Ekadimwelo Lo Wembola Anyu

◼ Kakɔna kahomba tanema lo bibliɔtɛkɛ ka Kalasa k’Olimu wa Teokrasi na?

Ekambi wa Nzambi kondjaka ekanda efula mɛtɛ wâlembetshiya awui wa lo Bible. Lam’ele apandjudi efula kema l’ekanda akɔ tshɛ, bibliɔtɛkɛ ka Kalasa k’Olimu wa Teokrasi, lo Mbalasa ka Diolelo, mbâkimanyiyaka dia vɔ sala eyangelo l’ekanda wele ondo totowokoka mbadia otondonga tɔ bu. Diɔ diakɔ diele bibliɔtɛkɛ kɛsɔ pombaka monga l’ekanda efula w’ohomba: ekadimwelo wa Bible wotshikitanyi, ekanda waki la Société weke ka tomba, omboho w’Olimu Aso wa Diolelo ndo wa vɔlimɛ ya Tshoto y’Etangelo la ya Réveillez-vous !, kâmɛ ndo Index des publications. Ayonga ɔlɔlɔ mbidja ndo dikisiɔnɛrɛ dia dimɛna dieke esadi a tomba. Wa encyclopédie, atlas kana ekanda wa gramatika kana w’ɛkɔndɔ w’andja ɔnɛ kokaka monga ohomba. Koko, oyango aso wa ntondo pombaka monga wa ndjâla l’ekanda watondja “ɔhɔmbɔ wa kɔlamelo ndo wa kɛsɔ.”​—⁠Mat. 24:​45, NW.

Ondo mbala mɔtshi sho todjaka abuku wavɔso tshɔdja lo bibliɔtɛkɛ ka Kalasa k’Olimu wa Teokrasi. Kema dimɛna mbidja abuku w’eshimu (romans), kɔmatɛrɛ ya Bible y’oma lo tamu ta wolo takadje anto amɔtshi, ndo ekanda wa filɔzɔfi kana watɛkɛta di’ɛtɛmwɛlɔ w’ɛdiɛngɛ. Bibliɔtɛkɛ ka Kalasa k’Olimu wa Teokrasi pombaka monga paka l’ekanda wayokimanyiya anto wayadiaka dia vɔ tetemala la pama lo nyuma.​—⁠1 Tim. 4:⁠15.

Omendji wa kalasa mbele l’ɔkɛndɛ wa bibliɔtɛkɛ, oyadi kânga ɔnangɛso okina kokaka sɔnama dia mbokimanyiya dia nde kotsha ɔkɛndɛ ɔsɔ. Nde la dia nama di’aha mbohɛ bibliɔtɛkɛ, lo mbidjaka ekanda w’eyoyo lɔkɔ kam’ayawɔ. Lokombo l’etshumanelo kakanga bibliɔtɛkɛ pombaka fundama dimɛna lo lɛkɛ la ntondo l’oseka dibuku tshɛ. Wayɔsɛdingolaka ekanda ɛnɔnyi tshɛ dia menda kana pombaka nɔngɔsɔla ɛmɔtshi kana mbanya ko mbidja ekina.

Onto tshɛ kokaka mbisha lonya lo dikambo sɔ lo kokɛka bibliɔtɛkɛ. Pombaka mendaka ɔlɔlɔ lam’anandaso abuku. Hatohombe tshika ana dia vɔ kɛnyaka l’ekanda akɔ ndo tatofundake ndoko dui lɔkɔ. Nɔtɛ kɛmɔtshi kofundami dimɛna kayokitshamaka lâdiko dia bibliɔtɛkɛ dia mboholaka anto ɔnɛ abuku hawotombe oma lo Mbalasa ka Diolelo.

Lam’ele tshumanelo di’eyoyo diekɔ lo mbatema tena tshɛ, bibliɔtɛkɛ efula mbeyaka pomba ekanda ɛmɔtshi. Apandjudi amɔtshi wele l’ekanda w’edjedja kokaka kanyiya dia mbasha etshumanelo. Dikumanyi mbeyaka mbɔsa yɛdikɔ dia nɔmba wa vɔlimɛ ya Tshoto y’Etangelo ya lo Falase yowofunda nto nshi nyɛ. Ngasɔ mbayoyala bibliɔtɛkɛ ka Kalasa k’Olimu wa Teokrasi ohomba efula, nɛ dia tɔ kayokimanyiyaka onto tshɛ dia nde mbishola mbɔkɔ y’akɛsɔ yoshami ya lo Dui dia Nzambi diasha ewo, lomba ndo yimba.​—⁠Tuk. 2:​4-6.