Onde Tekɔ La ‘Tɛndɛ Lo Demba’?
1 Sho kombolaka kotsha lotumu laso l’ɔlɔlɔ tshɛ, lotumu la nsambisha lokumu l’ɔlɔlɔ. Koko, anangɛso l’akadiyɛso efula hawokoke likotsha oko ahombama, nɛ dia hemɔ kana dikɔmɔ mbâshimbaka dia vɔ kamba lo yɛdikɔ yalangawɔ. Ondo wekɔ la pâ dia nɛmbia ɔkɔmwɛlɔ, djekoleko lam’ɛnawɔ anto akina wasalangana l’olimu.—1 Kor. 9:16.
2 Ɛnyɛlɔ ka Mbokoya: Ɔpɔstɔlɔ Paulo akakikɛ ‘tɛndɛ lo demba.’ Nde akasɛngasɛnga Jehowa mbala shato dia mbônyɛ otakanya ɔsɔ wa pâ efula, wakandelɛ ɔnɛ ‘ondjelo wa Satana’ wakɔ̂kɔmɔlaka wonya tshɛ. Kânga mbakidiɔ ngasɔ, nde akakikɛ ndo akatetemala l’olimu. Nde kokunyunyala la lonyangu ndo kokiyanaka wonya tshɛ dia hemɔ kande. Nde akayasha tshɛ. Sheke yande ndja oma l’eshikikelo kɛnɛ kakandalongola oma le Nzambi: ‘Ɔlɔlɔ ami wa mamba wambokoka le yɛ, nɛ dia wolo ami wekɔ lo tɛnama bamba lam’ele ɔhɔdu.’ Ɔhɔdu wa Paulo akayala wolo lam’akandetawɔ pâ kande ndo akandayaɛkɛ le Jehowa ndo le nyuma k’ekila dia mbikikɛ.—2 Kor. 12:7-10.
3 Woho wa Mbikikɛ: Onde demba diaso dia kɔnyangakɔnyanga todjɛka elelo l’olimu wakambɛso Nzambi? Naka eelo, kete tokoya dionga dia Paulo. Oyadi kânga okanga bu lo dikongɛ di’akambo nɛ wokoki shidiya hemɔ kana ɛkɔmɔ kaso pondjo, sho kokaka ndjaɛkɛ tshɛ le Jehowa, nɛ dia nde mbeyaka ehomba aso ndo ayotosha ‘wolo woleki wɔnɛ wokôngaka l’onto.’ (2 Kor. 4:7) Tokondja ɛlɔlɔ oma l’ekimanyielo katoshawɔ l’etshumanelo ndo tatoyâtolake l’anangɛso. (Tuk. 18:1) Naka ekɔ wolo le so dia nsambisha lo soko la soko, kete toyange kɛnɛ kokokiso ntsha kasungana dia nsambisha lo yoho ya tshakitudi kana lo telefɔnɛ.
4 Naka tɛndɛ diele lo demba susaka waaso aso wa kamba olimu, kete tatoyaokake oko anto wanganyi etale. Oko Paulo, sho lawɔ koka ‘mbewoya lokumu l’ɔlɔlɔ la ngandji ka mamba ka Nzambi,’ lo ndjela wolo aso ndo akambo wele laso. (Etsha 20:24) Tatohɛke dia, edja tshɛ kayotoyatshutshuyaka dia kotsha olimu aso, tekɔ lo ngɛnyangɛnya Jehowa.—Heb. 6:10.