Tɔlɔshana la “tende lu dimba”

“Ngandji kami ka mamba nkukaka le ye.”​—2 KORETO 12:9.

1, 2. (a) Lande na kahatahombe ndjakiyanya otamanya kânga lam’eso l’atei w’ehemba kana w’ekakatanu? (b) Lande na kahatakoke shisha wɛkamu aso kânga lam’eso l’atei w’ehemba?

“WANE tshe walanga ndjala la lumu l’ololo le Kristu Jesu, wayusuwa.” (2 Timote 3:12) Bonde kele dikambo sɔ ngasɔ na? Nɛ dia Satana mbutaka ɔnɛ onto kambɛka Nzambi paka l’ɔtɛ wa wahɔ ɛmɔtshi, ndo nde ekɔ lo sala tshɛ dia mɛnya ɔnɛ dikambo sɔ diekɔ ngasɔ. Mbala kɛmɔtshi, Yeso akewola apɔstɔlɔ ande wa kɔlamelo ate: ‘Satana akalɔmbɛ dia nyoyongola oko okuna w’eponga.’ (Luka 22:31) Yeso akeyaka dimɛna dia Nzambi mbetawɔka dia Satana tohemba lo tela ekakatanu wa wolo. Koko, dikambo sɔ halembetshiya dia okakatanu tshɛ watokomɛ lo lɔsɛnɔ ndjaka mbala kakɔ ɔtɔi oma le Satana kana oma le ɛdiɛngɛ ande. (Undaki 9:11) Koko Satana ekɔ lo nomɔlomɔ dia kamba l’ehomɔ tshɛ kele lande dia ndanya kɔlamelo yaso.

² Bible totɛka dia hatohombe ndjakiyanya otamanya dikambo di’ehemba aso. Oyadi kakɔna kakoka tokomɛ, tɔ kema dikambo di’oyoyo kana diahatakoke nongamɛ. (1 Petero 4:12) Ɔnkɔnɛ, teye dia ‘anyaso wa l’andja w’otondo wekɔ lo sowa la weho w’akambo akɔ wamɛ.’ (1 Petero 5:9) Ɛlɔ kɛnɛ, Satana ekɔ lo mbela okambi tshɛ waki Nzambi ekakatanu woleki wolo. Diabolo ngɛnangɛnaka mɛna woho wakawanaso l’ekakatanu efula wele oko tɛndɛ. Diakɔ diakambande la dikongɛ di’akambo nɛ dia nyomotofudiɛ ‘atɛndɛ l’alemba aso.’ (2 Koreto 12:7) Koko, ɛlɔshɛlɔ waki Satana hawohombe ndanya kɔlamelo yaso. Oko ‘wayotodiholɛ Jehowa mboka’ dia sho ndɔshana l’ohemba, nde ayosala woho akɔ wamɛ dia totsha l’etena keso l’ekakatanu wele oko atɛndɛ lo demba diaso.​—1 Koreto 10:13.

Woho wa ndɔshana la tɛndɛ

3. Jehowa ngande wakandakadimola Paulo lam’akandɔlɔmbɛ dia mbonyɛ tɛndɛ lo demba?

³ Ɔpɔstɔlɔ Paulo akalɔmbɛ Nzambi dia mbonyɛ tɛndɛ oma lo demba diande. “Dimi lakalombe Khumadiondjo tena satu dia minyiami engo kene.” Jehowa ngande wakandakadimola Paulo lo kɛnɛ kakandɔlɔmbaka l’etete tshɛ kɛsɔ na? Nde akokadimola ate: “Ngandji kami ka mamba nkukaka le ye: ne dia wulu ami atukukiamaka lu wodu.” (2 Koreto 12:8, 9) Nyɛsɔ tɔsɛdingole okadimwelo ɔsɔ ndo tende nganɛ wakokawɔ tokimanyiya dia ndɔshana l’ekakatanu tshɛ watɛnya pâ wele oko atɛndɛ.

4. Lo toho takɔna takakondja Paulo wahɔ oma lo ngandji k’otamanya kaki Jehowa?

⁴ Teye dia Nzambi akakeketsha Paulo dia monga la lowando lo ngandji k’otamanya kakandawôke oma lo tshimbo ya Kristo. Lo mɛtɛ, Paulo akatshɔkwama efula lo toho totshikitanyi. La ngandji tshɛ, Jehowa akawosha diɛsɛ dia nde koma ombeki waki Yeso, kânga mbakinde otunyi wa woke w’ambeki waki Yeso. (Etsha 7:58; 8:3; 9:1-4) L’ɔkɔngɔ diko, Jehowa akasha Paulo ɛkɛndɛ ndo waɛsɛ w’olimu w’ɔngɛnɔngɛnɔ efula. Tekɔ lo mboka hwe wetshelo wakokaso kondja. Oyadi kânga lam’eso lo tena dioleki wolo, tekɔ la waɛsɛ efula wakokaso monga la lowando lɔkɔ. Ehemba hawohombe pondjo tôhiya ɔlɔlɔ w’efula wakatɛnya Jehowa.​—Osambu 31:19.

5, 6. (a) Ngande waketsha Jehowa Paulo dia nkudu ka Nzambi “atukukiamaka lu wodu”? (b) Ngande wakɛnya ɛnyɛlɔ kaki Paulo dia Satana ekɔ kanga kashi?

⁵ Ngandji ka mamba kaki Jehowa kakakoke le nde lo yoho kina nto. Nkudu kaki Nzambi kambotakokaka dia tokimanyiya lam’eso l’atei w’ehemba. (Efeso 3:20) Jehowa aketsha Paulo ate nkudu ka Nzambi “atukukiamaka lu wodu.” Lo woho akɔna na? Nde akasha Paulo wolo tshɛ waki lande ohomba dia ndɔshana l’okakatanu ande. Lo wedi okina, etetemalelo kaki Paulo ndo woho wakandayaɛkɛ tshɛ le Jehowa akɛnya Akristo tshɛ dia Nkudu ka Nzambi kakadje otshumba lo dikambo diaki pami kɛsɔ ka wɔdu ndo kanga pɛkato. Kakianɛ, nyɛsɔ tɔsɛdingole kɛnɛ kakatshe Diabolo, ɔnɛ lasɛma ɔnɛ anto kambɛka Nzambi paka etena kewɔ la lɔsɛnɔ la dimɛna ndo laha l’ekakatanu. Kɔlamelo yaki Paulo yakasha okadimwelo lo kɛnɛ kendana l’awui wa kashi asɔ!

⁶ Paulo laki ntondo lo wedi waki Satana dia ndɔshana la Nzambi, aki osoyanyi wa woke w’Akristo ndo Ofarisɛ waki l’ohetoheto, aki mɛtɛ la lɔsɛnɔ la dimɛna efula nɛ dia nde akotɔ lo nkumbo k’ɔngɔnyi. Koko l’ɔkɔngɔ wa lâsɔ, Paulo akayokambɛka Jehowa ndo Kristo oko ‘ɔpɔstɔlɔ waki l’ɛse k’apɔstɔlɔ akina tshɛ.’ (1 Koreto 15:9) Oko wakinde ɔpɔstɔlɔ waki l’ɛse k’akina, nde akayakitshakitsha l’ɛse k’ɛlɔmbwɛlɔ k’olui-walɔmbɔla w’Akristo wa lo ntambe ka ntondo. Ndo nde akakikɛka la kɔlamelo tshɛ kânga mbakinde la tɛndɛ lo demba. Kânga mbakɔhɛnyɔla Satana efula, ehemba wa lo lɔsɛnɔ kokitshakitsha ohetoheto ande. Ndo Paulo koshisha pondjo elongamelo kande k’ɔnɛ nde ayotolɛ lo Diolelo diaki Kristo. (2 Timote 2:12; 4:18) Ndoko tɛndɛ, kana sui diakakoke kitshakitsha ohetoheto ande. Lâsɔ, sho lawɔ totetemale monga l’ohetoheto wa ngasɔ! Lo tosukɛ l’atei w’ehemba aso, Jehowa toshaka diɛsɛ dia lânde dia sho lawɔ mɛnya ɔnɛ Satana ekɔ kanga kashi.​—Tukedi 27:11.

Tɛdikɔ taki Jehowa tekɔ ohomba efula

7, 8. (a) Jehowa mbishaka ekambi ande wolo oma lo tshimbo yakɔna ɛlɔ kɛnɛ? (b) Lande na kele wadielo ndo wekelo wa Bible wa lushi la lushi ekɔ ohomba efula dia sho ndɔshana la tɛndɛ diele lo demba diaso?

⁷ Ɛlɔ kɛnɛ, Jehowa mbishaka Akristo wa kɔlamelo wolo oma l’ekimanyielo ka nyuma kande k’ekila, k’Ɔtɛkɛta ande, ndo oma lo tshimbo ya nkumbo k’Akristo k’anto l’ɔnango. L’ɛnyɛlɔ k’ɔpɔstɔlɔ Paulo, sho kokaka kitsha wetsho aso le Jehowa lo dɔmbɛlɔ. (Osambu 55:22) Kânga mbele mbeyaka monga ko Nzambi hatonye ehemba aso, nde kokaka tosha lomba la sho ndɔshana la wɔ, oyadi wɛnɛ wele wolo mbikikɛ. Jehowa kokaka nto tosha wolo mbut’ate ‘wolo woleki wɔnɛ wokongaka l’onto’ dia tokimanyiya dia sho mbikikɛ ehemba ɛsɔ.​—2 Koreto 4:7.

⁸ Ngande walongolaso ekimanyielo kɛsɔ? Sho pombaka mbeka Ɔtɛkɛta wa Nzambi l’etete tshɛ, nɛ dia lɔkɔ mbayototana esambelo kande ka shikaa. (Osambu 94:19) Lo Bible, sho mbadiaka ɛtɛkɛta wananda otema wakatɛkɛta ekambi waki Nzambi lam’akawɔlɔmbaka ekimanyielo kande. Ekadimwelo waki Jehowa wele mbala efula waki l’ɛtɛkɛta w’ekeketshelo wekɔ akambo wahombaso kana yimba la wɔ. Wekelo w’Ɔtɛkɛta wa Nzambi wayotokeketsha dia “wulu w’utamanya ayali uma le [Nzambi], aha uma le su shame.” Oko weso l’ohomba wa ndɛka mbo ya l’emunyi lushi tshɛ dia mbidja demba ɛtɛtɔ ndo kondja wolo, mbahombaso ndɛka ɛtɛkɛta wa Nzambi mbala la mbala. Onde sho salaka dikambo sɔ? Naka sho disalaka, kete tayɛna dia woho walongolaso ‘wolo woleki wɔnɛ wokongaka l’onto’ ayotokimanyiya dia mbikikɛ weho w’atɛndɛ tshɛ wa didjidji wakoka tosoya ɛlɔ kɛnɛ.

9. Ngande wakoka dikumanyi sukɛ wanɛ wele lo ndɔshana l’ekakatanu?

⁹ Dikumanyi di’Akristo dioka Nzambi wɔma koka monga oko “eshamelu uma lu lopepe,” ndo “uku ukumbo uma lu ngimbi,” mbut’ate anto washa ekokelo oma l’asui ndo oma l’ekakatanu. Dikumanyi diasungana mbɔsama oko eshamelo, pombaka nɔmbaka Jehowa la ndjakitshakitsha ndo l’otema ɔtɔi dia nde mbasha ‘lolimi l’anto wambetshama’ woho wa vɔ mbeya kadimolaka wanɛ wasowa l’ɛtɛkɛta wasungana. Ɛtɛkɛta wa dikumanyi kokaka monga oko apɔpɔ w’ashi wakeketsha ndo wɔdia wɔɔngɔ lo tena dia wolo dia lo lɔsɛnɔ. Lo kamba l’ɛtɛkɛta w’‘esambelo otsha le anima wambɔkɔmɔ,’ dikumanyi mɛtɛ sukɛka anangɛwɔ ndo akadiyɛwɔ wa lo nyuma wele ondo wambɔkɔmɔ l’ɔtɛ w’atɛndɛ amɔtshi wele lawɔ l’alemba.​—Isaya 32:2; 50:4; 1 Tesalonika 5:14.

10, 11. Ngande wakoka ekambi waki Nzambi kimanyiya anto akina wele l’atei w’ehemba wa wolo?

¹⁰ Ekambi waki Jehowa tshɛ wekɔ l’atei wa nkumbo kande k’Akristo kele kamɛ. Eelo, tekɔ “untu l’untu [oko] etenyi ka dimba,” ndo ‘sho lawɔ tekɔ l’ɔkɛndɛ wa mbokana ngandji lam’asaso.’ (Romo 12:5; 1 Joani 4:11) Ngande wakokaso kotsha dikambo sɔ na? Lo ndjela 1 Petero 3:8, sho kotshaka dikambo sɔ lo ‘mbokana kɛtshi, lo monga la ngandji k’anto l’ɔnango, ndo lo monga l’etema wa memakana’ otsha le anto tshɛ wotɔ laso lo mbetawɔ. Lo dikambo dia wanɛ washindanɛ la tɛndɛ dimɔtshi dia lânde lo demba, oyadi dikɛnda kana opalanga, sho tshɛ kokaka mbaɛnya ngandji kaso. Woho akɔna na?

¹¹ Sho pombaka sala la wolo dia mbidja yimba lo asui awɔ. Naka tekɔ etema wolo, kana la wendjodi, kete lâsɔ tayonyomoleka mbasha pâ. Woho weyaso ehemba wele lawɔ, pombaka totshutshuya dia monga la yewo l’ɛtɛkɛta watondjaso, woho watondjaso ɛtɛkɛta akɔ, ndo lo kɛnɛ katshaso. Naka sho mɛna akambo la sso di’ɔlɔlɔ ndo mbakeketsha, kete tayokoka kitshakitsha pâ kawɔ oyadi woho akɔna wa tɛndɛ diele lo mbasoya. Lâsɔ, tayokoka mbaɛnya dia tekɔ dihomɔ di’ekeketshelo le wɔ.​—Kolosai 4:11.

Woho wakatondoya anto amɔtshi ehemba

12-14. (a) Kakɔna kakasale Okristo ɔmɔtshi dia ndɔshana la hemɔ kande ka kansɛrɛ? (b) Ngande wakosukɛ akadiyɛnde ndo anango wa lo nyuma?

¹² Etena kɛnɛ katatasukana otsha l’ekomelo ka nshi y’ekomelo nyɛ, “asui” wekɔ lo tatetemala monga efula lushi la lushi. (Mateu 24:8) Omalɔkɔ, ehemba wekɔ lo komɛ onto tshɛ lanɛ la nkɛtɛ, djekoleko ekambi wa Jehowa wa kɔlamelo wayanga dia sala lolango lande. Tɔsɛdingole ɛnyɛlɔ k’Okristo ɔmɔtshi wakamba olimu wa lo tena tshɛ. Wakotane la kansɛrɛ ndo wakahombe mbâta l’onyɔ dia mbonya tokewo tôta sɔyi ndo tɔnɛ takengama tɔtshɔngu tɔmɔtshi ta lo dikila takimanyiya demba dia ndɔshana la hemɔ. Lam’akeye kadiyɛso nde l’omɛnde dia nde ekɔ la hemɔ kɛsɔ, vɔ wakalɔmbɛ l’ɔsɛngɔsɛngɔ tshɛ Jehowa l’etena k’otale efula. L’ɔkɔngɔ diko, nde akate dia vɔ wakonge la wɔladi wahawakoke ndo nembetshiya. Ɔnkɔnɛ, nde akakikɛ oyadi lo tena di’ɔlɔlɔ kana dia pâ, djekoleko etombelo waki la woho w’osakelo wakawosakɛka.

¹³ Dia nde ndɔshana l’okakatanu ɔsɔ waki lande, kadiyɛso kɛsɔ akeke akambo efula lo kɛnɛ kendana la hemɔ ka kansɛrɛ. Nde akɛnana l’enganga ande. Lo Tshoto y’Etangelo la Réveillez-vous !, ndo l’ekanda ekina w’Akristo, nde akatane ɛkɔndɔ wɛnya woho wakalɔshana anto amɔtshi la hemɔ kɛsɔ lo timba tawɔ. Nde akadia nto avɛsa wa lo Bible wɛnya akoka wele la Nzambi wa kokɛ ekambi ande lo tena dia wolo, ndo awui akina wakokimanyiya efula.

¹⁴ Sawo dimɔtshi diendana la woho wa ndɔshana l’ɔkɔmwɛlɔ diaki l’ɛtɛkɛta ɛnɛ wa lomba efula: “One latuyatulaka uma le antu akina, atuyangaka paka lulangu landi lutu.” (Tukedi 18:1) Ɔnkɔnɛ, sawo sɔ diakasha dako nɛ: “Toyanganyake l’anto akina.”a Kadiyɛso ekɔ lo mbuta ate: “Anto efula wakambutɛ dia vɔ wakanɔmbɛka; akina wakatelefɔnɛ. Dikumanyi dihende wakatelefɔnɛka mbala la mbala dia mbeya woho wayami. Anto wakatomɛ alɛmbɔlɛmbɔ ndo mɔyɔ lo wa kartɛ. Amɔtshi wakakatɛka ndo mbo ya ndɛ. Ndo, efula wakataka dia ndjɔmbɔsa woho wa tɔlami otsha lo dihole diakawasakɛka.”

15-17. (a) Ngande wakalɔshana Okristo ɔmɔtshi l’ekakatanu wakaye oma l’aksida wakandasale? (b) Ngande wakokimanyiya as’etshumanelo kande?

¹⁵ Okambi ɔmɔtshi wa Jehowa waya edja efula lo mɛtɛ wa l’osomba wa l’États-Unis welɛwɔ New Mexico, akasale aksida mbala hiende la mutuka. Nde akahomɔ lo kɔtshi la l’ahɛka ndo dikambo sɔ diakayolekaka mbolola hemɔ kande ka l’asɔnga kakashindanɛka lande ɛnɔnyi 25 w’etondo. Nde ate: “Dimi laki l’okakatanu wa woke dia sungukadja ɔtɛ kana mɛmba ɛngɔ kele kânga la kilɔ hiende tsho. Koko alɔmbɛlɔ ami wa l’etete otsha le Jehowa wakasukɛ efula. Ndo asawo wa lo Tshoto y’Etangelo wakatekaka wakakimanyiya nto efula. Sawo dimɔtshi diakatɛkɛta dia Mika 6:8, diakɛnya ɔnɛ kɛndakɛnda la ndjakitshakitsha la ntondo ka Nzambi nembetshiyaka mbeya elelo wele laso. Dikambo sɔ diakakimanyiya dia mbeya ɔnɛ kânga mbakimi la pâ kɛsɔ, dimi takamahombe kɔmɔ otema, kânga mbakimi kosambishaka efula oko wakamakombolaka. Kɛnɛ koleki ohomba ele mbokambɛ l’otema ɔtɔi.”

¹⁶ Nde mbutaka nto ate: “Dikumanyi mandolakami mbala tshɛ lo welo wadjami dia mbɔtɔka lo nsanganya ndo wa tombaka l’esambishelo. Akɛnda wakambishaka mɔyɔ wa lokumbatɛ. Ambatshi mboka waki l’asolo wa lotutsha efula oya le mi ndo mbala efula vɔ wakatshikitanyaka dikongelo diawɔ lo nshi yakampekaka hemɔ dia tomba l’esambishelo. Etena kakongaka yanyi kana tshitshi efula, vɔ wakatshɔka lami lo waendelo w’eyoyo kana le ambeki awɔ wa Bible. Ndo lam’ele dimi kokokaka mɛmba tapa diele l’abuku lɔkɔ, apandjudi akina wakambidjɛka abuku ami l’atapa awɔ etena kakatatombaka l’esambishelo.”

¹⁷ Ondo tambɛna woho wakakimanyiya dikumanyi dia l’etshumanelo la ambetawudi akina akadiyɛso ahende asɔ dia vɔ ndɔshana la dikɔmɔ diaki lawɔ diaki oko atɛndɛ l’alemba awɔ. Vɔ wakawasha ekimanyielo kaki lawɔ ohomba dia kotsha ehomba awɔ wa lo nyuma, wa lo demba ndo wa longandji. Onde dikambo sɔ hakotshutshuya dia kimanyiya ananyɔ ndo akadiyɛyɛ wele l’atei w’ekakatanu? Ndo nyu akɛnda kokaka kimanyiya as’etshumanelo kanyu walɔshana l’atɛndɛ l’alemba awɔ.​—Tukedi 20:29.

18. Ekeketshelo kakɔna kakokaso tana l’ɛkɔndɔ watomba lo Tshoto y’Etangelo la Réveillez-vous ! na?

¹⁸ Tshoto y’Etangelo la Réveillez-vous ! tondjaka ɛkɔndɔ efula w’Ɛmɛnyi wa Jehowa wakalɔshana ndo watetemala la ndɔshana l’ekakatanu wa lo lɔsɛnɔ. Naka wɛ ayadiaka asawo asɔ mbala la mbala, kete wɛ ayɛna di’ananyɔ ndo akadiyɛyɛ efula wa lo nyuma wa l’andja w’otondo wakakikɛ ekakatanu wendana l’ekondjelo, ovushelo wa wakiwɔ wa ngandji lo mpokoso yakatombe, ndo ekakatanu w’oma l’akambo w’ata. Akina wekɔ lo ndɔshana la hemɔ mɔtshi yalɛndja demba. Awui amɔtshi wakoka wanɛ wele l’alemba w’amɛna mbasala aha l’okakatanu hawokoke salema oma le wanɛ wele la hemɔ. Hemɔ kawɔ mbadjaka l’ohemba woleki tshɛ wolo, djekoleko etena kahawakoke tomba l’elimu w’Akristo oko wakombolawɔ. Vɔ wekɔ la lowando l’efula lo ekimanyelo kawasha anangɛwɔ ndo akadiyɛwɔ, oyadi akɛnda kana epalanga!

Etetemalelo mbelaka ɔngɛnɔngɛnɔ

19. Lande na kakakoke Paulo ngɛnangɛna kânga mbakinde l’atei w’ehemba ndo la wɛɔdu wele oko atɛndɛ?

¹⁹ Paulo akangɛnangɛna lo menda woho wakokeketsha Nzambi. Nde akate ate: “Layuyatumbula lu wodu ami la ongenongeno efula, ne dia wulu a Kristu ankhukhume. Okone dimi latongenangenaka lu wodu, lu tengo, lu ehumba, lu asui, lu lokonyo, dia dikambu dia Kristu; ne dia lam’emi wodu kemi la wulu.” (2 Koreto 12:9, 10) L’ɔtɛ w’akambo wakokomɛ, Paulo akakoke mbuta l’eshikikelo tshɛ ate: “Dimi halati dikambu dia uhumba a diango, ne dia lambekela uku wemi one, ndu dimi ngenangenaka wuhu ako. Dimi mbeyaka wuhu wa nkitshakitshama, ndu wuhu wa ndjala la efula. Lu wehu tshe ndu lu akambu tshe, dimi lakeki wuhu wa nduta ndu wuhu wa mbuka ndjala: wuhu wa ndjala la efula, ndu ndjala la uhumba. Dimi mbeyaka ntsha akambu tshe la wulu wa one latunkikitshaka.”​—Filipi 4:11-13.

20, 21. (a) Bonde kakokaso tana ɔngɛnɔngɛnɔ lo kana lomba l’‘akambo wahɛnama’? (b) Naa ‘akambo wahɛnama’ amɔtshi walongamɛyɛ ndjɛna lo Paradiso ka lanɛ la nkɛtɛ?

²⁰ Ɔnkɔnɛ, lo mbikikɛ oseka tɛndɛ tshɛ dia didjidji dia lo demba diaso, sho kokaka kondja ɔngɛnɔngɛnɔ w’efula lo mɛnya onto tshɛ dia nkudu ka Jehowa kambokoma kokele oma lo wɔdu aso. Paulo akafunde ate: “Okone shu hatuheko. . . . Utema asu atuyalaka uyuyu la lushi la lushi. Ne dia asui asu wa tshitshe wa kakiane wambutamanya ntutungela lutumbu la wuki pundju. Ne dia shu . . . tatendaka diango diahenama, ne dia diango . . . diahenama dieli pundju.”​—2 Koreto 4:16-18.

²¹ Ekambi efula waki Jehowa wekɔ lo nongamɛ ɛlɔ kɛnɛ dia sɛna lo Paradiso kande ka lanɛ la nkɛtɛ ndo ngɛnangɛna l’ɛtshɔkɔ wakandalake. Ɛtshɔkɔ ɛsɔ koka mbɔsama oko akambo ‘wahɛnama’ le so ɛlɔ kɛnɛ. Koko, etena kekɔ lo ndjasukana esadi esadi kayotɛna ɛtshɔkɔ ɛsɔ la washo asɔ hita, ndo ngɛnangɛna la wɔ pondjo pondjo. Ɔtshɔkɔ ɔmɔtshi wayotokondja ele otshungwelo, mbut’ate hatongaki nto pondjo l’okakatanu wele oko tɛndɛ! Ɔnaki Nzambi “[ay]ulanya elimu wa uhimbanyi” ndo “nembia laki la wulu a nyoi.”​—1 Joani 3:8; Heberu 2:14.

22. Wɛkamu ndo eshikikelo kakɔna kahomba monga laso?

²² Ɔnkɔnɛ, oyadi tɛndɛ diakɔna diatɛnya pâ lo demba ɛlɔ kɛnɛ, nyɛsɔ totetemale ndɔshana ladiɔ. L’ɛnyɛlɔ ka Paulo, tayonga la wolo wa sala dikambo sɔ oma l’ɔlɔlɔ waki Jehowa, latosha wolo la lokaho tshɛ. Lam’ayotonga lo Paradiso ka la nkɛtɛ, tayotombolaka Jehowa Nzambi kaso lushi tshɛ l’ɔtɛ w’akambo ande wa mamba lo wahɔ aso.​—Osambu 103:2.

[Nɔtɛ ka l’ɛse ka dikatshi]

Ngande wayoyokadimola?

• Lande na ndo ngande wahemba Diabolo dia ndanya kɔlamelo y’Akristo wa mɛtɛ?

• Ngande wele nkudu ka Jehowa ‘komiaka kokele lo wɔdu’?

• Ngande wakoka dikumanyi ndo anto akina keketsha wanɛ wadiɛnɛ l’ekakatanu?

[Osato wa lo lɛkɛ 13]

Mbala shato y’etondo Paulo akalɔmbɛ Nzambi dia nde mbonyɛ tɛndɛ diaki lo demba diande