Ngande wasalema wekelo wa Bible walɔmbɔla Ɛmɛnyi wa Jehowa?
Ɛmɛnyi wa Jehowa nɔmbaka dia mbeka l’onto Bible lo yoho ya dimɛna di’onto akɔ mbeya kɛnɛ ketsha Bible. Ekongelo kaso ka wekelo wa Bible kokaka kokimanyiya dia:
Monga l’ɔngɛnɔngɛnɔ lo lɔsɛnɔ.
Nkoma ɔngɛnyi wa Nzambi
Mbeya kɛnɛ kalaka Bible lo dikambo dia nshi yayaye
Lo sawo nɛ wɛ ayɛna:
Naka lambetawɔ mbeka Bible, onde wayotshutshuya la wolo dia dimi nkoma Ɔmɛnyi wa Jehowa?
Onde dimi kokaka mbelɛ anto akina lo wekelo etena kekawɔ la mi?
Onde nyu mbetawɔka di’onto mbeka Bible ndamɛ aha l’ekimanyielo k’ombetsha?
Ngande wasalema wekelo wa Bible?
Ombetsha ayɛ wa Bible ayokokimanyiya dia wɛ ndjaekesanyiya la Bible, lo ndjela asawo w’ɔkɛtshanyelo. Kamba la etenyi ka Kondja wahɔ oma lo wekelo wa Bible kele lo Ngɛnangɛnaka la lɔsɛnɔ pondjo pondjo! ayokokimanyiya dia wɛ teekaka yema yema kɛnɛ ketsha Bible ndo woho wakokatɔ kokimanyiya. Dia mbeya awui efula, enda vidɛo nyɛ.
Onde paka mfuta falanga dia mbeka?
Ndooko. Ɛmɛnyi wa Jehowa ndjelaka dako dia Yeso diakandasha ambeki ande ɔnɛ: “Nyakalongola olongolalongola, nyotokimɔ okimɔkimɔ.” (Mateo 10:8) Ndo nto, diangɔ dia nkimanyiya lo wekelo diekɔ ofele, diangɔ diakɔ ko Bible ndo dibuku diele l’ɔtɛ a dui ɔnɛ: Ngɛnangɛnaka la lɔsɛnɔ pondjo pondjo!
Edja ka ngande kaviya wekelo?
Dibuku di’ekaso l’anto diekɔ la wekelo 60. Wɛmɛ mbahomba mbɔsa yɛdikɔ ya woho wahombayɛ mbekaka, koko ambeki efula nangaka mbeka kaanga wekelo ɔtɔi lo lomingu.
Ngande wakokami ntatɛ la wekelo?
1. Lodia fɔrmilɛrɛ ka l’Ɛtɛrnɛtɛ. Tayokamba l’awui wendana la yɛ hita paka dia ndodia dɛmandɛ diayɛ dialɔmbayɛ Ɔmɛnyi wa Jehowa ɔmɔtshi dia mbekaka la yɛ Bible.
2. Ombetsha ɔmɔtshi ayokana la yɛ. Ombetsha ayɛ ayokolembetshiya woho wa nkondja wahɔ oma lo wekelo wa Bible ndo nde ayokadimola lo dimbola tshɛ diayoyonga la diɔ.
3. Nyayokana wɛ la ombetsha ayɛ. Wekelo kokaka salema l’okoko l’okoko kana lo telefɔnɛ, apɛlɛ vidɛo, lo mikanda kana lo e-mail. Wekelo mbiviyaka wonya a ntango, koko vɔ kokaka susama kana mbiviya edja lo ndjela ekongelo kayɛ.
Onde dimi pombaka tokohemba wekelo wa ntondo?
Eelo. Dia nsala dui sɔ, lodia fɔrmilɛrɛ ka l’Ɛtɛrnɛtɛ. Etena kakelɛ ombetsha ɔmɔtshi, tɛnde dia wɛ nangaka tokohemba mbeka dia menda kana wɛ ayɔngɛnangɛna wekelo. Dia kokimanyiya dia wɛ mɛna kana wɛ ayɔngangɛna la wekelo, nyayotokotatɛ la mbeka lo biukubuku Ngɛnangɛnaka la lɔsɛnɔ pondjo pondjo! yele la wekelo esato wa mbɔtwɛlɔ.
Naka lambetawɔ mbeka Bible, onde wayotshutshuya la wolo dia dimi nkoma Ɔmɛnyi wa Jehowa?
Ndooko. Ɛmɛnyi wa Jehowa nangaka mbetsha anto awui wa lo Bible, sho hatotshutshuya onto la wolo dia mbɔtɔ l’ɔtɛmwɛlɔ aso. Koko, la dilɛmiɛlɔ tshɛ sho mɛnyaka kɛnɛ ketsha Bible, sho mbeyaka di’onto tshɛ ekɔ la lotshungɔ la nsɔna dietawɔ diande.—1 Petero 3:15.
Onde dimi koka nkamba la Bible kami?
Eelo, wɛ mbeyaka nkamba l’ekadimwelo ka Bible kakombolayɛ. Kaanga mbele Ɛmɛnyi wa Jehowa nangaka nkamba la Bible—Ekadimwelo k’andja w’oyoyo nɛ dia tɔ kambaka la tɔtɛkɛta t’eshika ta mɛtɛ ndo tele bu wolo nshihodia. Sho shihodiaka di’anto efula kombolaka nkamba la ekadimwelo kambowoleka mbekesanɛ la tɔ.
Onde dimi kokaka mbelɛ anto akina lo wekelo etena kekawɔ la mi?
Eelo. Wɛ mbeyaka mbelɛ ase nkumbo kayɛ kana angɛnyi ayɛ.
Kakɔna kayomosalaka naka lakekaka Bible l’Ɛmɛnyi wa Jehowa lo nshi y’edjedja? Onde dimi koka nyomokalolɛ wekelo?
Eelo. Wɛ ayoleka ngɛnangɛna efula yoho yaso y’oyoyo ya mbeka l’anto, nɛ dia yɔ mendanaka efula la kɛnɛ kele anto l’ohomba l’etena kɛnɛ. Tamboleka nkamba la diangɔ diɛnama ndo woho wakokayɛ ndeka nkondja wahɔ oleki woho wakatekaka ntondo.
Onde nyu mbetawɔka di’onto mbeka Bible ndamɛ aha l’ekimanyielo k’ombetsha?
Eelo. Kaanga mbele ambeki efula mbekaka aha l’okakatanu l’ekimanyielo k’ombetsha, amɔtshi kombolaka ntatɛ mbeka vɔamɛ. Etenyi kaso ka “Dihomɔ diaso dia wekelo wa Bible” diekɔ la dihomɔ di’ofele diayokokimanyiya lo wekelo ayɛ wa Bible. Dimɔtshi nɛ diayokoka kokimanyiya:
Tovidɛo ta lo Bible. Tovidɛo ta tomondo ta lo wekelo tɔsɔ nembetshiyaka wetshelo w’ohomba wa lo Bible.
Ekadimwelo lo ambola w’oma lo Bible. Asawo asɔ mbishaka ekadimwelo lo ambola efula wendana la Bible.
Enda elembetshielo w’avɛsa amɔtshi wa lo Bible kana ditelo dimɔtshi dieyema dia lo Bible.