Tosambisha Oma Lo Lɔkɛwɔ Laso L’ɔlɔlɔ
1 L’andja wa nshi nyɛ watsha onto tshɛ oko alangande, akɛnda efula wahayâkiyanya kânga yema nanyaka nsɛnɔ yawɔ l’ɔnwɛlɔ a kândji, loseka, ɔtɔmbɔkwɛlɔ ndo akambo a ngala. Koko, akɛnda wele l’atei w’etshumanelo k’Akristo wekɔ la lɔkɛwɔ la dimɛna, la ndjâka ndo ɔlɔ menda ndo dui diakɔ diekɔ dimɛna mɛtɛ lo washo wa Jehowa. Vɔ nsambishaka anto oma lo lɔkɛwɔ lawɔ ndo vɔ koka kotwama oya lo sɔlɔ.—1 Pet. 2:12.
2 Awui efula wakatshama mɛnyaka ɔnɛ lɔkɛwɔ la dimɛna efula lele l’akɛnda w’Akristo akâmbiya anto wâshishima. Ombetsha ɔmɔtshi wa omoto akate lo kalasa la ntondo k’ambeki tshɛ lo dikambo di’ombeki ande ɔmɔtshi wele Ɔmɛnyi wa Jehowa ate: Nzambi k’ɔna omoto ɔnɛ kelɛwɔ Jehowa, ekɔ Nzambi ka mɛtɛ. Nde akate ɔsɔku nɛ dia ɔna omoto akɔ aki nshi tshɛ la lɔkɛwɔ l’ɔlɔlɔ. Ombetsha okina nto akafundɛ la Société ate: “Lambolanga nyandola nɛ dia nyekɔ l’akɛnda w’ɛlɔlɔ efula l’ɔtɛmwɛlɔ anyu. . . . Akɛnda wele lakanyu mɛtɛ mbishaka ɛnyɛlɔ k’ɔlɔlɔ efula. Vɔ nɛnyaka nondo diawɔ, wekɔ la loshilambo ndo ndɔtaka lo yoho yasungana. Ndo nto, vɔ mbeyaka Bible kawɔ dimɛna hakoke! Ɔnɛ mɛtɛ kele ɔtɛmwɛlɔ!”
3 Ombetsha ɔmɔtshi wa omoto akâmbe hakoke lo menda lɔkɛwɔ l’ɔlɔlɔ l’ombeki ande wa pami w’ɛnɔnyi esambele ndo ambutshi ande wekɔ Ɛmɛnyi wa Jehowa. Nde akangɛnangɛna memakana ndo ɔlɔlɔ waki ɔn’akɔ, otshikitanyi l’ana w’apami akina tshɛ. Nde akâmbe efula dia mɛna woho wɔsande awui wa l’ɔtɛmwɛlɔ awɔ la nɛmɔ efula, hoke sɔnyi lo woho wotshikitanyinde l’ana akina oma lo mbetawɔ kande. Nde akɛnyi dia ɔn’akɔ aki la nkum’otema k’ɔlɔlɔ ndo akakokaka ‘tshikitanya ɔlɔlɔ la kɔlɔ.’ (Heb. 5:14) L’ɔkɔngɔ, nyango ɔn’akɔ akatshu dia tenda ombetsha akɔ, ko akatatɛ mbeka la nde Bible. L’ɔkɔngɔ diko, ombetsha ɔsɔ akabatizama ndo akayongaka ombatshi mboka wa pondjo!
4 Ɔlɔngɔlɔngɔ ɔmɔtshi akasɛngiyama la lɔkɛwɔ l’ɔlɔlɔ l’ɔna omoto ɔmɔtshi laki Ɔmɛnyi wa Jehowa lakɔtɔka la wɔ kalasa. Nde mɛtɛ akatshikitanaka l’ana akina tshɛ: aki la loshilambo la mamba, nangaka mbeka hakoke, ndɔtaka nshi tshɛ dimɛna; ndo nto, nde kɔmɛngɔlaka l’ana w’apami la kanyi ya nangana awɔ oko akatshaka ana amato akina. Ɔlɔngɔlɔngɔ akɔ akɛnaka dia ɔna omoto ɔsɔ akayelaka awui wa lo Bible lo lɔsɛnɔ lande. Nde akawombola awui wendana la mbetawɔ kande ko kɛnɛ kakandawotɛ akananda otema ande. Nde akatatɛ mbeka Bible, kem’edja akabatizama, l’ɔkɔngɔ akayongaka ombatshi mboka ko ndjokoma ose Bɛtɛlɛ.
5 Naka wɛ ekɔ dikɛnda di’Okristo dialanga sambisha anto akina, kete endaka lɔkɛwɔ layɛ ɔlɔlɔ l’awui tshɛ. Toyadjake pondjo lo wale lo ndjela yimba ya l’andja ɔnɛ y’onto tshɛ tshaka kɛnɛ kalangande, oyadi lo waonga, lo tokanyi kana lo yoho ya sɛna. Onga ɛnyɛlɔ k’ɔlɔlɔ efula l’ɛtɛkɛta watondjɛ, l’ɔlɔtɔ, l’ɔlɔngɔswɛlɔ a divo, aha paka lam’eyɛ l’esambishelo oto kana lo nsanganya, koko ndo lam’atshwɛ la kalasa kana la tɔkɛnyɔ. (1 Tim. 4:12) Ande ɔlɔ wayonga layɛ etena kayɔngɛnangɛna onto ɔmɔtshi mbeka sɔlɔ nɛ dia wɛ ‘akangamula osase ayɛ’ oma lo lɔkɛwɔ layɛ l’ɔlɔlɔ lee!—Mat. 5:16.