Tôdianake Lo Mbishaka Kɔmatɛrɛ Lo Nsanganya
1 Heberu 10:24 tokeketshaka dia ‘sho tɔmbɔshanya lo ngandji la l’elimu w’ɔlɔlɔ.’ Dui sɔ mɛnyaka djekoleko ohomba wa mbodiana lo mbishaka kɔmatɛrɛ y’eshika lo nsanganya ya l’etshumanelo kaso. Bonde kahombaso kadimulaka? Ngande wakokaso kadimulaka? Ayokondja wahɔ oma lɔkɔ?
2 Ohokanyiya tena efula diakondjayɛ wahɔ oma lo kɔmatɛrɛ ya wɔdu ndo yokɛma hwe yalowanya oshihodielo ayɛ ndo yakokeketsha lo nyuma. Wɛ ekɔ la diɛsɛ dia salɛ anto akina woho akɔ wamɛ. Etena kashɛ kɔmatɛrɛ, wɛ mɛnyaka saki kayɛ ka ‘mbisha ampokami oshasha ɔmɔtshi wa lo nyuma’ wayowakeketsha vɔ tshɛ.—Romo 1:11, 12.
3 Woho wa Mbisha Kɔmatɛrɛ y’Amɛna: Aha mbishaka kɔmatɛrɛ y’etale ya mbitaka tokanyi tshɛ tele l’odingo w’otondo. Kɔmatɛrɛ ya ngasɔ hashaka okadimwelo shikaa lo dimbola ndo wɛ kokaka nɛmbia ampokami akina dia vɔ lawɔ mbisha kɔmatɛrɛ. Kɔmatɛrɛ ka ntondo kashawɔ l’odingɔ pombaka monga mondo ndo kadimula mbala kakɔ ɔtɔi lo dimbola. Nkina yayoyela kokaka mɛnya woho wa kamba l’awui akɔ kana woho wɔtɔnɛ awui akɔ l’avɛsa wele l’odingɔ. Enda lo Manuel pour l’École, lɛkɛ 90-2.
4 Naka wɛ mbokaka wɔma mbisha kɔmatɛrɛ, kete lɔngɔsɔlaka okadimwelo wa mondo ko wɛ nɔmba ɔnɛ lalɔmbɔla dia nde kombola l’odingɔ wakayasɔni. Naka wɛ ambotsha ngasɔ mbala efula, kete wɛ hoka wolo nto mbisha kɔmatɛrɛ. Ohɔ dia Mɔsɛ la Jeremiya wakɛnaka dia vɔ kema l’akoka wa tɛkɛta l’atei w’anto. (Etum. 4:10; Jer. 1:6, nɔtɛ) Koko Jehowa akâkimanyiya dia vɔ tɛkɛta lo lokombo lande, ndo nde ayotokimanyiya sho lawɔ.
5 Akɔna Ayokondja Wahɔ oma lo Kɔmatɛrɛ Yayɛ? Wɛmɛ kayonga onto la ntondo la kondja wahɔ oma lɔkɔ, nɛ dia kɔmatɛrɛ yayɛ yayɔtɔtɔmiya mɛtɛ lo yimba yayɛ ndo l’otema ayɛ, ko dui sɔ diayokokimanyiya dia wɛ ndjoyiohɔ l’ɔkɔngɔ. Lâdiko dia lâsɔ, anto akina wayokondja wahɔ oma l’ekadimwelo ayɛ wâkeketsha. Mɛtɛ, sho tshɛ keketshamaka lam’atsha onto tshɛ la wolo ande dia mbisha kɔmatɛrɛ, oyadi dikɛnda kana opalanga, kanga diki kana oyoyo, dia mɛnya mbetawɔ kande lo nsanganya ya l’etshumanelo.
6 Tekɔ l’eshikikelo dia mɛna ɔnɛ ‘mvuta dui l’etena kakokadiɔ mvutama ekɔ ɔlɔlɔ efula’ naka diɔ mvutama dia mbodiana lo nsanganya!—Tuk. 15:23.