joa. 5:19.

Shɛso ‘ekɔ lo tokimɛ lo lonya l’omi’

Shɛso lele l’olongo akatosha nto “ukimanyidi,” mbuta ate nyuma k’ekila. Yeso akate dia tɔ “[kayot]olombola lu akambu wa mete tshe.” (Joa. 14:15-17; 16:12, 13) Nyuma k’ekila kaki Nzambi kokaka tokimanyiya dia sho mbeya Shɛso dimɛna dimɛna. Tɔ kokaka tokimanyiya nto dia monula ‘diangɔ diakonɛma wolo,’ mbuta ate tokanyi taki la so ntondo, tokanyi dia kɔlɔ dia nɛmbia “tukanyi tshe, dia to ndjala la ukitanyia le Kristu.” (2 Kor. 10:4, 5) Ɔnkɔnɛ, nyɛsɔ tɔlɔmbake Jehowa dia nde tosha “ukimanyidi” wakandatolake, tele la eshikikelo ɔnɛ ‘Shɛso lele l’olongo ayosha nyuma k’ekila le wanɛ tshɛ watɔlɔmbakatɔ.’ (Luka 11:13) Ekɔ nto ohomba dia sho nɔmba dia nyuma k’ekila tokimanyiya dia sho ndeka ndjasukanya la Jehowa.

Ɔna dikɛnda ndjaokaka lo ekokelo, lo lotui tshitshi ndo aha la wɔma etena katandakɛndakɛnda lonya lo lonya nde la she. Naka sho mbɔsa Jehowa mɛtɛ oko Shɛso, kete tayonga la mbetawɔ lo ɛtɛkɛta w’ekeketshelo ɛnɛ: “Dimi keli [Jehowa Nzambi k]aye latukukimelaka lu lunya laye la pami. Dimi latukutelaka nti: Tukaki woma, layukukimanyia.” (Is. 41:13) Sho kokaka monga la diɛsɛ dia woke dia ‘nkɛndakɛnda’ la Nzambi pondjo pondjo. (Mika 6:8) Totetemale nsala lolango lande ko tayɛna ngandji katokande, tayonga la ɔngɛnɔngɛnɔ ndo la lotui tshitshi laya lo mbɔsa Jehowa oko Shɛso.

[Nɔtɛ ka l’ɛse ka dikatshi]