ASAWO WƆTƆNƐ L’ƆTƐ A DUI WA LO LOHOSO | ONDE WƐ NANGAKA MBEKA BIBLE?

Ekongelo ka wekelo wa Bible dikambo di’anto tshɛ

Ɛmɛnyi wa Jehowa mbeyamaka dimɛna oma l’esambishelo kawɔ ka lo sɛkɛ. Ko, onde wɛ mbeyaka dia tekɔ l’ekongelo ka wekelo wa Bible kasalema l’andja w’otondo?

Ɔmɛnyi wa Jehowa ekɔ lo mbetsha pami kengo Bible lo dihole diande di’olimu

Lo 2014, Ɛmɛnyi wa Jehowa ndekana 8 000 000 lo wedja 240 wakekaka Bible l’anto suke la 9 500 000 ngɔndɔ tshɛ.a Lofulo l’anto weka la so Bible ndeka lofulo l’anto la lo wedja oko 140!

Dia nkamba olimu wa mbetsha anto ɔsɔ, Ɛmɛnyi wa Jehowa wekɔ lo ntondja Bible suke la miliyara ɔtɔi l’etenyi, abuku, periodikɛ ndo dihomɔ dikina dia mbeka Bible ɔnɔnyi tshɛ l’ɛtɛkɛta oko 700! Welo wa laande wadjama dia ntondja ekanda ɛsɔ, kimanyiyaka anto dia mbeka Bible l’ɛtɛkɛta walangawɔ.

“Dimi konangaka mbeka lo kalasa, koko wekelo ɔnɛ wakangɛnyangɛnya. Ndo awui wakameke wakakeketsha efula!”—Katlego, Afrique du Sud.

“Diɛsɛ la wekelo ɔnɛ, lakakondja ekadimwelo lo ambola ami tshɛ ndo akina efula.”—Bertha, Mexique.

“Wekelo wa Bible wakasalemaka lakami l’etena kaki dimɛna le mi. Ɔsɔ mbaki dui diakamalekaka nanga!”—Eziquiel, Brésil.

“Lo tena dimɔtshi, wekelo wakasalemaka minitɛ 15 kana 30 ndo lo tena dikina takalekanyaka lo ndjela diaaso diaki lami.”—Viniana, Australie.

“Wekelo wakasalemaka ofele, ɔsɔ aki dui dia diambo efula!”—Aimé, Bénin.

“Ombetsha ami wa Bible aki la solo dia lotutsha ndo ɔlɔlɔ. Takayonga la diɔtɔnganelo dia ma ma dimi la nde.”—Karen, Irlande du Nord.

“Anto efula mbekaka Bible aha la nkoma Ɛmɛnyi wa Jehowa.”—Denton, Angleterre.

EKADIMWELO LO AMBOLA WALEKA ANTO NDJAOKA DIKAMBO DI’EKONGELO KASO KA MBEKA L’ANTO BIBLE

Ngande wasalema wekelo wa Bible?

Sho sɔnaka kambaka ɛtɛ w’awui wotshikitanyi wa lo Bible ndo sho sɛdingolaka avɛsa wa lo Bible wɔtɔnɛ l’ɛtɛ akɔ. Ɛnyɛlɔ, Bible mbishaka ekadimwelo wa ambola anɛ: Ele Nzambi? Ngande wende? Onde nde ekɔ la lokombo? Lende ele Nzambi? Onde sho koka ndjasukanya la nde? Okakatanu wele l’anto efula ele, mbeya dihole diatanema ekadimwelo lo Bible.

Dia nkimanyiya anto dia ntana ekadimwelo, mbala efula sho kambaka la dibuku Bible etshatɔ mɛtɛ? diele la ndjɛkɛ 224.b Dibuku sɔ diakatondjama, djekoleko dia nkimanyiya anto dia nshihodia wetshelo w’etatelo wa lo Bible. Diɔ diekɔ l’asawo wendana la Nzambi, Yeso Kristo, lande na kasowa anto, eolwelo, dɔmbɛlɔ ndo asawo akina efula.

Wonya ndo dihole diakɔna diakoka wekelo salema?

Wekelo koka salema lo wonya ndo lo dihole dialangayɛ.

Wenya engana wahomba wekelo salema?

Anto efula ndjatshungolɛka etena ka mbeka Bible wonya wa tango ɔtɔi kana ndekana lomingu tshɛ. Koko, yɛdikɔ ya wonya yahomba wekelo salema nemanɛka l’onto l’onto. Sho salaka la wolo dia ndjaɔtɔnganyiya l’ekongelo k’onto. Le amɔtshi, wekelo salemaka minitɛ 10 kana 15 lomingu tshɛ.

Falanga ngana yalɔmbama dia mbeka?

Wekelo ndo dihomɔ dia mbeka diekɔ ofele. Dui sɔ mbɔtɔnɛka la dako diakasha Yeso ambeki ande ɔnɛ: “Nyakalongola olongolalongola, nyotokimɔ okimɔkimɔ.”—Mateo 10:8.

Edja ka ngande kasalema wekelo?

Edja kahomba wekelo mbiviya nemanɛka la yɛ. Dibuku Bible etshatɔ mɛtɛ? diekɔ la totshapita 19. Wɛ koka nsɔna dia mbeka tshapita mɔtshi yalangayɛ kana nyanga dia mbeka totshapita tshɛ.

Onde dimi pombaka nkoma Ɔmɛnyi wa Jehowa?

Keema. Sho nɛmiyaka lotshungɔ lele l’onto tshɛ la nsɔna kɛnɛ kalangande mbetawɔ. Koko, anto wakondja ewo ka wetshelo w’etatelo wa lo Bible, koka nsala ɔsɔnwɛlɔ wa dimɛna.

Lende akokami mbeya awui akina?

Sitɛ k’Ɛtɛrnɛtɛ ka jw.org kekɔ la awui wa mɛtɛ wendana la dietawɔ ndo la elimu w’Ɛmɛnyi wa Jehowa.

Ngande wakokami nɔmba wekelo wa Bible?

Lɔmba l’Ɛtɛrnɛtɛ lo www.jw.org.
Funda lo adrɛsɛ woleki suke wɛnyami lo lɛkɛ la hende la periodikɛ kɛnɛ.
Ɛnana l’Ɛmɛnyi wa Jehowa wele suke la yɛ. Wɛ koka nyanga dihole diofundjiwɔ “Ɛmɛnyi wa Jehowa” lo listɛ la lo ngelo kanyu lele la numɛlɔ ya telefɔnɛ.

a Mbala tshɛ, sho mbekaka Bible l’onto ɔtɔi kana la djui y’anto.

b Diakatondjama oma le Ɛmɛnyi wa Jehowa. Miliyɔ ndekana 230 ya dibuku nɛ yambotondjama l’ɛtɛkɛta ndekana 260.

EKIMANYIELO LE NKUMBO

“Etena kakatatɛ wadɛmi mbeka Bible, lakɛnyi etshikitanu w’amɛna le nde. Lɔsɛnɔ la nkumbo kaso lakalowana. Lam’ele lakalangaka mbeya kɛnɛ kakekaka wadɛmi, lakatatɛ mbeka ndo dimi. Lakakome onto l’ɔlɔlɔ diɛsɛ la kɛnɛ kakameke. Nkumbo kaso kakayonga kaamɛ diɛsɛ la wekelo wa Bible.”—Eziquiel.

“L’ɔkɔngɔ wa dimi ntatɛ mbeka Bible, lakatshike mbekelo yami ya kɔlɔ, lakatshike mbidjɔ wanu ndo lakatatɛ mbahemɛ kɛlɛ kami. Luudu lami lakayotatɛ monga pudipudi, ndo ɛngɔ tshɛ lo dihole diatɔ. Lakayoleka ngɛnangɛna ase nkumbo kami, ndo lakayotatɛ nsala akambo waangɛnyangɛnya. Lekɔ l’ɔngɛnɔngɛnɔ wa mamba.”—Karen.

“Anto amɔtshi wakamɔnyɔla l’ɔtɛ wakamatatɛ mbeka Bible. Koko omɛmi akasukɛ yɛdikɔ yami ndo akambutɛ ate: ‘Hambete la kɛnɛ kata anto kɛsɔ. Woho wamboyotshikitanya dionga diayɛ mboleki ohomba le mi. Tokɔke lokolo lɔnɛ.’ Ndooko lushi lakonge lɔsɛnɔ la nkumbo kaso dimɛna oko woho wayalɔ kakianɛ!”—Viniana.