ASAWO WƆTƆNƐ L’ƆTƐ A DUI WA LO LOHOSO | WAA NA WELE ƐMƐNYI WA JEHOWA?
Oma lende aya falanga yakambema olimu aso?
Ɔnɔnyi tshɛ, sho tondjaka ndo kahanyaka miliyɔ nkama ya Bible ndo ekanda walembetshiya Bible. Tekɔ lo mbika ndo nɔngɔsɔla waa Bɛtɛlɛ ndo ahole watondjama ekanda aso l’andja w’otondo. Tshumanelo nunu akumi diekɔ lo nsangana lo ahole w’ɔtɛmwɛlɔ waha kawotake, koko wele amɛna welamɛ ɔnɛ Mbalasa ya Diolelo. Onto akɔna afuta elimu ɛsɔ tshɛ?
Olimu aso sukamɛka tshɛ lo tshɛ la weshasha wa la lolango. (2 Kɔrɛtɔ 9:7) Lo 1879, numɛlɔ ka hende ka periodikɛ kɛnɛ kakate ɔnɛ: “Tekɔ la mbetawɔ dia JEHOWA mbasukɛ otombelo wa ‘Tshoto y’Etangelo ya Siɔna.’ [lokombo lakawelɛka periodikɛ kɛnɛ] Ndo edja tshɛ kayodiongaka ngasɔ, yɔ halɔmbaki kana hasɛngasɛngaki anto pondjo dia kondja ekimanyielo.” Sho tatatshikitanya kanyi shɔ.
Weshasha tomamaka mbala kakɔ ɔtɔi lo Bɛtɛlɛ kaso kɛmɔtshi kana lo shɛtɛshɛtɛ ya weshasha yatanema lo Mbalasa ya Diolelo tshɛ. Koko, sho hatɔlɔmbɛ tenyi dia dikumi, hatɔkɔngɔla ɛkɔngɔ ndo hatofutsha mikanda lo elimu aso kana ekanda aso. Hatofutama dia nsambisha, mbetsha lo etshumanelo kana dia nkimanyiya lo wokelo wa ahole w’ɔtɛmwɛlɔ. Laadiko wa laasɔ, Yeso akate ate: “Nyakalongola olongolalongola, nyotokimɔ okimɔkimɔ.” (Mateo 10:8) Wanɛ tshɛ wakamba lo waa Bɛtɛlɛ yaso ndo lo mbalasa kalɔmbɔla olimu aso wa l’andja w’otondo, mbidja ndo wanɛ wakenga Olui-walɔmbɔla w’Ɛmɛnyi wa Jehowa, wekɔ anto wahafutama.
“Lo kɛnɛ kendana l’elimu tshɛ w’Ɛmɛnyi wa Jehowa, weshasha wa nsukɛ ɔtɛmwɛlɔ kimɔmaka la lolango, onto tshɛ ndjashikikɛka l’otema ande lofulo la ‘weshasha’ wendana l’ɔtɛmwɛlɔ layondokimɔ.”—Tuminadi ta l’Erɔpɛ tendana la lotshungɔ lele l’onto, 2011
Sho kambaka nto la weshasha wakimɔma dia nkimanyiya wanɛ wambohomɔ mpokoso. Akristo wa lo ntambe ka ntondo wakikɔ l’ɔngɛnɔngɛnɔ dia nkimanyiya wanɛ waki lo dihombo. (Rɔmɔ 15:26) Woho akɔ waamɛ mbele, sho kimanyiyaka wanɛ wele lo mpokoso lo nyomowakɛ mvudu yawɔ, ahole awɔ w’ɔtɛmwɛlɔ ndo lo mbakimanyiya la diangɔ dia ndɛ, ahɔndɔ ndo ekanga wa sakemɛ.