Dimi konangaka mvɔ

NSHI YAMI YAKETE

Lakotɔ la Paddington dihole dionga anto woho w’anyanya la Londres, Angleterre. Lakadjasɛka la mama ndo la nondo diami sato dia wamato. Papa akadjaka nsɛnɔ yaso lo waale l’ɔtɛ wakandatombatombaka oma la ngelo ndo l’ɔtɛ wa wodjwelo ande wa wanu.

Etena kakimi dikɛnda, mama akambetsha dia salaka dɔmbɛlɔ otsho tshɛ. Laki la Bible ka tshitshɛ kaki paka la dibuku di’Esambo ndo lakasale dia mbaembaka oko esambo. Dimi mbohɔka woho wakamembaka lushi lɔmɔtshi oma lo dibuku diami dimɔtshi ɔnɛ: “Ekɔ lushi lɔmɔtshi lele lɔsɛnɔ layokomɛ.” Ɛtɛkɛta ɛsɔ wakakonyaka dia dimi memɔka l’otsho ko kanyiyaka dikambo dia nshi yayaye. Lakakanyiyaka nte: ‘Weho akɔ tshɛ lɔsɛnɔ lekɔ la awui efula, lande na kemi la lɔsɛnɔ?’ Dimi konangaka mvɔ.

Lakayotatɛ nanga dia mbeya awui wendana l’ɛdiɛngɛ. Lakatatɛ mpemba dia nsawola l’anto wakavu, lakatshɔka lo waombo l’asekami wa la kalasa ndo lakendaka kaamɛ la wɔ filmɛ y’otsha wɔma. Awui asɔ wakatoshaka ɔngɛnɔngɛnɔ ndo wɔma l’etena kakɔ kaamɛ.

Lakatatɛ monga la lɔsɛnɔ la kɔlɔ etena kakimi leke l’ɛnɔnyi dikumi eto. Lakatatɛ nnɔ mfɔka ndo kombeta edja, lakakome mfumbe katɔ. Oma laasɔ, lakakome polo lo nnɔ mfɔka ka marijuana. Etena kakimi l’ɛnɔnyi 11, lakatatɛ nnɔ wanu. Kaanga mbakimi konangaka woho wakiwɔ lo onyɔ, laki l’ɔngɛnɔngɛnɔ w’efula etena kakamadjɔka. Lakangɛngɛnaka mishiki ndo ɔnwɛlɔ wa lokombe. Lakatshɔka lo waa fɛtɛ ndo lo barɛ ya l’etsho etena tshɛ kakamalangaka. Lakɔmɔka l’otsho otsha lɛkɔ ndo lakakalolaka la ntondo ka wonya mpotɔ. Lam’ele lakongaka l’ɔlɛmbɛlɔ la pindju, lakalawɔka kalasa. Etena kakamatshɔka la kalasa, lakanɔka wanu la ntondo ka wekelo tshɛ.

L’ekomelo k’ɔnɔnyi, lakakite wela. Lam’ele mama kombeyaka awui tshɛ wendana la lɔsɛnɔ lami la kɔlɔ, nde kɔngɛnangɛna ndo akomala. Takawane ko lakalawɔ oma la ngelo. Lakatodjasɛ lo tshanda mɔtshi la Tony, osekami la pami, nde aki ose Rasta. Nde akikɔ lo olui w’ase wevi, akasondjaka didjoyadjoya ndo akeyamaka oko kanga ngala efula. Ɔtɛkɛta kele edja, lakatshu diemi ndo etena kakimi leke l’ɛnɔnyi 16 eto, lakote ɔnaso la pami.

WOHO WAKATSHIKITANYA BIBLE LƆSƐNƆ LAMI

Lakɛnana la Ɛmɛnyi wa Jehowa mbala ka ntondo etena kakimi lo luudu ladjasɛ wamato wele bu la waomi ndo anawɔ. Ewandji wa lo ngelo mbakambisha luudu lɛkɔ. Wamato ahende w’Ɛmɛnyi wa Jehowa wakayaka ndjembola wamato wa lɛkɔ mbala la mbala. Lushi lɔmɔtshi, lakatatɛ nkɛtshanya la wɔ. Lakalangaka nshikikɛ dia kana Ɛmɛnyi wa Jehowa wekɔ la kashi. Koko vɔ wakakadimola ambola ami tshɛ la lotutsha ndo lo yohokɛma hwe oma lo Bible. Vɔ waki la ngandji ndo ɔlɔlɔ, waonga asɔ wakankotola. Ɔnkɔnɛ, laketawɔ mbeka la wɔ Bible.

Kombeta edja, lakeke dui dimɔ oma lo Bible diakatshikitanya lɔsɛnɔ lami. Oma ko dikɛnda diami, lakokaka nyɔi wɔma. Koko lakayoshola kɛnɛ kaketsha Yeso lo dikambo dia eolwelo. (Joani 5:28, 29) Ndo nto, lakeke dia Nzambi ekɔ lo ndjakiyanya dikambo diami. (1 Petero 5:7) Lakaleke minandema l’ɛtɛkɛta wa lo Jɛrɛmiya 29:11 wata ɔnɛ: “‘Nɛ dia dimi mbeyaka dimɛna tokanyi takanyiyami dikambo dianyu,’ mbata Jehowa, ‘tokanyi ta wɔladi, koko aha ta mpokoso, dia nyosha nshi yayaye ndo elongamelo.’” Lakatatɛ mbetawɔ dia dimi koka monga la elongamelo ka ndjɔsɛna pondjo pondjo lo Paradiso ka la nkɛtɛ.—Osambo 37:29.

Ɛmɛnyi wa Jehowa wakankɛnɛmɔlɛ ngandji k’oshika. Etena kakamɔtɔ mbala ka ntondo lo nsanganya yawɔ, anto tshɛ waki la osalosalo ndo dui sɔ diakankotola otsha le wɔ, mbuta ate anto tshɛ waki oko angɛnyi. (Joani 13:34, 35) Ɔsɔ aki otshikitanu wa woke efula la woho wakawansalɛ akambo lo ɔtɛmwɛlɔ okina wa lo ngelo kakɔ kaamɛ. Oyadi woho waki lɔsɛnɔ lami, Ɛmɛnyi wa Jehowa wakanongola. Vɔ waketsha wenya kaamɛ la mi, wakankokɛ, wakambidje yimba ndo wakambisha ekimanyielo ka shikaa. Lakayaoke dia lekɔ lo nkumbo ka woke kokana ngandji.

Diɛsɛ la wekelo ami wa Bible, lakɛnyi dia dimi pombaka nsala etshikitanu lo lɔsɛnɔ lami dia nkitanyiya atɔndɔ waki Nzambi wa laadiko wendana la lɔkɛwɔ. Komonga yana ya dikambo dia dimi ntshika ɔnwɛlɔ wa mfɔka. Lakashihodia dia mishiki ɛmɔtshi wakonyiyaka nsaki kami ka nnɔ mfɔka ka marijuana, diakɔ diele lakatshikitanya mishiki wakamahokamɛka. Lam’ele lakakombolaka dia ntshikala pudipudi, lakatshike otshwelo wa lo waa fɛtɛ ndo lo barɛ ya l’etsho lɛnɛ akamakoke tohembama dia nnɔ dinɔnɔ. Lakayange angɛnyi w’eyoyo wanɛ wakakoke monga la shɛngiya ya dimɛna lo yoho yami ya lɔsɛnɔ l’oyoyo.—Tokedi 13:20.

L’etena kɛsɔ, Tony nde la wɔ akekaka Bible l’Ɛmɛnyi wa Jehowa. Lam’ele Ɛmɛnyi wa Jehowa wakakadimola ambola ande oma lo Bible, nde la wɔ akonge la mbetawɔ dia kɛnɛ kakandekaka kaki mɛtɛ. Nde akasale etshikitanu wa mamba lo lɔsɛnɔ lande, ɛnyɛlɔ: nde akahembola lɔngɛnyi l’asekande waki akanga wa ngala, akatshike awui wa wovi ndo akatshike ɔnwɛlɔ wa mfɔka ka marijuana. L’oyango wa ngɛnyangɛnya Jehowa tshɛ lo tshɛ, takɛnyi ohomba wa ntshika lɔsɛnɔ laso la mindo ndo nɔngɔsɔlɛ ɔnaso edjaselo ka dimɛna. Takatshukana lo 1982.

Dimi mbohɔka woho wakamatayangaka lo Tshoto y’Etangelo ndo Réveillez-vous !a dia ntana asawo waki l’ɛkɔndɔ w’anto wakatondoya dia nsala etshikitanu wakamakombolaka ndo dimi dia nsala. Bɛnyɛlɔ di’anto asɔ diakakeketsha efula. Lakɛnyi dia ekɔ ohomba ntetemala mbidja weolo ndo aha mpekɔ. Lakatetemala nɔmba Jehowa diaha nde pekɔmi. Dimi la Tony takabatizama lo Ngɔndɔ k’esambele, 1982.

WAHƆ WAMOMOKONDJA

Mbɔtɔ la Jehowa Nzambi ɔngɛnyi amboshimbɛ lɔsɛnɔ lami. Dimi la Tony takɛnyi woho wakatosukɛ Jehowa lo tena dia wolo. Takeke dia ndjaɛkɛka le Nzambi lo tena di’ekekakatanuɔ ndo sho ndjaokaka dia nde tokimanyiyaka ndo sukɛka nkumbo kaso.—Osambo 55:22.

Dimi ngɛnangɛnaka woho wakamakimanyiya ɔnaso la pami ndo la womoto dia mbeya Jehowa oko dimi. Nshi nyɛ, lekɔ l’ɔngɛnɔngɛnɔ etena kɛnami anawɔ vɔ la wɔ wayole lo ewo kaki Nzambi.

Nshi nyɛ handjolala engondo la wɔma wa nshi yayaye kana wa nyɔi. Dimi la Tony tekɔ lo ndjasha tshɛ dia mbeteta lo tshumanelo di’Ɛmɛnyi wa Jehowa lomingu tshɛ dia towakeketsha. Ndo sho ndo vɔ tekɔ lo mbetsha anto akina ɔnɛ naka vɔ monga la mbetawɔ le Yeso, kete vɔ la wɔ koka nkondja lɔsɛnɔ la pondjo.