Tokoya Jehowa lo woho wende kema la shɔnɔdi
1 Jehowa ndjâkiyanyaka dikambo diaso. Nde bu la shɔnɔdi ndo mbetawɔka onto tshɛ latsha lolango lande. (Etsha 10:34, 35) Ndo Yeso lawɔ komonga la shɔnɔdi lam’akandasambishaka anto. (Luka 20:21) Sho pombaka mbokoya ɛnyɛlɔ kawɔ, oko akawaokoya Paulo, ɔnɛ lakafunde ate: “Ne dia Khumadiondjo kako kame, keli Khumadiondjo k’antu tshe. Ndi atukimoka engonyi andi le wane tshe watuwetaka.”—Romo 10:12.
2 Nzambi tombwamaka lam’asambishaso anto tshɛ wahomana la so lokumu l’ɔlɔlɔ la Diolelo diakinde. Sho la dia tetemala mbewoya anto akina losango lɔsɔ la dimɛna efula, oyadi kabila kakɔna kewɔ, dihole diele lawɔ lo tshunda di’anto, kalasa kakawɔtɔ, kana ekondjelo kawɔ. (Romo 10:11-13) Kɛdikɛdi sho pombaka sambisha anto wayotohokamɛ, oyadi apami, wamato, ɛlɔngɔlɔngɔ, esekaseka kana epalanga. Sho la dia sambisha l’asoko tshɛ dia mbisha onto tshɛ diaaso dia mboka akambo wa mɛtɛ.
3 Yasha le onto tshɛ: Oyango aso ele sambisha onto tshɛ lakoka pomana la so. La kanyi shɔ l’ɔtɛ, apandjudi amɔtshi wakasambisha dimɛna lo waa bilɔ y’adɔkɔtɛlɛ, lo waa pitadi, lo waa mvudu y’ase kɛtshi, lɛnɛ akahɛwɔ amɛnyi fɔnu pɔsɔ yawɔ, la lo ahole akina watanema ase pâ. Ndo nto, apandjudi wakasambisha wanɛ wasondja abaya w’edo kana wenda akambo w’okundelo, adikitɛlɛ wa kalasa l’andaki, ndo toshushi. Lam’asawolayɛ l’ewandji ɛmɔtshi wa lɛɛta, sunganaka wɛ mbawandola dikambo di’elimu w’ɔlɔlɔ wakambawɔ dikambo di’anto. Onga la dilɛmiyɛlɔ ndo sɔna asawo wêke ka tomba wendana l’elimu wakambawɔ ndo ekakatanu wahomana lawɔ l’elimu akɔ.
4 Oko ɛnyɛlɔ, kadiyɛso kɛmɔtshi akayalɔngɔsɔla dia sambisha shushi mɔtshi lo bilɔ kande. L’ɔkɔngɔ wa vɔ sawola dimɛna efula, shushi nde la kadiyɛso ate: “Wɛ mbeyaka dikambo diangɛnangɛnami le Ɛmɛnyi wa Jehowa? Vɔ wekɔ l’awui w’eshika wayelawɔ, ndo vɔ kukutɛka awui akɔ wolo.” Onto ɔsɔ la lokumu akasambishama dimɛna efula.
5 Hatokoke mbeya kɛnɛ kakana anto l’etema. Koko, lo sawola l’onto tshɛ lahomana la so, sho mɛnyaka mbetawɔ kaso l’akoka wele la Nzambi wa nɔmbɔla olimu aso. Lâdiko dia lâsɔ, dikambo sɔ mbishaka anto diaaso dia vɔ mboka ndo mbetawɔ losango lasha elongamelo latatawaɛmbɛ. (1 Tim. 2:3, 4) Nyɛsɔ tokambe dimɛna la wenya aso ndo totshe tshɛ dia mbokoya Jehowa lo woho wende kema la shɔnɔdi lo sambishaka anto tshɛ wakoka pomana laso lokumu l’ɔlɔlɔ.—Romo 2:11; Ef. 5:1, 2.