Ekadimwelo lo Wembola Anyu
◼ Woho akɔna wakokaso ndowanya kɔmatɛrɛ yaso lo nsanganya na?
Asolo aso ndokɔlokɔka dia sho tshumana lo nsanganya yasalema l’etshumanelo lomingu tshɛ. Tekɔ la diaaso dia mɛnya mbetawɔ kaso lo nsanganya yakɔ ndo keketsha akina oma lo kɔmatɛrɛ yaso. (Tuk. 20:15; Heb. 10:24, 25) Sho pombaka mbɔsa diaso sɔ oko diɛsɛ dimɔtshi ndo sho ndjatshutshuya dia disalaka mbala la mbala. Woho akɔna wakokaso ndowanya kɔmatɛrɛ yaso na?
Ntondotondo, toyalɔngɔsɔlake. Ekɔ ohomba dia mbalaka awui akɔ la ntondo ndo kana lawɔ yimba. Toyatshutshuya dia mboka lande na akawafunde tokanyi takɔ. Koyanga esangɔ ɛmɔtshi sawo diakɔ diambosalemaka, toyange awui w’eyoyo kana watɔtɔmiyawɔ. Tokime ɔtɛ wa sawo diakɔ lo yimba. Etena kalɔngɔsɔlaso kɔmatɛrɛ oma l’okanda ɔmɔtshi wakalɔngɔswama lo dikambo dia wekelo w’oshika wa dibuku dimɔtshi diele lo Bible, oko ɛnyɛlɔ dibuku Révélation: dénouement, tohembe dia shihodia kɛnɛ kakakatanya divɛsa dimɔtshi la avɛsa akina wosukanyi ladiɔ. Naka sho kamba l’alako asɔ, kete tayoleka mbeya kana yimba. Dikambo sɔ diayotokimanyiya dia sho nɔngɔsɔlaka kɔmatɛrɛ y’ɛlɔlɔ ndo dia kondja ɔngɛnɔngɛnɔ oma l’ɔlɔngɔswɛlɔ aso.
Kɔmatɛrɛ y’ɛlɔlɔ yekɔ tomondo, mbishama l’ɛtɛkɛta wa wɔdu, ndo tomba oma l’okanda wekama. Ɔnɛ layɔtɛkɛta ntondo pombaka kadimola mbala kakɔ ɔtɔi lo wombola, lo tshikɛ akina dihole dia vɔ kotsha awui akina l’okadimwelo akɔ. Aha mbisha kɔmatɛrɛ y’etale ndo yahɔtɔnɛ, yɔsa wenya efula ndo yashimba akina dia vɔ tɛkɛta. Tokambe la tɔtɛkɛta taso hita, lo dihole dia mbalaka kɔmatɛrɛ yaso ko woho wofundamiyɔ l’okanda. Lo kɔmatɛrɛ ya lâdiko, sho mbeyaka kɛnɛmɔla awui wotami l’avɛsa woshilami. Tohokame la yambalo tshɛ kɛnɛ kata akina diaha sho ndjokalola l’awui akɔ wâmɛ.
Ekɔ ɔlɔlɔ memɛka lonya mbala efula, koko aha l’odingɔ tshɛ. Sho keketshaka ɛlɔngɔlɔngɔ dia vɔ mbishaka kɔmatɛrɛ. Naka wɛ mengengaka dia kadimola, kete wɛ mbeyaka tewoyisha ɔnɔmbɔdi odingɔ walangɛ mbisha kɔmatɛrɛ, ondo nde mbeyaka ndjokosha diaaso lɔkɔ.
Sho tshɛ pombaka ndjatshutshuya l’otema ɔtɔi dia monga la kiambokambo mɔtshi ya mbuta lam’alɔmbawɔ ampokami dia mbisha kɔmatɛrɛ. Tohɔ dia olowanyelo wa nsanganya nemanɛka la saki kaso ka mbisha kɔmatɛrɛ y’ɛlɔlɔ.—Osam. 26:12.