Ombisha ɔnɔnyi ɔtɔi wa wɔladi ndo w’ɔngɛnɔngɛnɔ

NSHI YAMI YAKETE:

Nkumbo kami wakadjasɛka lo ngielongelo ya Tellancourt lo nɔrdɛ ɛstɛ ka la France. Papa kami aki ose France ndo mama kami ekɔ ose Italie. Etena kakimi l’ɛnɔnyi enanɛi, takonɔ lo ngielongelo ya wola yosukanyi la Rɔmɔ, l’Italie. Lɛkɔ, lɔsɛnɔ laki edika w’edika. Ambutshi ami wakawane wolo lo kɛnɛ kendana la ekondjelo.

Etena kakimi la ɛnɔnyi 15, mama akakeketsha dia dimi ntomba lokombo ko tonga kaamɛ l’angɛnyi. Diakɔ diele lakatatɛ mimɔka la ngelo lo edja ka nshi efula. Kombeta edja lakatonga l’angɛnyi wa kɔlɔ. Lushi lɔmɔtshi lakahomana la pami kɛmɔtshi kakamɔsaka oko ɔngɛnyi, ndo nde akasukana oya le mi. Nde akambisha didjoyadjoya, diakamanɔ nɛ dia lakalange nkoma opalanga. Aha la tshimbatshimba lakatatɛ kotɔma lo lɔsɛnɔ la nɔɔka didjoyadjoya ndo lo lɔsɛnɔ la mindo. Lo waaso efula, wakeyanaka la mi la wolo. Lɔsɛnɔ lakayala anyanya w’anyanya le mi, dimi kɔmbɔsaka dia layotshikala la lɔsɛnɔ kana layovɔ. Lakatshikalaka ompoko. Etena kakimi l’ɛnɔnyi 16, lakayange ndjadiaka oma lo ɔnwɛlɔ wa ɔlɔndɔ wa wiski ndo lakafumbɔ lo oduwa. Etombelo waki la dui sɔ ko, laki lo kɔma l’edja ka nshi shato.

Lakatatɛ ngɛnangɛna la lɔsɛnɔ, koko lakayokomaka ngala ndo okadi. Lakeyanaka l’anto, mbadjoya didjoyadjoya la waakawɔ ndo mbiva diangɔ diawɔ tshɛ dia nɛmɔ. Woho wakamayasha lo elui wa ngala ɛsɔ akakonya dia nsala okanda wa didjoyadjoya l’Italie w’otondo. Mbala efula lakongaka la ekakatanu la apulushi. Lɔsɛnɔ lami lakɛnamaka oko ndooko ohomba ndo aha la ekokelo. Koko, lakalongamɛka dia lakahombe monga l’oyango lo lɔsɛnɔ. Lakalɔmbɛ Nzambi nte, ombisha ɔnɔnyi ɔtɔi wa wɔladi ndo w’ɔngɛnɔngɛnɔ.

WOHO WAKATSHIKITANYA BIBLE LƆSƐNƆ LAMI:

Etena kakimi l’ɛnɔnyi 24, lakɔshi yɛdikɔ ya monɔ la Angleterre. L’ɔtɛ wa olimu ami w’osondjelo wa didjoyadjoya, lɔsɛnɔ lami laki lo waale. Ntondo ka dimi ntshɔ, lakɔshi yɛdikɔ ya tenda mama ndo lakakashimɔ dia mɛna pami kakawelɛka Annunziato Lugarà etsha mama Bible.a Lo mbeya ɔkɔndɔ ande w’awui wa ngala, lakoke wɔma ndo lakawombola woho wamondotshikitana. Nde akambutɛ dia etshikitanu wa wolo wakandasale lo lɔsɛnɔ lande dia ndjokoma Ɔmɛnyi wa Jehowa ndo nde akambutɛ dia dimi tosawola la Ɛmɛnyi wa Jehowa etena kayomokoma l’Angleterre. Laketawɔ dia tosala ngasɔ. Koko, lam’akamakome lɛkɔ, aha la tshimbatshimba lakatatɛ nsɛna yoho ya lɔsɛnɔ laki la mi ntondo.

Lushi lɔmɔtshi, lakahomana la Ɔmɛnyi wa Jehowa ɔmɔtshi ɔnɛ lakambisha Tshoto y’Etangelo ndo Réveillez-vous ! lo shinga mɔtshi ya la Londres yeteta anto efula. Lo mbohɔ kɛnɛ kakamalake Annunziato, lakalɔmbɛ Ɔmɛnyi wa Jehowa ɔsɔ dia dimi mbeka Bible.

Kɛnɛ kakamekaka oma lo Bible akamambiya efula. Ɛnyɛlɔ, lakanandema la ɛtɛkɛta wele lo 1 Joani 1:9, lɛnɛ atɛkɛtama lo dikambo dia Nzambi ɔnɛ: “Naka sho mbishola pɛkato yaso, kete nde ayotodimanyiya ndo ayotɛdia.” Divɛsa sɔ diakayala la shɛngiya y’efula le mi nɛ dia lakayaoke mindo lo menda yoho ya lɔsɛnɔ laki la mi. Aha la ntshimbatshimba lakatatɛ ntshɔ lo nsanganya lo Mbalasa ka Diolelo k’Ɛmɛnyi wa Jehowa. Ɛmɛnyi wa Jehowa wakanongola la wangasanu. Lam’akamɛnyi kaamɛ kele lam’asawɔ, dui diele lakakombolaka edja efula, lakalange monga ɔmɔtshi la l’atei w’etshumanelo kawɔ.

Kaanga mbele dimi komonga l’ekakatanu efula lo ntshika didjoyadjoya ndo ntshika nsɛna lɔsɛnɔ la mindo, lakɛnyi dia aki wolo efula mbɛdia lonto lami. Lakɛnyi ohomba wa nɛnya anto ndo mbaɔsa la nɛmɔ. Lo mɛtɛ, lekɔ lo ntetemala ndɔshana l’awui amɔtshi wa kɔlɔ. Koko l’ekimanyielo ka Jehowa, dimi lakasale ehamelo. L’ɔkɔngɔ wa ngɔndɔ shamalo ya wekelo wa Bible, lakalongola batisimu dia monga Ɔmɛnyi wa Jehowa. Akikɔ lo 1997.

WAHƆ WAMOMOKONDJA:

L’ɔkɔngɔ wa batisimu, lakatshuke osekaseka wa womoto welamɛ Barbara laki ndo nde lawɔ oma la nkoma Ɔmɛnyi wa Jehowa. Etena kakɛnyi ɔngɛnyi ami ɔmɔtshi w’edjedja woho wakamatshikitana, nde akatatɛ mbeka Bible. L’edjedja ka wonya, nde akayokoma Ɔmɛnyi, oma laasɔ kadiyɛnde. Tshɛmi ka womoto laki la ɛnɔnyi 80, akatatɛ mbeka Bible ndo akalongola batisimu la ntondo ka nde mvɔ.

Ɛlɔ, kɛnɛ lekɔ lo nkamba oko ekumanyi lo etshumanelo ka lo ngelo kaso ndo dimi la wadɛmi tekɔ ekambi wa lo tena tshɛ lo nkimanyia dia mbetsha Bible le anto watɛkɛta italien la Londres. Lo tena dimɔtshi, dimi ndjɔkɔmɔka lo menda lɔsɛnɔ laki la mi ntondo, koko Barbara ekɔ osukɔ wa woke efula le mi. L’ekomelo a shimu, lekɔ la lɔsɛnɔ la nkumbo la nge lakamakombolaka ndo lekɔ la Papa ka ngandji ɔnɛ latetemalami mboka ngandji. Lakalɔmbɛ Nzambi ɔnɔnyi ɔtɔi wa wɔladi ndo w’ɔngɛnɔngɛnɔ, koko nde ambombisha efula ka mamba!