Jehowa akadihola washo ami
Kɔndwama oma le Patrice Oyeka
Aki la dikɔlɔ di’otsho. L’ɔkɔngɔ wa dimi nsala lushi l’otondo aha la mɛna, mbuta ate nkoma tshungu, lele dimɛ, lahokamɛ aradio, lakayɔsa yɛdikɔ ya ndjadiaka lo menda pâ kaki la mi. Lakadje lɔlɛngɔ lo dikɔhɔ di’ashi ko lakadikitsha la mɛsa l’oyango wa dimi ndjɔnɔ l’ɔkɔngɔ wa dimi mbɔka ndo ndɔta dimɛna. Ko lande na kakamalange ndjadiaka? Ndo lande na kekemi la lɔsɛnɔ ndo komonyɔkɔndɔlɛ ɔkɔndɔ ɔnɛ?
LAKOTƆ lo Ngɔndɔ ka hende 2, 1958, lo prɔvɛsɛ ka Kasaï Oriental, lo wodja wa République démocratique du Congo. Papa akavu etena kakimi l’ɛnɔnyi divwa ndo enondo ami la pami mbakambodia.
L’ɔkɔngɔ wa dimi nshidiya kalasa, lakatatɛ nkamba olimu lo platasiɔ ka kawotshu. Lushi lɔmɔtshi la pindju lo 1989, etena kakamafundaka alapɔlɔ ɛmɔtshi lo biro ami, la shashimuya nganɛ mɛnyi ko handjɛna ndoko ɛngɔ. Lakafɔnyaka nte kana kura mbambotshɔ, koko mɔtɛrɛ wakahɛtaka ndo taki teke la pindju. Lakanyange woho w’anyanya nɛ dia takimi nto l’akoka wa mɛna kânga ɛngɔ ɔtɔi oyadi awui wakamafundaka.
Aha la ntshimbatshimba, lakelɛ ose olimu ɔmɔtshi wakamalɔmbɔlaka dia nde tɔlami otsha le onganga ɔmɔtshi. Lam’ele nde komonga l’akoka wa sakɛmi, nde akambutɛ ate tshɔka dia tɛnana l’adɔkɔtɛlɛ wele la diewo di’efula la Kinshasa, lo kapitalɛ.
La Kinshasa
Etena kakamakome la Kinshasa, lakɛnana l’adɔkɔtɛlɛ efula wendana la hemɔ ya lo washo, koko ndoko di’ɔlɔ. L’ɔkɔngɔ wa dimi nsala nshi 43 lo lopitadi, adɔkɔtɛlɛ wakambutɛ ɔnɛ lambotshikala tshungu lɔsɛnɔ lami l’otondo. Ase nkumbo kami wakatshu la mi l’ɛtɛmwɛlɔ efula dia waa pastɛrɛ tɔnɔmbɛ, koko ndoko di’ɔlɔ diakatombe.
L’ekomelo a shimu, lakayoshisha elongamelo ka mɛna nto ndo lakakɔmɔ nɛ dia lâdiko dia nkoma tshungu, lakashisha ndo olimu ami. Wadɛmi akandawɔ l’ɛngɔ tshɛ kaki lo luudu laso l’ɔtɛ wakamakome tshungu. Lakayotatɛ ndo mboka sɔnyi ka ntomba l’andja kana monga lale anto. Lakatatɛ ndjaoka okalema ndo lakadjasɛka paka lo luudu. Lakatatɛ ndjaoka opoko ndo oko onto lele bu kânga la yema ya nɛmɔ.
Lakahembe ndjadiaka mbala hiende y’etondo. Mbala ka hende mbakamanyote l’etatelo ka sawo nɛ. Ɔna ɔmɔtshi la dikɛnda la lo nkumbo kami mbakambitsha. Aha la dimi mbeya, etena kakamɔkaka, nde akayonya dikɔhɔ diaki la lɔlɛngɔ diakamakitsha la mɛsa ko akatodikasha. Diɛsɛ ko nde konɔ lɔlɛngɔ lakɔ. Etena kakamakalola oma la tɔka ashi, lakahekɔ mambamba la mɛsa koko dimi kotana dikɔhɔ diaki la lɔlɛngɔ sɔ. Oma lâsɔ, mbakamayotɛka ase nkumbo kami lande na katamayange dikɔhɔ diakɔ ndo dia nsala na.
Dimi kaloyɛka Nzambi ndo nkumbo kami losaka heyama lo woho wanamawɔ. Kanyi yaki la mi ya ndjadiaka yakɔtɔ l’ashi.
Lambonyomonga l’ɔngɛnɔngɛnɔ
Lushi la lomingu lo 1992, etena kakamadjasɛ lanɔ mfɔka, Ɛmɛnyi wa Jehowa ehende wakatasambishaka lo luudu la luudu wakɔtɔ lo lokombo laso. L’ɔkɔngɔ wa vɔ mɛna ɔnɛ dimi lekɔ tshungu, vɔ wakambadiɛ divɛsa dia Isaya 35:5 diata ɔnɛ: “Ashu w’akanga a tutshungu wayosena, la atui w’akanga a puki wayuka.” Etena kakamoke ɛtɛkɛta ɛsɔ, lakangɛnangɛna efula. Otshikitanyi la kɛnɛ kakambutɛka ase ɛtɛmwɛlɔ wa kashi, Ɛmɛnyi wa Jehowa kombutɛmi dia wayɔkɔnɔya lo yoho ya dihindo. Koko, vɔ wakanembetshiya ɔnɛ dimi kokaka ndjɛna l’andja w’oyoyo walaka Nzambi naka dimi mbeka dia mbêya. (Joani 17:3) Aha la ntshimbatshimba, lakatatɛ mbeka Bible l’Ɛmɛnyi wa Jehowa lo dibuku Kokaka We Monga la Loseno la Pondjo lo Paradiso ka la Kete. Lakatatɛ mbɔtɔ lo nsanganya y’Akristo lo Mbalasa ka Diolelo kaki suke laso, lakasale etshikitanu efula ndo lakatshike ɔnwɛlɔ wa mfɔka.
Woho wakimi tshungu akambidjɛka wekamu dia mpama lo nyuma. Ɔnkɔnɛ, lakatshu dia toyafundja lokombo lo kalasa y’akanga wa totshungu dia mbeya mbadia ndo mfunda. Dui sɔ diakakimanyiya dia dimi nkondja wahɔ oma lo nsanganya yasalema lo Mbalasa ka Diolelo. Kombeta edja, lakatatɛ nsambisha. Lakayotatɛ nyomonga l’ɔngɛnɔngɛnɔ. Lakatetemala mpama lo nyuma, lakayakimɔ le Jehowa ndo lakabatizama lo Ngɔndɔ ka tanu 7, 1994.
Lam’ele ngandji kakamokaka Jehowa ndo anto akina kakatahamaka, lakakɛnɛmɔla nsaki ka nkamba olimu wa lo tena tshɛ. Diakɔ mbele lo Ngɔndɔ ka dikumi l’ahende 1, 1995, lakatatɛ nkamba oko ombatshi mboka wa pondjo, mbuta ate osambisha wa lo tena tshɛ. Ndo nto, lakayɔsɔnamaka oko ekumanyi l’etshumanelo lo Ngɔndɔ ka hende 2004. Tena dimɔtshi, dimi mbelamɛka oko ɔtɛkɛtshi w’ɔngɛndangɛnanda lo tshumanelo dikina dia tosha asawo. Ɛtshɔkɔ ɛsɔ tshɛ wambombisha ɔngɛnɔngɛnɔ w’efula ndo wambokimanyiya dia nshihodia ɔnɛ ndoko ɛkɔmɔ kahomba toshimba dia kambɛ Jehowa Nzambi.
Jehowa ambombisha washo
Oko wakamanyote la diko, wadɛmi akandawɔ l’ɔtɛ wakamakome tshungu. Koko, Jehowa akatshɔkɔla efula. Lo yoho ya lânde, dimi mbutaka dia nde ambombisha washo. Anny Mavambu lakayetawɔ dia dimi monga omɛnde, amboyokoma washo ami. Lam’ele ndo nde lawɔ ekɔ osambisha wa lo tena tshɛ, nde tshɔka la mi l’esambishelo mbala la mbala. Ndo nto, nde mbadiɛkami awui wa lo asawo wa lo sɛkɛ ko dimi fundaka l’ɔtɛkɛta w’akanga wa totshungu welɛwɔ Braille. Lo yoho ya lânde, nde ekɔ tshondo y’ɔtshɔkɔ le mi. Diɛsɛ l’ekimanyielo kande, lambɛna mɛtɛ k’ɛtɛkɛta wele lo Tukedi 19:14 wata ɔnɛ: “Antu watukitaka luudu l’ongonyi uma le washewo. Keli wadi leli la yimba eli ushasha uma le [Jehowa].”
Ndo nto, Jehowa ambotɔtshɔkɔla dimi la Anny nɛ dia tambôta ana ahende, pami la womoto. Lekɔ lo nomɔlomɔ dia ndjɛna dungi diawɔ lo paradiso. Ɔtshɔkɔ okina ele, woho waketawɔ enondo ami la pami dia sho mbidjasɛ lo luudu lande ndo woho wakandetawɔ akambo wa mɛtɛ wa lo Bible ndo wakandabatizama. Sho tshɛ tekɔ l’etshumanelo ɔtɔi.
Kânga mbemi tshungu, dimi kombolaka ntetemala kambɛ Nzambi efula nɛ dia nde ambɔtshɔkɔla efula. (Malaki 3:10) Dimi nɔmbaka lushi tshɛ dia Diolelo diande ndja ndo ndjonya pâ tshɛ ya la nkɛtɛ. Lam’ele lamboyeya Jehowa, dimi kokaka mbuta aha la nkokoma nte: “Otshoko wa [Jehowa] mbatongonyaka. Ndi hataheka lunyangu ladiku diawo.”—Tukedi 10:22.
[Esato wa lo lɛkɛ 15]
Lasha sawo dia lo sɛkɛ; kâmɛ la nkumbo kami ndo l’enondo ami