Ɛlɔngɔlɔngɔ wekɔ l’ohomba w’ɛnyɛlɔ k’ɔlɔlɔ
1 Sho ngɛnangɛnaka lam’ɛnaso ɛlɔngɔlɔngɔ efula “[watombola lokombo la Jehowa, NW]” l’atei aso. (Osam. 148:12, 13) Efula wekekɔ akɛnda efula. Ohamelo awɔ nemanɛka lo yɛdikɔ ya woke l’olakanyelo ndo l’ɛnyɛlɔ k’oma le ambutshi awɔ ndo oma le epalanga wa l’atei w’etshumanelo. Koko, hatokoke mbohɛ shɛngiya y’ɛlɔngɔlɔngɔ ekina, djekoleko y’ɛlɔngɔlɔngɔ wowaole l’ɛnɔnyi ndo ya wanɛ waya epalanga. Naka wɛ ekɔ l’ɛnɔnyi ɛsɔ, kete akambo anɛ wayela kokaka ndjâla ɔlɔlɔ le yɛ.
2 Ana wekɔ la saki ka ndjela ɛnyɛlɔ k’ɛlɔngɔlɔngɔ wowaole l’ɛnɔnyi. Oko wele saki kawɔ ka l’otɔ, vɔ nangaka mbekesanɛ la wanɛ walangawɔ. Vɔ hawotshimbatshimba la kɔmiya ɛlɔngɔlɔngɔ wowaole yema l’ɛnɔnyi, wanɛ w’ɛnama oko wekɔ l’ewo ndo mbaleka yema. Ɔnkɔnɛ, ondo vɔ wayokoya yoho yatɛkɛtayɛ la lɔkɛwɔ layɛ, ndo ngandji kokayɛ akambo wa lo nyuma la woho wakambayɛ elimu wa l’atei w’etshumanelo.
3 Naka wɛ ekɔ ɔlɔngɔlɔngɔ woleki ɛnɔnyi efula, kete wɛ ekɔ la diɛsɛ ndo l’ɔkɛndɛ a woke. Mako kakianɛ, ondo ɛnyɛlɔ kayɛ kekɔ l’etombelo ɛmɔtshi le asekayɛ ɛlɔngɔlɔngɔ wele akosɛyɛ. Ohotokoyambola w’ate: “Shɛngiya yakɔna yele lami le akɛnda na? Onde dimi lekɔ onto l’oshika, lekɔ lo mbikasha akambo wele oko wa kanga enginya ndo ‘saki ya kɔlɔ yele lo nshi y’ɔlɔngɔlɔngɔ’ oka? Onde dimi kitanyiyaka ndo nɛmiyaka ambutshi ami, dikumanyi la epalanga oka?” (2 Tim. 2:22; Kol. 3:20) Ɛtɛkɛta ayɛ la ditshelo diayɛ kokaka monga l’ɔkɛndɛ a woke l’ohamelo a lo nyuma waki anyayɛ akɛnda wele lo koshishima.
4 Ɔkɛndɛ w’etshumanelo woleki ohomba ele sambisha losango la Diolelo. Otombelo ayɛ wa mbala la mbala w’aha paka onto mbokotshutshuyisha l’olimu akɔ ɔsɔ ayokeketsha anyayɛ dia vɔ ndjasha efula lɔkɔ. Naka wɛ ekɔ l’akoka wa kamba olimu w’ombatshi wa tshanda, kete angɛnyi ayɛ wayotshutshuyama dia vɔ sala ngasɔ ndo vɔ lawɔ. Wɛ kokaka nto mbisha ɛnyɛlɔ k’ɔlɔlɔ lo mbasâsaka lo sanganya ndo lo mbishaka ekimanyielo kayɛ ka la lolango dia kotsha elimu wahombama lo Mbalasa ka Diolelo.
5 Kânga mbaki Timote opalanga lam’akawosha Paulo dako nɛ diayela, ɛlɔngɔlɔngɔ kokaka mbidja yimba lo dako diakɔ diata ɔnɛ: “Uyali djimbitelu le wane wetawo, lu aui, ndu lu ditshelu, ndu lu ngandji ndu lu mbetawo, ndu lu pudipudi k’utema.” (1 Tim. 4:12) Naka wɛ ekɔ lo kambɛ Jehowa l’ohetoheto ndo la lumu layɛ tshɛ, kete wɛ ayonga la shɛngiya y’ɔlɔlɔ le anyayɛ akɛnda wakoshishima ndo wɛ ayowakimanyiya dia vɔ pama edja ndo vɔ koma oko anto wambotshunda ndo wele nge lo nyuma. (Ef. 4:13) Ondo ɛlɔngɔlɔngɔ wele nkumbo yawɔ wambotatɛ la mbeka Bible, mbeyaka ndjoya oya lo mɛtɛ oma lo kɛnɛ kɛnawɔ le yɛ.
6 Kɛnɛ koleki ohomba nto ele, ohetoheto ayɛ dia kɛnɛmɔla waonga wa Nzambi mendanaka la Jehowa efula ndo l’ɔlɔngɔswamelo ande. (Tok. 27:11) Anto w’eshika wakoshishima wayamba hakoke oma l’otshikitanelo wa mamba wele l’asa kɛnɛ kasalayɛ la kɛnɛ kasala ɛlɔngɔlɔngɔ wa l’andja ɔnɛ. Ɔnkɔnɛ, wɛ ekɔ la diaaso diahakoke mbɛdikama: diaaso dia kimanyiya anyayɛ akɛnda lam’akambayɛ efula dia tombola Jehowa.—Osam. 71:17.