Onde Nzambi ndjadjaka lo dihole di’onto?

KƐNƐ KATETSHA ETONGELO

Ndjadja lo dihole di’onto nembetshiyamaka oko “dikoka dia nkahana l’onto okina nsaki ndo awui lo nkanyiya kɛnɛ kakoka ntomba lo monga lo dihole di’onto akɔ.” Yɔnɛ Dr. Rick Hanson lele manyi lo hemɔ ya lo wɔɔngɔ mbutaka dia “sho mbotɔka la dikoka dia ndjadja lo dihole di’onto okina.”

OHOKANYIYA DUI NƐ: Lande na keso la dikoka dia ndjadja lo dihole di’onto okina, dikoka diahatanema le ditongami dikina? Bible mɛnyaka dia Nzambi akatonge anto l’efanelo kande. (Etatelo 1:26) Takatongama l’efanelo ka Nzambi diakɔ diele sho koka mbokoya lonto lande ndo nkɛnɛmɔla waonga ande w’amɛna. Ɔnkɔnɛ, etena katshutshuyama anto dia ndjadja lo dihole di’anto akina lo mbakimanyiya, vɔ mbokoyaka Otungi wakiwɔ layadja lo dihole di’anto akina ndo lele la kɛtshi, mbuta ate Jehowa Nzambi.​—Tokedi 14:31.

KƐNƐ KATETSHA BIBLE LO WOHO WAYADJA NZAMBI LO DIHOLE DIASO

Nzambi tokaka kɛtshi ndo nde petshaka woho wasowaso. Lo kɛnɛ kendana la ase Isariyɛlɛ w’edjedja wanɛ wakakikɛ lɔhɔmbɔ la wolo l’Edjibito wakayelana la ɛnɔnyi 40 wa shɔkɔ l’oswe wa shɛnga Bible mbutaka ɔnɛ: “Lo asui awɔ tshɛ nde akasowaka.” (Isaya 63:9) Lembetɛ dia Nzambi kombeyaka tsho dia vɔ wekɔ lo nsowa. Koko nde akakoke mboka kandji yaki la wɔ. Nde akate ate: “Dimi mbeyaka dimɛna dia wekɔ lo nsowa efula.” (Etombelo 3:7) Nzambi mbutaka ɔnɛ: “Ɔnɛ tshɛ lanyonanda ambonanda ɔna sso diami.” (Zɛkariya 2:8) Etena katohomuya anto akina, otema ande mongaka la lonyangu oko waso.

Bible toshikikɛka dia kaanga mbakokaso shoamɛ ndjaanya ndo mɛna dia hatokoke dia Nzambi toka kɛtshi, “Nzambi ndeka etema aso woke ndo nde mbeyaka akambo tshɛ.” (1 Joani 3:19, 20) Nzambi teyaka dimɛna ndeka ndo shoamɛ. Nde mbeyaka dimɛna dimɛna awui wahomana la so, tokanyi ndo nsaki yaso tshɛ. Nde ndjadjaka lo dihole diaso.

Afundelo toshikikɛka

• “Wɛ ayelɛ, ko Jehowa ayokadimola; wɛ ayolela dia nyanga ekimanyielo, ko nde ayota ate: ‘Dimi ɔnɛ!’”​—ISAYA 58:9.

• “‘Nɛ dia dimi mbeyaka dimɛna tokanyi takanyiyami dikambo dianyu,’ mbata Jehowa, ‘tokanyi ta wɔladi, koko aha ta mpokoso, dia nyosha nshi yayaye ndo elongamelo. Nyu nyayombelɛ, nyayoya ndo nyayɔnɔmba, ko dimi layonyohokamɛ.’”​—JƐRƐMIYA 29:11, 12.

• “Odje asɔyi ami lo ɔlɔndɔ ayɛ wa dikoho. Shi vɔ fundama lo dibuku diayɛ?”​—OSAMBO 56:8.

NZAMBI TODJAKA YIMBA, TEYAKA NDO NDJAOKAKA WOHO WAYAOKASO

Onde mbeya dia Nzambi ndjadjaka lo dihole diaso koka tokimanyiya dia sho ndɔshana la ekiyanu? Tɔsɛdingole kɛnɛ kakakomɛ Maria:

“Lakɛnyi dia lɔsɛnɔ laki wolo ndo wɛngiya l’ɔkɔngɔ wa dimi monga la kandji k’efula lo nshisha ɔnami la pami l’enondo l’ɛnɔnyi 18, ɛnɔnyi ehende l’ɔkɔngɔ wa nde diɛnɛ la hemɔ ka kansɛrɛ. Lakomalɛ Jehowa dikambo nde kombekɛ lonya dia mbɔkɔnɔla!

Ɛnɔnyi esamalo l’ɔkɔngɔ, ɔngɛnyi ami ɔmɔtshi wa ngandji ndo waki la kɛtshi wa l’etshumanelo akahokamɛka etena kakamakɛnɛmɔlaka nsaki yami lo mɛnya dia Jehowa kombokakami ngandji. L’ɔkɔngɔ wa nde pokamɛmi l’edja ka wenya ɛmɔtshi wa ntango aha la pemboyami ɔtɛkɛta, nde akɔshi ɛtɛkɛta w’oma lo divɛsa dimɔ diakatshutshuya efula. Divɛsa diakɔ diaki 1 Joani 3:19, 20, diata ɔnɛ: ‘Nzambi ndeka etema aso woke ndo nde mbeyaka akambo tshɛ.’ Nde akanembetshiya dia Jehowa ekɔ lo mbeya asui aso.

Oyadi awui asɔ tshɛ, aki dui dia wolo le mi dia dimi minya nkɛlɛ kami! Oma laasɔ lakadia Osambo 94:19, wata ɔnɛ: ‘Etena kakamamɛnama la ekiyanu, wɛ akansambe ndo akambɔladia.’ Lakoke di’avɛsa asɔ wakafundama paka lo wahɔ ami! Lo mɛtɛ, lakɛnyi dia ekɔ dui dia dimɛna nsawola la Jehowa dikambo dia ekiyanu ami, lo mbeya dia nde pokamɛkami ndo mbeyakami.”

Ande ekeketshelo dia mbeya dia Nzambi teyaka ndo ndjaokaka woho wayaokaso lee! Ko laasɔ, lande na kele asui efula? Onde ekɔ l’ɔtɛ watosha Nzambi dilanya dikambo dia pɛkato yaso? Onde Nzambi ayosala dui dimɔ dia nkomiya asui tshɛ? Awui asɔ wayɔsɛdingɔma l’asawo wayela.