Ɛlɔngɔlɔngɔ l’esekaseka wahɛta oko esase
1. Ngande wɛnya Bible woho wayeyama Akristo ndo ngande wɔtɔnɛ ɛtɛkɛta ɛsɔ l’ɛlɔngɔlɔngɔ l’esekaseka w’Akristo ɛlɔ kɛnɛ?
1 Yeso akatɛ ambeki ande ate: ‘Nyu nyekɔ yanyi ya la nkɛtɛ.’ (Mat. 5:14, 16) Lo ɛnyɛlɔ k’osomba wele la diko dia dikona, watongaimaka la osase a yanyi, vɔ tshikitana l’anto akina. Ɛlɔ kɛnɛ ɛlɔngɔlɔngɔ l’esekaseka w’Akristo wekɔ ‘lo mpɛta oko esase lo andja ɔnɛ’ oma lo lɔkɛwɔ lawɔ la dimɛna ndo oma l’ohetoheto awɔ l’olimu w’esambishelo.—Fil. 2:15; Mal. 3:18.
2. Naa toho tɔmɔtshi takokayɛ sambisha embetsha ndo asekayɛ wa la kalasa?
2 La kalasa: Ngande wakokayɛ sambisha la kalasa? Ɛlɔngɔlɔngɔ ɛmɔtshi wakakambe dimɛna la ɛkɛtshanyelo wa la kalasa lo asawo wele oko dinɔnɔ dia wolo, ohilwelo ndo odiakelo wa nyemba y’anto ndo awui akina. Kadiyɛso kɛmɔtshi akakambe la dɛvɔarɛ diakawawosha lo dikambo dia terɔrismɛ dia sambisha kɛnɛ kendana la Diolelo diaki Nzambi oko wediɔ elongamelo ka mɛtɛ le anto. Ombetsha ande akâmbe efula oma lo tokanyi tande ta dimɛna ndo dui sɔ akakimanyiya dia nde nyomosambisha nto.
3. Ngande wakoka osase ayɛ mpɛta la kalasa oma lo lɔkɛwɔ layɛ?
3 Yoho kina ya mpɛta oko osase ele oma lo lɔkɛwɔ layɛ, oma lo ɔlɔtɔ ndo ɔlɔngɔswɛlɔ ayɛ wa divo wa dimɛna. (1 Kor. 4:9; 1 Tim. 2:9) Etena kɛna ambeki ndo embetsha ayɛ dia lɔkɛwɔ layɛ tshikitana, amɔtshi mbeyaka kotwama oma lo akambo wa mɛtɛ oko etombelo wa lɔkɛwɔ layɛ l’ɔlɔlɔ ndo dui sɔ koshaka diaaso dia sambisha akambo wa mɛtɛ wa lo Bible. (1 Pet. 2:12; 3:1, 2) Kânga mbele kɛnɛmɔla waonga waki Nzambi kema dui dia wɔdu, Jehowa ayokɔtshɔkɔla efula. (1 Pet. 3:16, 17; 4:14) Dia memula nsaki k’onto lo lokumu l’ɔlɔlɔ wɛ mbeyaka mbadia ekanda walembetshiya Bible wonya wa diomuyelo kana mbatshika lo dihole diakoka anto akina mɛna.
4. Naa ɛlɔlɔ ɛmɔtshi waya lo sambisha la kalasa?
4 Tshika dia osase ayɛ mpɛta la kalasa keketshaka mbetawɔ kayɛ ndo kokimanyiyaka dia wɛ ndjafuna lo yoho ya dimɛna lo olimu wakambɛyɛ Jehowa. (Jer. 9:24) Ndo kɛsɔ mbeyaka monga ekokelo. Kadiyɛso kɛmɔtshi akate ate: “Ɔlɔlɔ ɔmɔtshi wakondjami lo mbutɛ ambeki akina awui wendana la dietawɔ diami ele vɔ hawotshutshuya dia dimi sala awui wahɔtɔnɛ la kɛnɛ kata Bible.”
5. a) Ngande wakahamia ɛlɔngɔlɔngɔ l’esekaseka ɛmɔtshi olimu awɔ? b) Naa eyango ayɛ wa lo nyuma?
5 Hamia olimu ayɛ: Yoho kina yahɛta ɛlɔngɔlɔngɔ l’esekaseka oko esase ele lo pamia olimu awɔ. L’ɔkɔngɔ wa nde shidiya kalasa ka lâdiko, ɔnangɛso ɔmɔtshi akonɔ dia tokamba lɛnɛ aki ohomba efula w’apandjudi wa Diolelo. Nde aki lo etshumanelo ka tshitshɛ kaki paka l’ekumanyi ɔtɔi. Nde akafundɛ ɔngɛnyi ande ɔmɔtshi ate: “Lekɔ lo nsɛna nshi yoleki dimɛna ya lo lɔsɛnɔ lami lanɛ. Olimu w’esambishelo wekɔ dimɛna efula lanɛ! Sho tɛkɛtaka l’oseka onto tshɛ yɛdikɔ ya minitɛ 20, lam’ele anto nangaka mpokamɛ kɛnɛ tshɛ kalangaso mbatɛ.” Nde akakotsha ate: “Dimi kombolaka dia ɔlɔngɔlɔngɔ tshɛ sala woho ɔnɛ ndo mboka woho wokami. Ndoko koleki kambɛ Jehowa la kɛnɛ tshɛ kele laso.”
6. Ɛngɔ kakɔna kangɛnangɛnayɛ le ɛlɔngɔlɔngɔ l’esekaseka wa lo etshumanelo kayɛ?
6 Sho ndjafunaka lo dikambo dianyu ɛlɔngɔlɔngɔ l’esekaseka wahɛta oko esase lo andja ɔnɛ! (1 Tes. 2:20) Oko wakambɛyɛ Jehowa l’otema ayɛ tshɛ, la anima ayɛ tshɛ la yimba yayɛ tshɛ ndo la wolo ayɛ tshɛ, wɛ ayolongola “kakiane l’etena kene . . . tena lukama; ku l’etena kayayi, lumu la pundju.”—Mako 10:29, 30; 12:30.