Tosale akambo wɔtɔnɛ la dɔmbɛlɔ dia Yeso

1, 2. Fɛtɛ kakɔna kakahɔhɔla Yeso l’ɔkɔngɔ wa vɔ nsala dambo di’Elekanelo nde l’ambeki ande lo 33 T.D.?

LA DIKƆLƆ dia ngɔndɔ ka Nisana 14, 33 T.D., Yeso nde l’ambeki ande wakasale dambo di’Elekanelo dia vɔ mbohɔ woho wakatshungola Nzambi watshɛwɔ oma lo lɔhɔmbɔ la l’Edjibito. Koko ambeki ande wa kɔlamelo asɔ waki suke la ‘ntshungɔ lo pondjo.’ La wedi a pindju, atunyi waki Yeso wakayoodiakaka. Koko nyɔi ka Yeso kɛsɔ kakakadimɔ ɔtshɔkɔ, nɛ dia dikila diande diakahombe ntshungola anto oma lo pɛkato la nyɔi.​—Hɛb. 9:12-14.

² Dia tokimanyiya diaha sho mbohɛ nyɔi kande, Yeso akahɔhɔla fɛtɛ kakahombe mpɛna dambo di’Elekanelo. Nde akasale dikambo sɔ lo mpembola mapa waha la wodoya ko mbeetshetsha le apɔstɔlɔ 11 wa kɔlamelo awatɛ ate: “Mapa ɔnɛ wekɔ didjidji dia demba diami diayanga kimɔma dikambo dianyu. Kanyotshake ɔnkɔnɛ dia mbohɔkami.” Nde akasale woho akɔ waamɛ ndo la dikɔhɔ dia vinyɔ, awatɛ ate: “Vinyɔ nyɛ nembetshiyaka sheke y’oyoyo yambodjama l’ekimanyielo ka dikila diami diayotshulɔma lo wahɔ anyu.”​—Luka 22:19, 20.

3. a) Otshikitanu akɔna wakayonga l’ɔkɔngɔ wa nyɔi ka Yeso? b) Ambola akɔna wahombaso ndjaoka lo kɛnɛ kendana la dɔmbɛlɔ dia Yeso diele lo Joani tshapita 17?

³ Sheke y’Ɛlɛmbɛ yakadje Nzambi l’Isariyɛlɛ wa lo demba yaki yaya suke la nkomɛ. Sheke y’oyoyo yakadje Jehowa nde l’ambeki waki Yeso w’akitami mbakahombe ndjɔhɛna sheke y’Ɛlɛmbɛ shɔ. Yeso akayakiyanyaka efula lo kɛnɛ kendana la yoonge ya lo nyuma y’Isariyɛlɛ wa lo nyuma. Ase Isariyɛlɛ wa lo demba wakaatɔna l’awui w’ɔtɛmwɛlɔ ndo wa lo tshunda ndo dui sɔ diakasandja Nzambi nsɔnyi. (Jni. 7:45-49; Etsha 23:6-9) Lo wedi okina, Yeso akakombolaka di’ambeki ande ntetemala nkamba olimu kaamɛ l’oyango wa vɔ ntombola lokombo laki Nzambi. Ko kakɔna kakasale Yeso? Nde akasale dɔmbɛlɔ dia lɔɔka diatetemala anto efula nkamba la diɔ ɛlɔ kɛnɛ. (Jni. 17:1-26; enda osato w’etatelo.) Diakɔ diele, sho pombaka ndjambola ɔnɛ: “Onde Nzambi akakadimola lo dɔmbɛlɔ diaki Yeso?” Sho pombaka ndjasɛdingola ndo ndjambola nto ɔnɛ: “Onde dimi salaka awui wɔtɔnɛ la dɔmbɛlɔ sɔ?”

AWUI WAKETSHAKA YESO LO DIHOLE DIA NTONDO

4, 5. a) Wetshelo akɔna wakondjaso oma lo ɛtɛkɛta wa mbɔtwɛlɔ wa lo dɔmbɛlɔ dia Yeso? b) Ngande wakakadimola Jehowa dɔmbɛlɔ dia Yeso?

⁴ Yeso akasawola l’ambeki ande polo l’otsho, awasha ewo k’oshinga wolo k’oma le Nzambi. Oma laasɔ, nde akedia washo l’olongo, ko akalɔmbɛ ate: “Papa, wonya wambokoka. Tombola ɔnayɛ kele ɔnayɛ akotombole kele, oko wakayawosha lowandji laadiko dia anto tshɛ, nde asha anto tshɛ wakayawosha lɔsɛnɔ la pondjo. . . . Dimi lambokotombola la nkɛtɛ ndo lamboshidiya olimu wakayambisha dia nsala. Ɔnkɔnɛ, kakianɛ wɛ Papa, otombole la ntondo kayɛ la lotombo lakimi la lɔ la ntondo kayɛ ntondo k’andja tongama.”​—Jni. 17:1-5.

⁵ Tende awui waketsha Yeso lo dihole dia ntondo lo mbɔtwɛlɔ ka dɔmbɛlɔ diande. Dui dia ntondo ele, okidiamelo wa lokombo la She lele l’olongo nɛ dia dui sɔ mbɔtɔnɛka la dui dia ntondo diakandalɔmbɛ lo dɔmbɛlɔ di’ɛnyɛlɔ ate: “Shɛso, lokombo layɛ lakidiame.” (Luka 11:2) Dui dia hende ele, Yeso akayakiyanyaka di’ehomba wa lo nyuma w’ambeki ande dia nde mbasha “lɔsɛnɔ la pondjo.” Oma laasɔ, Yeso akayɔlɔmba lo dikambo dia nde ɔnɛ: “Papa, otombole la ntondo kayɛ la lotombo lakimi la lɔ la ntondo kayɛ ntondo k’andja tongama.” Jehowa akayofutaka Ɔnande la kɔlamelo oleki ndo kɛnɛ kakandalɔmbɛ ndo akawosha “lokombo loleki nkombo” y’andjelo tshɛ la fwa.​—Hɛb. 1:4.

“KEYA WƐ NZAMBI ƆTƆI KA MƐTƐ”

6. Kakɔna kakahombe ambeki waki Yeso nsala dia ndjokondja lɔsɛnɔ la pondjo, ndo kakɔna kɛnya dia ngasɔ mbediɔ?

⁶ Lo dɔmbɛlɔ diande, Yeso akɛnya kɛnɛ kahombaso sho anto wele keema kokele nsala dia ndjokondja lɔsɛnɔ la pondjo. (Adia Joani 17:3.) Nde akate ate sho pombaka ntetemala ‘mbeya’ Nzambi ndo Kristo. Yoho mɔtshi yakokaso nsala dui sɔ ele lo nkamba l’atoyi ndo la washo aso dia ndeka mbetshama oma le Jehowa ndo Ɔnande. Yoho kina yakokaso monga la ewo ka Nzambi ele lo nkamba l’awui wetshamaso lo dikambo diande. Apɔstɔlɔ waki Yeso wakasale dui sɔ dikambo Yeso akatetemala nɔmba ate: “Dimi lakawatɛ kɛnɛ kakayambutɛ ndo vɔ wakakilongola.” (Jni. 17:8) Koko dia nkondja lɔsɛnɔ la pondjo, vɔ wakahombe ntetemala nkana yimba la wetshelo wa Nzambi ndo nkamba la wɔ lo nsɛnɔ yawɔ. Onde apɔstɔlɔ wa kɔlamelo wa Yeso wakatetemala nsala ngasɔ polo l’ekomelo ka lɔsɛnɔ lawɔ la nkɛtɛ? Eelo, nɛ dia nkombo yawɔ tshɛ yakafundama lo ave 12 wohikami Jɛrusalɛma y’Oyoyo ya l’olongo.​—Ɛny. 21:14.

7. Kakɔna kalembetshiya ‘mbeya’ Nzambi, ndo lande na kele dui sɔ diekɔ ohomba?

⁷ Lo ndjela waa nomb’ewo y’ɔtɛkɛta wa Grɛkɛ, tshɛkɛta yokadimɔmi ɔnɛ “keya” koka kadimɔma nto ɔnɛ “ntetemala mbeya.” Tokitshimudi tɔsɔ tohende mbɔtɔnɛka ndo tekɔ ohomba. Ɔnkɔnɛ, tshɛkɛta “keya” nembetshiyaka wekelo watatetemala watokimanyiya dia mbeya Nzambi. Mbokɛmaka dia mbeya Onto loleki woke l’andja w’otondo nembetshiyaka akambo efula laadiko dia mbeya tsho waonga ande la sangwelo diande. Mbeya Jehowa nembetshiyaka nto mbolanga ndo nanga asekaso ambetawudi. Pɔɔlɔ akalembetshiya ate: “Onto tshɛ lahokana ngandji ateye Nzambi, nɛ dia Nzambi ekɔ ngandji.” (1 Jni. 4:8) Ɔnkɔnɛ, mbeya Nzambi nembetshiyaka nto mbokitanyiya. (Adia 1 Joani 2:3-5.) Ande diɛsɛ diele laso dia mbadiema l’atei w’anto weya Jehowa lee! Koko oko wakidiɔ lo kɛnɛ kendana la Judasɛ Iskariyɔtɛ, sho kokaka nshisha diɛsɛ sɔ. Ɔnkɔnɛ, nyɛsɔ tosale la wolo diaha dishisha nɛ dia lo nsala ngasɔ mbayotoyokondja woshasha wa mamba wa lɔsɛnɔ la pondjo.​—Mat. 24:13.

“L’ƆTƐ WA LOKOMBO LAYƐ”

8, 9. Kakɔna kaketshaka Yeso lo dihole dia ntondo etena kakinde la nkɛtɛ, ndo mbekelo kakɔna kaki l’ambewi w’Ɛlɛmbɛ kakatone Yeso?

⁸ L’ɔkɔngɔ wa sho mbadia dɔmbɛlɔ dia Yeso diele lo Joani tshapita 17, shi sho tshɛ mɛnaka ngandji kakokaka Yeso apɔstɔlɔ ande ndo wanɛ wakahombe ndjonga ambeki ande l’ɔkɔngɔ diko? (Jni. 17:20) Koko Yeso kombetshaka panda k’ambeki ande lo dihole dia ntondo. Oyango wa woke waki la nde etena kakinde la nkɛtɛ aki okidiamelo wa lokombo la She. Ɛnyɛlɔ, etena kakinde lo luudu l’ɔtɛmwɛlɔ la la Nazarɛtɛ ndo kakandatɛka anto ɔkɔkɔ wakandaye la nkɛtɛ, Yeso akadia lo wɔɔmbɔ w’Izaya ate: “Nyuma ka Jehowa kambombahema, nɛ dia nde akasɔnɛ dia dimi mbewoya ase wola lokumu l’ɔlɔlɔ.” Weho akɔ tshɛ Yeso akadia lokombo l’oshika laki Nzambi etena kakandadia ɛtɛkɛta ɛsɔ.​—Luka 4:16-21.

⁹ Lo ndjela ɛkɔndɔ wa l’onyɔ w’ase Juda, edja efula la ntondo ka Yeso ndja la nkɛtɛ, ambewi w’Ɛlɛmbɛ w’ase Juda wakashimbe anto dia nkamba la lokombo la Nzambi. Tekɔ l’eshikikelo dia Yeso akatone wetshelo wa kɔlɔ ɔsɔ. Nde akatɛ andɔshi ande ate: “Dimi lakaye lo lokombo la Papa, koko nyu konongolami. Ko naka onto okina ndja lo lokombo lande ndamɛ, nyayokoka mbolongola.” (Jni. 5:43) Oma laasɔ, nshi ngana la ntondo ka nde mvɔ, Yeso akɛnyaka kɛnɛ kakandayakiyanyaka etena kakandate lo dɔmbɛlɔ diande ate: “Papa, otombole lokombo layɛ.” (Jni. 12:28) Ɔnkɔnɛ, l’ɔkɔngɔ wa sho nsɛdingola dɔmbɛlɔ diakasale Yeso, tamboka dia nde akayakiyanyaka efula dia lokombo laki She.

10, 11. a) Kakɔna kakasale Yeso dia mbeyanya lokombo laki She le ambeki ande? b) Oyango akɔna wahomba ambeki waki Yeso ndjadjɛ?

¹⁰ Yeso akalɔmbɛ ate: “Dimi lakeyanya lokombo layɛ le anto wakayambisha oma l’andja ɔnɛ. Vɔ waki anto ayɛ ko wɛ akambishawɔ ndo vɔ wakakitanyiya ɔtɛkɛta ayɛ. Ndo nto, dimi laya bu l’andja ɔnɛ, koko vɔ wekɔ l’andja ɔnɛ ndo dimi lekɔ lo ndjaye oya le yɛ. Papa k’ekila, owakoke l’ɔtɛ wa lokombo layɛ lakayambisha, dia vɔ tshɛ monga kaamɛ oko weso kaamɛ.”​—Jni. 17:6, 11.

¹¹ Dia mbeyanya lokombo la She le ambeki ande, Yeso kokomɛkomɛ tsho lo mbatɛlɔ, koko nde akaakimanyiya dia vɔ mbeya kɛnɛ kalembetshiya lokombo lakɔ, waonga ande ndo woho watosalɛnde akambo. (Etum. 34:5-7) Kaanga lam’akandadiyama lo dihole dia lotombo l’olongo, Yeso akatetemala nkimanyiya ambeki ande dia vɔ mbeyanya lokombo laki Jehowa. Ko l’oyango akɔna wasalande dui sɔ? Ele di’anto ndeka sambishama la ntondo k’ekomelo ka dikongɛ di’akambo ndja. Ɔnkɔnɛ, Jehowa ayoyatongɛ lokombo la woke etena kayondodiaka atunyi ande dia ntshungola ekambi ande wa kɔlamelo.—Ezek. 36:23.

“KELE ANDJA KAWETAWƆ”

12. Naa awui asato wahombaso nsala dia nsambisha dimɛna?

¹² Etena kakinde lanɛ la nkɛtɛ, Yeso akakimanyiya ambeki ande dia vɔ mbahemɛ wɛɔdu awɔ. Dui sɔ diakahombe mbakimanyiya dia vɔ nshidiya olimu w’esambishelo wakatatɛ Yeso. Nde akalɔmbɛ ate: “Oko wakayatome l’andja mbele ndo dimi lawɔ lambaatoma l’andja.” Yeso akɛnyi ɔnɛ di’ambeki ande nkamba olimu w’esambishelo dimɛna, vɔ pombaka nsala awui asato anɛ. Dui dia ntondo, ambeki ande takawahombe monga ase andja wa kɔlɔ waki Satana. Dui dia hende, ambeki ande wakahombe kidiama lo ndjasha tshɛ lo nkamba la mɛtɛ k’oma l’Ɔtɛkɛta wa Nzambi. Dui dia sato, vɔ wakahombe monga kaamɛ lo dimama dia ngandji oko wediɔ lam’asande la She. Laasɔ, toyambole ɔnɛ: ‘Onde dimi salaka akambo wɔtɔnɛ l’awui asato wa lo dɔmbɛlɔ diaki Yeso?’ Lo mbika washo l’awui asɔ, Yeso akate l’eshikikelo tshɛ ate: “Kele andja kawetawɔ dia wɛ mbakatome.”​—Adia Joani 17:15-21.

13. Ngande wakakadimɔma dɔmbɛlɔ diaki Yeso lo ntambe ka ntondo T.D.?

¹³ Naka sho mbeka dibuku di’Etsha w’apɔstɔlɔ diahɔnyi l’Evanjiliɔ ɛnɛi, kete tayɛna dia Jehowa akakadimola dɔmbɛlɔ diaki Yeso. Diatɔnelo diakakoke ndjonga l’atei w’Akristo wa lo ntambe ka ntondo nɛ dia l’atei awɔ mbaki ndo ase Juda, wanɛ waki komonga ase Juda, akanga w’ɛngɔnyi, ase wola, ɛhɔmbɔ ndo wanɛ waki l’ɛhɔmbɔ. Koko, vɔ waki kaamɛ nɛ dia wakakoke mbɛdikama la tenyi dia demba ɔtɔi diohakemi lo ɔtɛ awɔ wele Yeso. (Ɛf. 4:15, 16) Ɔsɔ mɛtɛ aki dui dia diambo diakasalema l’andja waki Satana wambolola la diatɔnelo. Jehowa mbahomba tombɔma nɛ dia nde mbakasale dui sɔ l’ekimanyielo ka nyuma kande k’ekila.​—1 Kɔr. 3:5-7.

14. Ngande wambokadimɔma dɔmbɛlɔ dia Yeso nshi nyɛ?

¹⁴ Lonyangu ko, kaamɛ kɛsɔ kotetemala monga l’ɔkɔngɔ wa nyɔi k’apɔstɔlɔ. Oko wakadiatatami, waa apɔsta wakayololanɛ l’atei awɔ ndo etombelo wakonge la dui sɔ ele, diatɔnelo diakayongaka. (Etsha 20:29, 30) Koko lo 1919, Yeso akatshungola Akristo w’akitami oma lo lɔhɔmbɔ l’ɔtɛmwɛlɔ wa kashi ndo akaatshumanya kaamɛ lo “dimama diasala dia anto monga kaamɛ lo yoho ya kokele.” (Kɔl. 3:14) Etombelo akɔna wambonga l’esambishelo kawɔ lo andja w’otondo? Ndekana miliyɔ esambele y’“ɛkɔkɔ ekina” y’anangɛwɔ w’oma lo “wedja tshɛ, oma lo waoho tshɛ ndo oma lo nkoho y’alemba tshɛ ndo oma l’ɛtɛkɛta tshɛ” wakonge olui ɔtɔi vɔ l’Akristo w’akitami. (Jni. 10:16; Ɛny. 7:9) Ɔsɔ mɛtɛ aki okadimwelo wa diambo lo woho wakalɔmbɛ Yeso ate: “Kele andja weye dia wɛ mbakatome ndo wɛ akaalange oko wakayanange.”​—Jni. 17:23.

NDJIHELO KAKEKETSHA

15. Kakɔna kakalɔmbɛ Yeso lo kɛnɛ kendana l’Akristo w’akitami?

¹⁵ La dikɔlɔ dia Nisana 14, Yeso akasha apɔstɔlɔ ande nɛmɔ lo mbidja la wɔ sheke ya tolɛ kaamɛ la wɔ lo Diolelo diande. (Luka 22:28-30; Jni. 17:22) Ɔnkɔnɛ, Yeso akalɔmbɛ lo kɛnɛ kendana l’Akristo tshɛ wakakoke ndjokoma akitami ate: “Papa, dimi nangaka dia ndo wanɛ wakayambisha monga la mi lɛnɛ ayomonga, dia vɔ mɛna lotombo lakayambisha, nɛ dia wɛ akanange la ntondo k’andja tongama.” (Jni. 17:24) Ɛkɔkɔ ekina waki Yeso mongaka l’ɔngɛnɔngɛnɔ, koko aha la kandjema l’ɔtɛ wa dui sɔ ndo kɛsɔ mɛnyaka di’Akristo tshɛ wekɔ kaamɛ ɛlɔ kɛnɛ.

16, 17. a) Kakɔna kakayotaka Yeso l’ekomelo ka dɔmbɛlɔ diande? b) Kakɔna kambotoyashikikɛ dia nsala?

¹⁶ Lam’ele vɔ wekɔ lo sɛngiyama oma le waa pastɛrɛ ya l’ɛtɛmwɛlɔ awɔ, anto efula hawetawɔ dia Jehowa ekɔ l’ekambi ande wele kaamɛ ndo waweya dimɛna. Ngasɔ mbakasalemaka ndo lo nshi ya Yeso. Nde akadihiya dɔmbɛlɔ diande l’ɛtɛkɛta wa diambo ɛnɛ: “Papa ka losembwe, lo mɛtɛ andja ɔnɛ hawokeye, koko dimi lambokeya ndo wanɛ wambeya dia wɛ mbakatome. Dimi lakawaewoya lokombo layɛ ndo layowaewoyalɔ, dia ngandji kakayamboke monga le wɔ ndo dimi monga kaamɛ la wɔ.”​—Jni. 17:25, 26.

¹⁷ Akɔna akoka mbidja taamu ɔnɛ Yeso kosala akambo wɔtɔnɛ la dɔmbɛlɔ diande? Oko wende Ɔtɛ w’etshumanelo, nde ekɔ lo ntetemala tokimanyiya dia sho mbeyanya lokombo la She ndo sangwelo diande. Ɔnkɔnɛ, nyɛsɔ sho tshɛ totetemale nkitanyiya didjango diakandadje dia nsambisha l’ohetoheto ndo mbetɛ anto ambeki. (Mat. 28:19, 20; Etsha 10:42) Nyɛsɔ tosale la wolo nto dia nama kaamɛ kaso nɛ dia ngasɔ mbayotosala akambo wɔtɔnɛ la dɔmbɛlɔ dia Yeso dia sho ntombola lokombo la Jehowa ndo nkondja ɔngɛnɔngɛnɔ wa pondjo.