Onde Ngɔndɔ Ka Divwa Kayofundama L’abuku W’ɛkɔndɔ?

¹ Ɔnɔnyi wa 1963 akafundama l’abuku w’ɛkɔndɔ w’ekambi wa Jehowa. Onde wɛ mbeyaka lande na? Ɔnɔnyi ɔsɔ, lofulo l’apandjudi lakakome miliyɔ l’andja w’otondo. Otondongaka wɛ aki lo sɔlɔ nshi shɔ, tshike wɛ otohɔ mɛtɛ ohetoheto waki la so dia mɛna lokema l’apandjudi ngasɔ wasambisha losango la Diolelo! Ɛlɔ kɛnɛ wodja aso vɔamɛ oto wekɔ l’apandjudi 108000. Koko, ngɔndɔ tshɛ, anto oko 10374 l’atei awɔ hawokimɔ alapɔlɔ awɔ w’olimu.

² Toshidiya Tɔfwɛfwɛ: Lo Ngɔndɔ ka Divwa, naka onto tshɛ l’atei aso kimɔ alapɔlɔ, kete lofulo l’apandjudi layodɛ lo mbilo ngaso. Naka weolo wayotodja monga l’etombelo w’ɔlɔlɔ, kete ngɔndɔ kɛsɔ kayofundama mɛtɛ l’abuku w’ɛkɔndɔ! Sho kokaka kotsha oyango ɔsɔ naka onto tshɛ l’atei aso mbisha lonya.

³ Naka tekɔ lo nanga ntshɔ lo vakashi, kete sho kokaka tâsambishisha efula la ntondo ka ntshɔ. Tɛ̂mbɛ traktɛ, tobukubuku kana periodikɛ woho wa tashaka anto wayohomanaka la so. Ondo kana tayetsha ndo etenyi k’ɔlɔlɔ ka vakashi yaso lo sambishaka kâmɛ l’apandjudi wele lɛnɛ ayototshɔ.

⁴ Kânga naka hatoyokoka sɛkɔ l’ɔkɔkɔ wa hemɔ kɛmɔtshi, tayongaka tsho la diaaso dia sambisha. Sho koka sambisha enganga, ɛfɛlɛmɛ kana onto okina tshɛ laya a ndjotenda. Ondo sho koka sambisha ndo lo mikanda kana lo telefɔnɛ.

⁵ Aha la tamu, amɔtshi wayɔngɛnangɛna ekimanyielo kaso dia vɔ sambisha lo Ngɔndɔ ka Divwa. Dikumanyi, ekambi w’olimu ndo anɔmbɔdi wa wekelo wa dibuku wayɔsa tɛdikɔ dia mbâkimanyiya. Djekoleko, tatohɛke kimɔ alapɔlɔ aso w’olimu esadi l’ekomelo ka ngɔndɔ woho wa sho mbadiema l’ɔnɔngɔ w’apandjudi akina lo Ngɔndɔ ka Divwa.

⁶ Tɔngɛnɛngɛnɛ Diɛsɛ Diele Laso: Olimu wa sambisha ekɔ ‘eombelo k’ɔlɔlɔ.’ (2 Tim. 1:14) Sho ngɛnangɛnaka diɛsɛ diakatakondja dia sambisha lokumu l’ɔlɔlɔ. (1 Tes. 2:⁠4) Naka sho kanyiya kɛnɛ tshɛ kakatosalɛ Jehowa, kete sho pombaka sokoyama dia kamba olimu ɔsɔ w’ohomba efula la kɔlamelo tshɛ ɔnɔnyi ɔnɛ w’otondo. Tatɛnake ndoko ema atoshimba dia sambisha tena la tena. Totshe tshɛ dia Ngɔndɔ ka Divwa fundama l’abuku w’ɛkɔndɔ w’olimu wa Jehowa ndo tɔshi yɛdikɔ ya sambishaka dikambo diande ngɔndɔ tshɛ!​—⁠Osam. 34:⁠1.