Tosembole Ɔtɛkɛta Lam’adiaso!

Efula l’atei aso wekɔ l’okakatanu dia mbadia avɛsa watowowashaka. Koko, akina mbâdiaka lo yoho yekola ampokami yimba. Ko, naa yoho y’ɔlɔlɔ yahombaso mbadiaka avɛsa oma ko kakianɛ na? Okanda wa mbeka mbadia la funda wele l’ɔtɛ a dui ɔnɛ Appliquez-vous à la lecture et à l’écriture mɛnyaka dikambo sɔ hwe. Toyatshutshuya dia mbutaka woho watawɔ lo lɛkɛ 75: “Naka sho nangaka nembetshiya kɛnɛ kelɛwɔ anima, sho kokaka menda lo Etatelo, tshapita ya hende, divɛsa di’esambele. Wayofunda divɛsa sɔ nganɛ: Etatelu 2:⁠7. . . . Woho akɔ wâmɛ, sho kokaka menda lo tshapita ya samalo ya dibuku dia Mateu, oma lo divɛsa dia divwa polo dia dikumi l’asato . . . Vɔ fundaka nganɛ: Mateu 6:​9-13.” Woho akɔ wâmɛ, Mateu 6:​9, 13, ayadiemaka nganɛ: Mateu tshapita ya samalo, divɛsa dia divwa la dia dikumi l’asato. Takɛnyi dia hawote tolembetelo ta wadielo (les signes de ponctuation). Vɔ mbutaka “polo” kana “la” kânga tshika aha mbuta. Hawote ɔnɛ: “Mateu tshapita ya samalo, divɛsa divwa, shilola dikumi l’asato!” Naka tayosembolaka ɔtɛkɛta lam’adiaso kete tayoyaɛnya dia tekɔ ekambi ‘walakanya ɔtɛkɛta wa sɔlɔ woho wosembwe’ oko anangɛso akina wambotshunda lo nyuma.​—⁠2 Timote 2:15; 1 Koreto 1:⁠10.