Totetemale l’elimu aso wa teokrasi lo nshi ya vakashi

¹ Lotena eduwa la Loseketanya toshaka diaaso dia ndjasha l’elimu wotshikitanyi. Efula ka l’atei aso tolangaka kamba olimu la wenya w’amɛna watanema dia tshikitanya mbekelo yaso ndo dia sutshasutsha alemba. Koko, sho pombaka nama di’aha memadia elimu aso wa teokrasi.​—Fil. 3:16.

² L’asolo ladiko, tekɔ lo konga losanganya la distrike layotatɛ lo ngɔndɔ ka Loseketanya. Onde takɔshi tɛdikɔ t’eshika dia mbɔtɔ lo losanganya lakɔ, oma lo momba tshenyi ya dikuta dia futa mboka ndo lo kanyia dia dihole diayototohanga oka? Onde takakani lomba dikambo di’onto ɔmɔtshi la l’etshumanelo lele l’ohomba w’ekimanyielo oka? Lo bɛkɛ diakɔ dihende tayokoka kondja ɛngɛnɔngɛnɔ naka sho monga la woho w’otema w’ɔlɔlɔ wa ngasɔ.

³ Naka hatokimame l’olimu ɔmɔtshi, oko ɛnyɛlɔ lo nshi yeso lo vakashi ya kalasa, onde sho sangoyaka dia ndjasha efula l’olimu wa sambisha oka? Efula wakɛnyi ɔnɛ ɔsɔ aki diaaso di’ɔlɔlɔ efula diakakondjama woho wa ndjala ambatshi mboka wa tshanda. Tena efula, olimu ɔsɔ akadihola lokuke otsha lo waɛsɛ a weke w’olimu. Nkumbo kokaka kondja ɔngɛnɔngɛnɔ w’oshika lo sambisha kamɛ lushi l’otondo mbala efula. Oyadi sho mangema kana kema, onde hatokoke momba wenya w’efula dia ndjasha l’olimu wa sambisha oka? Naka tayoyasha l’olimu wa sambisha la dikɔlɔ lo shi ya vakashi, kete efula kaso tayohomba kondja ɛngɛnɔngɛnɔ watomba omalɔkɔ.

⁴ Dikambo kuna di’eso hatokoke kimanyia etshumanelo kele l’ekakatanu wa kindjakindja mbilo katɔ na? Ondo anangɛso akina l’akadiyɔ wayokombola sangana laso dia kamba kamɛ laso lumingu l’otondo kana mingu hiende lɛnɛ ele ohomba wekɔ efula. Naka olui aso wa tshitshɛ mbewɔ, esangɔ ɛmɔtshi apandjudi wa lo tshumanelo diosukanyi laso wayolanga tosha lonya. Naka akoka wa sho ntshɔ etale kema, kete omendji w’otshimbedi ayotɔlɔmbɛ dia sho ntshɔ l’etshumanelo kosukanyi laso ndo kayɔngɛnangɛna ekimanyielo kakiso.

⁵ Onde sho sangoyaka dia ntshɔ lo vakashi oka? Naka osɔku mbediɔ, onde takanakɔ woho watɔtɔka lo sanganya lɛnɛ atatatshu oka? Lande na keso hatokoke tosambisha kamɛ l’anangɛso wa lo wodja ako na? Pakɛ elimu ɛsɔ l’atei wa vakashi yaso mbeyaka monga ekimanyielo k’ɔlɔlɔ le so ndo le anyaso. (Rom. 1:11, 12) Onde hatotôkoka ndjasha l’esambishelo ka lokolo l’ɔlɔlɔ lam’ayotonga lo lɔkɛndɔ oka? Katotshu la Bible kaso ndo kianda y’ekanda y’ɔlɔlɔ lo dôto. Tokambe olimu la diaaso diayonga laso woho washidiya ɛrɛtarɛ aso a wadielo ndo wa wekelo wa Bible. Tôhɔ dia, kânga mbeso mbala mɔtshi l’ohomba wa mumuya l’elimu aso wa l’emunyi, kema dimɛna dia sho kalola ɛkɔngɔ ɛkɔngɔ l’olimu wakambɛso Jehowa.

⁶ Dinondo wayohomba nama di’elimu w’etshumanelo walɔngɔswami dimɛna. Naka dinondo dimɔtshi kana akambi w’olimu wambetsha, tɛdikɔ tayohombama mbɔsama di’akina kamba elimu wotowokamba. Lo mbewoya omendji wa lɔmbɔla yema la ntondo dia nshi yayowetsha, anangɛso akɔ wayowokimanyia dia nde mbeya lende ayohombama otshikitanelo ndjala.

⁷ Aha la mbidja tamu, Lotena eduwa la Losekatanya eko tena di’olimu w’efula. Koko, tɔkɛnyɔ tayokoka memadia olimu wakambaso dikambo dia Diolelo tena tshɛ. Tokambe olimu la tena di’ɔlɔlɔ tshɛ diatotanemɛ lo nshi ya vakashi. Toshikikɛ elimu woleki ohomba ndo w’endana la eko ka lo nyuma, ndo tomamemi tɛdikɔ takɔ l’ɔlɔlɔ tshɛ.​—Fil. 1:10.