Onde wɛ ekɔ l’atei w’anto walangema oma le Nzambi?
“One leli la elembe ami, ndu latêkitanyiyaka, ndi kananga. Untu lananga, ayulangema le Papa. Dimi layûlanga, layuyaenya le ndi.”—JOANI 14:21.
1, 2. (a) Ngande wɛnya Jehowa ngandji kande otsha le anto? (b) Kakɔna kakasale Yeso l’otsho wa Ngɔndɔ ka Nisana 14, 33 T.D.?
JEHOWA nangaka anto wakandatonge. Eelo, nde nangaka anto wa l’andja ɔnɛ “utamanya, mbakandawasha On’andi etoi lakanduti, dia untu tshe lawetawo, tavokaki, keli ayali la lumu la pundju.” (Joani 3:16) Oko wayasukana nshi ya Eohwelo ka nyɔi ka Kristo, Akristo wa mɛtɛ pombaka ndeka mbeya dia Jehowa “akatulangi. Ndi akatumi On’andi dia ndjala ulambu ne dia kolo yasu.”—1 Joani 4:10.
2 L’otsho wa Ngɔndɔ ka Nisana 14, 33 T.D., Yeso nde l’apɔstɔlɔ ande 12 wakatshumana lo luudu lɔmɔtshi la la diko la Jerusalɛma dia sala dambo dia Pasaka diakawohɔka otshungwelo w’ase Isariyɛlɛ oma l’Edjibito. (Mateu 26:17-20) L’ɔkɔngɔ wa vɔ sala dambo sɔ di’ase Juda, Yeso akatondja Judasɛ Isakariyɔtɛ ndo akahɔhɔla dambo dia dikɔlɔ diakahombe ndjohɔmaka. Dambo sɔ mbakayokomaka Eohwelo ka nyɔi ka Kristo le Akristo.a Lo kamba la mapa waha la wodoya ndo la wanu wa bêla oko tolembetelo, kana didjidji dia demba la dikila diande, Yeso akasale dambo sɔ di’osanga kamɛ l’apɔstɔlɔ ande 11 wakatshikala. Akambo wendana la woho wakandasale dambo sɔ kɔndwama oma le afundji w’Evanjiliɔ: Mateo, Makɔ, la Luka mbidja ndo ɔpɔstɔlɔ Paulo lakadielɛ ɔnɛ ‘dambo dia dikɔlɔ dia Nkumadiɔndjɔ.’—1 Koreto 11:20; Mateu 26:26-28; Mako 14:22-25; Luka 22:19, 20.
3. Lo toho takɔna t’ohomba totshikitanyi ɔkɔndɔ waki Joani wendana la wenya w’ekomelo waketsha Yeso nde l’ambeki lo luudu la diko la ɛkɔndɔ ekina na?
3 Ɔpɔstɔlɔ Joani kɔtɛkɛta dia wetshetshelo wa mapa la vinyɔ, ondo nɛ dia l’etena kakandafunde Evanjiliɔ ande (oya l’ɔnɔnyi 98 T.D.), ko mbekelo kɛsɔ kambotashilaka monga l’atei w’Akristo wa ntondo. (1 Koreto 11:23-26) Koko, oma lo wolo wa nyuma k’ekila, Joani ndamɛ oto mbatewoya awui amɔtshi w’ohomba wendana la kɛnɛ kakate Yeso ndo kakandasale yema tshitshɛ la ntondo ndo l’ɔkɔngɔ wa Nde pɔhɔla Eohwelo ka nyɔi Kande. Totshapita ndekana totanu t’Evanjiliɔ waki Joani ndola l’awui asɔ wa diambo efula. Awui akɔ mɛnyaka lo yoho yokɛma hwe, weho w’anto wokama ngandji oma le Nzambi. Nyɛsɔ tɔsɛdingole Joani tshapita 13 polo 17.
Tokondja wetshelo oma l’ɛnyɛlɔ ka ngandji kaki Yeso
4. (a) Ngande wakake Joani epole ɔsɛkɛ lo dikambo diakaleke ohomba dia lo losanganya lakɔtɔ Yeso nde l’ambeki ande lam’akandahɔhɔla Eohwelo? (b) Naa ɔkɔkɔ ɔmɔtshi w’ohomba wele Jehowa la ngandji otsha le Yeso?
4 Ngandji mbele dui dioleki tɛkɛtama lo totshapita tɔnɛ tele l’alako wakasha Yeso ambeki ande. Ɔnkɔnɛ, tshɛkɛta “ngandji” tanemaka lo totshapita tɔsɔ mbala 31 lo toho totshikitanyi. Ngandji k’efula kaki la Yeso otsha le Jehowa, She ndo otsha le ambeki ande ndeka mɛnama lo totshapita tɔsɔ oleki l’ahole akina tshɛ. Ngandji kaki Yeso otsha le Jehowa koka mɛnama l’ɛkɔndɔ wa l’Evanjiliɔ tshɛ wendana la lɔsɛnɔ lande, koko paka l’ɔkɔndɔ waki Joani oto mbakatɛkɛta Yeso hwe ate: “Dimi latulangaka Papa.” (Joani 14:31) Yeso akate nto ɔnɛ Jehowa mbolangaka ndo akalembetshiya bonde kolangande. Nde akate ate: “Dimi lambunyulanga uku akanangi Papa. Nyuyali lu ngandji kami. Naka nyu nyambukitanyia elembe ami, nyu nyayuyala lu ngandji kami, uku akamakitanyia elembe a Papa, wemi lu ngandji kandi.” (Joani 15:9, 10) Eelo, Jehowa nangaka Ɔnande l’ɔtɛ w’okitanyiya ande wa l’otema ɔtɔi. Ɔsɔ ekɔ mɛtɛ wetshelo w’oshika le ambeki tshɛ waki Yeso Kristo!
5. Ngande wakɛnya Yeso ngandji kande otsha le ambeki ande?
5 Ngandji k’efula kaki la Yeso otsha le ambeki ande mɛnyama hwe oma k’etatelo k’ɔkɔndɔ waki Joani wendana la losanganya l’ekomelo lakasale Yeso nde l’apɔstɔlɔ ande. Joani akakɔndɔla ate: “La ntundu ka dambu [dia pasaka], Jesu akeyi ati: Etena kami kambukuka ka dimi mumo uma la kete nye utsha le Papa, uku akandalangi antu andi la kete, osoku mbakandâlangi edja ndu l’ekumelu.” (Joani 13:1) La dikɔlɔ sɔ diahohamamɛki, nde akasha ambeki ande wetshelo wahawakokaki mbohɛ lo kambɛ anto akina la ngandji tshɛ. Nde akasole ekolo awɔ. Ɔsɔ aki dikambo diakahombe ɔmɔmɔ wa l’atei awɔ salɛ Yeso ndo anangɛwɔ, koko vɔ kodisala. Yeso akatshe lotumu lɔsɔ l’ɛnya ndjakitshakitsha ndo l’ɔkɔngɔ nde akatɛ ambeki ande ate: “Ku naka dimi Khumadiondjo la Umbetsha lakanyotshisha ekulu, ndu nyu nyambuhumba mbotshanya ekulu. Ne dia dimi lambunyusha djimbitelu ya ndu nyu ntsha, uku unyutshedimi.” (Joani 13:14, 15) Akristo wa mɛtɛ pombaka mbetawɔ ndo ngɛnangɛna dia kambɛ anangɛwɔ.—Mateu 20:26, 27; nɔtɛ ka l’ɛse ka dikatshi; Joani 13:17.
Tokitanyiya ɔlɛmbɛ w’oyoyo
6, 7. (a) Naka dikambo dimɔtshi di’ohomba diatɛkɛta Joani lo kɛnɛ kendana la Eohwelo? (b) Naa didjango di’oyoyo diakasha Yeso ambeki ande, ndo kakɔna kaki oyoyo lo didjango diakɔ?
6 Paka ɔkɔndɔ waki Joani wendana la kɛnɛ kakatombe lo luudu la la diko l’otsho wa Ngɔndɔ ka Nisana 14 oto mbatɛkɛta shikaa woho wakawatondja Judasɛ Isakariyɔtɛ. (Joani 13:21-30) Ɛkɔndɔ wa l’Evanjiliɔ mɛnyaka dia paka l’ɔkɔngɔ wa nde tondja ofungi ɔsɔ mbakahɔhɔla Yeso Eohwelo ka nyɔi Kande. Oma lâsɔ, nde akatɛkɛta nde l’ambeki ande wa kɔlamelo l’etena k’otale efula dia mbasha alako la wetshelo wa ndjihelo. Lam’ayalɔngɔsɔlaso dia sala Eohwelo, sho pombaka nyomoleka ndjasha efula lo kɛnɛ kakate Yeso lo diaaso sɔ, ndo djekoleko lam’ele sho nangaka monga l’atei w’anto walangema oma le Nzambi.
7 Wetshelo wa ntondo wakasha Yeso ambeki ande l’ɔkɔngɔ wa nde pɔhɔla Eohwelo ka nyɔi kande aki dikambo dimɔtshi di’oyoyo. Nde akate ate: “Olembe w’uyuyu mbamumunyusha, dia nyu mbukana ngandji. Nyukani ngandji uku akamanyuki ngandji. Uma lu dikambu ne, antu tshe wayeya vati: Ambeki ami mbenyu, naka nyu nyayukana ngandji.” (Joani 13:34, 35) Kakɔna kaki oyoyo lo kɛnɛ kendana l’ɔlɛmbɛ ɔsɔ na? Yema tshitshɛ l’ɔkɔngɔ wa dikɔlɔ sɔ, Yeso akahonola dikambo sɔ lo mbuta ate: “One eli olembe ami: Nyukani ngandji, uku akamanyuki ngandji. Nduku untu la ngandji kuleki kene ka mvwela engenyi andi.” (Joani 15:12, 13) Ɛlɛmbɛ wa Mɔsɛ wakalɔmbaka ase Isariyɛlɛ dia ‘nanga anyawɔ oko wayalangawɔ vamɛ.’ (Akambu w’Asi Lewi 19:18) Koko ɔlɛmbɛ waki Yeso kopembetɛ lâsɔ. Akristo pombaka mbokana ngandji oko wakawaoke Kristo ngandji, mbut’ate monga suke dia nambola nsɛnɔ yawɔ dikambo di’anangɛwɔ.
8. (a) Kakɔna kalembetshiya ngandji ka ndjahombia? (b) Ngande wɛnya Ɛmɛnyi wa Jehowa ngandji ka ndjahombia ɛlɔ kɛnɛ?
8 Nshi ya Eohwelo ekɔ nshi yasungana sho ndjasɛdingola shamɛ, l’onto ndo l’onto ndo oko etshumanelo, dia menda kana tekɔ la djembetelo shɔ ya Lokristo la mɛtɛ, mbut’ate woho wa ngandji kaki la Kristo. Woho wa ngandji ka ndjahombia ka ngasɔ koka nembetshiya, ndo kakalembetshiya tena dimɔtshi di’Okristo akakokaka mbidja lɔsɛnɔ lande lo wâle lo dihole dia nde funga anango. Ɔnkɔnɛ, diɔ nembetshiyaka mbala efula dia sho pombaka mbetsha wahɔ aso l’ɔkɔngɔ dia kimanyiya ndo kambɛ anangɛso l’anto akina. Ɔpɔstɔlɔ Paulo aki ɛnyɛlɔ ka dimɛna efula lo dikambo sɔ. (2 Koreto 12:15; Filipi 2:17) Ɛmɛnyi wa Jehowa mbeyamaka l’andja w’otondo oma lo yimba yawɔ ya ndjahombia, lo kimanyiya anangɛwɔ l’asukanyi awɔ ndo lo ndjakimɔ dia mbewoya anyawɔ anto akambo wa mɛtɛ wa lo Bible.b—Ngalatiya 6:10.
Waɔtɔnganelo wahombaso mbɔsa la nɛmɔ
9. Kakɔna kahombaso sala l’ɔngɛnɔngɛnɔ tshɛ dia nama diɔtɔnganelo di’oshinga wolo diele lam’asaso la Nzambi ndo l’Ɔnande?
9 Ndoko kɛnɛ koleki nɛmɔ le so oko nangema oma le Jehowa ndo oma le Ɔnande, Yeso Kristo. Koko, dia sho mbokama ngandji kɛsɔ, sho pombaka sala dikambo dimɔtshi. L’otsho wa komelo wakandetsha nde l’ambeki ande, Yeso akate ate: “One leli la elembe ami, ndu latêkitanyiyaka, ndi kananga. Untu lananga, ayulangema le Papa. Dimi layûlanga, layuyaenya le ndi.” (Joani 14:21) Lam’ele sho mbɔsaka diɔtɔnganelo diasaso la Nzambi ndo diasaso l’Ɔnande la nɛmɔ di’efula, sho kitanyiyaka ɛlɛmbɛ awɔ l’ɔngɛnɔngɛnɔ tshɛ. Kɛsɔ mendanaka ndo l’ɔlɛmbɛ w’oyoyo wa monga la ngandji ka ndjahombia ndo la didjango diakasha Kristo l’ɔkɔngɔ w’eolwelo kande ɔnɛ: “nyusambisha antu,” ndo nyosale la wolo di’anto tshɛ wetawɔ lokumu l’ɔlɔlɔ ‘mbetɛma ambeki.’—Etsha 10:42; Mateu 28:19, 20.
10. Naa waɔtɔnganelo w’oshinga wolo wamonga l’akitami w’esɔ vɔ la “ekoko ekina”?
10 L’ɔkɔngɔ wa l’otsho ɔsɔ, lam’akandakadimolaka wombola wakawoke Judasɛ y’ɔpɔstɔlɔ ande wa kɔlamelo (lakawelɛka nto ɔnɛ Tadayo), Yeso akate ate: “Lam’ayunanga untu, ndi ayukitanyia diui diami. Papa ayuwulanga, shu tayuya le ndi, tayudjase la ndi.” (Joani 14:22, 23) Kânga l’etena kekewɔ lanɛ la nkɛtɛ, Akristo w’akitami wanɛ wakalongola leeta la ntolɛ kâmɛ la Kristo l’olongo wekɔ la diɔtɔnganelo dia lânde vɔ la Jehowa ndo vɔ l’Ɔnande. (Joani 15:15; 16:27; 17:22; Heberu 3:1; 1 Joani 3:2, 24) Koko “ekoko ekina,” wa anyawɔ wele l’elongamelo ka sɛna pondjo pondjo lanɛ la nkɛtɛ, wekɔ vɔ lawɔ la diɔtɔnganelo di’oshinga wolo vɔ la Yeso Kristo lele “ulami [awɔ] otoi” ndo la Jehowa Nzambi kawɔ diɛsɛ oma l’okitanyiya awɔ.—Joani 10:16; Osambu 15:1-5; 25:14.
“Nyu nyaha wa la kete”
11. Naa ɔhɛmwɛlɔ w’oshika wakasha Yeso ambeki ande?
11 Lo losanganya l’ekomelo lakandɔtɔ l’ambeki ande wa kɔlamelo la ntondo ka nyɔi kande, Yeso akawasha ɔhɛmwɛlɔ w’oshika ate: Naka onto ambôkama ngandji oma le Nzambi, kete nde ayohetshama oma le andja ɔnɛ. Nde akate ate: “Naka wa la kete wambunyuhetsha, nyu mbeyaka nyati: Wakampetsha ntundu watanyuhetsha. Utunyuyala wa la kete, tshiki wa la kete wutulanga asikawo. Ne dia nyu nyaha wa la kete, keli dimi lakanyosonola uma le wa la kete, diako mbanyuhetsha wa la kete. Nyuho diui diakamanyutela nti: Ukambi haleki uwandji andi. Naka vo wakansuya, wayunyusuya ndu nyu. Naka wakakitanyia diui diami, wayukitanyia ndu diui dianyu.”—Joani 15:18-20.
12. (a) Bonde kakahɛmɔla Yeso ambeki ande ɔnɛ as’andja ɔnɛ wayowahetsha? (b) Kakɔna kayonga ɔlɔlɔ le so tshɛ dia ndjasɛdingola l’etena kɛnɛ kayasukana Eohwelo na?
12 Yeso akasha ɔhɛmwɛlɔ ɔsɔ di’aha apɔstɔlɔ 11 asɔ ndo Akristo tshɛ wa mɛtɛ wayoyonga la lɔsɛnɔ l’ɔkɔngɔ awɔ kɔmɔ etema ndo mpekɔ l’ɔtɛ wa lohetsho l’oma le ase andja ɔnɛ. Nde akate nto ate: “Dimi lambunyutela akambu aso, ne dia nyu nyatukutakanyema. Vo wayunyutundja uma lu temwelo. Ee, etena kayuyala, lam’ayukana untu layunyudiaka ati: Dimi lambutshela [Nzambi] ulimu. Vo wayutsha akambu aso, ne dia vo haweyi Papa, hawumbeyi.” (Joani 16:1-3) Ombewi ɔmɔtshi wa Bible mɛnyaka dia woho wa vɛrbɛ yokadimwami lanɛ ɔnɛ “takanyema” nembetshiyaka “konya onto lo shisha mbetawɔ kande ndo mboka ɔnɛ lahombande mbɛkɛ otema kana kitanyiya awui ande ɔkɔngɔ; mbut’ate kɔsha onto.” Oko wayasukana etena ka Eohwelo, sho tshɛ pombaka kana yimba la yoho ya lɔsɛnɔ yaki l’anto wa kɔlamelo wa lo nshi yakete ndo wa nshi nyɛ, ndo mbokoya ɛnyɛlɔ kawɔ ka tshikala nge l’atei w’ehemba. Tetawɔke dia ɛlɔshamelo kana asui kokonya dia wɛ mboka Jehowa nde la Yeso ɔkɔngɔ, koko yashikikɛ dia mbɛkɛ otema ayɛ le wɔ ndo mbakitanyiya.
13. Kakɔna kakalɔmbɛ Yeso lo dikambo di’ambeki ande lo dɔmbɛlɔ diande otsha le She na?
13 Lo dɔmbɛlɔ diande dia ndjihelo la ntondo ka vɔ mimɔ oma lo luudu la la diko la Jerusalɛma, Yeso akatɛ She ate: “Dimi lakawatela diui diaye. Wa la kete wakâhetsha, ne dia vo kema wa la kete, uku wemi kema la la kete. Dimi halombe nti: Uwanya la kete, keli lambukolomba nti: Uwashimbeli uma lu kolo. Vo kema wa la kete, uku wemi kema la la kete.” (Joani 17:14-16) Sho koka monga l’eshikikelo dia Jehowa ekɔ lo nama anto wokande ngandji, ndo nde mbakeketshaka etena katetemalawɔ la ndjakakitola l’andja ɔnɛ.—Isaya 40:29-31.
Toyange dia nangemaka oma le Shɛso ndo oma le Ɔnande
14, 15. (a) Yeso akayaɛdika la na, otshikitanyi ‘l’okodi wa kɔlɔ wa vinyɔ’? (b) Waa na wele “tahi” y’‘ɔkɔdi wa vinyɔ wa mɛtɛ’?
14 Lam’akandasawolaka la lɔngɛnyi tshɛ nde l’ambeki ande wa kɔlamelo l’otsho wa Ngɔndɔ ka Nisana 14, Yeso akayaɛdika l’‘ɔkɔdi wa vinyɔ wa mɛtɛ’ otshikitanyi ‘l’ɔkɔdi wa kɔlɔ wa vinyɔ’ wakalembetshiyaka ase Isariyɛlɛ waha la kɔlamelo. Nde akate ate: “Dimi utundu w’okodi mete. Papa eli ukambi.” (Joani 15:1) Ɛnɔnyi nkama la ntondo, omvutshi Jeremiya akatɛ atɔmbɔki wa lo nshi yande ɛtɛkɛta ɛsɔ waki Jehowa ɔnɛ: “Dimi lakanyune wuhu wuleki ololo, . . . Ukundi ambunyukadimo dia ndjala tahi y’anyanya.” (Jeremiya 2:21) Ndo omvutshi Hɔshea akafunde ate: “Isariyele eli uku okodi wa vinyo watotokaka elua efula. Uku aki efula k’elua awo. . . . Etema awo wambuyala lu beke pendi.”—Hosea 10:1, 2.
15 Lo dihole dia tɔ elua w’ɔtɛmwɛlɔ wa mɛtɛ, Isariyɛlɛ akayoyatambiyaka l’apɔstazi ndo akayatwɛla elowa awɔ vamɛ. Nshi shato la ntondo ka losanganya lande l’ekomelo nde l’ambeki ande wa kɔlamelo, Yeso akatɛ ɛlɔmbɛdi wa dungi pende w’ase Juda ate: “Okone dimi lambunyutela nti: Wayunyokosola diulelu dia [Nzambi], ku wayudisha wudja watotokaka elua adio.” (Mateu 21:43) Wodja w’oyoyo ɔsɔ ele “Isariyele [waki Nzambi],” wokengami l’anto 144 000 w’Akristo w’akitami w’esɔ wanɛ wambɛdikama la “tahi” y’“ɔkɔdi wa vinyɔ wa mɛtɛ,’ mbut’ate Kristo Yeso.—Ngalatiya 6:16; Joani 15:5; Enyelo 14:1, 3.
16. Kakɔna kakakeketsha Yeso apɔstɔlɔ 11 dia sala, ndo kakɔna kakoka mbutama lo kɛnɛ kendana l’atshikadi wa kɔlamelo l’etena kɛnɛ k’ekomelo?
16 Yeso akatɛ apɔstɔlɔ 11 waki lande lo luudu la la diko ate: “Lutahi lami tshe lahato elua, ndi ayulunya. Lutahi tshe latotokaka elua, ndi ayulolongosola dia lo ndeka nto elua efula. Nyuyali l’utema ami, dimi ndjali l’etema anyu. Uku aheyi lutahi nto elua lame, tshikima lo [“kakatana,”NW] l’okodi, osoku ndu nyu hanyeyi nto elua, tshikima nyu [“kakatana,”NW] ami.” (Joani 15:2, 4) Ɔkɔndɔ w’ekambi wa Jehowa wa nshi nyɛ mɛnyaka di’atshikadi wa kɔlamelo wa l’atei w’Akristo w’akitami w’esɔ wakakatana kâmɛ vɔ la Owandji awɔ, Yeso Kristo. (Efeso 5:23) Vɔ waketawɔ dia koma pudipudi ndo mbɛdiama. (Malaki 3:2, 3) Tatɛ oma l’ɔnɔnyi wa 1919, vɔ wakatɔ elowa efula wa Diolelo, ntondotondo Akristo w’akitami w’esɔ ndo, tatɛ oma l’ɔnɔnyi 1935, ‘lemba la woke,’ l’anyawɔ latatetemala la fula tsho.—Enyelo 7:9; Isaya 60:4, 8-11.
17, 18. (a) Naa ɛtɛkɛta waki Yeso wakimanyiya akitami w’esɔ ndo ɛkɔkɔ ekina dia mbokamaka ngandji oma le Jehowa? (b) Ngande wayotokimanyiya Eohwelo dia keketsha yɛdikɔ yaso ya mbokamaka ngandji oma le Jehowa?
17 Ɛtɛkɛta ɛnɛ ekina waki Yeso mendanaka l’Akristo tshɛ w’akitami w’esɔ ndo anyawɔ, nde akate ate: “Papa ayutumbwama, dia nyu nto elua efula. Okone nyu nyayuyala ambeki ami. Dimi lambunyulanga uku akanangi Papa. Nyuyali lu ngandji kami. Naka nyu nyambukitanyia elembe ami, nyu nyayuyala lu ngandji kami, uku akamakitanyia elembe a Papa, wemi lu ngandji kandi.”—Joani 15:8-10.
18 Sho tshɛ nangaka nangemaka oma le Nzambi, ndo dui sɔ totshutshuyaka dia monga Akristo watɔ elowa. Sho salaka dikambo sɔ lo kamba l’oseka diaaso tshɛ diakondjaso dia sambisha “lukumu l’ololo lone la diulelu.” (Mateu 24:14) Sho salaka nto tshɛ dia kɛnɛmɔla “elua wa nyuma” lo nsɛnɔ yaso hita. (Ngalatiya 5:22, 23) Mbɔtɔ lo Eohwelo ka nyɔi ka Kristo ayotokeketsha lo yɛdikɔ yakatɔshi dia sala dikambo sɔ, nɛ dia diaaso sɔ diayotohola ngandji ka Nzambi ndo ka Kristo oya le so.—2 Koreto 5:14, 15.
19. Naa dikambo di’ekimanyielo kekina diayotɔsɛdingola lo sawo diayela?
19 L’ɔkɔngɔ wa nde pɔhɔla Eohwelo, Yeso akalake dia She ayotomɛ ambeki ande wa kɔlamelo “ukimanyidi, nyuma k’[ekila].” (Joani 14:26) Lo sawo diayela, tayɔsɛdingola woho wakimanyiya nyuma kɛsɔ akitami w’esɔ ndo ɛkɔkɔ ekina dia vɔ mbokamaka ngandji oma le Jehowa.
[Nɔtɛ ya l’ɛse ka dikatshi]
a L’ɔnɔnyi wa 2002, lo ndjela alamanaka wa Bible, Ngɔndɔ ka Nisana 14 tatɛka lo ɛɔtwɛlɔ ka wonya ka lushi la nɛi, Ngɔndɔ ka Sato 28. La dikɔlɔ sɔ, Ɛmɛnyi wa Jehowa wa l’andja w’otondo wayotshumana dia mbohɔ nyɔi ka Nkumadiɔndjɔ, Yeso Kristo.
b Enda lo tshapita 19 ndo 32 ya dibuku Les Témoins de Jéhovah: Prédicateurs du Royaume de Dieu, diakatondja Ɛmɛnyi wa Jehowa.
Wembola w’ovuswelo
• Naa wetshelo w’ohomba wakasha Yeso ambeki ande lo kɛnɛ kendana l’olimu wa la ngandji?
• Lo na ele nshi ya Eohwelo etena kasungana onto l’onto ndjasɛdingola?
• Bonde kahatahombe takana lo dikambo di’ɔhɛmwɛlɔ waki Yeso wendana la lohetsho ndo l’ɛlɔshamelo k’oma le andja ɔnɛ?
• Ele ‘ɔkɔdi wa vinyɔ wa mɛtɛ’? Waa na wele “tahi,” ndo alongamɛwɔ oma le wɔ?
[Osato wa lo lɛkɛ 23]
Yeso akasha apɔstɔlɔ ande wetshelo wahawohɛki lo kɛnɛ kendana la kambɛ anto akina la ngandji tshɛ
[Esato wa lo lɛkɛ 24]
Ambeki wa Kristo kitanyiyaka ɔlɛmbɛ ande wendana la monga la ngandji ka ndjahombia