Ayoyotɛ onto lahetawɔ ɔnɛ Nzambi ekɔ na?
1 Prɔfɛsɛrɛ kɛmɔtshi k’Ose Pologne akatɛ kadiyɛso kɛmɔtshi kele misiɔnɛrɛ l’Afrika ate: “Dimi haletawɔ ɔnɛ Nzambi ekɔ.” Koko kadiyɛsɔ akayokoka sawola la mama kɛsɔ ndo akawosha dibuku La vie: comment est-elle apparue? Évolution ou création? Lam’akatshu misiɔnɛrɛ ɔsɔ nto le prɔfɛsɛrɛ kakɔ lomingu lakahɔna, prɔfɛsɛrɛ akawotɛ ate: “Dimi lêtawɔ nte Nzambi ekɔ.” L’ɔkɔngɔ wa nde shidiya mbadia dibuku di’otondo dia Création nde akalɔmbɛ dia vɔ tatɛ mbeka la nde Bible. Akokayɛ ntsha dia wɛ mbeya sambisha anto wata ɔnɛ vɔ hawetawɔ Nzambi na? Ntondotondo, tokenda ɛkɔkɔ wotshikitanyi wahetawɔ anto dikambo sɔ.
2 Awui wakonya anto dia mbuta ɔnɛ Nzambi kema: Aha anto tshɛ wahetawɔ ɔnɛ Nzambi ekɔ ɛlɔ kɛnɛ mbakole la kanyi shɔ. Efula kawɔ waki l’ɛtɛmwɛlɔ ɛmɔtshi ndo l’etena kɛmɔtshi waketawɔka ɔnɛ Nzambi ekɔ. Koko, l’ɔtɛ w’ekakatanu kana hemɔ ya wolo, ekakatanu wa lo nkumbo kana wɛngiya ɛmɔtshi wakahomana lawɔ akayɔ̂ladiaka mbetawɔ k’anto asɔ. Le akina, akambo wakawetshama lo kalasa y’adidi akayongaka la shɛngiya ya kɔlɔ lo yoho yakawɔsaka Nzambi. Tênde bɛnyɛlɔ diayela nɛ di’anto waki kombetawɔka ɔnɛ Nzambi ekɔ, koko aha la nongamɛ, wakayongaka la mbetawɔ ka wolo le Jehowa Nzambi ndo wakayokomaka Ɛmɛnyi ande.
3 Womoto ɔmɔtshi la l’osomba wa Paris akotɔ la hemɔ ka weka wɔdu wɔdu. Kânga mbakandabatizama laka Mupɛ, nde akayaɔshi ndamɛ oko onto lahetawɔ ɔnɛ Nzambi ekɔ. Lam’akandambola waa masɛlɛ ɔnɛ bonde kaketawɔ Nzambi dimi mbotɔ l’ɛkɔmɔ ka nganɛ, vɔ wakôkadimola ɔnɛ: “Dikambo nde kolangaka.” Nde akatone okadimwelo ɔsɔ wahokɛ l’atui. Tɔ̂shi nto ɛnyɛlɔ k’ɔlɔngɔlɔngɔ ɔmɔtshi w’Ose Finlande waki la hemɔ kɛmɔtshi ka l’eshisha ndo akɛngɔlaka paka lo pusupusu. Nyango akatshu la nde le pasitɛlɛ kɛmɔtshi k’Ose Asɔnyi kakasɛmaka dia nde kɔnɔlaka anto. Koko pasitɛlɛ kakɔ akahekɔ mbɔkɔnɔla. Oma lɔkɔ, ɔlɔngɔlɔngɔ ɔsɔ kondjoyasha nto kânga yema le Nzambi ndo akayokitɛka lo mbuta ɔnɛ Nzambi kema.
4 Pami kɛmɔtshi ka lo wodja wa Honduras akole l’ɔtɛmwɛlɔ w’aseka Mupɛ koko akayekaka Philosophie socialiste la wetshelo w’ɔnɛ Nzambi kema. Wetshelo ɔsɔ wakandalongola lo kalasa y’adidi akayowetawoyaka ɔnɛ anto wakahilɔ lohilɔ koko vo kotongama, ndo nde kondjonga la mbetawɔ nto le Nzambi. Yoho yakɔ yâmɛ, mama kɛmɔtshi ka l’États-Unis akole l’ɔtɛmwɛlɔ w’ase Asɔnyi. Lam’akinde lo kalasa k’adidi, nde akayele Psychologie, mbut’ate wekelo wa yimba y’onto. Shɛngiya yakɔna yakayongaka la wekelo ɔsɔ lo mbetawɔ kande na? Nde akate ate: “Oma lo Ngɔndɔ ka Samalo polo ka Divwa, wekelo ami wa Psychologie akashishɛ mbetawɔ tshɛ kaki lami lo ɔtɛmwɛlɔ.”
5 Nanda etema w’anto w’ɔlɔlɔ: Anto efula wata ɔnɛ vɔ hawetawɔ ɔnɛ Nzambi ekɔ wayɔngɛnangɛna mbeya dia kana ekakatanu wa lo demba, wa lo nkumbo, wɛngiya, ndo akambo akina wa kɔlɔ wayoshila. Vɔ nyangaka l’otema ɔtɔi ekadimwelo wa wembola wele oko wɛnɛ: ‘Bonde kele akambo wa kɔlɔ?’ ‘Lande na kele akambo wa kɔlɔ komɛka anto w’ɔlɔlɔ?’ ndo ‘Lande na kasɛnaso na?’
6 Wadi l’omi amɔtshi wodjashi la Suisse wakodiama le anto wahetawɔ ɔnɛ Nzamabi ekɔ. Mbala ka ntondo kakawoke akambo wa mɛtɛ, vɔ kombaetawɔ. Koko vɔ waki l’ekakatanu wa wolo efula lo nkumbo kawɔ ndo wakayangaka ndjaka diwala diawɔ. Lam’akatshu Ɛmɛnyi wa Jehowa mbala kekina dia towaenda, vɔ wakɛnya nkumbo kɛsɔ woho wa kandola ekakatanu wakiwɔ l’ekimanyielo ka Bible. Wadi l’omi asɔ wakambe heyama lo menda alako w’eshika wele l’Afundelo, ndo vɔ waketawɔ mbeka Bible. Diwala diawɔ diakayongaka nge, vɔ wakayohamaka lo nyuma, ndo wakayobatizamaka.
7 Kɛnɛ kakokayɛ mbutɛ onto lahetawɔ ɔnɛ Nzambi ekɔ: Naka onto ambokotɛ dia nde hetawɔ ɔnɛ Nzambi ekɔ, ntsha tshɛ dia mbeya lande na katande ngasɔ. Onde ekɔ l’ɔtɛ wa kalasa kakandɔtɔ, ekakatanu wakahomana lande, kana oma lo woho wele ase ɛtɛmwɛlɔ dungi pende ko kana oma lo wetshelo wa kashi wakandalongola? Wɛ kokaka mombola ɔnɛ: “Onde wɛ oketawɔka nshi tshɛ ɔnɛ Nzambi kema?” kana ɔnɛ: “Ko lande na kamboyokoma lo mbuta ɔnɛ Nzambi kema na?” Okadimwelo ande ayokokimanyiya dia wɛ mbeya kɛnɛ ka wɛ mbuta. Lɛnɛ akokayɛ tana tokanyi t’eshika ele lo dibuku Y a-t-il un Créateur qui se souci de vous?
8 Wɛ kokaka tetemala sawola l’onto lahetawɔ ɔnɛ Nzambi ekɔ lo mbuta ɔnɛ:
◼ “Onde wɛ atayambolaka ɔnɛ: ‘Naka Nzambi ekɔ, lande na kele asui la wɛngiya efula nganɛ l’andja ɔnɛ?’ [Tshikande akadimole.] Onde dimi kokoka kɛnya kanyi ya Bible lo dikambo sɔ?” Adia Jeremiya 10:23. L’ɔkɔngɔ wa wɛ mbadia mbolande kanyi yande lo kɛnɛ kendana la divɛsa sɔ. L’ɔkɔngɔ diko ko wɛ mbɛnya lɛkɛ 16 la 17 la biukubuku Connaîtrons-nous un jour un monde sans guerre ? Wɛ kokaka kamba kânga la tshapita ya 10 ya dibuku Créateur. Lɔmbande etawɔ dibuku sɔ ndo adia akambo wele lɔkɔ.—Dia wɛ kondja tokanyi tokina, enda lo dibuku Comment raisonner, lɛkɛ 111-112.
9 Lo mbuta mɛtɛ, aha wanɛ tshɛ wata ɔnɛ Nzambi bu mbayetawɔ akambo wa mɛtɛ. Koko, efula mbetawɔka tokanyi tokina lo kɛnɛ kendana la dikambo sɔ. Kamba l’ekanelo k’ɔlɔlɔ ka yimba ndo la yeewo ya mbetawoya onto, ndo lâdiko di’akambo asɔ tshɛ, kamba la nkudu kele l’Ɔtɛkɛta waki Nzambi dia mbakimanyiya dia vɔ mbetawɔ akambo wa mɛtɛ.—Etsha 28:23, 24; Heb. 4:12.