ASAWO WƆTƆNƐ L’ƆTƐ A DUI WA LO LOHOSO | WAƐNƐLƆ WAFUDIA EOKELO KENDANA LA ANDJA WAHƐNAMA
Ambola wendana la wanɛ wasɛna lo andja wahɛnama
Onde wɛ atayaokaka ambola lo kɛnɛ kendana la andja wahɛnama ndo wanɛ wasɛna lɛkɔ? Naka ngasɔ, kete aha wɛ oto. Aya ɛnɔnyi nunu wele anto wekɔ lo mbisha tokanyi totshikitanyi lo dikambo sɔ. Anto amɔtshi mbutaka dia andja wahɛnama ekɔ dihole diadjasɛ watshɛso wele sho pombaka mbasha kɛnɛmɔ. Akina mbutaka ɔnɛ ɔsɔ ekɔ dihole di’ɔngɛnɔngɛnɔ diele bu la lofunge dielamɛ ɔnɛ olongo, diololane l’andjelo ndo l’anto w’ɛlɔlɔ wambovɔka. Ndo akina mbutaka dia andja wahɛnama ekɔ dihole diadjasɛ miliyɔ nkama ya tozambizambi.
Anto efula mbutaka dia hatokoke mbeya ndooko dui diendana l’andja wahɛnama nɛ dia ndooko onto lakaye oma lɛkɔ ko ndjototɛ akambo wendana la wɔ. Ekanelo ka ngasɔ bu dimɛna. Yeso Kristo akasɛnɛ l’olongo, lo andja wahɛnama la ntondo ka nde ndjoya la nkɛtɛ. Nde akatɛ ewandji w’ɛtɛmwɛlɔ wa lo ntambe ka ntondo ɔnɛ: “Dimi lakaye oma l’olongo dia ndjosala, aha lolango lami, koko lolango la Ɔnɛ lakantome.” Ɔnkɔnɛ, Yeso akate awui oko onto lakasɛnɛ ntondo l’olongo etena kakandatɛ apɔstɔlɔ ande ate: “Lo luudu la Papa, ahole wa mbidjasɛ wekɔ efula.”—Joani 6:38; 14:2.
She aki Yeso ekɔ Nzambi ɔnɛ lele lokombo lande Jehowa, ndo “luudu” laki Jehowa lekɔ l’olongo. (Osambo 83:18) Ɔnkɔnɛ, ndooko onto lakoka mbuta awui wendana la andja wahɛnama lo yoho ya dimɛna efula ko ndeka Jehowa Nzambi la Yeso Kristo. Vɔ wakɛnya awui efula wendana la andja wahɛnama lo tshimbo ya waɛnɛlɔ wa diambo wakawɛnya akanga wa kɔlamelo.
Sawo diayela diayɔtɛkɛta dia tenyi dia Bible diɛnya kɛnɛ kakɛnyi anto lo waɛnɛlɔ wotshikitanyi. Etena kayangayɛ nsɛdingola waɛnɛlɔ asɔ, ohɔ dia andja wahɛnama ɔsɔ hatokoke mbonanda, ndo vɔ bu la diangɔ diakokaso nkimɛ kana mɛna. Ɔnkɔnɛ, lam’ele tototoshihodia ndooko dui naka Nzambi tolembetshiya andja wahɛnama ɔsɔ lo yoho ya lo nyuma, nde akɛnya lo waɛnɛlɔ, andja wahɛnama lo yoho yakoka tokimanyiya dia sho nshihodia. Waɛnɛlɔ wayokokimanyiya dia wɛ mbeya wanɛ wasɛna lo ‘ahole efula wa mbidjasɛ’ wa lo andja wahɛnama.