Naa Eyango Wele La So Lo Nshi Ya Vakashi Ya Kalasa?

Lam’akanyiyaso ngɔndɔ ka Lotena Eduwa, ka Loseketanya la ka Lovula, sho kanyiyaka tɛdikɔ ta mbɔsa dia mbɔtɔ lo losanganya la distrikɛ, ndo eyango aso: tovakashi ta mumuya kana ntshɔ a tenda ambutshi kana angɛnyi. Waohwelo amɔtshi anɛ wayokoka tokimanyiya dia mbidja dikambo dia Diolelo lo dihole dia ntondo lam’akongɛso etena kɛsɔ:

◼ Tɔshi tɛdikɔ t’eshika dia mbɔtɔ lo losanganya la distrikɛ. Dia mbewɔ okakatanu tshɛ, totombi falanga ya futa mutuka ndo dihole dia sho todjasɛ.

◼ Naka tambotshɔ lo vakashi, toyalɔngɔsɔlɛ dia mbɔtɔka lo nsanganya ya l’etshumanelo ka lo ngelo kakɔ ndo sambishaka. Todje yimba dia tomɛka sekeletɛrɛ ka l’etshumanelo kaso alapɔlɔ aso w’esambishelo; naka ekɔ ohomba, totome alapɔlɔ ɛsɔ lo mboka koleki esadi ndo k’oshika.

◼ Tênda ambutshi wele bu lo mɛtɛ mbeyaka monga diaaso dia salaka esambishelo ka lo tshakitudi katondja elowa. Tatohɛke ntshɔ la Bible kaso ndo l’ekanda efula.

◼ Ayotota dia kimanyiya etshumanelo kele suke kahomba ekimanyielo dia mana mbilo kawɔ? Dikumanyi la omendji w’otshimbedi kokaka tewoya ehomba wele lo etenyi kaso ka ngelo.

◼ Vakashi ya kalasa ekɔ diaaso dioleki ɔlɔlɔ le ɛlɔngɔlɔngɔ dia pamia olimu awɔ w’esambishelo. Ɛlɔngɔlɔngɔ, onde nyu kokaka monga ambatshi mboka wa tshanda?

◼ L’edjedja a wonya, tayɛna aha la tamu ɔnɛ tekɔ lo kondja etombelo w’ɛlɔlɔ efula naka sho sambishaka efula la dikɔlɔ, etena kele anto efula la wakawɔ.

◼ Djekoleko dikumanyi, vɔ pombaka mbidja yimba dia mongaka nshi tshɛ l’ekongelo ka dimɛna k’elimu wa l’etshumanelo, lo mbɔsaka tɛdikɔ dia anto akina kotsha ɛkɛndɛ wakawasha wanɛ wayotshɔ lo vakashi.

Tôhɔ dia “Tukanyi ta kanga kolamelu, tatûkundjiyaka diango efula.” (Tuk. 21:⁠5) Tɔlɔngɔsɔlɛ etena kaso woho wa mbɔsa waaso tshɛ wa kambɛ Teokrasi.