Jehowa futaka wanɛ wooyanga l’otema ɔtɔi
“Ɔnɛ layasukanya la Nzambi pombaka mbetawɔ dia nde ekɔ, ndo nde ndjalaka ofutshi wa wanɛ wooyanga l’otema ɔtɔi.”—HƐBƐRU 11:6.
1, 2. a) Diɔtɔnganelo diakɔna diele lam’asa ngandji la mbetawɔ? b) Ambola akɔna wayotɔsɛdingola?
JEHOWA shɛso ndakaka ɔnɛ nde ayɔtshɔkɔla ekambi ande wa kɔlamelo. Ɔsɔ ekɔ yoho mɔtshi yɛnya Jehowa ngandji katokande ndo sho mbookaka ngandji “nɛ dia [nde] akatolange ntondo.” (1 Joani 4:19) Etena katafule ngandji kokaso Jehowa, mbataleke mbetawɔ kaso le nde nkeketala ndo sho ndekaka monga l’eshikikelo ɔnɛ Jehowa ayofuta wanɛ wokande ngandji.—Adia Hɛbɛru 11:6.
2 Jehowa ekɔ ofutshi! Ɔsɔ ekɔ dui dimɔtshi di’ohomba diendana la woho w’onto wende ndo kɛnɛ kasalande. Diakɔ diele, hatokoke monga la mbetawɔ tshɛ lo tshɛ le Nzambi naka sho bu l’eshikikelo ɔnɛ nde ayofuta wanɛ wooyanga l’otema ɔtɔi. Lande na kediɔ ngasɔ? Nɛ dia “mbetawɔ ele okongelo wa la eshikikelo tshɛ wa kɛnɛ kalongamɛ onto.” (Hɛbɛru 11:1) Monga la mbetawɔ kɛdikɛdi monga l’eshikikelo tshɛ lo tshɛ ɔnɛ Nzambi ayɔtshɔkɔla ekambi ande wa kɔlamelo. Ko lande na kele elongamelo ka difuto kekɔ la wahɔ le so? Ngande wakafute Jehowa ekambi ande wa lo nshi y’edjedja ndo wafutande ekambi ande wa nshi nyɛ? Nyɛsɔ tɔsɛdingole dui sɔ.
JEHOWA NDAKAKA DIA NTSHƆKƆLA EKAMBI ANDE
3. Daka diakɔna diele lo Malaki 3:10?
3 Jehowa Nzambi ndakaka dia mfuta ekambi ande wa kɔlamelo. Nde tɔlɔmbaka dia mbosha kɛnɛ koleki ɔlɔlɔ le so ndo monga l’eshikikelo ɔnɛ nde ayotɔtshɔkɔla. Jehowa mbutaka ɔnɛ: “Lam’alanganyu, nyompembe.” Nde kotshaka ɔnɛ: “Dia menda kana dimi hantonyodiholɛ asoko w’olongo ndo nyohongolɛ ɔtshɔkɔ polo ndo ndooko ɛngɔ kahombama.” (Malaki 3:10) Tayɛnya lowando laso l’ɔtɛ wa woshasha ɔsɔ, naka sho mbetawɔ leeta la Jehowa la mbohemba.
4. Lande na kahombaso ndjaɛkɛ lo daka dia Yeso diele lo Mateo 6:33?
4 Yeso akalake ambeki ande ɔnɛ, naka vɔ mbetsha Diolelo lo dihole dia ntondo, kete Nzambi ayowasukɛ. (Adia Mateo 6:33.) Yeso akakoke mbuta ngasɔ, nɛ dia nde akeyaka ɔnɛ alaka waki Nzambi hawetaka paa. (Isaya 55:11) Diakɔ diele, sho la wɔ koka monga l’eshikikelo ɔnɛ naka sho monga la mbetawɔ tshɛ lo tshɛ le Jehowa, nde ayokotsha daka diande diata ɔnɛ: “Dimi hakotshikaki ndo hakokalɛki pondjo.” (Hɛbɛru 13:5) Daka dia Jehowa sɔ tokimanyiyaka dia ndjaɛkɛ l’ɛtɛkɛta wa Yeso wele lo Mateo 6:33.
Yeso akɛnya dia ambeki ande wakahombe futama l’ɔtɛ wa kɛnɛ kakawayahondja (Enda odingɔ 5)
5. Lande na kele okadimwelo wakasha Yeso Petero tokeketshaka sho tshɛ?
5 Lushi lɔmɔtshi, ɔpɔstɔlɔ Petero akambola Yeso ɔnɛ: “Sho takatshike diangɔ diaso tshɛ ndo takakoyele, kakɔna mɛtɛ kayotokondja?” (Mateo 19:27) Yeso kopangwɛ Petero l’ɔtɛ wakandoke dimbola sɔ. Koko, Yeso akatɛ ambeki ande ɔnɛ vɔ wayofutama l’ɔtɛ wa kɛnɛ kakawayahondja. Apɔstɔlɔ ndo anto akina wele la kɔlamelo wayolɛ kaamɛ la Yeso l’olongo lo nshi yayaye. Koko, Yeso akate nto ɔnɛ kaanga l’etena kɛnɛ difuto diekɔ: “Onto tshɛ lakatshike mvudu, kana anango, kana akadiyɛnde, kana she, kana nyango, kana ana, kana dikambɔ lo lokombo lami, ayolongola kɛnɛ kakandatshike ndodia lo 100 ndo ayokita lɔsɛnɔ la pondjo.” (Mateo 19:29) Ɛlɔ kɛnɛ ombeki wa Yeso tshɛ koka ntana ambutshi w’apami, wa wamato, anango, akadiyɛnde ndo ana l’etshumanelo. Lo mɛtɛ, kɛnɛ kayotokondja kɛsɔ ndeka kɛnɛ tshɛ kakatayahondja l’ɔtɛ wa Diolelo nɛmɔ.
“LONGO LA MASUWA LE ANIMA”
6. Lande na kalaka Jehowa dia mfuta ekambi ande?
6 Laadiko dia nkondja ɛtshɔkɔ w’amɛna efula ɛsɔ l’etena kɛnɛ, tekɔ lo nongamɛ ɛtshɔkɔ woleki weke lo nshi yayaye. (1 Timɔte 4:8) Jehowa ndakaka dia mfuta ekambi ande wa kɔlamelo, ndo mbeya dui sɔ tokimanyiyaka dia mbikikɛ tena dia wolo. Lo monga l’eshikikelo tshɛ lo tshɛ ɔnɛ Jehowa “ndjalaka ofutshi wa wanɛ wooyanga l’otema ɔtɔi,” sho koka ntetemala monga la kɔlamelo.—Hɛbɛru 11:6.
7. Ngande wafɔna elongamelo la longo la masuwa?
7 Lo Dako dia lo dikona, Yeso akate ate: “Nyɔngɛnɛngɛnɛ, nyonge l’ɔlɔ w’efula, nɛ dia difuto dianyu diekɔ woke l’olongo, dikambo ngasɔ mbakawahɛnyahɛnya amvutshi waki la ntondo kanyu.” (Mateo 5:12) Ekambi wa Nzambi ɛmɔtshi wayolongola difuto l’olongo. Ndo akina wayolongola difuto dia lɔsɛnɔ la pondjo lo paradiso ka la nkɛtɛ. Ɔsɔ ekɔ nto ɔkɔkɔ wa “ndjɔngɛnangɛna ndo ndjoleka ngɛnangɛna.” (Osambo 37:11; Luka 18:30) Koko le onto tshɛ la l’atei aso, elongamelo koka monga “longo la masuwa le anima kekɔ nge, hasukasuka.” (Hɛbɛru 6:17-20) L’ɛnyɛlɔ ka longo la masuwa lakimanyiya diaha masuwa monga lo waale l’etena ka lɔpɛpɛ la wolo, elongamelo kaso ka wolo koka tokimanyiya dia tshikala nge. Tɔ koka tosha wolo wa mbikikɛ tena dia wolo.
8. Ngande wakitshakitsha elongamelo kaso ekiyanu?
8 Elongamelo kaso koka tokimanyiya dia nkitshakitsha ekiyanu. Oko wele esɔ kakitshakitsha kandji koka mbɔdia lokoho laso, mbele alaka waki Nzambi koka mbɔdia ekiyanu wa l’otema aso. Ekɔ tshondo y’esambelo dia mbeya ɔnɛ Jehowa ayotokokɛ naka sho nkitsha wotsho aso le nde. (Osambo 55:22) Sho koka monga l’eshikikelo tshɛ lo tshɛ ɔnɛ Nzambi koka nsala “akambo efula oleki kɛnɛ tshɛ kalɔmbaso.” (Ɛfɛsɔ 3:20) Jehowa ayotokimanyiya aha tsho efula kana lo yɛdikɔ y’efula, koko “efula oleki”!
9. Ngande wakokaso monga l’eshikikelo ɔnɛ Jehowa ayotɔtshɔkɔla?
9 Dia nkondja difuto, sho pombaka monga la mbetawɔ tshɛ lo tshɛ le Jehowa ndo ndjela ɛlɔmbwɛlɔ katoshande. Mɔsɛ akatɛ wodja w’Isariyɛlɛ ɔnɛ: “Jehowa ayonyɔtshɔkɔla lo wodja wayanga nyosha Jehowa Nzambi kanyu oko etenyi k’okitɔ, koko paka nyu mbokitanyiyisha tshɛ lo tshɛ dui dia Jehowa Nzambi kanyu ndo nyu mboyedi dimɛna dimɛna wadjango anɛ tshɛ wamomonyosha ɛlɔ. Nɛ dia Jehowa Nzambi kanyu ayonyɔtshɔkɔla oko wakandanyolake.” (Eohwelo k’Ɛlɛmbɛ 15:4-6) Onde wɛ ekɔ l’eshikikelo tshɛ lo tshɛ ɔnɛ Jehowa ayokɔtshɔkɔla naka wɛ ntetemala mbokambɛ la kɔlamelo? Wɛ ekɔ la ɛkɔkɔ w’eshika wa monga l’eshikikelo ka ngasɔ.
JEHOWA AKI OFUTSHI AWƆ
10, 11. Ngande wakafute Jehowa Yɔsɛfu?
10 Bible kakafundama lo wahɔ aso. Lɔkɔ, sho tanaka bɛnyɛlɔ efula dia woho wakafute Jehowa ekambi ande wa kɔlamelo wa lo nshi y’edjedja. (Rɔmɔ 15:4) Yɔsɛfu aki ɛnyɛlɔ k’oshika ka dikambo sɔ. Ntondotondo, anango wakosondja oko mfumbe. L’ɔkɔngɔ diko, wadi aki nkumɛnde akoomamatanyɛ awui wa kashi ndo wakotome lo lokanu l’Edjibito. Etena kaki Yɔsɛfu lo lokanu, onde nde akakakitɔna la Jehowa? Ndooko! Bible mbutaka ɔnɛ: “Jehowa akatetemala monga kaamɛ la Yɔsɛfu ndo akatetemala mbɛnya ngandji kande ka kɔlamelo,” ndo “Jehowa aki kaamɛ la Yɔsɛfu ndo Jehowa akatshɔkɔlaka kɛnɛ tshɛ kakandasalaka.” (Etatelo 39:21, 23) Oyadi la ntondo ka tena dia wolo sɔ, la solo dia lotutsha tshɛ Yɔsɛfu akakongɛka le Nzambi kande.
11 Ɛnɔnyi efula l’ɔkɔngɔ wa laasɔ, Farawɔ akayotondja Yɔsɛfu oma lo lokanu ndo mfumbe kaki l’okitshakitsha kɛsɔ akayonga onto lahende lakaleke wolo lakolɛ l’Edjibito. (Etatelo 41:1, 37-43) Etena kakote Yɔsɛfu la wadɛnde ana ahende, “Yɔsɛfu akɔlɛ ɔna l’enondo Manase, nɛ dia nde akate ate: ‘Nzambi ambombohiya paa yami tshɛ ndo luudu l’otondo la papa.’ Nde akɔlɛ ɔna la 2 Efrayimɛ, nɛ dia nde akate ate: ‘Nzambi ambosala dia dimi monga la diwutshi lo wodja w’asui ami.’” (Etatelo 41:51, 52) Jehowa akafute Yɔsɛfu l’ɔtɛ wa kɔlamelo yande ndo nde aki l’akoka wa nkokɛ ase Isariyɛlɛ ndo ase Edjibito oma lo ndjala. Ndo Yɔsɛfu akeyaka ɔnɛ Jehowa mbakoofute ndo mbakɔɔtshɔkɔla.—Etatelo 45:5-9.
12. Ngande wakatshikala Yeso la kɔlamelo etena kakandahembama?
12 Yeso Kristo nde la wɔ akatetemala nkitanyiya Nzambi kaanga la ntondo k’ehemba efula ndo Jehowa akoofute. Kakɔna kakakimanyiya Yeso dia ntshikala la kɔlamelo? Ɔtɛkɛta wa Nzambi nembetshiyaka ɔnɛ: “L’ɔtɛ w’ɔngɛnɔngɛnɔ wakakitshama la ntondo kande, nde akakikɛ otamba w’asui, akɔnyɔla nsɔnyi.” (Hɛbɛru 12:2) Aha la taamu, Yeso aki l’ɔngɛnɔngɛnɔ lo woho wakandonge l’akoka wa nkidia lokombo la Nzambi. Ndo Yeso akafutama lo woho wakandetawɔma oma le She ndo wakandonge la waɛsɛ efula wa diambo. Bible mbutaka dia nde “akatodjasɛ lo lonya l’omi la kiti ka lowandji ka Nzambi.” Tɔ mbutaka nto ɔnɛ: “Nzambi akawodiya lo dihole dia laadiko ndo la ngandji tshɛ nde akawosha lokombo lele laadiko dia nkombo nkina tshɛ.”—Filipɛ 2:9.
JEHOWA HOHƐ KƐNƐ KASALASO
13, 14. Ngande wɔsa Jehowa kɛnɛ kasalaso lo dikambo diande?
13 Sho koka monga l’eshikikelo ɔnɛ Jehowa mbɔsaka oseka dui tshɛ diasalaso dia mbokambɛ la nɛmɔ. Nde mbeyaka etena keso bu l’eshikikelo lo dikambo diaso hita kana etena keso la taamu lo kɛnɛ kendana l’akoka aso. Nde ndjakiyanyaka efula dikambo diaso etena keso l’ekiyanu l’ɔtɛ w’olimu aso kana woho wa nkotsha ehomba wa nkumbo kaso. Ndo nde shihodiaka etena kahatakoke nsala akambo efula l’olimu ande oko wakatasalaka ntondo l’ɔtɛ wayaso la hemɔ kana wambotɔkɔmɔ. Sho koka monga l’eshikikelo tshɛ lo tshɛ ɔnɛ Jehowa mbɔsaka kɔlamelo yaso la nɛmɔ oyadi ekakatanu akɔna wele la so.—Adia Hɛbɛru 6:10, 11.
14 Tohɔ nto dia Jehowa “tokaka dɔmbɛlɔ.” Sho koka monga l’eshikikelo ɔnɛ nde ayotohokamɛ. (Osambo 65:2) “Shɛso ka kɛtshi ndo Nzambi k’esambelo tshɛ,” ayotosha ɛngɔ tshɛ kele la so ohomba dia ntetemala monga suke la nde. Lo tena dimɔtshi nde koka nkamba l’anangɛso la akadiyɛso dia nsala dui sɔ. (2 Kɔrɛtɔ 1:3) Jehowa ngɛnangɛnaka etena kokaso anto akina kɛtshi. “Onto loka mbolambola kɛtshi ekɔ lo nsɔndja Jehowa diangɔ, ndo Nde ayowofuta l’ɔtɛ wa kɛnɛ kasalande.” (Tokedi 19:17; Mateo 6:3, 4) Ɔnkɔnɛ naka sho monga la lokaho ndo kimanyiyaka anangɛso, Jehowa mbɔsaka ɔlɔlɔ wasalaso oko tekɔ lo mbɔsɔndja. Ndo nde ndakaka dia ndaamɛ ayofuta wanɛ wasala ɛlɔlɔ ɛsɔ.
DIFUTO DIA NSHI NYƐ NDO DIA PONDJO PONDJO
15. Difuto diakɔna diakongɛyɛ? (Enda osato wele lo mbɔtwɛlɔ.)
15 Akristo w’akitami wekɔ l’elongamelo ka nongola, ‘dɛmbɔ dia nkoso dia losembwe.’ (2 Timɔte 4:7, 8) Koko, naka wɛ ekɔ l’elongamelo kotshikitanyi, dui sɔ halembetshiya ɔnɛ wɛ bu la nɛmɔ efula lo washo wa Nzambi. Miliyɔ ya “ɛkɔkɔ ekina” waki Yeso wekɔ lo kongɛɛ difuto dia lɔsɛnɔ la pondjo lo paradiso ka la nkɛtɛ lo nshi yayaye. Lɛkɔ “vɔ wayɔngɛnangɛnaka heyama la wɔladi w’efula.”—Joani 10:16; Osambo 37:11.
16. Esambelo kakɔna katanaso lo 1 Joani 3:19, 20?
16 Lo tena dimɔtshi, sho mbeyaka mfɔnya ɔnɛ hatosale akambo efula l’olimu wa Jehowa kana ndjambola dia kana Jehowa ekɔ lo ngɛnangɛna kɛnɛ kasalaso. Sho koka kaanga mfɔnya ɔnɛ sho hatosungana nongola oseka difuto tshɛ. Koko hatohombe pondjo mbohɛ ɔnɛ: “Nzambi ndeka etema aso woke ndo nde mbeyaka akambo tshɛ.” (Adia 1 Joani 3:19, 20.) Etena kakambɛso Jehowa l’ɔtɛ wa mbetawɔ ndo ngandi kawokaso, sho koka monga l’eshikikelo ɔnɛ nde ayotofuta oyadi kaanga kɛnɛ kasalaso mbeyaka mɛnama le so oko bu la nɛmɔ efula.—Makɔ 12:41-44.
17. Naa ɛtshɔkɔ ɛmɔtshi wakondjaso ɛlɔ kɛnɛ?
17 Oyadi lo nshi y’ekomelo ka dikongɛ dia kɔlɔ diaki Satana nɛ, Jehowa ekɔ lo ntshɔkɔla ekambi ande. Nde ndjashikikɛka dia tekɔ lo nkondja ewo k’efula ndo wɔladi oko weso lo nkumbo k’onto l’ɔnango ka l’andja w’otondo. (Isaya 54:13) Lo mɛtɛ oko wakalake Yeso, Jehowa ekɔ lo tofuta ɛlɔ kɛnɛ lo tosha nkumbo k’anangɛso l’akadiyɛso wa l’andja w’otondo watoka ngandji. (Makɔ 10:29, 30) Ndo nto, wanɛ wayanga Nzambi l’otema ɔtɔi wekɔ lo futama lo monga la wɔladi w’efula wa l’etei k’otema, ɔngɛnɔngɛnɔ ndo ɔlɔ.—Filipɛ 4:4-7.
18, 19. Ngande wayaoka ekambi wa Jehowa lo dikambo dia ɛtshɔkɔ wakondjawɔ?
18 Ekambi wa Jehowa wa l’andja w’otondo wekɔ lo nkondja ɛtshɔkɔ w’amɛna efula oma le Shɛso. Ɛnyɛlɔ, Bianca lodjashi l’Allemagne mbutaka ɔnɛ: “Haleye efula ka losaka lakokami mbisha Jehowa l’ɔtɛ wakimanyiyande etena kemi l’ekiyanu ndo wongande nsuke la mi lushi tshɛ. Andja ɔnɛ wambolola l’efukutanu ndo ndooko k’ɔlɔ kele lɔkɔ. Koko oko wakambami kaamɛ la Jehowa, lekɔ lo ndjaoka l’ekokelo l’anya ande. Oyadi awui akɔna wayahondjami lo dikambo diande, nde tshɔkɔlakami ndodia lo lokama.”
19 Tɔshi ɛnyɛlɔ ka Paula lele l’ɛnɔnyi 70 ladjasɛ la Canada, nde ekɔ la spina bifida, mbuta ate hemɔ ka wolo ka l’okandji kawodjɛ elelo efula. Nde mbutaka ɔnɛ lam’ele hemɔ kele la nde hawosha diaaso dia mbeteta, dui sɔ halembetshiya ɔnɛ nde aya bu la diaaso dia nsambisha. Nde kotshaka ɔnɛ: “Dimi kambaka la toho t’esambishelo totshikitanyi, ɛnyɛlɔ lo telefɔnɛ ndo lo tshakitudi. Dia ndjakeketsha, dimi mongaka la kalupɛ yami yele l’avɛsa ndo tokanyi t’oma l’ekanda aso takokami mbadiaka mbala la mbala. Dimi kielɛka ɔnɛ ‘Kalupɛ yami ya panda.’ Ɔkɔmwɛlɔ ekɔ dui dia lo tshanda mɔtshi naka sho mbika washo lo alaka wa Jehowa. Jehowa ekɔ nshi tshɛ suke dia tokimanyiya oyadi ekakatanu akɔna wele la so.” Okakatanu ayɛ mbeyaka ntshikitana efula la wɔnɛ wele la Bianca kana wele la Paula. Koko, ondo wɛ koka nkana yimba lo toho takofuta Jehowa ndo tafutande anto akina. Ande dimɛna nkana yimba lo woho wakofuta Jehowa l’etena kɛnɛ ndo woho wayondokofuta lo nshi yayaye lee!
20. Akokaso nongamɛ naka sho ntetemala nsala kɛnɛ tshɛ kakokaso nsala dia kambɛ Jehowa la kɔlamelo?
20 Tohɛke pondjo dia alɔmbɛlɔ ayɛ wa l’otema ɔtɔi “[w]ayofutama lo yɛdikɔ y’efula.” Wɛ koka monga l’eshikikelo ɔnɛ, “l’ɔkɔngɔ wa [wɛ] nsala lolango la Nzambi,” wɛ ‘ayolongola ekotshamelo ka daka.’ (Hɛbɛru 10:35, 36) Ɔnkɔnɛ, nyɛsɔ totetemale nkeketsha mbetawɔ kaso ndo nsala kɛnɛ tshɛ kakokaso nsala dia kambɛ Jehowa. Tekɔ l’eshikikelo dia Jehowa ayotofuta!—Adia Kɔlɔsayi 3:23, 24.